ბიბლიაშ მთავარი სწავლებეფიშ განხილვაქ, ალბათ, იეჰოვა უმოსო ქოიჸოროფუეს. მარა თე გრძნობა ირიათო ოკო განავითარათ (1 პეტრე 2:2). მარადიული სიცოცხლე დამოკიდებული რე თიშა, მუჭო გაგრძელენთ ღორონთწკუმა დაახლოებას მუშ სიტყვაშ გურაფაშ მეშვეობით. წეკითხით იოანეშ 17:3; იუდაშ 21.

მუთ უმოსის გეგენთ ღორონთიშ გურშენი, თით უმოსო გეგემანგარებუნა რწმენა. რწმენა დეგეხმარებუნა ღორონთიშ მოსაწონო იცხოვრათ (ებრაელები 11:1, 6). თენა ცოდვეფიშ მონანიება დო ცხოვრებაშ თირუაშე ხოლო გიბიძგენა. წეკითხით საქმეეფიშ 3:19.

ალბათ გოკონა შხვეფს ხოლო გინოჩათ თინა, მუთ დიგურეთ. მის ვასიამოვნუ ჯგირი დო სახიოლო ამბეშენი რაგადი?! ბიბლიაშ გურაფა გაგრძელითდა, ქიგეგენთ, მუჭო აუხსნათ შხვეფს თქვანი რწმენა დო ეჩუათ სახიოლო ამბე. წეკითხით რომაელეფიშ 10:13—15.

ბრელქ სიხიოლო ამბე პირველო მუში მეგობრეფს დო ნათესეფს გაგებაფუ. ათე დროს ტაქტიანობა რე საჭირო. დღას ვაუწუათ, თქვანი რელიგია არასწორი რენშო, უჯგუშ იჸუაფუ, ქეჩუათ ღორონთიშ დანაპირეფშენ. ირო რშუდან, ადამიანეფი თქვანი რაგადიშ უმოსო, თქვანი საქციელს აქციენა ყურადღებას. წეკითხით 2 ტიმოთეშ 2:24, 25.

ღორონთიშ სიტყვაშ გურაფა მიგეხვარებუნა სულიერი წიმიულას. დო ბოლოს, იეჰოვაწკუმა ჯგირი ურთიერთობა გაღვენუნა დო თიშ დიდი ოჯახიშ წევრო გინირთუთ. წეკითხით 2 კორინთელეფიშ 6:18.

სულიერი წარმატებეფს თი შემთხვევას გაკეთენთ, მუჟამს ღორონთიშ სიტყვაშ გურაფას გაგრძელენთ (ებრაელები 5:13, 14). ქოთხით იეჰოვაშ ართ-ართი მოწმეს, ქიმგეხვარან ბიბლიაშ გურაფას წიგნით „რას გვასწავლის ბიბლია სინამდვილეში?“. მუთ უმოსის დიგურუანთ ბიბლიაშე, თით უმოსო წარმატებული იჸუაფუ თქვანი ცხოვრება. წეკითხით ფსალმუნიშ 1:1—3; 73:27, 28.

სახიოლო ამბე ბედნერ ღორონთი, იეჰოვაშე მოურს. ღორონთიშ ხალხის დეახლოებუთდა, ღორონთის ხოლო დეახლოებუთ (ებრაელები 10:24, 25). ეცადით, ირიათო ასიამოვნათ ღორონთის დო იცხოვრენთ მარადიულო. ღორონთიწკუმა დაახლოება, მართალო, არძაშ უჯგუში გინოჭყვადილი საქმე რე ცხოვრებას. წეკითხით 1 ტიმოთეშ 1:11; 6:19.