1. მუ საკითხშე წუხენდჷ იესო ღურაშ წოხლენ სერს?

იესო ღურაშ წოხლენ სერს მანგარო წუხენდჷ მუშ მოწაფეეფიშ მომავალშე. თის უჩქუდ, ნამდა მალას დატებელ აჸიდ თინეფ, ათეშენ უწუ: „თქვა ვა რეთ თე ქიანაშ ნაწილ“ (იოანე 15:19). თიმ სერს, უმოს გვიანო იესო მუშ ზეციერ მუმას ლოცვას ურაგადუდ: „თინეფ ვა რენა თე ქიანაშ ნაწილ, მუჭოთ მა ვა ვორექ თე ქიანაშ ნაწილ“ (იოანე 17:15, 16). მუს გულისხმენდჷ იესო?

2. მუ იგულისხმებ სიტყვას „ქიანა“?

² თაქ გიმორნაფილ სიტყვას „ქიანა“ იგულისხმებ თი ხალხ, მით ვეჩინენს ღორონთის დო სატანაშ გავლენაშ თუდო რე (იოანე 14:30; ეფესოელები 2:2; იაკობი 4:4; 1 იოანე 5:19). მუჭო შემლებნა ვა ვორდათ „თე ქიანაშ ნაწილ“? თე დუდის გარჩიებულ იჸუაფ შხვადოშხვა მხარე: მნიშვნელოვან რე, ვორდათ ღორონთიშ სამეფოშ ართგურეფ დო ნეიტრალურ პოზიცია მიღდან პოლიტიკურ საკითხეფს, ქივეწინააღმდეგათ თე ქიანაშ აზროვნებას, ჩქინ გარეგნობა დო მიკაქუნალ რდას მოკრძალებულ, გაწონასწორებულ თვალსაზრის მიღდან ფარაშე დო თეს გეძინელ, ღორონთიშ სრულ საჭურველით ვორდათ მონწყილ (ქოძირ დანართ 16).

3. მუჭო უჯინედ იესო პოლიტიკას?

³ მუჟამსით იესო დედამიწას რდუ, თინა ორწყედ, ნამდა ხალხის ბრელ პრობლემა უღუდ დო თინეფშო ადვილ ვარდ ცხოვრება. თის ოწუხუდ ხალხიშ მდგომარეობა დო მთელ გურით ოკოდ თინეფიშ მოხვარა. გინირთუო თიქ პოლიტიკურ ლიდერო? მუშო ოკო რაგად, ვარ. იესოს უჩქუდ, ნამდა ხალხიშ მოხვარა ხვალე ღორონთიშ სამეფოს, ზეციერ მთავრობას შეულებუდ, ნამდგაშ მეფე მუ თვითონ ოკო ჸოფედკო. ზუსტას ღორონთიშ სამეფო რდუ იესოშ ქადაგებაშ მთავარ თემა (დანიელი 7:13, 14; ლუკა 4:43; 17:20, 21). იესო ვა ღებულენდჷ მონაწილებას პოლიტიკურ საკითხეფს დო ირიათო ნეიტრალურ რდუ. თიქ რომიშ მართველ პონტიუს პილატეს უწუ: „ჩქიმ სამეფო თე ქიანაშ ნაწილ ვა რე“ (იოანე 18:36). თიშ მოწაფეეფ ხოლო ნეიტრალურეფ რდეს. ართ წიგნ იჩიებ, ნამდა პირველ საუკუნეშ ქრისტიანეფს პოლიტიკურ თანამდებობეფ ვა უკებდეს (On the Road to Civilization). ამდღა ხოლო ჭეშმარიტ ქრისტიანეფს თეცალ პოზიცია უღნა. ჩქი ხუც ვუკინენთ ღორონთიშ სამეფოს დო ვა ბღებულენთ მონაწილებას პოლიტიკურ საკითხეფს (მათე 24:14).

4. მუჭო უკინენა ხუც ღორონთიშ სამეფოს ნამდვილ ქრისტიანეფ?

⁴ შხვა ქიანას ელჩეფ მუნეფიშ მთავრობაშ წარმომადგენელეფ რენა, ათეშენ მონაწილებას ვა ღებულენა თი ქიანაშ საქმეეფს. ცხებულ ქრისტიანეფ ხოლო, მიდგას იესოწკუმა ართო ზეცას მართველობაშ იმენდ უღნა, თაშ იქციებნა. პავლექ ცხებულ ქრისტიანეფს მეჭარ: „ჩქი ელჩეფ ვორეთ ქრისტეშ მანგიორო“ (2 კორინთელები 5:20). ცხებულეფ ღორონთიშ სამეფოშ წარმომადგენელეფ რენა, ათეშენ ვა ღებულენა მონაწილებას პოლიტიკურ საქმეეფს (ფილიპელები 3:20). თეშ მანგიორო, თინეფ  მილიონობით კათას ოხვარნა, ქიგეგან ღორონთიშ სამეფოშ გურშენ. „შხვა შხურ“, მიდგას ახალ ქიანას მარადიულ ცხოვრებაშ იმენდ უღჷ, ხუც უკინენს ცხებულ ქრისტიანეფს დო ვა ღებულენს მონაწილებას პოლიტიკურ საკითხეფს (იოანე 10:16; მათე 25:31—40). არგამა რე, ნამდვილ ქრისტიან დღას ვემიღენს მონაწილებას მუთუნნერ პოლიტიკურ საქმეეფს (წეკითხ ესაია 2:2—4).

5. მუ რე თიშ ართ-ართ მიზეზ, მუშ გურშენით ქრისტიანეფ ჩხუპეფს ვა ღებულენა მონაწილებას?

⁵ ეროვნებაშ დო წარმოშობაშ უმკუჯინუო, ჭეშმარიტ ქრისტიანეფს თანამორწმუნეეფ მუნეფიშ ოჯახიშ წევრეფო მიორჩქუნა (1 კორინთელები 1:10). იესოქ მითითება მუჩეს, მიჸორდან და დო ჯიმალეფ, ათეშენ ჩხუპის მონაწილება თიცალ იჸუაფ, ჩქინ ოჯახიშ წინააღმდეგ ებჭოფათ  იარაღ (იოანე 13:34, 35; 1 იოანე 3:10—12). თეს გეძინელ, იესოქ მუშ მოწაფეეფს უწუ, ნამდა მუნეფიშ ნტერეფ ხოლო ოკო უჸორდესკო (მათე 5:44; 26:52).

6. მუჭო უჯინენა ღორონთიშ მსახურეფ მთავრობეფს?

⁶ ჩქი ირნერო ვოცადუთ, ვორდათ ჯგირ მოქალაქეეფ, მარა თეწკუმა ართო, მუჭოთ ქრისტიანეფს ნეიტრალურ პოზიცია მიკინებნა. მაგალთო, მთავრობაშ პატიცემას გიმიფრჩქინანთ, მუჟამსით ვომორჩილუთ კანონეფს დო ბგაფულენთ ოგაფურეფს. მარა ჩქინო ირფელშე უმოს მნიშვნელოვან რე, მუთ ღორონთის ოკუთვნუნ, ღორონთის მეფჩათ (მარკოზი 12:17; რომაელები 13:1—7; 1 კორინთელები 6:19, 20). თენა ნიშნენს მიჸორდან, დევემორჩილათ დო თაყვან ფცათ თის. ჩქი მზათ ვორეთ, სიცოცხლე ხოლო დაფთმათ, ვინემ იბდათ იეჰოვაშ ნებაშ წინააღმდეგ (ლუკა 4:8; 10:27; წეკითხ საქმეები 5:29; რომაელები 14:8).

7, 8. მუს ნიშნენს „თე ქიანაშ აზროვნება“ დო მუჭო მოქმედენს თინა ხალხწკუმა?

⁷ ვორდათ სატანაშ ქიანაშე გიშართილ, ნიშნენს ნება ვემეფჩათ „თე ქიანაშ აზროვნებას“, იმოქმედას ჩქინწკუმა. თეშა მიშურს თიცალ ფიქრეფ დო მოქმედებეფ, მუნერით სატანაშე მოურს. თეცალ აზროვნებაშ თუდო თინეფ რენა, მით ვამსახურნა იეჰოვას. მარა ქრისტიანეფ ირნერო ოწინააღმდეგნა თე ქიანაშ აზროვნებას. მუჭოთ პავლექ თქუნ, „ჩქი თე ქიანაშ აზროვნება ვემემღებნან, ჩქი ღორონთშე მიბღით წმინდა შურ“ (1 კორინთელები 2:12; ეფესოელები 2:2, 3; ქოძირ დანართ 17).

⁸ მით თე ქიანაშ აზროვნებაშ თუდო რე, ეგოისტ, ამაყ დო დაუმორჩილებელ რე. თინეფ ფიქრენა, ნამდა ვასაჭირნა ღორონთიშ მორჩილება. სატანაშ სურვილ რე, ხალხიქ  მუთ ოკონ ირფელ გაკეთას, თეშ ნამდა შედეგეფშე ვედეფიქრას დო ქუდაჯერუას, ნამდა არძაშ უმოს მნიშვნელოვან ცხოვრებას თინა რე, „მუთ ცოდამ გურს ოკო დო თოლს მოწონს“ (1 იოანე 2:16; 1 ტიმოთე 6:9, 10). სატანა ოცად, განსაკუთრებულო ღორონთიშ მსახურეფ მიოჩილითუას დო მუშობრათ ოფიქრებაფუას (იოანე 8:44; საქმეები 13:10; 1 იოანე 3:8).

9. მუჭო შილებე იმოქმედას ჩქინწკუმა „თე ქიანაშ აზროვნებაქ“?

⁹ მუჭოთ ჰაერ, ნამდგას ფსუნთქენთ, თე ქიანაშ აზროვნება ხოლო ირდიხას რე გავრცელებურ. ათეშენ თის მთელ ძალათ ვა ვოწინააღმდეგუთ-და, შილებე ადვილო ქიმოქმედას ჩქინწკუმა (წეკითხ იგავები 4:23). თექ შილებე ქიდიჭყას ართ მეჯინათ უმნიშვნელო მუდგარენეფშე: მაგალთო, ნება ქიმეფჩათ ჩქინ დუც, ნამდა ქიდიბჭყათ თინეფცალო აზროვნება დო მოქმედება, მით ვამსახურ იეჰოვას (იგავები 13:20; 1 კორინთელები 15:33). ვარდა ქიმოქმედას თიცალ მუდგარენეფქ, მუნერით რე პორნოგრაფია, განდგომილება დო სპორტიშ თიცალ სახეობეფ, ნამუთ მანგარო უნწყუნს ხეს მეტოქეობაშ შურიშ გავითარებას (ქოძირ დანართ 18).

10. მუჭო შემლებნა ქივეწინააღმდეგათ „თე ქიანაშ აზროვნებას“?

¹⁰ მუ ოკო ვაკეთათ, ნამდა ვეპჸუათ სატანაშ ქიანაშ ნაწილ? საჭირო რე, იეჰოვაწკუმა მიღდან ხოლოშიან ურთიერთობა დო საშვალება ქიმეფჩათ თიშ სიბრძნეს, ნამდა მიხემძღვანელან. თეწკუმა ართო თის ირიათო ოკო ფთხუათ წმინდა შურ დო აქტიურო მიბღათ მონაწილება მსახურებას. იეჰოვა არძაშ უმოს ძალიერ პიროვნება რე მთელ სამყაროს. ჩქი დარწმუნებულ ვორეთ, ნამდა თინა მიმეხვარებნა, ქივეწინააღმდეგათ სატანაშ ქიანაშ აზროვნებას (1 იოანე 4:4).

11. მუჭო იძირე თე ქიანაშ გავლენა ხალხიშ მუკოქუნა დო გარეგნობაშე?

¹¹ ჩქინ მუკოქუნათ დო გარეგნობათ ხოლო ვოძირანთ, ნამდა ვა ვორეთ თე ქიანაშ ნაწილ. ამდღა ბრელ თეშ მიკიქუნანს, ნამდა ქიმიქცუას შხვეფიშ ყურადღება, გურჩქინას უზნეო ფიქრეფ, გეგმოხანტას პროტესტ ვარდა ქიცქუას ქონებათ. რენა თიცალეფ ხოლო, მიდგას შურო ვა წუხენს მუშ გარეგნობა. ნამთინეს არდებულო მიკაქუნს ვარდა წინდამ ბარგით გილურს. ჩქი ნება ოკო ვემეფჩათ თეცალ აზროვნებას, ქიმოქმედას ჩქინ მუკოქუნა დო გარეგნობაწკუმა.

12, 13. ნამ პრინციპეფით ოკო იფხემძღვანელათ მიკაქუნალიშ გიშაგორუაშ დროს?

 ¹² იეჰოვაშ მსახურეფს მოკონა ირიათო სუფთას, კოხტას, გემოვნებათ დო სიტუაციას უხუჯანსინ თეშ მიკიფქუნათ. „მოკრძალებურო დო გონივრულო გიშაგორილ წესიერ მიკაქუნალით“ ვოძირანთ, ნამდა „ღორონთიშ მოშიშ“ ვორეთ (1 ტიმოთე 2:9, 10; იუდა 21).

¹³ ჩქინ გარეგნობა შხვეფს გარკვეულ წარმოდგენას უტენს იეჰოვა ღორონთ დო თიშ ხალხშე. ჩქი მოკონა, ირფელ „ღორონთიშ ოდიდებელო“ ვაკეთათ (1 კორინთელები 10:31). მოკრძალება რე, მუჟამსით პატის ფცენთ შხვეფიშ გრძნობეფს დო შეხედულებეფს. ათეშენ, მუჟამსით გინობჭყვიდუნთ, მუ მიკიფქუნათ ვარდა მუნერ გარეგნობა მიღდან, ოკო ფშუდან, ნამდა ჩქინ არჩევან შხვეფწკუმა მოქმედენს (1 კორინთელები 4:9; 2 კორინთელები 6:3, 4; 7:1).

14. მუ საკითხეფშე ოკო დეფიფქრათ, მუჟამსით მიკაქუნალს გიშაბგორუნთ ქრისტიანულ შეხვალამეფშო ვარდა მსახურებაშო?

¹⁴ მუჭო მიკმოქუნა კრებაშ შეხვალამეფს დო მსახურებაშ დროს? ზედმეტ ყურადღებას ხომ ვემიფქციენთ ჩქინ მიკაქუნალით? უხერხულს ხომ ვენვოჸოთანთ შხვეფს? ხომ ვა ფიქრენთ, ნამდა მითინიშ საქმე ვა რე, მუს მიკიფქუნანთ? (ფილიპელები 4:5; 1 პეტრე 5:6). მართალ რე, არძას მოკონა, სქვამას მიკმოქუნდან, მარა არძაშ უმოსო მუთ მასქვამენან, თენა რე ქრისტიანულ თვისებეფ. ზუსტას თე თვისებეფს ოკვირ იეჰოვა, მუთ ოძირანს, მუნერ რე ჩქინ „შინაგან პიროვნება, ნამუთ . . . ღორონთიშ თოლს უძვირფასეს“ რე (1 პეტრე 3:3, 4).

15. მუშენ ვა მუჩეს იეჰოვაქ კანონეფიშ სია, მუ მიკიფქუნათ დო მუ ვარ?

¹⁵ იეჰოვა ვა მარზენა კანონეფიშ სიას, მუ მიკიფქუნათ დო მუ ვარ. თეშ მანგიორო, მარზენა ბიბლიურ პრინციპეფს, მუთ მოხვარნა, მიბღათ სწორ გადაწყვეტილებეფ  (ებრაელები 5:14). თის ოკო, ჩქინ არძა გადაწყვეტილებაშე იძირედას ღორონთიშ დო მოყვასიშ ჸოროფა (წეკითხ მარკოზი 12:30, 31). მთელ მსოფლიოს იეჰოვაშ ხალხ მუნეფიშ გემოვნებას დო კულტურას ოსადაგუნ თეშ მიკიქუნანს. თეცალ განსხვავებულ მიკოქუნა დო გარეგნობა ასქვამენს ჩქინ დიდ ოჯახის.

16. მუნერ დამოკიდებულება უღჷ ქვეყნიერებას ფარაწკუმა, მარა მუ თქუ იესოქ? მუ ოკო ბკითხათ ჩქინ დუც?

¹⁶ სატანას ოკო ქუდაჯერუას ხალხ, ნამდა ფარას დო მატერიალურ ნივთეფს ბედნერობა მოუღ, მარა იეჰოვაშ  მსახურეფს უჩქნა, ნამდა თენა ტყურა რე. ჩქი ბჯერა იესოშ სიტყვეფიშ: „ქონებას ვარსხებე კოჩ ღურაშე“ (ლუკა 12:15). ფარას ვეშულებ, მომღან ნამდვილ ბედნერობა. ფარათ ვა მაჸიდირენა ნამდვილ მეგობრეფ, სიმშვიდე დო მარადიულ სიცოცხლე. მუშო ოკო რაგად, ჩქი მოსაჭირნა გარკვეულ მატერიალურ ნივთეფ დო მოკონა, სიცოცხლეთ გეფხარათ. მარა იესოქ თქუ, ნამდა ბედნერეფ თიმწკუმა იპჸუაფუთ, მუჟამსით ჯგირ ურთიერთობა მაღვენუნა იეჰოვაწკუმა დო თიშ თაყვანიშცემას ჩქინ ცხოვრებას პირველ ადგილს ქიგვორინუანთ (მათე 5:3; 6:22). ქოკითხ სქან დუც: ჩქიმწკუმა ხოლო მოქმედენსო ფარაშ გურშენ თი დამოკიდებულება, მუთ ქვეყნიერებას უღჷ? ირიათო ფარა ხომ ვა რე ჩქიმ ოფიქრებელ დო ორაგადე თემა? (ლუკა 6:45; 21:34—36; 2 იოანე 6).

17. მუჭო გეუჯგუშებ ჩქინ ცხოვრება, მუჟამსით ვა მაღვენუნა ფარაშ გურშენ თიცალ შეხედულება, მუნერით ქვეყნიერებას უღჷ?

¹⁷ მუჟამსით აქტიურო მიბღენთ მონაწილებას იეჰოვაშ მსახურებას დო ვა მაღვენუნა თიცალ შეხედულება ფარაშენ, მუნერით ქვეყნიერებას უღჷ, ჩქინ ცხოვრება აზრიან დო ბედნერ იჸუაფ (მათე 11:29, 30), მაღვენუნა კმაყოფილებაშ გრძნობა დო შინაგან სიმშვიდე (მათე 6:31, 32; რომაელები 15:13), ბრელს ვებწუხენთ ფარა დო მატერიალურ ნივთეფშე (წეკითხ 1 ტიმოთე 6:9, 10), ჩქინ დუდშა გეგმობცადუნთ თი ხიოლს, მუთ ჯგირიშ კეთებას მოუღ (საქმეები 20:35), საშვალება მაღვენნა, მეტ დრო დავუთმათ თინეფს, მით მიჸორა დო თეს გეძინელ, შილებე უმოს მშვიდას ხოლო ქიდიბრულუათ (ეკლესიასტე 5:12).

18. მუშ კეთებას ოცად სატანა?

¹⁸ სატანა ოცად, გილამლუან იეჰოვაწკუმა ურთიერთობა,  ათეშენ ირნერო ოკო ვეცადათ, ვემეფჩათ თეშ საშვალება. ჩქი „ვობრძოლუთ ზეციერ უბადო შურეფს“ (ეფესოელები 6:12). სატანას დო თიშ დემონეფს ვაკონა, ბედნერეფ ვორდათ დო მარადიულო იფცხოვრათ (1 პეტრე 5:8). თე ძალიერ ნტერეფ მობრძოლნა, მარა იეჰოვაშ მოხვარათ შემლებნა გივორჯგინათ თინეფს.

19. მუჭო რე ეჭარილ ეფესოელეფიშ 6:14—18-ს ქრისტიანეფიშ „საჭურველ“?

¹⁹ ჯვეშო ჩხუპიშ დროს ჯარიშკოჩის დუდ ვა დაცვებედ საჭურველიშ უმშო. ამდღა ჩქი ხოლო მოსაჭირნა „საჭურველ“, ნამდგას იეჰოვა მარზენა (ეფესოელები 6:13). თინა მიცვენა ჩქინ ნტერეფშე. თე საჭურველიშ გურშენ ეფესოელეფიშ 6:14—18-ს ბკითხულენთ: „მანგარო გერდათ, ჭეშმარიტებაშ ორტყაფ კეთებულ, სიმართლეშ ჯავშან მიკოქუნელ დო კუჩხმოდვალირ მშვიდობაშ ამბეშ ოხარებელო. თეს გეძინელ, გეჭოფით რწმენაშ დიდ ფარ, მუდგათ შეგალებენა უბადოშ დაჩხერმონტებულ ისარეფიშ ეჩილითაფა. თეწკუმა ართო, ქიგირთვით რსხებაშ მუზარად დო გეჭოფით შურიშ მახვილ — ღორონთიშ სიტყვა. ირო მთელ გურით ილოცით დო იხვეწით“.

20. მუ ოკო ვაკეთათ, ნამდა სულიერ „საჭურველქ“ დამცვან?

²⁰ ჯარიშკოჩის ჩხუპიშ დროს საჭურველიშ ნამდგაინ ნაწილ გაჭყორდუდ-და, ნტერ ზუსტას თი ადგილს გეუწურუანდჷ, ნამუთ ფორილ ვაფუდ. თეშნერო, ქუმოკონა სულიერ საჭურველქ დამცვან-და, ოკო ვაგმოჭყორდან თიშ ნამთინ ნაწილიშ გიმორნაფაქ, ირო მიკმოქუნდან თე საჭურველ დო მუკულუათ, ნამდა ჯგირ მდგომარეობას მიღდან. სატანაშ დო თიშ დემონეფიშ წინააღმდეგ თეიშახ მაჸინა ობრძოლებერ, სოიშახ ღორონთ საბოლათ ვა მოსპუნს თინეფს (გამოცხადება 12:17; 20:1—3). თაშ ნამდა,  ვემვოტუათ ჩქინ სუსტ მხარეეფ დო არასწორ სურვილეფწკუმა ბრძოლა! (1 კორინთელები 9:27).

21. მუჭო შემლებნა გივორჯგინათ სატანას?

²¹ მუშო ოკო რაგად, ჩქინ ძალეფით სატანაშა ვამმარიებენა, მარა იეჰოვაშ მოხვარათ თენა შეიოლებერ რე! ლოცვაშ, ბიბლიაშ გურაფაშ დო და დო ჯიმალეფწკუმა ურთიერთობაშ საშვალებათ შემალებენა, ბოლოშა ართგურეფ ქუდოფსქიდათ (ებრაელები 10:24, 25). თე ირფელ მიმეხვარებნა, დეფცვათ ჩქინ რწმენა დო ვა ვოდინუათ ღორონთიშ ართგურობა.

22, 23. ა) მუჭო შემლებნა ირიათო მზათ ვორდათ ჩქინ რწმენაშ დაცვებელო? ბ) მუს გუვარჩიენთ უკულიან დუც?

²² ირ დროს მზათ ოკო ვორდათ ჩქინ რწმენაშ დაცვებელო (იოანე 15:19). ნამთინე საკითხის იეჰოვაშ მოწმეეფიშ პოზიცია მანგარო გენესხვავებ ხალხიშ უმენტაშიშ აზრშე. ქოკითხ სქან დუც: ბოლოშა ქუმარჩქილენო, მუშენ მიღნა იეჰოვაშ მოწმეეფს თეცალ პოზიცია? ქუვორექო დარწმუნებულ, ნამდა მუდგას ბიბლია დო გონიერ მონა იჩიებ, სიმართლე რე? ხომ ვა მოონჯღორ, ნამდა იეჰოვაშ მოწმე ვორექ? (ფსალმუნი 34:2; მათე 10:32, 33). შემლებნო შხვეფს გევუნწყე, მუ ბწანს? (მათე 24:45; იოანე 17:17; წეკითხ 1 პეტრე 3:15).

²³ ბრელ სიტუაციას ადვილ რე თიშ ძირაფა, მუ ოკო ვაკეთათ, ნამდა გიშართილ ვორდათ თე ქვეყნიერებაშე. მარა რე თიცალ შემთხვევეფ ხოლო, მუჟამსით თენა არგამათ ვეძირე. სატანა შხვადოშხვა საშვალებეფით ოცად ჩქინ მეჩილითაფას. ართ-ართ მეთოდ, ნამდგას თინა გიმირინუანს, რე გართობა. მუჭო შემლებნა გართობაშ გონივრულო გიშაგორუა? თე საკითხის უკულიან დუც გუვარჩიენთ.