1—3. ა) მუს მოგურუანა იგავეფიშ 13:20? ბ) მუშენ რე მნიშვნელოვან გონივრულო გეგშებგორათ მეგობრეფ?

წერმიდგინ ჭიჭე ბაღანა, ნამუთ დიდა დო მუმას ოკვირ. შილებე დიო რაგად ხოლო ვა უჩქჷ, მარა ითვისენს ირფელს, მუდგას ორწყე დო ირჩქილე. ჭიჭეს გემწირდუნ, ხასიათით დო თვისებეფით თეშ აგურუ მშობლეფს, ნამდა ვართ გინაფლენს თეს. გასაკვირ ვა რე, ნამდა დიდეფ ხოლო თინეფცალო იჭყანა ფიქრის დო მოქმედებას, მიდგაწკუმა უმოს დროს ატარენა.

² იგავეფიშ 13:20-ის ინოჭარ: „მით ბრძენეფწკუმა გილურს, დებრძენებ“. თაქ გიმორნაფილ სიტყვა „გილურს“, ნიშნენს პიროვნებაწკუმა ბრელ დროშ გატარებას დო ვართ ხოლო თის, ნამდა უბრალოთ იფჩინენდათ თე პიროვნებას. ბიბლიაშ ართ მარკვიებელიშ აზრით თე სიტყვა ნიშნენს პიროვნებაშ ჸოროფას დო თიწკუმა ხოლოშიან ურთიერთობას. მუშო ოკო რაგად, ჩქინწკუმა მანგარო მოქმედენს თი ხალხ მიდგაწკუმა ბრელ დროს ვატარენთ, განსაკუთრებულო თინეფ, მით ხოლოშიან მეგობრეფო მიმორჩქუნა.

³ მეგობრეფს შეულებნა მუჭოთ ჯგირო, თეშ გლახათ ხოლო იმოქმედან ჩქინწკუმა. იგავეფიშ 13:20-ის ჭარჷ:  „სულელეფწკუმა საქმეშ დუმაკინებელ უბედრობას ქიმიკინდუანს“. ებრაულ ნინას ფრაზა „საქმეშ დუმაკინებელ“ მეგობრობას ნიშნენს (იგავები 22:24). იეჰოვაშ მოჸოროფე მეგობრეფ მიმეხვარებნა, ქუდოფსქიდათ ღორონთიშ ართგურეფ. მორთ ქობძირათ, მის გიშაგორუნს იეჰოვა მუშ მეგობარო. თენა მიმეხვარებნა, ჩქი ხოლო გეგშებგორათ ჯგირ მეგობრეფ.

4. მუშენ რე დიდ პატი, ვორდათ იეჰოვაშ მეგობრეფ? მუშენ მიშინუ იეჰოვაქ აბრაამი მუშ მეგობარო?

⁴ იეჰოვა, სამყაროშ უზენაეს ღორონთ, საშვალებას მარზენა, თიშ მეგობრეფ ვორდათ. თენა დიდ პატი რე. იეჰოვა დაკვირვებულო გიშაგორუნს მეგობრეფს. ღორონთ თიცალ ხალხის გიშეგორუნს მეგობრეფო, მიდგას თიშ ჸოროფა დო რწმენა უღჷ. დეფიფქრათ აბრაამიშ მაგალითშე. თინა მზათ რდუ, ირფელ გაკეთკო ღორონთშო. აბრაამი ირიათო გიმირჩქინანდჷ იეჰოვაშ ართგურობას დო მორჩილებას. თის მუშ სქუა, ისაკი, ხოლო ვადანარღებ, ნამდა იეჰოვას მსხვერპლო შეწირკო. აბრაამს წანდჷ, „ნამდა ღორონთის შეულებუდ თიშ გათელება“ (ებრაელები 11:17—19; დაბადება 22:1, 2, 9—13). აბრაამი მორჩილებას დო ართგურობას გიმირჩქინანდჷ, ათეშენ იეჰოვაქ თინა მუშ მეგობარო მიშინუ (ესაია 41:8; იაკობი 2:21—23).

5. მუნერ დამოკიდებულება უღჷ იეჰოვას თინეფწკუმა, მით თიშ ართგურ რე?

⁵ იეჰოვა აფასენს მუშ მეგობრეფს. თიშ მეგობრეფშო ხოლო, ირფელშე უმოს მნიშვნელოვან იეჰოვაშ ართგურო დოსქილადა რე (წეკითხ 2 სამუელი 22:26). თინეფ ართგურეფ რენა დო ომორჩილნა ღორონთის, მუშენდა  უჸორა თინა. ბიბლია იჩიებ, ნამდა ღორონთ მართალ კათაწკუმა მეგობრენს, თინეფწკუმა, მით ურჩქილე თის (იგავები 3:32). იეჰოვა მუშ მეგობრეფს, მუჭოთ ძვირფას სტუმარეფს, აპეჯენს მუშ „კარავშა“ დო ოკო, ნამდა თინეფქ ირ დროს ლოცვათ გურ გოუნწყან დო ემსახურან თის (ფსალმუნი 15:1—5).

6. მუჭო ვოძირანთ, ნამდა მიჸორა იესო?

⁶ იესოქ თქუ: „მიდგას ვუჸორქ, ჩქიმ სიტყვას მიაჸუნუ დო ჩქიმ მუმა ხოლო ქიჸოროფუანს თის“ (იოანე 14:23). იეჰოვაშ მეგობრეფ ვორდათინ, საჭირო რე მიჸორდან ქრისტე დო მივაჸუნათ ირფელს, მუთ იესოქ დუმოგურეს. მაგალთო, ჩქი მეპჸუნთ ქრისტეშ მითითებას დო ფქადაგენთ სახიოლო ამბეს; თეს გეძინელ, მოწაფეეფო ვამზადენთ ხალხის (მათე 28:19, 20; იოანე 14:15, 21). იესოშ ჸოროფა მოხვარნა, „ართგურო მივაჸუნათ თიშ ნაკვალუს“ (1 პეტრე 2:21). იეჰოვას გურს უხარენს თიშ ძირაფა, მუჟამსით სიტყვათ დო საქმეთ მეპჸუნთ მუშ სქუაშ მაგალითის.

7. მუშენ ოკო დერწმუნე, ნამდა სქან მეგობრეფ იეჰოვაშ მეგობრეფ რენა?

⁷ იეჰოვაშ მეგობრეფ ართგურეფ რენა, დოჸუნა ღორონთის დო უჸორა თიშ სქუა. ქოთქუანდიო ვარიას თეცალ მეგობრეფშე? მუჟამსით სქან მეგობრეფ ქრისტეშ მაგალითის მეჸუნა დო ირფელს ორთნა, ნამდა ღორონთიშ სამეფოშ გურშენ შხვეფს ქუდაგურუან, თინეფს შეულებნა სი ხოლო ქიმგეხვარან, უჯგუშ პიროვნებათ გინირთე დო ვადინუე ღორონთიშ ართგურობა.

8. მუ მორწონს რუთი დო ნაომიშ მეგობრობაშე?

⁸ ბიბლიას ნამდვილ მეგობრობაშ ბრელ მაგალით რე მოჩამილ. ართ-ართ რე რუთიშ დო თიშ დიანთილ,  ნაომიშ, მეგობრობა. თინეფ შხვადოშხვა ქიანაშე რდეს დო თეს გეძინელ, ნაომი რუთშე ბრელით უნჩაშ რდუ. მარა თინეფს ჯგირ მეგობრობა უღდეს, მუშენდა ჟირხოლოს უჸორდჷ იეჰოვა. მუჟამსით ნაომიქ მოაბიშ დოტება დო ისრაელშა დორთა გინოჭყვიდ, რუთიქ ხოლო მიდაჸუნ თის. თიქ უწუ ნაომის: „სქან ხალხ ჩქიმ ხალხ იჸუაფ დო სქან ღორონთ — ჩქიმ ღორონთ“ (რუთი 1:14, 16). რუთი მანგარ ჯგირო ოქცუდ მუშ დიანთილს. ისრაელშა დორთაშ უკულ რუთი ბრელს ხანდენდჷ, ნამდა ქიმკაჯინკო მუშ მეგობარს. ნაომის ხოლო მანგარო უჸორდჷ მუშ ნოსა დო ირო ჯგირს ელუჩანდჷ. რუთი ურჩქილედ თის დო შედეგო ღორონთშე ხვამა ვემერკებნა (რუთი 3:6).

9. მუქ მიგეწონ დავითი დო იონათანიშ მეგობრობაშე?

⁹ ჯგირ მეგობრობაშ მაგალით დავით დო იონათანქ ხოლო მუჩეს. თინეფს მანგარო უჸორდეს იეჰოვა. იონათან დავითშე 30 წანათ უნჩაშ რდუ დო ისრაელიშ მომავალ მეფექ ოკო იჸუკო (1 სამუელი 17:33; 31:2; 2 სამუელი 5:4). მუჟამსით იონათანქ ქიგეგ, ნამდა იეჰოვაქ მეფეთ დავით გიშაგორ, ვანჯარებ დო მოწინააღმდეგეთ ვემურჩქინუ თინა. თეშ მანგიორო, იონათანქ ირფელ გაკეთ, ხუჯ ქუდუკინკო მუშ მეგობარს. მაგალთო, მუჟამსით დავითიქ საფრთხეშ წოხლე ქიგედირთ, იონათანქ გურშა ქელუკინ თის დო უწუ, ნამდა „იეჰოვა ვემიოტალენდჷ“. თიქ დავითიშ გურშენ მუშ სიცოცხლე ხოლო ქინიჸოთ საფრთხეშა (1 სამუელი 23:16, 17). დავითი ხოლო ართგურ მეგობარ რდუ. თიქ დეპირ იონათანს, ნამდა ქიმკაჯინედ თიშ ოჯახის დო იონათანიშ ღურაშ უკულ ხოლო მუშ სიტყვაშა ვეგნურთაფ (1 სამუელი 18:1; 20:15—17, 30—34; 2 სამუელი 9:1—7).

10. მუს გურაფლენქ სუმ ებრაელიშ მეგობრობაშე?

 ¹⁰ სუმ ებრაელ მეგობარ — შადრაქ, მეშაქ დო აბედნეგო — ბაღანეფ რდეს, მუჟამსით ბაბილონიშ ტყვეობას მოხვადეს. მართალ რე, თინეფ მუნეფიშ ოჯახშე შორს რდეს, მარა ართიანს ოხვარდეს, იეჰოვაშ ართგურეფ ქუდოსქიდესკო. დრო-ხანიშ უკულ, მუჟამსით უკვე მირდეს, თინეფიშ რწმენაქ გეგმიცად. მეფე ნაბუქოდონოსორქ ზოჯჷ, ნამდა არძაქ ბირგულ ქუდაშქუკო ოქროშ ქანდაკებაშ წოხლე. შადრაქ, მეშაქ დო აბედნეგოქ ვარია ქოთქვის ქანდაკებაშ თაყვანიშცემაშე დო მეფეს უწის: „მოკონა გიჩქუდას, ნამდა ვართ სქან ღორონთეფს ვემსახურებუთ დო ვართ სქან ნაკეთებ ოქროშ ქანდაკებას ფცენთ თაყვანს“. მუჟამსით თინეფიშ რწმენაქ გეგმიცად, ღორონთიშ ართგურობა ვაუდინუაფნა (დანიელი 1:1—17; 3:12, 16—28).

11. სოვრეშე მიჩქნა, ნამდა პავლე დო ტიმოთე ჯგირ მეგობრეფ რდეს?

¹¹ მუჟამსით მოციქულ პავლექ გეჩინებაფუ ახალგაზრდა ტიმოთე, ხეთეშე ქიმეხვად, ნამდა თის უჸორდჷ იეჰოვა დო შურდოგურით ხანდენდჷ კრებაშო. ათეშენ პავლექ მამზად ტიმოთე, ნამდა ქუმუხვარებუდკო და დო ჯიმალეფშა შხვადოშხვა ტერიტორიას (საქმეები 16:1—8; 17:10—14). ტიმოთე თიცალ შურ დო გურით ორთუდ საქმეს, ნამდა პავლექ თიშგურშენ თქუ: „მუჭოთ სქუა მუმაწკუმა, თეშ მსახურენდჷ ჩქიმწკუმა ართო სახიოლო ამბეშ გაცხადებელო“. პავლეს უჩქუდ, ნამდა ტიმოთე მთელ გურით ქიმკაჯინედ და დო ჯიმალეფს. თინეფ იეჰოვაშ საქმეს ართო ხანდენდეს, მუდგაქ ხე შეუნწყუ თინეფიშ ხოლოშიან მეგობრობას (ფილიპელები 2:20—22; 1 კორინთელები 4:17).

12, 13. ა) მუშენ მოსაჭირნა სიფრთხილე კრებას ხოლო, მუჟამსით მეგობრეფს გიშებგორუნთ? ბ) მუშენ მუჩეს მოციქულ პავლექ რჩევა, ნამუთ 1 კორინთელეფიშ 15:33-ს ინოჭარ?

¹² კრებაშ შეხვალამეფს ბრელ მუთუნს ბგურაფლენთ და დო ჯიმალეფშე დო ართიანს ვოხვარუთ, იეჰოვაშ ართგურეფ ქუდოფსქიდათ (წეკითხ რომაელები 1:11, 12). მარა კრებას ხოლო მოსაჭირნა სიფრთხილე ხოლოშიან მეგობრეფიშ გიშაგორუაშ დროს. ჩქინ ძვირფას და დო ჯიმალეფ შხვადოშხვა კულტურაშ დო წარმოშობაშ რენა; ნამთინე ბრელ ხან ვა რე, მუთ ომსახურ იეჰოვას,  ნამთინე ხოლო წანეფ რე, მუთ ორგანიზაციას რე. მუჭოთ ხილს ოსაჭირ დრო, ნამდა ქუმორთას, თეშ იეჰოვაწკუმა ურთიერთობაშ გავითარებას ხოლო დრო ოსაჭირ. ათეშენ მოთვინება დო ჸოროფა ოკო გიმიფრჩქინათ ართიანწკუმა დო გონივრულო გიშებგორათ მეგობრეფ (რომაელები 14:1; 15:1; ებრაელები 5:12—6:3).

¹³ შილებე მინშა კრებას პრობლემეფქ გორჩქინდას. თეცალ დროს მანგარ სიფრთხილე მოსაჭირნა. მაგალთო, თანაქრისტიანქ შილებე ქიდიჭყას თიცალ მუდგარენიშ კეთება, მუდგაშ გურშენ ბიბლია იჩიებ, ნამდა გლახა რე ვარდა ნამთინექ შილებე კრიტიკულ აზროვნება გევითარას, მუდგაქ შილებე კრება დაზარალას. თექ ოკო ვა გამკვირდან, მუშენდა თეცალ პრობლემეფ პირველ საუკუნეშ კრებას ხოლო უღდეს. პავლე მოციქულქ ქრისტიანეფ გაფრთხილ: „ვემეჩირთათ! გლახა საზოგადოება გილმალუანს ჯგირ ჩვევეფს“ (1 კორინთელები 15:12, 33). თეს გეძინელ, პავლექ ტიმოთე ხოლო გაფრთხილ, ნამდა დაკვირებულო გეგშაგორკო მეგობრეფ. თე რჩევა ამდღა ხოლო პრაქტიკულ რე (წეკითხ 2 ტიმოთე 2:20—22).

14. მუჭო იმოქმედენს იეჰოვაწკუმა ურთიერთობას, მის გიშებგორუნთ მეგობარო?

¹⁴ ჩქი ოკო ვეცადათ, ნამდა ვეგლებლუათ იეჰოვაწკუმა მეგობრობა. თე მეგობრობა ჩქინო არძაშე უმოს ძვირფას რე. ათეშენ დუც ვურიდანთ თინეფწკუმა მეგობრობას, მიდგას შეულებ ჩქინ რწმენა დასუსტას დო იეჰოვაწკუმა ურთიერთობა გილამლუან. მაგალთო, პიშქოსალს ძმარს ქინობდვანთ-და, ვეველდათ ოკო, ნამდა წილოხუაშ უკულ თიშე სუფთა წყარ მოლურს. თეშნერო, გლახა მეგობრეფ ქოპჸუნან-და, ოკო ვეველდათ, ნამდა ადვილ მაჸინა ჯგირ საქმეეფიშ კეთება. ათეშენ საჭირო რე,  დაკვირვებულო გიშებგორათ მეგობრეფ (1 კორინთელები 5:6; 2 თესალონიკელები 3:6, 7, 14).

15. მუჭო შეილებ კრებას ჯგირ მეგობრეფიშ გორუა?

¹⁵ კრებას ბრელ და დო ჯიმა რე, მიდგას ნამდვილო უჸორს იეჰოვა. თინეფს შეულებნა სქან ხოლოშიან მეგობრეფო გინირთან (ფსალმუნი 133:1). ხვალე თინეფ შქას ვეგშაგორა მეგობრეფ, მით სქან მახანა რე ვარდა ართნერ კულტურა დო წარმომავლობა გიღნა. ვაგგოჭყორდას, ნამდა იონათან დავითშე ბრელით უნჩაშ რდუ დო რუთი — ნაომშე ბრელით ახალგაზრდა. ბიბლია ელამჩანა, გურიშ კარ გოვუნჯათ ახალ მეგობრეფს (2 კორინთელები 6:13; წეკითხ 1 პეტრე 2:17). მუთ უმოსო მიაჸუნუქ იეჰოვაშ მაგალითის, თით უმოს მეტის აღვენუ სურვილ, დეგემეგობრას.

16, 17. მუ ოკო ვა ვაკეთათ, მუჟამსით კრებას მიდგარენ მოწყინებაფუანა?

¹⁶ ოჯახიშ არძა წევრის განსხვავებულ ხასიათ, აზროვნება დო ჩვევეფ უღჷ. თაშ რე კრებას ხოლო. ჩქი ართიანშე განსხვავებულ ვორეთ დო თენა ცხოვრებას უმოს საინტერესოთ გინაშქვანს. თეს გეძინელ, შემლებნა ართიანშე ბრელ მუთუნ დიბგურუათ. მარა თეცალ განსხვავებაშ გურშენ მინშა შილებე და დო ჯიმალეფშა ვაგმაგინან დო გურქ მომირთან ვარდა მანგარო ხოლო ქუმოწყინუან (იგავები 12:18). ქიმეფჩანთო უფლებას თეცალ გაუგებრობას, გურ გომტახან დო კრება მიმოტებაფუან?

¹⁷ მუშო ოკო რაგად, ვარ. მიდგაქ ვა მოწყინუან, იშენით ვემვოტენთ კრებას, მუშენდა ჩქინდა იეჰოვას ვა უწყინუაფ! სიცოცხლე დო ირფელ, მუთ მიღნა, იეჰოვა მარზენა, ათეშენ თინა ჩქინ ჸოროფა დო ართგურობაშ ღირს რე (გამოცხადება 4:11). კრება საჩუქარ რე იეჰოვაშე, ნამუთ  მოხვარნა მიღდან ძალიერ რწმენა (ებრაელები 13:17). თაშ ნამდა, მიდგაქ ვა მოწყინუან, დღას ოკო ვა ფთქუათ ვარია თე საჩუქარშე (წეკითხ ფსალმუნი 119:165).

18. ა) მუ ოკო ვაკეთათ, ნამდა და დო ჯიმალეფწკუმა ჯგირ ურთიერთობა მიღდან? ბ) მუშენ რე საჭირო პატიება?

¹⁸ ჩქი მიჸორა და დო ჯიმალეფ დო მოკონა, თინეფწკუმა ჯგირ ურთიერთობა მიღდან. იეჰოვა მითინშე ვეთხინს სრულყოფილებას დო ვართ ჩქი ოკო ველდათ თეს (იგავები 17:9; 1 პეტრე 4:8). უჩილათ მითინ ვა ვორეთ, მარა ჸოროფა მოხვარნა, მთელ გურით ქუვაპატუათ ართიანს (კოლოსელები 3:13). ჸოროფა ვა მუჩანა თიშ ნებას, ჭიჭე გაუგებრობეფ დიდ პრობლემათ გინვოშქვათ. მართალ რე, მუჟამსით გურს ელმოჭუანა, ძნელ რე თეშე ვეფიფქრათ; უმოს ადვილ რე გურქ მომრთან. მარა თენა გლახაშ მეტის, ჯგირს მუთუნს ვა მომღანა — გურს ჟღამ ქელმოსქიდნა დო ხიოლს მივოდინუანთ. თეშ გინაწონს, ართიანიშ პატიება სიმშვიდეს მომღანა, ხეს შევუნწყუნთ კრებაშ ართობას დო მუთ არძაშ უმოს მთავარ რე, მაღვენუნა ჯგირ ურთიერთობა იეჰოვაწკუმა (მათე 6:14, 15; ლუკა 17:3, 4; რომაელები 14:19).

19. მუ დროს ოკო მივოტუათ ნამთინეწკუმა ურთიერთობა კრებას?

¹⁹ მოჸოროფე ოჯახის არძა ართიანს უნწყუნს ხეს, ნამდა ბედნერეფ რდან. მარა წერმიდგინ, ოჯახიშ ართ-ართ წევრ ბუნტიშ ეტახუას იჭყანს. შხვეფ ირნერო ოცადნა თიშ მოხვარას, მარა თინა ვა ღებულენს თეს. თიქ შილებე ჸუდეშე მიდართას ვარდა ოჯახიშ დუდიქ მოთხუას თეშ კეთება. მინშა კრებას ხოლო მოხვადუ თეცალ მუდგარენ. ნამთინე თიცალ მუდგარენიშ კეთებას აგრძელენს, მუთ იეჰოვას ვა მოწონს დო კრებას აზარალენს.  თინა შილებე ვა ღებულენს მუთუნნერ მოხვარას დო მუშ საქმეეფით ოძირანს, ნამდა ვაკო კრებას ქუდოსქიდას. თიქ შილებე მუშით ქიდიტუას კრება ვარდა გერიცხას. თეცალ დროს ბიბლია არგამათ იჩიებ, ნამდა მუთუნნერ ურთიერთობა ოკო ვამღუდან თინეფწკუმა (წეკითხ 1 კორინთელები 5:11—13; 2 იოანე 9—11). თე მითითებაშ მეჸუნაქ შილებე მანგარო გამჭირდან, მუჟამსით თე პიროვნება ჩქინ მეგობარ ვარდა ოჯახიშ წევრ რე. მარა თეცალ დროს თინეფიშ ართგურობაშე უმოს მნიშვნელოვან იეჰოვაშ ართგურო დოსქილადა რე (ქოძირ დანართ 8).

20, 21. ა) მუჭო იძირე გარიცხვაშე ჸოროფა? ბ) მუშენ რე მნიშვნელოვან, დაკვირვებულო გიშებგორათ მეგობრეფ?

²⁰ გარიცხვათ იეჰოვაშ ჸოროფა იძირე. თენა კრებას თხილანს თიცალ ხალხშე, მით ვა ცხოვრენს იეჰოვაშ ნორმეფით (1 კორინთელები 5:7; ებრაელები 12:15, 16). თე მითითებაშ მეჸუნათ ვოძირანთ, ნამდა მიჸორა იეჰოვა ღორონთ, თიშ წმინდა სახელ დო მაღალზნეობრივ ნორმეფ (1 პეტრე 1:15, 16). გარიცხვათ იეჰოვა თი პიროვნებაშ ჸოროფას ხოლო გიმოხანტუნს, მიდგაქ გერიცხჷ. თე მკაცრ ღონისძიებაქ შილებე თის ქიმეხვარას, დეფიქრას მუშ გლახა საქციელშე დო დითირას. თინეფ, მით ართ დროს გარიცხულეფ რდეს, დრო-ხანიშ უკულ დართეს იეჰოვას დო კრებაქ მთელ გურით ქეშეხვად თინეფს (ებრაელები 12:11).

²¹ მუჭოთ ბძირითინ, მეგობრეფს შეულებნა მანგარო იმოქმედან ჩქინწკუმა. თაშ ნამდა, მნიშვნელოვან რე დაკვირვებულეფ ვორდათ მეგობრეფიშ გიშაგორუაშ დროს. მუჟამსით მიჸორა თინეფ, მიდგა იეჰოვას უჸორს, თი ხალხ შქას იპჸით, მით მიმეხვარებნა, ბოლოშა ქუდოფსქიდათ იეჰოვაშ ართგურეფ.