დუდი 12
ღორონთიშ მოსაწონო ცხოვრება
-
მუჭო შეილებ ღორონთიშ მეგობარქ იჸუე?
-
მუჭო გოხუ სატანაშ წუმოჭკირილ საკითხ პირადო სი?
-
მუს ვეწონუანს იეჰოვა?
-
მუჭო შეილებ იცხოვრე ღორონთიშ მოსაწონო?
1, 2. მი გიშაგორ იეჰოვაქ მუშ მეგობარო?
მუნერ კოჩწკუმა იმეგობრენდი? ალბათ პატიოსან დო გურალალ, სქან აზრიშ, ინტერესეფიშ დო ფასეულობეფიშ კოჩის დეკინენდ მეგობარო.
2 ბიბლიურ ისტორიას ქიგნაჯინექ-და ქოძირუნქ, ნამდა იეჰოვა კათას მუშ მეგობარო გიშაგორუნდ. მაგალთო, იეჰოვაქ აბრაამს მეგობარ დუძახ (წეკითხი ესაია 41:8; იაკობი 2:23). ღორონთიქ დავით მუშ გურიშ ოსხუნურო მიშინუ, მუშენდა თინა თიშო მოსაწონ რდუ (საქმეები 13:22). წინასწარმარაგადე დანიელ ხოლო ძვირფას რდუ იეჰოვაშო (დანიელი 9:23).
3. მუშენ მიორჩქუდ იეჰოვას ნამთინე კოჩ მუშ მეგობარო?
3 მუშენ რდეს აბრაამ, დანიელ დო დავით იეჰოვაშ მეგობრეფი? ღორონთიქ აბრაამს უწუ: „სი მირჩქილე ჩქიმ ხონარი“ (დაბადება 22:18). თავრეშე იძირე, ნამდა იეჰოვა თინეფიშ ხოლოს იჸუაფ, მით თანდაბალო მეჸუნს თიშ სიტყვეფს. „ქუდუჯერით ჩქიმ ხონარს, — უწუ თიქ ისრაელეფს დო მა იპჸიქ თქვან ღორონთი, დო თქვა ჩქიმ ხალხი იჸით“ (იერემია 7:23). იეჰოვას ქოუჯერქ-და, სი ხოლო შეილებ იჸუე თიშ მეგობარქ!
იეჰოვა მუშ მეგობრეფს ელურე
4, 5. მუჭო ელურე იეჰოვა მუშ მსახურეფს?
4 წერმიდგინ, მუს ნიშნენს ღორონთწკუმა მეგობრობა. მუჭოთ ბიბლიას ჭარუნ, იეჰოვა გორუნს საშვალებას, „ნამდა ქიმეხვარას თინეფს, მით მთელ გურით რე თიწკუმა“ (2 მატიანე 16:9). მუჭო შეულებ იეჰოვას სქან ელარინა? ართ-ართ საშუალებაშენ ფსალმუნიშ 32:8-ს ჭარ: „ინონჭაფაშ უნარს მერჩა დო გიგოწურუა შარას, ნამუსით ოკო გიაჸუნე; გიზუკოლუნქ დო თოლ სქანჸურე მაღვენუ“.
5 მუშმადიდა ჸოროფა დო ელარინა იძირე თე სიტყვეფშე! ქიგლართ სწორ შარათ-და, ღორონთი ხენჯღვერუას ვემგარკენს დო თოლს ვა ჩაითხინუანს სქან საჯგირობუოთ. ღორონთის ოკო მიგეხვარას, ნამდა გინარჯგინე განსაცდელეფს დო პრობლემეფს (წეკითხი ფსალმუნიშ 55:22). თეგვარო, იეჰოვას მთელ გურით ქემსახურებუქ-და, დარწმუნებულ რდა, ნამდა თინა ელაიდირთუ, მუჭოთ ფსალმუნმაბირექ თქუნ თეშ: „ირიათო თოლშა აწომრე იეჰოვა. ვედიფჩაკალუანქ, მუშენდა თინა ჩქიმ მორძგვიშე რე“ (ფსალმუნი 16:8; 63:8). ნამდვილო, იეჰოვა მიგეხვარებ იცხოვრე მუს ოკონ თეშ. მარა მუჭოთ გებგითინ, არსებენს ღორონთიშ ნტერ, ნამუთ ირნერო ოცადუ გლახა ქუმოიკინდუას.
სატანაქ ეჭვიშ თუდო გიორინუ ხალხიშ მოტივეფი
6. მუ ეკაბრალ სატანაქ ხალხის?
6 თე წიგნიშ მა-11 დუდის ენწყუმილ რდუ, მუჭო გიორინუ სატანაქ ეჭვიშ თუდო იეჰოვაშ უზენაესობა. თიქ ღორონთის ეკაბრალ, ნამდა უსამართლოთ მექცუ ადამ დო ევას დო ვემეჩ თიშ უფლება, მუნეფიშით გინოჭყვიდესკო, მუ რდუ ჯგირ დო მუ ფური. ადამ დო ევაქ შეცოდეს დო დედამიწას თინეფიშ გამნარყიქ გემრავლუნ თიშ უკულ, სატანა ირ კოჩიშ გურშენ იჩიებ, ნამდა თინეფ მანგიორშა ომსახურნა ღორონთის. თაშ გიშურს, ნამდა სატანა იჩიებ: „ხალხ ჸოროფათ ვამსახურ იეჰოვას. შემლებ, მიდგა თინა ვა რდას, დუპირისპირე ღორონთის“. ღორონთიშ ართ-ართ მსახურიშ იობიშ შემთხვევაშე იძირე, ნამდა სატანა ზუსტას თაშ ფიქრენდ. მი რდუ იობი დო მუჭო გიორინუ სატანაქ ეჭვიშ თუდო თიშ მოტივეფი?
7, 8. ა) მუთ ვა გუდ იობი თიმ დროშ ხალხის? ბ) მუჭო გინაშქუ სატანაქ ონირზებელო თინა, მუ მოტივით ომსახურუდ იობი ღორონთის?
7 იობი სოდგარენ 3 600 წანაშ წოხლე ცხოვრენდ. თინა ღორონთიერ კოჩ რდუ. იეჰოვაქ თიშ გურშენ თქუ: „მითინ ვა რე თიშნერ დედამიწას, უმკუწიკუ, მართალი, ღორონთიშ მოშიშ კოჩ რე თინა დო უბადობაშე შორს გერე“ (იობი 1:8). იობი ღორონთიშ მოსაწონო ცხოვრენდ.
8 სატანაქ ონირზებელო გინაშქუ თინა, მუ მოტივით ომსახურუდ იობი ღორონთის. თიქ იეჰოვას უწუ: „სი ვა თხილანქო თის [იობის], თიშ ჸუდეს დო ირფელს, მუთ უღუნ? სქანდე რე ხვამელ თიშ ხეშე გიშნაულა დო სი გამრავლი თიშ საქონელ ირ დიხას. აბა, მიდეღი სქან ხე დო ქიმკანჭ თიშ ქონებას, ქოძირუნქ პიჯის ვა დოიჭყ გორაფა-და“ (იობი 1:10, 11).
9. მუჭო უპასუხ იეჰოვაქ სატანაშ სიტყვეფს დო მუშენ?
9 თეშნერო სატანა აცხადენდ, ნამდა იობი ხვალე ჯგირობუაშ მიოღებელო ომსახურუდ ღორონთის. ეშმაკ თის ხოლო იჩიებუდ, ნამდა იობი პრობლემაშ წოხლე ქიგედირთუდ-და, ღორონთის დეპირისპირებუდ. მუჭო უპასუხ იეჰოვაქ სატანაშ სიტყვეფს? მუჟამს იობიშ მსახურებაშ მოტივქ საეჭოთ გინირთუნ, იეჰოვაქ სატანას ნება ქიმეჩუ, თინა გეგმუცადებუდკო. შედეგო, ირ კოჩ ქოძირუნდ, ნამდვილო ქოუჸორდ დო-ვარ იობის ღორონთი.
იობიშ გიმოცადუა
10. მუ განსაცდელეფიშ წოხლე გედირთ იობიქ დო მუნერ რეაქცია უღუდ თის?
10 სატანაქ იობი ბრელნერო გიმოცად. თის ბრელ საქონელ ჸუნდ, თავრეშე მინქ გუჭყორდ დო მინ ქიმიოხირეს. მოინალეფიშ უმენტაშ დუჸვილეს. თენა ირფელ დიდ ზარალ რდუ თიშო. თეშ უკულ ხოლო დიდ უბედრობებქ ქიგიანთხ დუდის, მუჟამს ქარბორიაშ დროს ვითხოლო სქუაქ დუღურ. მარა თეშ უმკუჯინუო „იობის ვეშუცოდებ, ღორონთიშ გურშენ მუთუნ გლხა ვეკოლაფუ“ (იობი 1:22).
11. ა) ხოლო მუ ბრალ წუმურინუ სატანაქ იობის დო მუნერ რდუ იეჰოვაშ პასუხი? ბ) მუჭო იმოქმედუ საცოდება ლახალაქ იობწკუმა?
11 სატანა იობის ქონებაშ, მოინალეეფიშ დო სქუალეფიშ დინაფაშ უკულ ხოლო ვა დათხიებ. სატანა ფიქრენდ, ნამდა იობი ქიდელახებუდ-და, დეპირისპირებუდ ღორონთის. იეჰოვაქ ნება ქიმეჩ სატანას თე მხარეთ ხოლო გეგმუცადებუდკო იობი დო თის საცოდება ლახალაქ ქაღოლუ. მარა იობის ვართ თე დროს მეუდინუაფ ღორონთიშ რწმენა. პირიქით, თიქ თქუ: „სოიშა ცოცხალ ვორექინ, უმკუწიკუო დოფსკიდუქ!“ (იობი 27:5).
ღორონთიქ დოხვამუ იობი ართგურობაშ გურშენ
12. მუჭო დამტკიცუ იობიქ მუშ ართგურობათ, ეშმაკი ტყურას იჩიებუდუნ?
12 იობის ვა უჩქუდ, ნამდა თე უბედრობეფი სატანაშე მიშუ. თის ვა უჩქუდ იეჰოვაშ უზენაესობაშ გურშენ ეშმაკიშ წუმოჭკირილ საკითხი დო ფიქრენდ, ნამდა ღორონთი გიმოცადუნდ (იობი 6:4; 16:11—14). მარა იობიქ იშენით ბოლოშა იეჰოვაშ ართგურო ქუდოსქიდ. მუშ ართგურობათ იობიქ დამტკიც, ნამდა ღორონთშე მანგიორს ვეთხინდუნ თეშ ომსახურუდ დო თეთ გეგმაარგამ, მუჭო სატანა ტყურას იჩიებუდ!
13. მუქ მაჸუნუ იობიშ ართგურობას?
13 იობიშ ართგურობა ობაღუდ თის, ნამდა იეჰოვას პასუხი ქიმუჩამუდკო სატანაშ შეურაცხყოფაშ მიმარინაფალ ბრალდებეფშა. იობი მართალო იეჰოვაშ მეგობარ რდუ დო იეჰოვაქ დოხვამუ თინა ართგურობაშ გურშენ (იობი 42:12—17).
სი მუჭო გოხუ თე საკითხი?
14, 15. მუშენ ირაგადე, ნამდა სატანაშ წიმორინაფილ ბრალდებეფი ხვალე იობის ვარინ, არძას ოხუ?
14 სატანაშ წუმოჭკირილ ართგურობაშ საკითხი ხვალე იობის ვახუდ. თინა სი ხოლო გოხუ. თეს ვორწყეთ იგავეფიშ 27:11-შე, სოდეთ იეჰოვა იჩიებ: „სქუა, რდა ბრძენი დო გურ გამხარი, ნამდა პასუხი ქიმეფჩე ჩქიმ გიმაძიცალს“. თე სიტყვეფი, ნამუთ იობიშ ღურაშე საუკუნეეფიშ უკულ იჭარუნ, მოძირანა, ნამდა სატანას ვემუტებ ღორონთიშ გეძიცა დო თიშ მსახურეფშა ტყურაშ ეკობრალება. ათეშენ, ღორონთიშ მოსაწონო ქოფცხოვრენთ-და, ჩქინ წილ მიშამღუნა თიშა, ნამდა პასუხიქ ქიმიაჩას სატანაშ ტყურა ბრალდებეფს. თეთ გურს უხარენთ იეჰოვას. მუჭო მოქმედენს თეშ რჩქინა სქანწკუმა? ცხოვრებაქ ოთირალქ მაჸუანინ ხოლო, თენა ღირ თიშა, ნამდა ეშმაკიშ ტყურას ჩქინ წილ პასუხ ქიმეფჩათინ.
15 ჸუჯ ქათხი სატანაშ სიტყვეფს: „სიცოცხლეშ გურშენ ირფელს ქიმეჩანს კოჩი“ (იობი 2:4). სიტყვა „კოჩიშ“ გიმორინაფათ სატანაქ ოძირუ, ნამდა თიშ ბრალდება ხვალე იობის ვარინ, არძას ოხუდ. თენა მართალო გურიშგაჩამალ რე. სატანაქ ეჭვიშ თუდო სქან ართგურობა ხოლო გიორინუ. ეშმაკის ოკო, ნამდა ვა დუჯერე ღორონთის დო მიოტუე სიმართლეშ შარათ გილულა პრობლემეფიშ დროს. მუჭო ოცად სატანა თე მიზანს ქიმიოჭირინუასი?
16. ა) მუ მეთოდეფით ოცად სატანა, გემკაჸათას ხალხი ღორონთის? ბ) მუჭო შილებე ეშმაკიქ თე მეთოდეფ სქან წინააღმდეგ გეგმირინუას?
16 მუჭოთ მა-10 დუდშე გებგითინ, სატანა შხვადოშხვა მეთოდით ოცად ხალხიშ ღორონთშე მიკოჸოთამას. მინშა თინა არგამათ გეიაძირუ კოჩის „მუჭოთ მაღირთალ ლომი დო გორუნს, მი გინორყინტას“ (1 პეტრე 5:8). სატანაშ გავლენა შილებე იძირედას, მუჟამს მეგობრეფი, ნათესეფ ვარდა შხვეფ გოწინააღმდეგნა დო ოცადნა, გეცილან ბიბლიაშ გურაფას დო ნაგურეფუშ ცხოვრებას გიმორინაფას * (იოანე 15:19, 20). მინშა სატანა „სინათეშ ანგელოზიშ სახეს ღებულენს“ (2 კორინთელები 11:14). სატანას შეულებ ვა გოგინაფუასინ თეშ იმოქმედას სქანწკუმა დო გამგკოჸოთას ღორონთის. ეშმაკის შეულებ გურ გომტახან დო მოფიქრებაფუან, ნამდა ვა ვორეთ ღორონთიშ მსახურებაშ ღირსი (იგავები 24:10). ვა უღუ მნიშვნელობა, ეშმაკი „მაღირთალ ლომცალო“ მოქმედენს, დო-ვარ „სინათეშ ანგელოზიშ სახეს ღებულენს“. თინა იჩიებ, ნამდა პრობლემეფიშ დროს სი მიოტენქ ღორონთიშ მსახურებას. მუჭო შეილებ ქუპასუხე სატანაშ ბრალდებას დო დამტკიცე, ნამდა იობცალო სი ხოლო ართგურ რექ?
იეჰოვაშ მცნებეფიშ დაცვება
17. მუშენ ოკო იფცვენდათ ღორონთიშ მცნებეფს?
17 სატანაშ ბრალდებას პასუხის ქიმეჩანქ, ღორონთიშ მოსაწანო ქიცხოვრენქ-და. მუ რე თეშ გურშენ საჭირო? ბიბლია მირაგადნა: „გიჸორდას იეჰოვა, სქან ღორონთი, მთელ გურით, მთელ შურით დო მთელ ძალათ“ (კანონი 6:5). მუთ უმოსო გეჸოროფებუ ღორონთინ, თით უმოსო გაკორინედას იჸი, აკეთე თინა, მუდგას ღორონთი ითხინს სქანდე. მოციქულ იოანექ ჭარუ: „ღორონთიშ ჸოროფა თინა რე, ნამდა იფცვენდათ თიშ მცნებეფს“. მთელ გურით ქოიჸორს ღორონთი-და, ქოძირუნქ, ნამდა „თიშ მცნებეფ დუმამონკებელ ვა რე“ (1 იოანე 5:3).
18, 19. ა) მუს ითხინს იეჰოვა ჩქინდე? (ქოძირით ჩარჩო „ ვაკეთა თინა, მუთ იეჰოვას ჯოგუ“) ბ) სოვრეშე მიჩქნა, ნამდა იეჰოვა დღას ვა მოფთხინა, შემლებნა თიშ უმოსის?
18 მუს ითხინს იეჰოვა ჩქინდე? მუდგას თინა ითხინსინ თევრეშე იძირე, მუს ოკო ავარიდათ დუდ ცხოვრებას. მაგალთო, ყურადღება ქიმიაქცი 122 გვერდის მოჩამილ ჩარჩოს, „ ვაკეთა თინა, მუთ იეჰოვას ჯოგუ“. თექ მოჩამილ რე, მუ ჯოგუ იეჰოვას. შილებე დუდშე მუთუნ გლახათ ვემირჩქინე თე ჩარჩოს მოჩამილ ნამთინე საქმე. მარა, მუჟამს დეფიქრებუქ ბიბლიურ მუხლეფშენ, ქოძირუნქ, მუდგას იეჰოვა ითხინსინ თინა, მართალო ჭკვერულ რე. ცხოვრებაშ თირუა შილებე ადვილ ვა რდას, მარა ღორონთიშ მოსაწონო ცხოვრებას დიდ კმაყოფილება დო ბედნერება მოჸუნს (ესაია 48:17, 18). სი ხოლო შეილებ თეს მიოჭირინუე. სოვრეშე მიჩქნა თენა?
19 იეჰოვა დღას ვემითხინს ჩქინდე, შემლებუნა თიშე უმოსის (წეკითხი კანონიშ 30:11—14). თის ჩქინდე უჯგუშო უჩქ, მუ შემლებნა სინამდვილეს დო მუ — ვარ (ფსალმუნი 103:14). იეჰოვა მუდგას ითხინსინ თიშ შესრულებას, კინ მუ მოხვარნა. მოციქულ პავლექ ჭარ: „ღორონთი ართგურ რე დო ვა დუშვენს თიცალ ცდუნებას, ნამუთ თქვა შეილებნან თიშე უმოს რე დო საშველს ხოლო ქიმერჩანა, ნამდა ქიმითვინათ“ (1 კორინთელები 10:13). თეშ გარდა, იეჰოვას შეულებ მერჩას „ძალა, ნამუთ ჩვეულებრივშე უმოს რე“ (2 კორინთელები 4:7). ბრელ განსაცდელიშ უკულ პავლექ თქუ: „ირფელიშ ძალა მიღუ ჩქიმ გუმამანგარებელიშ ჭყოლოფუათ“ (ფილიპელები 4:13).
ქიმიჩ ღორონთიშ მოსაწონ თვისებეფი
20. მუ თვისებეფ ოკო მიბჩათ დო მუშენ რე თენა მნიშვნელოვანი?
20 ღორონთიშ მოსაწონო ქიფცხოვრათ თიშენ, დასაბაღ ვარე, ხვალე ვა ვაკეთათ თინა, მუთ იეჰოვას ჯოგუ. სი ოკო ქიჸოროფუე თინა, მუთ ღორონთის უჸორს (რომაელები 12:9). ხოლოს ვეჸიდიო სი გიღუნ თინერ აზრიშ, ინტერესეფიშ დო ფასეულობეფიშ ხალხწკუმა? ქუგოკო იეჰოვაქ დეგეახლოვას-და, ოკო ქიჸოროფუე თინა, მუთ თიშო რე ძვირფას. თინა, მუდგას იეჰოვა აფასენსინ, ეჭარილ რე ფსალმუნიშ მა-15 დუდის. თავრეშე ბგებულენთ, მის თვალუნს იეჰოვა მუშ მეგობარო (წეკითხი ფსალმუნი 15:1—5). იეჰოვაშ მეგობრეფ გიმირჩქინანა, ბიბლიურ ნინათ ქოფთქუათი, „შურიშ ნაყოფის“. თიშა მიშურს თიცალ თვისებეფ, მუნერით რე: „ჸოროფა, ხიოლი, მშვიდობა, მოთვინება, ჯგირობუა, სიჯგირე, რწმენა, ლიბ ხასიათ, დუდშეკება“ (გალატელები 5:22, 23).
21. მუ მიგეხვარებ ღორონთიშ მოსაწონ თვისებეფ ქიმიჩენ?
21 ღორონთიშ მოსაწონ თვისებეფ ქიმიჩენ, მიგეხვარებ ბიბლიაშ რეგულარულო კითხირ დო გურაფა. ღორონთიშ მოთხოვნეფიშ გურშენ მეტიშ გაგება მიგეხვარებ, სქან აზროვნება ღორონთიშ აზროვნებას ქუდუჸუნუე (ესაია 30:20, 21). მუთ უმოსო გეჸოროფებუ იეჰოვა, თით უმოსო გოკოდას იჸი თიშ მოსაწონო ცხოვრება.
22. მუს მიოჭირინუანქ ღორონთიშ მოსაწონო ქიცხოვრენქ-და?
22 იეჰოვაშ მოსაწონ ცხოვრება დიდ მონდომას ითხინს. ბიბლია მოქარგილ ნინათ იჩიებ, ნამდა ცხოვრებაშ თირუა ჯვეშ პიროვნებაშ მიკონწყუმა დო ახალ პიროვნებაშ მიკოქუნას ნიშნენს (კოლოსელები 3:9, 10). იეჰოვაშ მცნებეფშენ ფსალმუნმაბირექ ჭარ: „დიდ რე ჯილდო თინეფიშ დაცვებაშენ“ (ფსალმუნი 19:11). ღორონთიშ მოსაწონო ქიცხოვრენქ-და, სქან თოლო ძირუნქ, ნამდა თენა მართალო თაშ რე. თეწკუმა ართო, პასუხის ქიმეჩანქ სატანაშ ბრალდებას დო გურს გაუხარენქ იეჰოვას!
^ აბზ. 16 თენა თის ვა ნიშნენს, ნამდა მიდგა გოწინააღმდეგუნ თის სატანა მართუნს. მარა სატანა თე ქიანაშ ღორონთი რე დო მთელ ქიანა თიშ ხეს რე (2 კორინთელები 4:4; 1 იოანე 5:19). თავრეშე იძირე, ნამდა ღორონთიშ მოსაწონო ქიცხოვრენქ-და, თენა ბრელს გურშა ვეგიახანტუ დო ნამთინე წინააღმდეგობას გაიწიენს.
