1, 2. მუშენ რე მნიშვნელოვან ხემძღვანელობა, მუჟამსით უჩინებ ადგილს რექ? მუნერ ხემძღვანელობა მუჩეს იეჰოვაქ?

წერმიდგინ, მეურქ უდაბნოს, ნამდგაშა თოლ ვეჭირინე. მანგარ ბორია ქვიშას თევრე-თავრე მიკარღვანს დო თექიანობას ფორმას ირ წუთის უთირანს. შილებე ადვილო მედინე. მუჭო ოკო მეხვადე, სოვრე გაფჷ ოულარ? თეცალ დროს მიგეხვარებ კომპას, ჩხანა, მურიცხეფ, ადგილმდებარეობაშ მაძირაფალ სისტემა (GPS) ვარდა თიცალ კოჩ, მიდგას ჯგირო უჩქჷ უდაბნოშ შარეფ. ხემძღვანელობა  მნიშვნელოვან რე, მუშენდა, მუჟამსით გიჩქჷ, სოვრე იდე, თეს სქან სიცოცხლეშ რსხება შეულებ.

² ამდღა ბრელ პრობლემას შეფხვადუთ, ათეშენ მინშა შილებე ვამჩქუდან, მუჭო მიფქცუათ. მარა იეჰოვაქ არძას მუჩეს სინდის, ნამდგას შეულებ ჩქინ ხემძღვანელობა (იაკობი 1:17). მორთ ქიგებგათ, მუ რე სინდის დო მუჭო შეულებ თის ჩქინ მოხვარა. თეწკუმა ართო გუვარჩუათ, მუჭო გოფწაფათ ჩქინ სინდის, მუშენ ოკო გეფთვალისწინათ შხვეფიშ სინდის დო მუჭო შეულებ სუფთა სინდისის ჩქინ ცხოვრებაშ გაუჯგუშება.

3. მუ რე სინდის?

³ სინდის ძვირფას საჩუქარ რე იეჰოვაშე. თენა რე უნარ, ნამუთ ჯგირ დო ფურიშ გარჩიებას მოხვარნა. ბიბლიას გიმორნაფილ ბერძნულ სიტყვა, ნამუთ ითარგმნუ, მუჭოთ სინდის, ნიშნენს, „იჩინენდე სქან დუც“. მუჟამსით ჩქინ სინდის სწორას მუშენს, თინა მოხვარნა, ქიგებგათ, სინამდვილეს მუნერ პიროვნებეფ ვორეთ, ალალას შევაფასათ ჩქინ ფიქრეფ დო გრძნობეფ, ვაკეთათ ჯგირ დო დუდ ევუჩილითუათ გლახას. არასწორო იფქციებუთინ, სინდის მაწუხენა, მარა მუჟამსით სწორ გადაწყვეტილებეფს ბღებულენთ, ბედნერო ბგინაფლენთ დუც (ქოძირ დანართ 5).

4, 5. ა) მუ შედეგიქ მაჸუნ, მუჟამსით ადამ დო ევაქ ვა მურჩქილეს სინდისიშ ხუმას? ბ) ქიმიჸონ ბიბლიურ მაგალითეფ, მუჭო მოქმედენს სინდის.

⁴ არძას შეულებ გინოჭყვიდას, მურჩქილუანს დო ვარ მუშ სინდისიშ ხუმას. ადამ დო ევაქ ვა მურჩქილეს თის დო შედეგო შეცოდეს. თეშ უკულ თინეფ სინდისიქ  შეაწუხ, მარა უკვე გვიან რდუ, მუშენდა გინორთელ აფდეს ღორონთიშ კანონშა (დაბადება 3:7, 8). თინეფს სრულყოფილ სინდის უღდეს დო უჩქუდეს, ნამდა ღორონთიშ დაუმორჩილებლობას გლახა შედეგეფ მაჸუნუდ, მარა იშენით გინოჭყვიდეს, ვა მურჩქილუაფდესკო მუნეფიშ სინდისიშ ხუმაშა.

⁵ ადამ დო ევაშ გინაწონს ბრელ, მით არასრულყოფილ რდუ, ურჩქილედ მუშ სინდისიშ ხუმას. თეშ ჯგირ მაგალით რე იობი. თინა სწორას იქციებუდ დო ათეშენ შეულებუდ თქუკო თეცალ სიტყვეფ: „ონდო ცოცხალ ვორექ, ჩქიმ გურ ბრალს ვეგებდვანს“ (იობი 27:6). მუჟამსით იობიქ მიშინუ „გურ“, თინა გულისხმენდჷ მუშ სინდისის, შხვა სიტყვეფით ქოფთქუათინ, ჯგირ დო ფურიშ გარჩიებაშ უნარს. იობიშ გინაწონს დავითიქ ვა მურჩქილუ მუშ სინდისიშ ხუმას დო ვედემორჩილ იეჰოვას. თეშ უკულ დავითის დანაშაულიშ გრძნობა თიშმანწარათ აწუხენდჷ, ნამდა მუშ გურ „ბრალს გედვანდჷ“ (1 სამუელი 24:5). სინდისიქ ქუგახვამილუ თინა, ნამდა არასწორო მიქცუ დო ქიმეხვარ ჯვეშ შეცდომეფ კინ ვა დუშვებუდკო.

6. სოვრეშე იძირე, ნამდა ღორონთიქ არძას მეჩჷ სინდის?

⁶ თინეფს ხოლო, მით იეჰოვას ვეჩინენს, არჩქილე, მუ რე ჯგირ დო ფურ. ბიბლია იჩიებ: „მუნეფიშ აზრეფ მინშა ბრალს გედვანა დო მინშა ამართლენა“ (რომაელები 2:14, 15). მაგალთო, ბრელს არჩქილე, ნამდა გლახა რე ჸვილუა დო ხირუა. თინეფ გაუაზრებელო ურჩქილენა იეჰოვაშე მეჩამილ სინდისიშ ხუმას დო მეჸუნა პრინციპეფს, ნამუთ ღორონთიქ მუჩეს საკითხეფიშ სწორას გინაჭყვიდირალო.

7. მუშენ შილებე ჩქინ სინდისიქ მინშა მიმოჩილითუან?

 ⁷ მარა მინშა შილებე სინდისიქ მიმოჩილითუან. მაგალთო, ჩქინ არასწორ ფიქრეფს დო გრძნობეფს შეულებ გლახა შარას ქიგმორინუან. სინდის, ნამუთ სწორ მიმართულებას მოძირანა, მუშით ვევითარებ (დაბადება 39:1, 2, 7—12). თის გოწაფუა ოსაჭირ. თეშო იეჰოვა მუშ წმინდა შურს დო ბიბლიურ პრინციპეფს მარზენა (რომაელები 9:1). მორთ ქობძირათ, მუჭო შემლებნა გოფწაფათ ჩქინ სინდის.

8. ა) მუჭო შეულებ ჩქინ გრძნობეფს გილამლუან სინდის? ბ) მუ ოკო ბკითხათ ჩქინ დუც, ონდო მუთუნს გინობჭყვიდუნდათ?

⁸ ნამთინეშ აზრით, სინდისიშ ხუმაშ მორჩქილაფა ნიშნენს, აკეთე თინა, მუდგას სქან გურ გირაგად. თინეფ ფიქრენა, ნამდა შეულებნა აკეთან ირფელ, მუთ მუნეფიშ გურს ოჰამ. მარა არასრულყოფილებაშ გურშენ შილებე ჩქინ გრძნობეფქ ადვილო მიმოჩილითუან. გრძნობეფს თიშმადიდა ძალა უღჷ, ნამდა შილებე სინდის გილამლუან. ბიბლია იჩიებ: „გურ არძაშ უმოს უდუნდებელ დო დაუმორჩილებელ რე. მის შეულებ თიშ ინონჭაფა?!“ (იერემია 17:9). ათეშენ შილებე ჯგირო მიფრჩქინათ თინა, მუთ გლახა რე. მაგალთო, პავლე სოიშახ ქრისტიანო გინირთუდ, ღორონთიშ ხალხის თხოზუდ. თინა ფიქრენდჷ, ნამდა სწორას იქციებუდ დო სინდის შურო ვა წუხენდჷ, მარა უმოს გვიანო თქუ: „იეჰოვა განმსაჯენს“ (1 კორინთელები 4:4; საქმეები 23:1; 2 ტიმოთე 1:3). მუჟამსით პავლექ ქიგეგ, მუს ფიქრენდჷ იეჰოვა მუშ საქციელშე, ქიმეხვად, ნამდა მნიშვნელოვან რდუ დითირკო დო მუშ  დუც ღორონთიშ თოლით უჯინკო. ჩქი ხოლო, სოიშახ მუთუნს ვაკეთენდათ, ჩქინ დუც ოკო ბკითხათ: „მუშ კეთებას ელჷ იეჰოვა ჩქიმდე?“.

9. მუს ნიშნენს ღორონთიშ შიშ?

⁹ მუჟამსით მიდგარენ მთელ გურით გიჸორს, ოცადუქ ვაწყინუე თის. თეშნერო, ჩქი ხოლო მიჸორა იეჰოვა დო ვა მოკონა ვაკეთათ თიცალ მუთუნ, მუდგათ თის გურს ვუწყუნუანთ. ჩქი მანგარო ოკო მოშქურდან, ვა ვოწყინუათ იეჰოვა. მაგალთო, ნეემიას ღორონთიშ შიშიქ მეხვარ, მაღალ მდგომარეობა ქონებაშ ოშაყარალო ვეგმირინუკო (ნეემია 5:15). თის ვაკოდ თიცალ მუთუნიშ კეთება, მუდგათ ღორონთის გურს ქელაჭუანდჷ. თიშ შიშ, ნამდა ღორონთის გურ ვა ვუწყუნუათ, ჩქი ხოლო მოხვარნა ვა ვაკეთათ გლახა. ბიბლიაშე ბგურაფლენთ, მუჭო შემლებნა გურ გუხარათ იეჰოვას (ქოძირ დანართ 6).

10, 11. ნამ პრინციპეფ მიმეხვარებნა სწორ გადაწყვეტილებაშ მეღებას ოშუმალწკუმა დაკავშირებით?

¹⁰ მაგალთო, დეფიფქრათ ალკოჰოლურ ოშუმალშე. ნამ პრინციპეფ მეხვარებ ქრისტიანს სწორ გადაწყვეტილებაშ მეღებას? ქობძირათ მუსხირენ პრინციპი. ბიბლია ვარიას ვეჩიებ შუმაშე. თექ მოშინაფილ რე, ნამდა ღვინ საჩუქარ რე ღორონთშე (ფსალმუნი 104:14, 15). მარა იესოქ მუშ მიმაჸუნალეფ გაფრთხილ, ვეგნაჸუნესკო შუმას (ლუკა 21:34). პავლექ ხოლო უწუ ქრისტიანეფს, დუდ ეუჩილითესკო „დუდეშქუმალირ დროშ ტარებას დო გინოჸუნელ შუმას“ (რომაელები 13:13). თიქ თქუ, ნამდა თინეფს, მით შუმას რენა გინოჸუნელ, „ვა დამკვიდრებენა ღორონთიშ სამეფო“ (1 კორინთელები 6:9, 10).

¹¹ ქრისტიანქ მუშ დუც ოკო ქოკითხას: „მუშენ ფშუნქ ოშუმალს? თიშენ ხომ ვარ, ნამდა ხასიათშა ქუმოფრთე  ვარდა უმოს სითამამექ ქუმაშუას? შემლებნო გუვაკონტროლე, მუსხით ხშირას დო მუსხის ფშუნქ?“ * შემლებნო ოშუმალიშ უმშო ხოლო ჯგირ დრო გუვატარე მეგობრეფწკუმა? ქოთხი იეჰოვას, ქიმგეხვარას სწორ გადაწყვეტილებეფიშ მეღებას (წეკითხ ფსალმუნი 139:23, 24). თენა მიგეხვარებ, თეშ გოწაფე სინდის, ნამდა თიქ ბიბლიურ პრინციპეფით იმოქმედას. მარა ხვალე თენა ვა რე დასაბაღ.

12, 13. მუშენ შილებე ჩქინ სინდის შხვეფიშ სინდისშე განსხვავებულ რდას? მუჭო ოკო მიფქცუათ თეცალ დროს?

¹² არძაშ სინდის განსხვავებულ რე. სქან სინდისიქ შილებე მუდგარენიშ კეთებაშ ნება ქიმერჩას, მარა შხვას მუშ სინდისიქ ვემეჩას თეშ ნება. მაგალთო, შილებე ფიქრენდე, ნამდა გლახა მუთუნ ვა რე ჭიჭე გეშვე, მარა შხვას გინოჭყვიდილ აფუდას, შურო ვა შვას. მუშენ შილებე თე საკითხშე ჟირ პიროვნებას შხვადოშხვა აზრ უღდას?

¹³ ჩქინ შეხედულებეფწკუმა ბრელ მუთუნ მოქმედენს, მაგალთო: სო დებაბდით, მუნერ ოჯახის იბრდით, მუნერ ცხოვრება მიღდეს დო შხვა ფაქტორეფ. პიროვნებაქ, ნამუსით ადრე უჭირდჷ შუმაშ გაკონტროლება, შილებე გინოჭყვიდას, ნამდა შურო ვა შვას (1 მეფეები 8:38, 39). მუნერ რეაქცია გაღვენუ, მუჟამსით სტუმარს ოშუმალს მიარზიენქ დო თინა ვარიას გირაგად? ხომ ვეგეწყინებ? შუმას ხომ ვა დანძალენქ? ხომ ვა დუჭყანქ გითოკითხირს,  მუშენ ვა შუნს? მუშო ოკო რაგად, ვარ, მუშენდა პატის ცენქ თიშ სინდისის.

14, 15. მუ საკითხიქ წიმიჭკირ პავლეშ დროს? მუ ელუჩ თიქ ქრისტიანეფს?

¹⁴ მოციქულ პავლეშ დროს წიმოჭკირილ საკითხ ოძირანს, მუსხით განსხვავებულ რე ხალხიშ სინდის ართიანშე. თი დროს ბაზარს კერპშენაწირ ხორც გიმიჩამუდ (1 კორინთელები 10:25). პავლე დარწმუნებულ რდუ, ნამდა არასწორ ვარდჷ თიშ ჸიდირ დო ჭკუმუა. თის უჩქუდ, ნამდა ირნერ ოჭკუმალ იეჰოვაშე რდუ გოჭყაფილ. მარა ნამთინე ჯიმა, მით ადრე კერპთაყვანიშმცემლობას მეჸუნდჷ, შხვანერო ფიქრენდჷ. თინეფიშ აზრით, თეცალ ხორციშ ჭკუმუა სწორ ვა რდუ. ხომ ვა უფიქრებ პავლეს: „მა სინდის ვა მაწუხენს დო მიღჷ უფლება, მუდგა მოკონ თინა ბჭკუმე“?

¹⁵ პავლე თაშ ვა ფიქრენდჷ. თიშო ჯიმალეფიშ გრძნობეფს დიდ მნიშვნელობა უღუდ დო მზათ რდუ, ვარია ქოთქუკო მუშ უფლებეფშე. პავლექ თქუ, ნამდა ჩქინ დუდშე ვარინ შხვეფშე ოკო იფიფქრათ. თიქ გეუძინ: „ვართ ქრისტე ფიქრენდჷ, ნამდა მუშ დუც მუჰამუკო“ (რომაელები 15:1, 3). იესოცალო პავლე ხოლო მუშ დუდშე უმოსო შხვეფიშ მოხვარაშე ფიქრენდჷ (წეკითხ 1 კორინთელები 8:13; 10:23, 24, 31—33).

16. მუშენ ოკო ვაგვასამართლათ თანაქრისტიანეფ, მუჟამსით თინეფს სინდის მუდგარენიშ კეთებაშ ნებას არზენს?

¹⁶ მარა მუ ოკო ვაკეთათ, მუჟამსით ქრისტიანს მუშ სინდის თიცალ მუდგარენიშ კეთებაშ ნებას არზენს, მუთ ჩქი არასწორო მიმორჩქუნა? ფრთხილას ოკო ვორდათ, კილიშ გორუა ვა დიბჭყათ დო ვედეფჩემათ, ნამდა ჩქი ვორეთ მართალ დო თინეფ მტყუან (წეკითხ რომაელები  14:10). იეჰოვაქ სინდის ჩქინ დუდიშ მოსამართლეთ მუჩეს დო ვართ ხოლო შხვეფიშ (მათე 7:1). ვა მოკონა, ნამდა ჩქინ შეხედულებეფქ კრებას გორთუალა გემშიღას. თეშ მანგიორო, ოკო ვეცადათ, ხე ქეშუნწყუათ ჸოროფას დო ართობას (რომაელები 14:19).

17. მუჟამ მიოტენს სინდის ჩქინ გაფრთხილებას?

¹⁷ პეტრე მოციქულქ ჭარჷ: „გიღდან სუფთა სინდის“ (1 პეტრე 3:16). სანარღოთ, მუჟამსით შეგნებულო ვემეპჸუნთ იეჰოვაშ პრინციპეფს, საბოლათ სინდის  მიოტენს ჩქინ გაფრთხილებას. პავლექ თეცალ კათაშ გურშენ თქუ, ნამდა „სინდის დაღილ აფნა“ (1 ტიმოთე 4:2). წერმიდგინით პიროვნება, ნამდგას კან მანგარო აფჷ ჭვილ. დრო-ხანიშ უკულ თე ადგილს შრამ სქიდუ დო მუთუნს ვა გინაფლენს. თეშნერო, მუჟამსით პიროვნება აგრძელენს გლახაშ კეთებას, დრო-ხანიშ უკულ თიშ სინდის ხოლო მუთუნს ვა გინაფლენს დო უმოქმედო გინმირთუ.

18, 19. ა) მუ ჯგირობუა მოუღ დანაშაულიშ გრძნობას? ბ) მუ შემლებნა ვაკეთათ, მუჟამსით მონანიებაშ უკულ ხოლო დამნაშავეთ ბგინაფლენთ დუც?

¹⁸ მუჟამსით დამნაშავეთ ბგინაფლენთ დუც, შილებე თე დროს ჩქინ სინდის მირაგადნა, ნამდა მუდგარენ გლახა მაფნა კეთებულ. თინა მოხვარნა, ქობძირათ, სო მეფჩირთით დო მივოტუათ თიშ კეთება. მოკონა, ჩქინ შეცდომეფშე ქიდიბგურუათ დო მეტშა ვა ვაკეთათ თინა. მაგალთო,  მეფე დავითის შეცოდებაშ უკულ სინდისიქ მეხვარ, ნამდა მინანუკო. თიქ გიჯოგუ მუთ ულირს აკეთ დო გეგნოჭყვიდ, ირიათო დემორჩილკო იეჰოვას. დავითის მუშ გამოცდილებაშე შეულებუდ თქუკო: „ჯგირ რექ, იეჰოვა, დო მზათ რექ პატიებაშო“ (ფსალმუნი 51:1—19; 86:5; ქოძირ დანართ 7).

¹⁹ მარა მონანიებაშ უკულ ხოლო შილებე პიროვნება დუც დამნაშავეთ გინაფლენდას. შედეგო, სიმშვიდე მიოდინუას დო უღირსობაშ გრძნობაქ გურჩქინდას. სი ხოლო მინშა დუც თაშ ქოგინაფლენქ-და, რშუდას, ნამდა ულირს მოხვალამირ ვაგათირე. ვა უღჷ მნიშვნელობა, თი დროს გარჩქილედ დო ვარ, მუ რდუ სწორ დო არასწორ, რჯერდას, იეჰოვაქ ბოლოშა ქუგაპატუ დო დოლას სქან ცოდვეფ. ასე ღორონთიშ თოლს სუფთა რექ დო გიჩქჷ, ნამდა მუდგას ორთუქ, სწორ რე. თეშ უმკუჯინუო,  შილებე სქან გურ იშენ ბრალს გერდვანდას, მარა ბიბლია იჩიებ: „ღორონთ ჩქინ გურეფშე უმოს რე“ (წეკითხ 1 იოანე 3:19, 20). თენა ნიშნენს, ნამდა ჸოროფა დო პატიება, ნამდგას ღორონთ გიმირჩქინანს, მიგეხვარებ, გიორჯგინე ონჯღორეს დო დანაშაულიშ გრძნობას. დარწმუნებულ რდა, ნამდა იეჰოვაქ ქუგაპატუ. მუჟამსით ღორონთშე პატიებას მიღენქ, სულიერ სიმშვიდე გაღვენუ დო ხიოლით ემსახურებუქ თის (1 კორინთელები 6:11; ებრაელები 10:22).

20, 21. ა) მუს მიგეხვარებ თე წიგნ? ბ) მუ თავისუფლება მუჩეს იეჰოვაქ? მუჭო ოკო გიმიბრინუათ თინა?

²⁰ თე წიგნ მიგეხვარებ, გოწაფე სქან სინდის, ნამდა თიქ გუგაფრთხილას დო დორთხილუას თე ბოლო დღალეფს. თეწკუმა ართო, თე წიგნ მიგეხვარებ, გეგმირინუე ბიბლიურ პრინციპეფ შხვადოშხვა სიტუაციეფიშ დროს. მუშო ოკო რაგად, თაქ ვა რე მოჩამილ კანონეფიშ დიდ სია, ნამუთ გოძირანს, მუჭო მიქცუე არძანერ სიტუაციას. ჩქი ფცხოვრენთ ქრისტეშ კანონით, ნამუთ გერსხილ რე ღორონთიშ პრინციპეფშა (გალატელები 6:2). მუჟამსით ბიბლიას ვა რე მოჩამილ კონკრეტულ კანონ მუდგარენ საკითხიშ გურშენ, თენა ვა მარზენა თიშ საფუძველს, მიბსამანჯელუათ არასწორიშ კეთება (2 კორინთელები 4:1, 2; ებრაელები 4:13; 1 პეტრე 2:16). ჩქი მოკონა, თეშ გიმიბრინუათ ჩქინ თავისუფლება, ნამდა ქუვოძირათ იეჰოვაშ ჸოროფა.

²¹ ბიბლიურ პრინციპეფშე ფიქრ დო თიშ მეჸუნა, მოგურუანა, გეგმიბრინუათ აღქმაშ უნარ დო იეჰოვაშ თოლით ვუჯინათ საკითხეფს (ებრაელები 5:14). შედეგო, გოწაფილ სინდის სწორ მიმართულებას ქომჩანა დო მიმეხვარებნა, ვა ვოდინუათ ღორონთიშ ჸოროფა.