ღორონთიშ კანონეფ თიშ პრინციპეფშა რე გერსხილ. თე პრინციპეფ ბიბლიას მოჩამილ ძირითად ჭეშმარიტება რე. თინეფიშ საშვალებათ ბგებულენთ, მუს ფიქრენს იეჰოვა შხვადოშხვა საკითხშე, მუ მოწონს დო მუ ვარ. პრინციპეფ მოხვარნა, მიბღათ სწორ გადაწყვეტილებეფ დო სწორას მიფქცუათ, განსაკუთრებულო თი დროს, მუჟამსით ბიბლიას კონკრეტულ კანონ ვა რე მოჩამილ.

▸ დუდი 1, აბზაც 8

იეჰოვაშ მორჩილება ნიშნენს, ხიოლით ვაკეთათ ირფელ, მუდგას თინა მირაგადნა. თის ოკო, ჸოროფათ ვომორჩილდათ (1 იოანე 5:3). ღორონთ ქომიჸორა დო ქუვონდუთ-და, არძანერ სიტუაციას მივაჸუნუთ თიშ რჩევეფს დო თაშ თი დროს ხოლო მიფქციებუთ, მუჟამსით თენა ადვილ ვა რე. იეჰოვაშ მორჩილებას ჯგირობუა მოუღ, მუშენდა თინა მოგურუანა, მუჭო შილებე ამდღა ხოლო მიღდან აზრიან ცხოვრება დო მომავალშო მოპირნა ხვამას, ნამდგას ბოლო ვაღვენუ (ესაია 48:17).

▸ დუდი 1, აბზაც 10

იეჰოვაქ თითოულს მუჩეს ნებაშ თავისუფლება, შხვა სიტყვეფით ქოფთქუათინ, არჩევანიშ კეთებაშ უფლება. თის რობოტეფცალო ვა გუჭყაფუთ (კანონი 30:19; იესო ნავეს ძე 24:15). ჩქი შემლებნა თე თავისუფლება სწორ არჩევანიშ ოკეთებელო გიმიბრინუათ. მარა ფრთხილას ვეპჸით-და, შილებე არასწორ გადაწყვეტილებეფ მიბღათ. ნებაშ თავისუფლება ნიშნენს, პირადო გეგნობჭყვიდათ, მოკონა დო ვარ, ვორდათ იეჰოვაშ ართგურ დო იპჸოროფუათ დო ვარ თინა მთელ გურით.

▸ დუდი 1, აბზაც 12

იეჰოვაქ მუჩეს ზნეობრივ ნორმეფ, ნამუთ მიმართულებას არზენს ჩქინ მოქმედებეფს. ბიბლიაშე შემლებნა ქობძირათ, მუ რე თე ზნეობრივ ნორმეფ დო მუჭო მიმეხვარებნა თინეფ ცხოვრებაშ გაუჯგუშებას (იგავები 6:16—19; 1 კორინთელები 6:9—11). თეშ ჭყოლოფათ შემლებნა გებგათ ღორონთიშ თვალსაზრის ჯგირ დო ფურიშ გურშენ;  თეს გეძინელ, მოხვარნა, ვორდათ მოჸოროფეეფ, მიბღათ სწორ გადაწყვეტილებეფ დო ვედმეზარან ჯგირიშ კეთებაქ. დროშ მიკულაწკუმა ართო, მთელ მსოფლიოს ზნეობრივ ნორმეფ იუფრაშებ, მარა იეჰოვაშ ზნეობრივ ნორმეფ დღას ვეთირუ (კანონი 32:4—6; მალაქია 3:6). თე ნორმეფიშ მეჸუნა მიცვენა ფიზიკურ დო ემოციურ ზიანშე.

▸ დუდი 1, აბზაც 17

სინდის მოხვარნა ჯგირ დო ფურიშ გიშაგორუას. იეჰოვაქ თითოულს მუჩეს სინდის (რომაელები 2:14, 15). მარა სწორას ქიმოქმედასინ, საჭირო რე თიშ გოწაფუა იეჰოვაშ ზნეობრივ ნორმეფით. გოწაფილ სინდის მიმეხვარებნა, მიბღათ ღორონთიშ მოსაწონ გადაწყვეტილებეფ (1 პეტრე 3:16). სინდის მაფრთხილენა, მუჟამსით არასწორ გადაწყვეტილებაშ წოხლე გივორეთ დო მაწუხენა, მუჟამსით მუდგაინ გლახას ვაკეთენთ. მინშა შილებე სინდისიშ ხუმაქ ვეშმაწუხან, მარა იეჰოვაშ მოხვარათ, შემლებნა თიშ კინ გოწაფუა. სუფთა სინდის მარზენა შინაგან სიმშვიდეს დო ღირსებაშ გრძნობას.

▸ დუდი 2, აბზაც 3

ღორონთიშ შიშ ნიშნენს, მიღდან იეჰოვაშ თიცალ დიდ ჸოროფა დო პატიცემა, ნამდა ვა ვაკეთათ მუთუნ, მუთ თის გურს უწყუნუანს. თეცალ შიშ მოხვარნა, ვაკეთათ ჯგირ დო დუდ აურიდუათ გლახას (ფსალმუნი 111:10). თეს გეძინელ, ირნერ საკითხის ქუმურჩქილუათ იეჰოვას დო შევასრულათ მეჩამილ პირობა. ღორონთიშ შიშ მოქმედენს ჩქინ აზროვნებაწკუმა, გადაწყვეტილებეფწკუმა დო თიწკუმა, მუჭო ვოქცუთ შხვეფს.

▸ დუდი 2, აბზაც 9

მონანიება რე დაშებულიშ გურშენ მთელ გურით წუხება. მიდგას ღორონთ უჸორს, მანგარო წუხენს, მუჟამსით მეხვადუ, ნამდა ღორონთიშ ნორმეფიშ საწინააღმდეგო აკეთ. არასწორო მიფქცით-და, იეჰოვას პატიება  ოკო ქოფთხუათ ქრისტეშ გიშაჸიდირალიშ საფუძველშა (მათე 26:28; 1 იოანე 2:1, 2). მუჟამს მთელ გურით მნარღენთ დაშებულს დო მეტშა ვა ვაკეთენთ, შემლებნა ბჯერდან, ნამდა იეჰოვა ქუმაპატიენა. თეშ უკულ, დუდ ოკო ვადვადანაშაულათ ულირს დაშებულშენ (ფსალმუნი 103:10—14; 1 იოანე 1:9; 3:19—22). საჭირო რე, დიბგურუათ ჩქინ შეცდომეფშე, დეფთხინუათ გლახა ფიქრეფ დო იფცხოვრათ იეჰოვაშ ნორმეფით.

▸ დუდი 2, აბზაც 18

მუჟამსით პიროვნება, ნამდგაქ სერიოზულო დაშუ, ვა ნარღენს დო ვემეჸუნს იეჰოვაშ პრინციპეფს, ვა დოსქიდუ ქრისტიანულ კრებას. თინა კრებაშე გერიცხებ. ჩქი მუთუნნერ ურთიერთობა ვა მიღნა გარიცხულწკუმა დო ვართ დურაგადუანთ (1 კორინთელები 5:11; 2 იოანე 9—11). თე ღონისძიება იეჰოვაშ სახელს დო კრებას იცვენს (1 კორინთელები 5:6). თეწკუმა ართო, თენა ოხვარ გარიცხულს, მინანუას დაშებულ დო დართას იეჰოვას (ლუკა 15:17).

▸ დუდი 3, აბზაც 19

იეჰოვას უჸორს მუშ ხალხ დო ოკო, მიმეხვარან. ათეშენ მარზენა ხემძღვანელობას, მითითებას დო რჩევას, ბიბლიაშ დო თი ხალხიშ საშვალებათ, მიდგას ღორონთ უჸორს. ჩქი არასრულყოფილეფ ვორეთ დო ნამდვილო მოსაჭირნა ხემძღვანელობა (იერემია 17:9). მუჟამსით პატიცემათ ვურჩქილეთ თინეფს, მიდგას იეჰოვა გიმირინუანს ჩქინ გიოწურაფალო, თეთ იეჰოვაშ პატიცემას დო მორჩილებას გიმიფრჩქინანთ (ებრაელები 13:7).

▸ დუდი 4, აბზაც 2

არძა არასრულყოფილ ვორეთ დო ათეშენ ადვილო გიმიფრჩქინანთ სიამაყეს დო ეგოისტობას. მარა იეჰოვა ჩქინდე თანდაბლობას ელჷ. ხშირას თანდაბლობას თიმწკუმა ბგურაფლენთ, მუჟამსით იეჰოვას ჩქინ დუც ვადარენთ დო ვორწყეთ, მუსხით უმნიშვნელო ვორეთ თიშ გინაწონს (იობი 38:1—4). თანდაბლობაშ გურაფა თით ხოლო შემლებნა, ნამდა ჩქინ ინტერესეფშე უმოს წოხლე შხვეფიშ ინტერესეფ გივორინუათ. ამაყ პიროვნებას მუშ დუდ მიორჩქ არძაშე უჯგუშო. მარა თანდაბალ ალალას აფასენს დუც დო ორწყე მუშ მუჭოთ ჯგირ, თეშ გლახა მხარეეფს ხოლო. თის ვაშქურ გაცხადას მუშ შეცდომა, ბოდიშ ქოთქუას დო რჩევა ქიმირჩქილუას. თანდაბალ პიროვნება მენდებულ რე იეჰოვაშა დო მეჸუნს თიშ მითითებეფს (1 პეტრე 5:5).

▸ დუდი 4, აბზაც 4

ძალაუფლება რე შხვეფშა მითითებეფიშ მეჩამაშ დო გადაწყვეტილებეფიშ მეღებაშ უფლება. ზეცას დო დედამიწას არძაშ უდიდაშ ძალაუფლება იეჰოვას უღჷ. ირფელ თიშ გოჭყაფილ რე, ათეშენ თინა არძაშ უმოს ძალიერ პიროვნება რე სამყაროს. იეჰოვა მუშ ძალაუფლებას ირო შხვეფიშ საჯგირობუოთ გიმირინუანს. თიქ ნამთინე პიროვნებას მეჩჷ პასუხიშმგებლობა, ქიმკაჯინას მუშ ხალხის. მაგალთო, მშობლეფს, კრებაშ უხუცესეფს დო მთავრობაშ წარმომადგენლეფს ღორონთიქ მეჩჷ გარკვეულ უფლებეფ დო თის ოკო, ნამდა ქუმურჩქილუათ თინეფს (რომაელები 13:1—5; 1 ტიმოთე 5:17). მარა, მუჟამსით კოჩიშ დოდგინელ კანონ ოწინააღმდეგ ღორონთიშ კანონს, ჩქი პირველ ადგილს ღორონთიშ კანონს გივორინუანთ (საქმეები 5:29). იეჰოვაშ დანიშნულ პიროვნებეფს ქუვაფასენთ-და, თეთ ვოძირანთ, ნამდა პატის ფცენთ თიშ გადაწყვეტილებეფს.

▸ დუდი 4, აბზაც 7

იეჰოვა გიმირინუანს უხუცესეფს — გამოცდილ ჯიმალეფს, ნამდა იხანდან კრებაშო (კანონი 1:13; საქმეები 20:28). თინეფ მოხვარნა, ხოლოშიან ურთიერთობა მიღდან იეჰოვაწკუმა, კრებას რდას მშვიდობა დო ირფელქ ორგანიზებულო იჸუას (1 კორინთელები 14:33, 40). უხუცესეფქ  წმინდა შურით დენიშნანინ, ოკო აკმაყოფილენდან ბიბლიას მოჩამილ მოთხოვნეფს (1 ტიმოთე 3:1—7; ტიტე 1:5—9; 1 პეტრე 5:2, 3). ჩქი ვონდუთ დო ხუც ვუკინენთ ღორონთიშ ორგანიზაციას, ათეშენ ხიოლით ფთანამშრომლენთ უხუცესეფწკუმა (ფსალმუნი 138:6; ებრაელები 13:17).

▸ დუდი 4, აბზაც 8

იეჰოვაქ მშობლეფს დავალ, ქიმკაჯინან მუნეფიშ სქუალეფს დო ოჯახის. ბიბლია იჩიებ, ნამდა ოჯახიშ დუდ ქომონჯ რე. მარა, მუჟამსით ოჯახის ვა რე მუმა, ოჯახიშ დუდ დიდა იჸუაფ. ოჯახიშ დუდ პასუხიშმგებელ რე, ნამდა ოჯახიშ წევრეფს უღდან ოცხოვრებელ, ოჭკუმალ დო მიკაქუნალ. თეს გეძინელ, მნიშვნელოვან რე, ქიმეხვარას თინეფს, ნამდა თაყვან ცან იეჰოვას; მაგალთო, რეგულარულო გილართან კრებაშ შეხვალამეფშა, მონაწილება მიღან ქადაგებაშ საქმეს დო ართო ქიდიგურუან ბიბლია. ოჯახის საბოლა გადაწყვეტილებეფს ოჯახიშ დუდ ღებულენს. თინა ირო ოცად, მიაჸუნას იესოშ მაგალითის, გეგმირჩქინას ლიბ ხასიათ, გონიერება, ვა რდას უხეშ დო მკაცრ. თენა ხეს უნწყუნს, ნამდა ოჯახის რდას ჸოროფა დო სიგემუანე, თითოულ წევრიქ დუდ თხილერო იგინას დო უმოს ხოლოშიან ურთიერთობა გავითარას იეჰოვაწკუმა.

▸ დუდი 4, აბზაც 12

ხემძღვანელ საბჭო რე ქომოლკოჩეფიშ ჯგუფ, მიდგას ზეციერ ცხოვრებაშ იმენდ უღჷ. თინეფს ღორონთიქ მუშ ხალხიშ ხემძღვანელობა დავალ. დიო ხოლო პირველ საუკუნეს იეჰოვა გიმირინუანდჷ ხემძღვანელ საბჭოს, ნამდა ქრისტიანულ კრებას ქიმეჩკო მითითებეფ თაყვანიშცემაშ დო ქადაგებაშ საქმეს (საქმეები 15:2). ამდღა ჯიმალეფ, ნამუთ ხემძღვანელ საბჭოს მსახურენა მითითებეფს არზენა, ხემძღვანელენა დო თხილანა ღორონთიშ ხალხის. თე ჯიმალეფ ღორონთიშ სიტყვაშ დო წმინდა შურიშ ხემძღვანელობათ ღებულენა გადაწყვეტილებეფს. იესოქ თე ცხებულ ჯიმალეფიშ ჯგუფ მიშინუ, მუჭოთ „ართგურ დო გონიერ მონა“ (მათე 24:45—47).

▸ დუდი 4, აბზაც 15

მინშა შილებე დას ქოთხუან, კრებას შეასრულას თი დავალება, ნამუშ კეთება ჩვეულებრივო ჯიმას ოვალ. მუჟამსით და თეცალ დავალებაშ შესრულებაშ დროს დუდშა გირთვანს, თეთ იეჰოვაშ დოდგინელ წესრიგიშ პატიცემას გიმოხანტუნს. მარა დუდშა გერთუმალა არძა სიტუაციას ვა რე საჭირო. მაგალთო, და დუდშა გირთვანს, მუჟამსით ბიბლიაშ გურაფას ატარენს დო თექ რე მუშ ქომონჯ ვარდა ნათილ ჯიმა (1 კორინთელები 11:11—15).

▸ დუდი 4, აბზაც 17

ჩქი ნეიტრალურ პოზიცია მიღნა, მუჟამსით პოლიტიკას მითინიშ მხარეს ვებკინენთ (იოანე 17:16). იეჰოვაშ ხალხ ხუც უკინენს თიშ სამეფოს. ჩქი მეპჸუნთ იესოშ მაგალითის დო ვა ბღებულენთ მონაწილებას თე ქიანაშ საქმეეფს.

იეჰოვა მუშ ხალხის არზენს მითითებას, „დემორჩილან მთავრობეფს დო ხელისუფლებეფს“ (ტიტე 3:1, 2; რომაელები 13:1—7). მარა ღორონთიშ კანონ თის ხოლო იჩიებ: „ვაჸვილა“, ათეშენ ქრისტიანეფს სინდის ვარზენს ჩხუპშა ულაშ ნებას. მუჟამსით სამხედრო სამსახურიშ მანგიორო ქრისტიანს ალტერნატიულ სამუშა აფჷ შეიოსრულებერ, საჭირო რე დეფიქრას, ქიმეჩანს დო ვარ მუშ სინდის თე საქმეშ კეთებაშ ნებას.

ჩქი ხვალე იეჰოვას ფცენთ თაყვანს, მუშენდა თინა ჩქინ გუმაჭყაფალ რე. მუშო ოკო რაგად, პატის ფცენთ სახელმწიფო სიმბოლოეფს, მარა ვებიბრთ ეროვნულ ჰიმნის დო ვართ დროშას ვარზენთ სალამს (ესაია 43:11; დანიელი 3:1—30; 1 კორინთელები 10:14). თეწკუმა ართო, იეჰოვაშ თითოულ მსახურ პირადო გინოჭყვიდუნს, ნამთინ პოლიტიკურ პარტიას ვარდა კანდიდატის ვემეჩას ხონარ. თაშ თიშენ იფქციებუთ, ნამდა ჩქი უკვე იეჰოვაშ მთავრობაშ მხარე მიკინებნა (მათე 22:21; იოანე 15:19; 18:36).

▸ დუდი 5, აბზაც 2

თე ქიანა ხეს უნწყუნს სატანაშ აზროვნებაშ გავრცელებას. თეცალ აზროვნებას გიმირჩქინანს თი ხალხ, მისით ვა უჸორს იეჰოვა, ვაკო, უღდას ღორონთიშ მოსაწონ თვისებეფ დო ვა ცხოვრენს თიშ ზნეობრივ ნორმეფით (1 იოანე 5:19). ზუსტას თაშ რე ეჭარილ ბიბლიას სატანაშ ქიანაშ აზროვნება დო მოქმედება (ეფესოელები 2:2). იეჰოვაშ ხალხ ირფელს აკეთენს, ნამდა ქეწინააღმდეგას დო გიორჯგინას თეცალ აზროვნებას (ეფესოელები  6:10—18). ჩქი მიჸორა იეჰოვაშ შარეფ დო ვოცადუთ, ირფელ გუვაკეთათ, ნამდა თიშ მოსაწონ აზროვნება მიღდან.

▸ დუდი 5, აბზაც 7

განდგომილება ბიბლიურ ჭეშმარიტებაშ წინააღმდეგ ულას ნიშნენს. თეცალ პიროვნება შეგნებულო ოწინააღმდეგ იეჰოვას დო იესოს, ნამუთ ღორონთიშ სამეფოშ მეფე რე. თეწკუმა ართო, თინა ოცად, შხვეფ ხოლო გეიჸუნუას, ნამდა მუშ მხარე ქიდეკინან (რომაელები 1:25). განდგომილეფიშ მიზან რე ეჭვეფ ქინათასან იეჰოვაშ მსახურეფიშ გურს. პირველ საუკუნეს ქრისტიანულ კრებას ნამთინექ განდგომილო გინირთჷ დო შილებე თექ ამდღა ხოლო ქუმოხვადას (2 თესალონიკელები 2:3). იეჰოვაშ ართგურ მსახურეფს მუთუნ საერთო ვა უღნა განდგომილეფწკუმა. ჩქი დღას ვემეფჩანთ დუც უფლებას, შხვეფიშ გავლენაშ ვარდა ინტერესიშ გურშენ ქუმურჩქილუათ განდგომილეფიშ აზრეფს ვარდა წებკითხათ, მუს ჭარნა თინეფ. ჩქი იეჰოვაშ ართგურეფ ვორეთ დო ხვალე თის ფცენთ თაყვანს.

▸ დუდი 5, აბზაც 9

მოსეშ კანონით ისრაელეფ იეჰოვას თხინდეს ცოდვეფიშ პატიებას. თინეფს ცოდვეფიშ გიშაჸიდირალო ტაძარშა მეუღდეს მარცვლეულ, ზეთ დო ცხოველურ შესაწირ. თენა გაშინანდჷ ისრაელეფს, ნამდა იეჰოვა მზათ რდუ, ცოდვეფ ქაპატუკო მუჭოთ მთელ ერს, თეშ თითოულს. უმოს გვიანო, იესოქ სიცოცხლე შეწირ ჩქინ ცოდვეფიშ გიშაჸიდირალო დო თეშ უკულ, საჭირო ვარდჷ შესაწირავეფიშ მეღალა. იესოქ გეგშეჸიდ ხალხ სრულყოფილ შესაწირიშ „ხვალე ართშა შეწირუათ“ (ებრაელები 10:1, 4, 10).

▸ დუდი 7, აბზაც 6

მოსეშ კანონით ხალხის შეულებუდ ცხოველეფიშ ხორციშ ოჭკუმალო გიმორნაფა. თეწკუმა ართო, კანონ თინეფშე ითხინდჷ ცხოველეფიშ შესაწირო გიმორნაფას (ლევიანები 1:5, 6). მარა იეჰოვას დღას ვემუჩამ მუშ ხალხშა თიშ უფლება, ნამდა უდუნდებუო მექცისკო ცხოველეფს (იგავები 12:10). არგამა რე, კანონ იცვენდჷ ცხოველეფს თეცალ მოქმედებეფშე. თაშ ნამდა, ისრაელეფს მითითება უღდეს, დაფასესკო ცხოველეფიშ სიცოცხლე (კანონი 22:6, 7).

▸ დუდი 7, აბზაც 6

ზისხირიშ ფრაქციეფ. ზისხირ შითმოდირთუ ოთხ ძირითად კომპონენტშე, თენეფ რე: ერითროციტეფ, ლეიკოციტეფ, თრომბოციტეფ დო პლაზმა. თე ოთხ კომპონენტიშ დამუშებაშ შედეგო ღებულენა ზისხირიშ ფრაქციეფს. *

მუშო ოკო რაგად, ქრისტიან ვეგნიბუნს მთლიან ზისხირს ვარდა თიშ ოთხ ძირითად კომპონენტის, მარა მუშ რაგად შილებე ზისხირიშ ფრაქციეფშე? ბიბლია კონკრეტულო მუთუნს ვეჩიებ თე საკითხშე. ათეშენ თითოულ ქრისტიანქ ბიბლიათ გოწაფილ სინდისით, პირადო ოკო გინოჭყვიდას, მუჭო მიქციებ.

ნამთინე ქრისტიანს გინოჭყვიდილ აფჷ, ვარია ქოთქუას ზისხირიშ არძა ფრაქციაშე. თეშ მიზეზო მოჸუნს მოსეშ კანონ, სოდეთ ღორონთ ისრაელეფშე ითხინდჷ, ჸვილირ ცხოველიშ ზისხირ დიხას ქუდაბესკო (კანონი 12:22—24).

მარა შხვა ქრისტიანს შილებე სინდის არზენს ნებას, გეგმირინუას ზისხირიშ ნამთინე ფრაქცია; თეს თით ეთმონწყუნს, ნამდა ზისხირიშ თე ჭიჭე ფრაქციეფ უკვე ვა რე ზისხირ, ნამდგათ წარმოდგენილ რე სიცოცხლე.

სოიშახ ზისხირიშ ფრაქციეფიშ გურშენ მუთუნნერ გადაწყვეტილებას მიღენდე, ქოკითხ სქან დუც:

• ქუმარჩქილენო, ნამდა ზისხირიშ არძა ფრაქციაშე ვარიაშ რაგად ნიშნენს, ვარია ფთქუე თიცალ მედიკამეტეფშე, ნამუთ ობრძოლ ნამთინე ლახალას ვარდა ხეს უნწყუნს ზისხირიშ დენაშ გაჩერებას?

•   მუჭო შემლებ ევუნწყე ექიმს, მუშენ გიმიბრინუანქ ვარდა ვეგმიბრინუანქ ზისხირიშ ნამთინე ფრაქციას?

სამედიცინო პროცედურეფ. ქრისტიანეფ ვარიას იფჩიებუთ ჩქინ ზისხირიშ შხვაშა გინობუნაშენ. თეწკუმა ართო, ვართ ჩქინ ზისხირს ვაბარენთ ოპერაციაშახ მუსხირენ მარათ ადრე, ნამდა საჭირო შემთხვევას ექიმქ თინა გეგნომბან. თეს გეძინელ, არსებენს შხვა პროცედურეფ ხოლო, მუჟამსით კინ პაციენტიშ ზისხირს გიმირინუანა. თითოულ ქრისტიანქ მუშით ოკო გინოჭყვიდას ოპერაციაშ, ანალიზეფიშ ეჭოფუაშ ვარდა მკურნალობაშ დროს, მუჭო გიმირინუანა მუშ ზისხირს. თეცალ პროცედურეფიშ დროს პაციენტის გარკვეულ რაოდენობაშ ზისხირს გიშმუღანა დო ჭიჭე ხანით ჩუანა (მეტ ინფორმაციაშ მიოღებელო ქოძირით 2000 წანაშ 15 ოქტომბერიშ „გინაჯინალ კოშკი“ გვ. 30, 31).

მაგალთო, თეცალ პროცედურა რე ჰემოდილუცია. თე დროს ოპერაციაშ დოჭყაფაშახ პაციენტიშ ორგანიზმშე გიშმუღნა ზისხირიშ გარკვეულ რაოდენობა დო მიშმაჸუნა ზისხირიშ მოცულობაშ მუმაძინალ. ოპერაციაშ უკულ ხეთე ვარდა ჭიჭე ხანშა პაციენტის კინ ურთინუანა მუშ ზისხირს.

შხვა პროცედურა რე ზისხირიშ დაზოგება. თე პროცედურაშ დროს ჭრილობაშე გიშულირ ზისხირ ვა დინუ. თინა იშაყარუ, ისუფთებ დო კინ ართუ პაციენტიშ ორგანიზმის ხეთეშე ვარდა ოპერაციაშ უკულ ჭიჭე ხანშა.

თეცალ პროცედურეფიშ დროს ექიმეფს შილებე ართიანშე ჭიჭეთ განსხვავებულ მეთოდეფ უღდან. ათეშენ, სოიშახ თანახმა იჸუაფუქ გეკეთე ოპერაცია, გეჭოფე ანალიზეფ ვარდა ქიმკურნალე, საჭირო რე, ზუსტას ქიგეგე, მუჭო იჸუაფ გიმორნაფილ სქან ზისხირ.

სოიშახ გინოჭყვიდუნქ, მუჭო გიმირინუე სქან ზისხირ სამედიცინო პროცედურეფიშ დროს, ქოკითხ სქან დუც:

• მუჟამსით ჩქიმ ორგანიზმშე გეჭოფნა ზისხირიშ გარკვეულ რაოდენობას დო თიშ ცირკულირება ჭიჭე ხანით ვარა მეჭყორდუ, ქომჩანსო ჩქიმ სინდის თიშ ნებას, თე ზისხირ კინ ჩქიმ ორგანიზმიშ ნაწილო მიფრჩქინე დო ვარ მოფთხინს, თინა „დიხას“ ქუდვობე? (კანონი 12:23, 24).

• ხომ ვეშმაწუხენს ბიბლიათ გოწაფილ სინდის, მუჟამსით სამედიცინო პროცედურეფიშ დროს ზისხირიშ გარკვეულ ნაწილს გემჭოფნა, მოდიფიცირებას გუკეთენა დო კინ ჩქიმ ორგანიზმშა დართინუანა?

• ქუმარჩქილენო, ნამდა არძა თი პროცედურაშე ვარიაშ რაგად, ნამუთ კინ ჩქიმ ზისხირიშ გიმორნაფას ითხინს, ნიშნენს, ვარია ფთქუე ზისხირიშ ანალიზიშ ჩაბარებაშე, ჰემოდიალიზშე ვარდა ზისხირიშ ხელოვნურ მიმოქცევაშ აპარატიშ გიმორნაფაშე?

 სოიშახ მუთუნს გინობჭყვიდუნდათ ზისხირიშ ფრაქციეფიშ გურშენ ვარდა სამედიცინო პროცედურეფიშ დროს ჩქინ ზისხირიშ გიმორნაფაშე, საჭირო რე იეჰოვას ლოცვას ხემძღვანელობა ქოფთხუათ დო უკულ მეტ ინფორმაცია დობგორათ თე საკითხეფშე (იაკობი 1:5, 6). თეშ უკულ, ბიბლიათ გოწაფილ სინდისით ოკო გინობჭყვიდათ, მუჭო მიფქცუათ. თეცალ სიტუაციას შხვეფს ოკო ვა ბკითხათ, მუჭო მიქციებდეს ჩქინ ადგილს დო ვართ მითინქ ოკო ეცადას, დუმანძალან მუშ აზრიშ გათვალისწინება (რომაელები 14:12; გალატელები 6:5).

▸ დუდი 7, აბზაც 11

ზნეობრივ სიწმინდეშა მიშურს, ჩქინ ფიქრეფ, ჩიება დო საქციელ იეჰოვაშ თოლს სუფთა რდას. იეჰოვა ითხინს, ვემკვანჭათ მუთუნნერ უწმინდურებას დო უზნეობას (იგავები 1:10; 3:1). სოიშახ შეფხვადუდათ თიცალ სიტუაციას, სოდეთ შილებე გამოცდაშ წოხლე ქიგებდირთათ დო მეფჩირთათ, თეიშახ ოკო მაფდან გინოჭყვიდილ, ნამდა იფცხოვრენთ იეჰოვაშ მაღალზნეობრივ ნორმეფით. საჭირო რე, ლოცვას ირიათო ფთხუათ ღორონთის, ქიმმეხვარან გონებაშ სუფთათ დაცვებას; თეწკუმა ართო, ირნერო ოკო ვეცადათ, დუდ ევუჩილითუათ თიცალ სიტუაციეფს, მუდგაქ შილებე მიმოჩილითუან (1 კორინთელები 6:9, 10, 18; ეფესოელები 5:5).

▸ დუდი 8, აბზაც 11

დუდეშქუმალირ საქციელ რე, მუჟამსით პიროვნება უონჯღორეთ იჩიებ ვარდა ორთჷ თიცალ მუდგარენს, მუთ ოწინააღმდეგ იეჰოვაშ მაღალზნეობრივ ნორმეფს. თეცალ საქციელით თინა პატის ვა ცენს იეჰოვაშ კანონეფს. თე დროს კრებას სამართლებრივ კომიტეტ ქეშედირთუ. უწმინდურებაშა მიშურს შხვადოშხვანერ ცოდვა. ნამთინე უწმინდურ საქციელიშ გურშენ, შილებე კრებას სამართლებრივ ­კომიტეტიქ ქეშედირთას (გალატელები 5:19—21; ეფესოელები 4:19; მეტ ინფორმაციაშ მიოღებელო ქოძირით 2006 წანაშ 15 კვირკვეშ „გინაჯინალ კოშკი“, გვ. 29—31).

▸ დუდი 9, აბზაც 7; დუდი 12, აბზაც 10

იეჰოვაქ თიშენ გაჭყჷ ჩილ დო ქომონჯ შქას სქესობრივ ურთიერთობა, ნამდა თინეფქ ართიანწკუმა ჸოროფა გეგმოხანტესკო. მარა მუჟამსით პიროვნებას მასტურბაციაშ ჩვევა უღჷ, შხვა სიტყვეფით ქოფთქუათინ, მუშ სასქესო ორგანოს სიამოვნებაშ მიოღებელო გარძახ აღიზიანენს, თენა უკვე უწმინდურ საქციელ რე. თეცალ ჩვევას შეულებ გილამლუან იეჰოვაწკუმა ურთიერთობა. თექ შილებე ადამიანს უწესო სურვილეფ გურჩქინას დო შხვეფ ხვალე მუშ სურვილეფიშ დასაკმაყოფილებერო მირჩქინას (კოლოსელები 3:5). მუჟამსით პიროვნებას თე უწმინდურ ჩვევაშ მეტება უჭირს, ირფელ ოკო გაკეთას, ნამდა ჩეთხინუას თინა (ფსალმუნი 86:5; 1 იოანე 3:20). თეცალ პრობლემა სი ხოლო ქოიღ-და, იეჰოვას მთელ გურით ქოთხი მოხვარა. ვემკანჭა მუთუნს, მუთ არასწორ ფიქრეფს გოირჩქინანს, მაგალთო, პორნოგრაფიას. ქუდურაგადე თე საკითხშე ქრისტიან მშობლეფს ვარდა სულიერო მოწიფულ მეგობარს, მით აფასენს იეჰოვაშ ნორმეფს (იგავები 1:8, 9; 1 თესალონიკელები 5:14; ტიტე 2:3—5). შეილებ რჯერდას, იეჰოვა ორწყე დო აფასენს სქან მონდომას, ქუდოსქიდე ზნეობრივო სუფთა (ფსალმუნი 51:17; ესაია 1:18).

▸ დუდი 9, აბზაც 9

პოლიგამია ქორწინებაშ თიცალ ფორმა რე, მუჟამსით პიროვნებას ართშე მეტ მეუღლე ჸუნს. იეჰოვაშ განზრახვათ ქორწინება ართ კოჩ დო ართ ოსურ შქას ოკო რდას. იეჰოვაქ ჯვეშო ისრაელ ქომოლკოჩეფს უფლება მეჩჷ, ჸუნდესკო ართშე მეტ ოსურ, მარა თენა ვარდჷ ღორონთიშ დუდშეიან განზრახვა. ამდღა იეჰოვა მუშ ხალხის პოლიგამიაშ ნებას ვარზენს. ათეშენ, ქომონც ხვალე ართ ოსურ ოკო ჸუნდას დო ოსურს — ართ ქომონჯ (მათე 19:9; 1 ტიმოთე 3:2).

▸ დუდი 10, აბზაც 12

იეჰოვა ელჷ, ნამდა ჩილ დო ქომონჯ მთელ ცხოვრება ართო იჸუაფ (დაბადება 2:24; მალაქია 2:15, 16; მათე 19:3—6; 1 კორინთელები 7:39). ღორონთ  განქორწინებას ხვალე თი დროს უშვენს, მუჟამსით ართ-ართ მეუღლე ღალატენს. თე დროს იეჰოვა ბრალ ვა უღუნ ფერ მეუღლეს უფლებას არზენს, პირადო გეგნოჭყვიდას, აკარღვანს დო ვარ ოჯახის (მათე 19:9).

მინშა ნამთინე ქრისტიან ცალკე ცხოვრებას გინოჭყვიდუნს, თიშ უმკუჯინუო, ნამდა მეუღლეს თიშა ვა უღალატებ (1 კორინთელები 7:11). თუდო მოჩამილ რე თეშ მუსხირენ მიზეზ:

• ოჯახიშ მიკოჯინაშა შეგნებულო დუდიშ არიდაფა. ქომონჯ ვარიას იჩიებ, მატერიალურო ქიმკაჯინას ოჯახის დო თინეფს ფარაშ დო ოჭკუმალიშ უმშო იტენს (1 ტიმოთე 5:8).

• უკიდურეს ფიზიკურ ძალადობა. თეშა მიშურს თიცალ უდუნდებელ მოქციება, მუჟამსით ართ-ართ მეუღლე ფიქრენს, ნამდა თიშ ჯამრთელობა ვარდა სიცოცხლე საფრთხეშ თუდო რე (გალატელები 5:19—21).

• სერიოზულ საფრთხეშ თუდო რე იეჰოვაწკუმა ურთიერთობა. თეცალ დროს ქომონჯ ვარდა ოსურ მუშ მეუღლეს ირნერო ოცილ იეჰოვაშ მსახურებას (საქმეები 5:29).

▸ დუდი 11, აბზაც 19

არძას მოსაჭირნა ცქვაფა დო გურიშელაკინა (იგავები 12:25; 16:24). ჩქი შემლებნა ჰამო სიტყვეფით ართიანს გურშა ელუკინათ; თეს გეძინელ, ქიმვეხვარათ და დო ჯიმალეფს, მითვინან დო რთულ სიტუაციეფს ართგურო გაგრძელან იეჰოვაშ მსახურება (იგავები 12:18; ფილიპელები 2:1—4). ნამთინე შილებე მანგარ გურგოტახილ რდას; თე დროს შურ დო გურით ოკო ქუმურჩქილუათ დო ვეცადათ, ქინვანჭათ თიშ გრძნობეფს. შედეგო, შემალებენა თიცალ სიტყვეფ ქუწუათ ვარდა თეშ ქიმვექცუათ, ნამდა გურშა ევუქექუათ (იაკობი 1:19). უჯგუშო გეჩინებაფე და დო ჯიმალეფ, ნამდა ქიგეგე, მუ ოსაჭირნა. თეცალ დროს შეგალებე, ქიმეხვარე თინეფს, მოჭყოლოფე დო გურიშემაქექაფალ ღორონთშე მიღან ძალეფ (2 კორინთელები 1:3, 4; 1 თესალონიკელები 5:11).

▸ დუდი 12, აბზაც 16

ბიბლიას ვა რე მოჩამილ კონკრეტულ მითითება, მუჭო ოკო ჩეტარას ქორწილქ. ადგილობრივ წეს-ჩვეულებეფ დო იურიდიულ პროცედურეფ ირ დიხას შხვა დო შხვანერ რე (დაბადება 24:67; მათე 1:24; 25:10; ლუკა 14:8). საქორწინო ცერემონიაშ  არძაშ უმოს მნიშვნელოვან ნაწილ იეჰოვაშ წოხლე ართიანშა აღთქმაშ მეჩამა რე. ბრელ წყვილს უსხუნ, ოჯახიშ წევრეფ დო ხოლოშიან მეგობრეფ ოსწრუდან აღთქმაშ დოდვალას დო საქორწინო მოხსენებას, ნამდგათ უხუცეს გიშურს. წყვილ პირადო გინოჭყვიდუნს, გაკეთენს დო ვარ საქორწინო წვეულებას დო მუნერ იჸუაფ თინა (ლუკა 14:28; იოანე 2:1—11). თინეფ დარწმუნებულ ოკო რდან, ნამდა მუნეფიშ მონწყილ საქორწინო წვეულება განადიდენს იეჰოვას (დაბადება 2:18—24; მათე 19:5, 6). სწორ გადაწყვეტილებეფიშ მიოღებელო თინეფს ბიბლიურ პრინციპეფ მეხვარებ (1 იოანე 2:16, 17). წყვილქ საქორწინო წვეულებას ალკოჰოლიშ მიკოღალა გეგნოჭყვიდ-და, დარწმუნებულ ოკო რდან, ნამდა თინა ზომიერო იჸუაფ გიმორნაფილ (იგავები 20:1; ეფესოელები 5:18). შილებე თინეფს საქორწინო წვეულებაშ გაფორმება ოკოდან გასართობ ვარდა მუსიკალურ პროგრამათ; თეცალ დროს ოკო დერწმუნან, ნამდა ირფელ მუდგას აკეთენა, განადიდენს იეჰოვაშ სახელს. ქრისტიან წყვილს ოკო შუდას, ნამდა ქორწილიშ დღაშე უმოს მნიშვნელოვან იეჰოვაწკუმა დო ართიანწკუმა ურთიერთობა რე (იგავები 18:22; მეტ ინფორმაციაშ მიოღებელო ქოძირით 2006 წანაშ 15 ოქტომბერიშ „გინაჯინალ კოშკი“, გვ. 18—31).

▸ დუდი 13, აბზაც 18

ჩქი მოკონა, ბიბლიურ პრინციპეფიშ გიმორნაფათ სწორ გადაწყვეტილებეფ მიბღათ. მაგალთო, ნამთინე დღახუშ დროს ქრისტიანს შილებე მეუღლექ, ნამუთ ვა რე იეჰოვაშ მოწმე, ქოთხუას, ნათესეშ ჸუდეს გიმონწყილ სუფრაშა მიდაჸუნას. მუშ კეთება შეილებ, თეცალ სიტუაციას სი ხოლო ქორექ-და? სქან სინდის ულაშ ნებას ქუგარზენს-და, მეუღლეს ოკო გეუნწყე, ნამდა მონაწილებას ვემიღენქ თი წარმართულ წეს-ჩვეულებეფს, მუთ თექ იჸუაფ. თეს გეძინელ, ოკო დეფიქრე, თექ ულათ შხვეფს ხომ ვა დაბრკოლენქ (1 კორინთელები 8:9; 10:23, 24).

 მუშ რაგად შილებე, მუჟამსით დღახუშ დროს, უნჩაშ ფარას გეიძინანს ხელფასშა? ვარია ოკო თქუეო თიშ ეჭოფუაშე? სიტუაციას გარჩქ. გადაწყვეტილებაშ მეღებაშა ქიგეგ, სქან უნჩაშ მუ მოტივეფით ორთჷ თეს. ფიქრენსო, ნამდა ფარაშ გეძინათ დღახუს მიგახვამანს დო ვარ სქან ხანდაშე გიმოხანტუნს მარდულობას? ჯგირო დეფიქრ თე დო შხვა საკითხეფშე დო თეშ უკულ გეგნოჭყვიდ, გეჭოფუნქ დო ვარ თე ფარას.

შილებე დღახუშ დროს მითინქ საჩუქარ ქიმერჩას დო გიწუას: „მიჩქჷ, ვა ზეიმენქ თე დღახუს, მარა მოკო თენა გაჩუქე“. შილებე თის უბრალოთ სქან პატიცემა ოკოდას. მარა, მუშ რაგად შილებე, მუჟამსით ფიქრენქ, ნამდა თიშ მიზან რე გეგმოცადას სქან რწმენა ვარდა მონაწილება მიგოღებაფუას თე დღახუს? თე ირფელშე დაფიქრებაშ უკულ შეილებ გეგნოჭყვიდე, გეჭოფუნქ დო ვარ საჩუქარს. მოკონა, ირო თიცალ გადაწყვეტილება მიბღათ, ნამდა სინდისიქ ბრალ ვეგებდვან დო იეჰოვაშ ართგურეფ ქუდოფსქიდათ (საქმეები 23:1).

▸ დუდი 13, აბზაც 22

ხშირ შემთხვევას, უთანხმოებეფიშ ხეთეშე დო მშვიდობიანო მოგვარებათ სერიოზულ პრობლემეფს ეიფჩილითუანთ (მათე 5:23—26). ქრისტიანეფშო არძაშ უმოს მთავარ რე, განადიდან იეჰოვა დო ხე ქეშუნწყუან კრებაშ ართობას (იოანე 13:34, 35; 1 კორინთელები 13:4, 5).

ქრისტიანეფს საქმიან ურთიერთობეფიშ დროს უთანხმოებეფქ ქაშუეს-და, ჟირხოლოქ ოკო ეცადას, თეშ მაგვარან თინა, ნამდა საქმექ სასამართლოშა ვემერთას. პავლე მოციქულ 1 კორინთელეფიშ 6:1—8-ს მიშინუანს თი ქრისტიანეფს, ნამდგაქ ართიანს სასამართლოს უჩიულეს. თეცალ საქციელ სახელს უტახუნს იეჰოვას დო კრებას. მათეშ 18:15—17-ს მოჩამილ რე სუმ ნაბიჯ, მუჭო ოკო მაგვარან ქრისტიანეფქ სერიოზულ პრობლემა, მაგალთო, მუნერით რე, ტყურაშ ეკობრალება ვარდა თაღლითობა: 1) თინეფქ ოკო ეცადან, პირველ რიგის ართიანშქას მაგვარან უთანხმოება. 2) შეთანხმებაშა ვემიაჭირნეს-და, შეულებნა მოხვარა ქოთხუან კრებაშ ართ ვარდა ჟირ სულიერო მოწიფულ ქრისტიანს. 3) პრობლემაქ იშენით ვემიგვარ-და, თინეფს შეულებნა უხუცესეფს ქოთხუან მოხვარა. თე დროს უხუცესეფ ბიბლიურ პრინციპეფიშ გიმორნაფათ ქეშეცადებნა, დაპირისპირებულ მხარეეფს ქიმეხვარან,  დირთინუან ართიანწკუმა მშვიდობიან ურთიერთობა. მუჟამსით ქრისტიან ვარიას იჩიებ ბიბლიურ პრინციპეფიშ მეჸუნაშე, კრებაშ უხუცესეფქ შილებე აუცილებერო მირჩქინან საქმეშ სამართლებრივ წესით განხილვა.

ნამთინე სიტუაციას საჭირო რე, ქრისტიანქ გეგმირინუას სასამართლო, მაგალთო, თეცალ საკითხეფიშ დროს, მუნერით რე: განქორწინება, ბაღანეფიშ მეურვეობა, ალიმენტიშ გინოგაფა, სადაზღვეო ოგაფურ, გაკოტრება ვარდა ანდერძი. მუჟამსით ქრისტიან გიმირინუანს კანონიერ საშვალებეფს, ნამდა მუსხით შეიოლებერ რე, მშვიდობიანო მაგვარას თე საკითხ, თინა ვაწინააღმდეგ პავლეშ რჩევას.

ქრისტიან თი დროს ხოლო ვაწინააღმდეგ პავლეშ რჩევას, მუჟამსით სამართალდამცავ ორგანოეფს შეოტყვინუანს თიცალ სერიოზულ დანაშაულიშ გურშენ, მუნერით რე გაუპატიურება, ბაღანეფშე ძალადობა, გენთხაფა, დიდ ქონებაშ ხირუა ვარდა ჸვილუა.

▸ დუდი 14, აბზაც 14

სატანაქ ხალხიშ ღორება დიო ხოლო ედემიშ ბაღის დიჭყჷ (დაბადება 3:1—6; გამოცხადება 12:9). თის უჩქჷ, ნამდა აზროვნება მომწამალეს-და, შეულებ გუმოკეთებაფუანა თინა, მუთ გლახა რე (2 კორინთელები 4:4; იაკობი 1:14, 15). სატანა გიმირინუანს რელიგიას, კომერციას, გართობას, განათლებას დო შხვა ბრელ მუთუნს, ნამდა მუშ აზროვნება გავრცელას დო ხალხის მუწონუას (იოანე 14:30; 1 იოანე 5:19).

სატანას უჩქჷ, ნამდა ხალხიშ ოღორებელო ჭიჭე დრო აფჷ დოსქილადირ, ათეშენ ირფელს ორთჷ, მუთ შეიალებე მეტ მიოჩილითუას. თინა არძაშე უმოსო ღორონთიშ მსახურეფიშ მეჩილითაფას ოცად (გამოცხადება 12:12). ათეშენ ფრთხილას ვეპჸით-და, ეშმაკ ჭიჭე-ჭიჭეთ გილამლუანა აზროვნებას (1 კორინთელები 10:12). მაგალთო, იეჰოვას ოკო ქორწინება მუდმივ კავშირ რდას (მათე 19:5, 6, 9). მარა ამდღა ქორწინებას ბრელ თეშ უჯინე, მუჭოთ დროებით ურთიერთობას, ნამდგაქ შილებე ადვილო აკოცუას. თე აზრიშ გავრცელებას ხეს უნწყუნს ბრელ კინო დო სატელევიზიო გადაცემა. ათეშენ ირნერო ოკო ვეცადათ, ქორწინებაშ გურშენ გავრცელებურ აზროვნებაქ ჩქინწკუმა ხოლო ვემოქმედას.

 ხოლო ართ მეთოდ, ნამდგათ სატანა ოცად ჩქინ მეჩილითაფას, თინა რე, ნამდა ირნერო უნწყუნს ხეს დამოუკიდებლობაშ შურიშ გავითარებას (2 ტიმოთე 3:4). ფრთხილას ვეპჸით-და, თექ შილებე მიმოდინაფუან თინეფიშ პატიცემა, მიდგაშა იეჰოვას აფჷ უფლებამოსილება მეჩამილ. მაგალთო, ჯიმაქ შილებე კრებაშ უხუცესეფიშ ხემძღვანელობაშ წინააღმდეგ ულა ქიდიჭყას (ებრაელები 12:5). ვარდა დაქ შილებე ეჭვიშ თუდო ქიგიორინუას ოჯახის იეჰოვაშ დოდგინელ მეთაურობაშ პრინციპ (1 კორინთელები 11:3).

გინოჭყვიდილ ოკო მაფდან, ნამდა ეშმაკის დღას ვემეფჩათ ნება იმოქმედას ჩქინ აზროვნებაშა. თეშ მანგიორო, მოკონა იეჰოვაშ თოლით ვუჯინათ საკითხეფს დო „ზეციერშე“ იფიფქრათ (კოლოსელები 3:2; 2 კორინთელები 2:11).

▸ დუდი 16, აბზაც 9

არძას მოკონა ვორდათ ჯამრთელეფ დო ლახალაშ დროს ჯგირ სამედიცინო მკურნალობა გიშებგორათ (ესაია 38:21; მარკოზი 5:25, 26; ლუკა 10:34). ამდღა ექიმეფ დო შხვა სპეციალისტეფ მკურნალობაშ ბრელნერ მეთოდის გიმირინუანა. მუჟამსით გიშმებგორუნთ მკურნალობაშ ნამ მეთოდ გიმიბრინუათ, მნიშვნელოვან რე, მივაჸუნათ ბიბლიურ პრინციპეფს. ვაგმოჭყორდან, ნამდა ხვალე ღორონთიშ სამეფოს შეულებ ლახალაშე საბოლათ დუმოსქილიდუან. ვა მოკონა ჩქინ ჯამრთელობაშა თისხი ყურადღება გინიბღათ, ნამდა იეჰოვაშ მსახურებაქ ჩქინ ცხოვრებას მაჟია ადგილშა გეგნორთას (ესაია 33:24; 1 ტიმოთე 4:16).

ფრთხილას ოკო ვორდათ, ნამდა ირნერო აურიდუათ დუდ მკურნალობაშ თიცალ მეთოდეფს, ნამუთ დემონეფწკუმა რე დაკავშირებულ (კანონი 18:10—12; ესაია 1:13). ათეშენ სოიშახ გიშებგორუნთ მკურნალობაშ მეთოდის ვარდა წამალს, საჭირო რე, მუთ შილებე მეტ ინფორმაცია დობგორათ, სოვრეშე მოურს დო მუჭო გიმირინუაფ თინა (იგავები 14:15). დღას ვაგმოჭყორდან, სატანა ოცად, ქიმშამტყურუან დემონურ საქმეეფშა. მუჟამსით გურს შურო ქუგოთაკილ, ნამდა მკურნალობაშ თე მეთოდის მუდგარენ კავშირ უღჷ დემონეფწკუმა, ირფელიშ უჯგუშ იჸუაფ ვემკანჭე თის (1 პეტრე 5:8).

▸ დუდი 16, აბზაც 18