1, 2. მუ გეგმა დანწყუ ბალაამქ იეჰოვაშ ხალხიშ ოჩილითაფარო?

მეჩხომე გორუნს თიცალ ადგილს, სოდეთ მუს ოკონ ფერ ჩხომ უწონებ. თინა გიშაგორუნს ჩხომიშ მატყურაფალს დო ანკესის წყარს ინაჸათანს. მეჩხომე მოთვინებათ უჯინე, მუჟამ მეურს ჩხომ ანკესშა დო მუჭოთ ქიმკაბუნუნ, ხეთეშე იჭყანს თიშ ეშაჸონაფას.

² თეცალ მეთოდეფით ხალხიშ შეცდომაშა მიშაჸუნაფა ხოლო შილებე. მაგალთო, ისრაელეფ უკვე მენჭაფილ რდეს დუნაპირებ ქიანაშა, მუჟამსით მოაბიშ დიხას კარავეფ გოშალეს. მოაბიშ მეფექ ბრელ ფარა შეპირ ბალაამს, ნამდა დოჭყუკო ისრაელ ხალხ. ბალაამქ დოგორ საშვალება, ნამდა ისრაელეფს მუნეფიშით დუჭყუდესკო მუნეფიშ დუდ. თიქ მოხუჯურო ქუდანწყუ გეგმა დო ახალგაზრდა დო სქვამ მოაბელ ოსურეფ მიდაშქვჷ ისრაელ კოჩეფიშ ოჩილითაფარო (რიცხვები 22:1—7; 31:15, 16; გამოცხადება 2:14).

3. მუჭო იმოქმედ ბალაამიშ გეგმაქ?

³ ბალაამიშ გეგმაქ გამართლჷ. ანთასობით ისრაელ ქომოლკოჩიქ „ქიდიჭყ სექსუალურ უზნეობა“ მოაბელ  ოსურეფწკუმა. თეს გეძინელ, ტყურა ღორონთეფიშ თაყვანიშცემა ხოლო ქიდიჭყეს, მაგალთო ფეორიშ ბაალიშ თაყვანიშცემა, ნამუთ გარყვნილებაშ ღორონთო ითვალუდ. შედეგო 24 000 ისრაელქ გოჭყორდჷ დუნაპირებ ქიანაშ საზღვარს (რიცხვები 25:1—9).

4. მუშენ ეიაჸუნ ანთასობით ისრაელქ სექსუალურ უზნეობას?

⁴ მუშენ ეიაჸუნ ანთასობით ისრაელქ სექსუალურ უზნეობას? თინეფ ხვალე მუნეფიშ სიამოვნებაშე ფიქრენდეს დო გაჭყორდეს ირფელქ, მუთ იეჰოვაქ აკეთ თინეფშო. ისრაელეფს ბრელ მიზეზ უღდეს, ქუდოსქიდესკო ღორონთიშ ართგურეფ. იეჰოვაქ თინეფ ეგვიპტეშ მონობაშე დერსხჷ, ოჭკუმალს ვარკენდჷ უდაბნოს დო უსაფრთხოთ ქიმიჸონ დუნაპირებ ქიანაშ საზღვარშა (ებრაელები 3:12). მარა თე ირფელიშ უმკუჯინუო, იშენით გეიაჸუნეს უზნეობას. მოციქულ პავლექ ჭარჷ: „ვართ სექსუალურ უზნეობას ეიაჸუნათ, მუჭოთ ნამთინექ ეიაჸუნ“ (1 კორინთელები 10:8).

5, 6. მუშ გურაფა შემლებნა თევრეშე, მუდგაქ მოაბიშ საზღვარწკუმა მოხვად?

⁵ ახალ ქიანა მონჭაფილ რე. ისრაელეფცალო ჩქი ხოლო დუნაპირებ ქიანაშ საზღვარს გივორეთ (1 კორინთელები 10:11). ამდღარ ქიანას უზნეობა უმოსო რე გავრცელებურ, ვინემ თენა მოაბის რდუ. ათეშენ, შილებე თეცალ გარემოქ ადვილო ქიმოქმედას ღორონთიშ ხალხწკუმა. არგამა რე, არძაშ უმოს ეფექტურ საშვალება, მუდგას სატანა გიმირინუანს სექსუალურ უზნეობა რე (რიცხვები 25:6, 14; 2 კორინთელები 2:11; იუდა 4).

⁶ ქოკითხ სქან დუც: მუს გიშაბგორუნქ — სიამოვნებას, ნამუთ ჭიჭე ხანს იგრძელებ დო ვარ ბედნერ ცხოვრებას მარადიულო ახალ ქიანას? ვაღირნო ირფელ გუვაკეთათ  დო მივაჸუნათ იეჰოვაშ თე მითითებას, ნამდა „ვემკვანჭათ უზნეობას“?! (1 კორინთელები 6:18).

7, 8. მუ რე სექსუალურ უზნეობა დო მუ შედეგეფ მაჸუნუ თის?

⁷ ამდღა ხალხიშ უმენტაშის შუროთ ვაონჯღორ, ნამდა ვემეჸუნს ღორონთიშ მაღალზნეობრივ ნორმეფს. ბიბლიურ გაგებათ უზნეობა რე სექსუალურ ხასიათიშ მოქმედებეფ თინეფ შქას, მით ვა რე კანონიერ ქორწინებას. უზნეობაშა მიშურს სექსუალურ ხასიათიშ მოქმედებეფ ართ სქესიშ პიროვნებეფ შქას დო სქესობრივ ურთიერთობა ადამიანეფ დო ცხოველეფ შქას. სექსუალურ ხასიათიშ მოქმედებეფ რე: სექსუალურ ურთიერთობა, ორალურ სექსი, ანალურ სექსი დო სექსუალურ სურვილეფიშ დაკმაყოფილებაშ მიზანით, შხვა პიროვნებაშ სასქესო ორგანოეფიშ შეხება (ქოძირ დანართ 23).

⁸ ბიბლია არგამათ იჩიებ, ნამდა კრებაშე გერიცხებ თინა, მით აგრძელენს უზნეო ცხოვრებას დო ვა ნარღენს მუშ საქციელს (1 კორინთელები 6:9; გამოცხადება 22:15). თეს გეძინელ, თეცალ პიროვნება ოდინუანს მუშ დუდიშ პატიცემას დო შხვეფიშ ნდობას. უზნეო ცხოვრებას გლახა შედეგეფ მოჸუნს. მაგალთო, თეცალ პიროვნება შილებე სინდისიქ შეაწუხას. თეს გეძინელ, თიცალ პრობლემეფ მოუღას, მუნერით რე: არასასურველ ორსულობა, პრობლემეფ ქორწინებას, ლახალა ვარდა ღურა (წეკითხ გალატელები 6:7, 8). მუჟამსით პიროვნება თე ირფელშე დეფიქრებ, შილებე გეგნოჭყვიდას, მიოტუას უზნეო ცხოვრება. მარა, მუჟამსით პიროვნება, პირველ ნაბიჯის გინმოდგუნს უზნეობაშა, თეცალ დროს ხვალე მუშ დუდიშ სიამოვნებაშე ფიქრენს. თე პირველ ნაბიჯ ხშირას პორნოგრაფია რე.

9. მუშენ რე პორნოგრაფია საშიშ?

⁹ პორნოგრაფია სექსუალურ სურვილეფს ოკურცხინუანს. ამდღა პორნოგრაფიას ირ დიხას შეფხვადუთ, მაგალთო, ჟურნალეფს, წიგნეფს, ობირეშეფს, სატელევიზიო გადაცემეფს დო ინტერნეტის. ბრელ ფიქრენს, ნამდა პორნოგრაფიას მუთუნ გლახა ვა რე, მარა სინამდვილეს თინა მანგარ საშიშ რე. თის შეულებ პიროვნება სექსიშ მონათ გინაშქვას დო მავნებელ სურვილეფ გურჩქინას. პიროვნებას, მით პორნოგრაფიას უჯინე, შილებე ჩვევათ გინართას მასტურბაციაქ, პრობლემეფქ გურჩქინდას ქორწინებას ვარდა ოჯახიქ აკუცუას (რომაელები 1:24—27; ეფესოელები 4:19; ქოძირ დანართ 24).

10. მუჭო მიმეხვარებნა იაკობიშ 1:14, 15-ის მოჩამილ პრინციპ ვევაჸუნათ უზნეობას?

¹⁰ მნიშვნელოვან რე, მარჩქილედან, მუჭო შეულებ უზნეობას იმოქმედას ჩქინწკუმა. ქიდეკვირ, მუნერ გაფრთხილება რე მოჩამილ იაკობიშ 1:14, 15-ის: „თითოულს გიმოცადუნს მუშ სურვილ, ნამუთ გეიჸუნუანს დო ოჩილითუანს თის. სურვილს, მუჟამსით გევითარებ, მოჸუნს ცოდვა დო დაშებულ ცოდვას — ღურა“. თაშ ნამდა, მუჟამსით არასწორ ფიქრეფ ქუმმალენა, ხეთეშე ოკო მიფშორათ თინა. ეროტიკულ სურათეფქ შემთხვევით თოლშა ქუმოიოლ-და, ხეთეშე აურიდე თოლ! გოთიშ კომპიუტერ ვარდა შხვა არხშა გეგნაჸათ ტელევიზორ. ვემეჩა უფლება არასწორ სურვილეფს ქიმოქმედას სქანწკუმა. თაშ ვემიქციებუქ-და, არასწორ სურვილეფქ შილებე თეშ გევითარას, ნამდა გაიჭირდას თინეფიშ გაკონტროლებაქ (წეკითხ მათე 5:29, 30).

11. მუჭო მიმეხვარებნა იეჰოვა, გივორჯგინათ უზნეო ფიქრეფს?

¹¹ იეჰოვა თიშე უჯგუშო მიჩინენა, ვინემ ჩქი იფჩინენთ  ჩქინ დუც. თის ჯგირო უჩქჷ, ნამდა არასრულყოფილეფ ვორეთ. მარა ღორონთის თინა ხოლო უჩქჷ, ნამდა შემლებნა გივორჯგინათ არასწორ სურვილეფს. იეჰოვა მირაგადნა: „ათეშენ ქინაჸვილით ხორციელ სურვილეფ, ნამდა ვეიაჸუნათ უზნეობას, უწმინდურებას, გაუკონტროლებერ სექსუალურ სურვილეფს, ზიანიშ მუმაღალარ სურვილეფს დო ჰარამობას, მუთ კერპთაყვანიშცემა რე“ (კოლოსელები 3:5). მართალ რე, თეშ კეთება ადვილ ვა რე, მარა იეჰოვა მომთმენ რე დო მზათ რე, ქიმმეხვარან (ფსალმუნი 68:19). ართ ახალგაზრდა ჯიმას ჩვევათ გინართ პორნოგრაფიაშ ჯინაქ დო მასტურბაციაქ. თიშ სკოლაშ მეგობრეფს თეცალ საქციელ ნორმალურო მიორჩქუდეს, მარა თე ჯიმა იჩიებ: „თექ სინდის გილამლუ დო უზნეო ცხოვრება ქიდიბჭყჷ“. თიქ ქიმეხვად, ნამდა საჭირო რდუ სურვილეფიშ გაკონტროლება დო იეჰოვაშ მოხვარათ მიშორ თე გლახა ჩვევეფ. უზნეო ფიქრეფ თქვა ხოლო ქუგაწუხენან-და,  ქოთხით იეჰოვას „ძალა, ნამუთ ჩვეულებრივშე უმოს რე“, ნამდა თქვან ფიქრეფ ირიათო სუფთა რდას (2 კორინთელები 4:7; 1 კორინთელები 9:27).

12. მუშენ რე საჭირო, დოფთხილუათ ჩქინ გურ?

¹² სოლომონქ ჭარჷ: „ირფელშე უმოსო გურ დოთხილე, მუშენდა თევრეშე მოურს სიცოცხლე“ (იგავები 4:23). „გურ“ რე ჩქინ შინაგან პიროვნება, ნამდგას იეჰოვა ორწყე. თოლით ნაძირეფ მანგარო მოქმედენს ჩქინწკუმა. ართგურ იობიქ თქუ: „პირობა ქიმეფჩჷ ჩქიმ თოლეფს დო მუჭო დოვუჭყანდჷ ცირასქუას შხვა თოლით ჯინას?!“ (იობი 31:1). იობცალო, საჭირო რე, ჩქი ხოლო გუვაკონტროლათ, მუს ვუჯინეთ დო მუშე ფიფქრენთ. თეს გეძინელ, ფსალმუნმაბირეცალო იეჰოვას ოკო ქოფთხუათ: „ქიმმეხვარ, თოლ ევუჩილითუე ირნერ გლახას“ (ფსალმუნი 119:37).

13. მუნერ მეგობრეფ გიშეგორ დინაქ?

¹³ მეგობრეფს შეულებნა ქოთ ჯგირო დო ქოთ გლახათ იმოქმედან ჩქინწკუმა. თიცალ მეგობრეფიშ გიშაგორუა, მით ღორონთიშ ნორმეფით ცხოვრენს, მიგეხვარებ, სი ხოლო თაშ იცხოვრე (იგავები 13:20; წეკითხ 1 კორინთელები 15:33). დინაშ მაგალითშე ვორწყეთ, მუშმადიდა მნიშვნელობა უღჷ მეგობრეფიშ გიშაგორუას. იაკობიშ ოსურსქუა დინა ირდუდ ოჯახის, ნამუთ იეჰოვას ცენდჷ თაყვანს. თინა წესიერ ძღაბ რდუ, მარა მეგობრობა ქიდიჭყჷ ქანაანელ ძღაბეფწკუმა, მით ვამსახურდეს იეჰოვას. ღორონთიშ ხალხიშ გინაწონს, ქანაანელეფ შხვანერო უჯინედეს ზნეობრივ საკითხეფს დო არძას ჯგირო უჩქუდ, მუნერ უზნეო ცხოვრებას მეჸუნდეს თინეფ (ლევიანები 18:6—25). მუჟამსით დინა  მეგობრეფწკუმა რდუ, თიქ ქანაანელ ბოშ, შექემ გეჩინებაფუ; თის მანგარო მეწონ დინაქ. შექემ „არძაშ უმოს პატიცემულ“ ახალგაზრდა კოჩ რდუ მუშ ოჯახის, მარა თის ვა უჸორდ იეჰოვა (დაბადება 34:18, 19).

14. მუქ მაჸუნ დინაშ არჩევანს?

¹⁴ შექემქ თინა აკეთ, მუთ ჩვეულებრივ დო მისაღებ რდუ თიშო. თის მოწონდჷ დინა, ათეშენ მიდეჸონ დო ძალაშ გიმორნაფათ ქიდინჯირ თიწკუმა (წეკითხ დაბადება 34:1—4). თეს უბედრობაქ ქუმაჸუნ მუჭოთ დინაშო, თეშ მთელ თიშ ოჯახშო (დაბადება 34:7, 25—31; გალატელები 6:7, 8).

15, 16. მუ მიმეხვარებნა სიბრძნეშ მეღებას?

¹⁵ შუროთ ვა რე საჭირო დინაშ შეცდომეფ გემეობრათ, ნამდა ქიმეფხვადათ იეჰოვაშ ზნეობრივ ნორმეფ ჩქინ საჯგირობუოთ რე. იგავეფიშ 13:20-ის ჭარჷ: „მით ბრძენეფწკუმა გილურს, დებრძენებ, სულელეფწკუმა საქმეშ დუმაკინებელ უბედრობას ქიმიკინდუანს“. გინოჭყვიდილ გაფდას, ქინანჭე თის, „მუთ ჯგირ რე“, თეშნერო დუც ეუჩილითუანქ გლახა შედეგეფს, მუდგას გურჭუა დო ტანჯება მოჸუნს (იგავები 2:6—9; ფსალმუნი 1:1—3).

¹⁶ ღორონთიშ სიტყვაშ გურაფა, გადაწყვეტილებაშ მეღებაშახ ლოცვა დო ართგურ დო გონიერ მონაშ რჩევეფიშ გიმორნაფა, მიმეხვარებნა სიბრძნეშ მეღებას (მათე 24:45; იაკობი 1:5). მუშო ოკო რაგად, არასრულყოფილეფ ვორეთ დო მუდგარენ კილ არძას მიღნა (იერემია 17:9). მუნერ რეაქცია გაღვენუდ, მუჟამსით მიდგარენ გუგაფრთხილენდჷ, ნამდა ჩილათაშა ჭიჭე მეიძ? გეწყინებუდუო დო ვარ თანდაბლურო მიღენდ რჩევას? (2 მეფეები 22:18, 19).

17. ქიმიჸონ მაგალით, მუჭო შილებე მიმეხვარან თანაქრისტიანიშ რჩევაქ.

 ¹⁷ მაგალთო, წერმიდგინ, სამუშას თანამშრომელ განსაკუთრებულო ოქცუ ქრისტიან დას დო პაემანშა აპეჯენს. თინა ვა რე იეჰოვაშ მოწმე, მარა ჯგირ პიროვნებათ იძირე. შხვა და, ნამდგაქ თინეფ ართო ძირჷ, უმოს გვიანო აფრთხილენს თის. მუნერ რეაქცია აღვენუ თე დას? ხომ ვედიჭყანს დუდიშ გიშაღალას დო ვარ გონივრულო მირჩქინანს თე გაფრთხილებას? შილებე თე დას უჸორს იეჰოვა დო ოკო სწორას მიქცუას, მარა პაემანშა გილულა გაგრძელ-და, ქირაგადენო, ნამდა მეჸუნს ბიბლიურ რჩევას, დუდ აურიდას უზნეობას დო ვარ მუშ გურშა რე დაიმენდებულ? (იგავები 22:3; 28:26; მათე 6:13; 26:41).

18, 19. გენწყ, მუჭო ეუჩილითუ იოსებიქ დუდ უზნეობას.

¹⁸ ახალგაზრდა იოსებ ეგვიპტეს მონობას ჸუნდეს.  ბატონიშ ოსურ იოსების ირ დღას ურაგადუდ, ქუდუნჯირუდკო თიწკუმა, მარა თის უჩქუდ, ნამდა თენა ვა რდუ სწორ. იოსების უჸორდჷ იეჰოვა დო ოკოდ თიშ მოსაწონო მიქცუკო. თაშ ნამდა, ირიათო, მუჟამსით თე ოსურ ოცადუდ იოსებიშ ჩილათას, თინა ხოლოშა ვემკინჭანდჷ თის. იოსებ მონა რდუ, ათეშენ ვეშულებუდ მუშ ბატონიშ დოტება. ართშა, მუჟამსით ბატონიშ ოსურქ კინ ქეცად თიშ ჩილათას, იოსებიქ ენტჷ თის (წეკითხ დაბადება 39:7—12).

¹⁹ სიტუაცია გვალო შხვანერ იჸუაფუდ, მუჟამსით იოსებ უზნეო ფიქრეფს დუც ქიმეჩანდჷ ვარდა თე ოსურშე ქიოცნებენდჷ. მარა იოსებშო ირფელიშ უმოს მნიშვნელოვან იეჰოვაწკუმა ურთიერთობა რდუ. თიქ მუშ ბატონიშ ოსურს უწუ: „ჩქიმ ბატონს . . . სქანიშ მეტ მუთუნშე ვა უთქუალ ჩქიმდა ვარია, მუშენდა თიშ ოსურ რექ. მუჭო ვაკეთა თეშმადიდა უბადობა დო შებცოდა ღორონთის?!“ (დაბადება 39:8, 9).

20. სოვრეშე მიჩქნა, ნამდა იოსებ გურს უხარენდჷ იეჰოვას?

²⁰ მართალ რე, იოსებ შორს რდუ მუშ ოჯახშე, მარა თინა ირიათო ღორონთიშ ართგურ რდუ დო იეჰოვაქ ხოლო დოხვამუ (დაბადება 41:39—49). იეჰოვას გურს უხარენდჷ იოსებიშ ართგურობა (იგავები 27:11). მუშო ოკო რაგად, ადვილ ვა რე, ვეიაჸუნე უზნეობას, მარა ვაგგოჭყორდას ბიბლიას ინოჭარილ სიტყვეფქ: „იეჰოვაშ მოჸოროფეეფ, გიჯოგეთ უბადობა. თინა თხილანს მუშ ართგურეფიშ სიცოცხლეს; უბადოეფიშ ხეშე ირსხენს თინეფს“ (ფსალმუნი 97:10).

21. მუჭო მიაჸუნ იოსებიშ მაგალითის ართ ახალგაზრდა ჯიმაქ?

²¹ იეჰოვაშ მსახურეფ ირ დღას გაბედულო ოძირანა, ნამდა ჯოგნა, მუთ გლახა რე დო უჸორა, მუთ ჯგირ რე  (ამოსი 5:15). ვა უღჷ მნიშვნელობა, მუ ხელა რექ, სი შეილებ იეჰოვაშ ართგურ ქუდოსქიდე. ართ ახალგაზრდა ჯიმაშ რწმენაქ სკოლას გეგმიცად. თანაკლასელ ძღაბიქ უწუ, ნამდა მათემატიკაშ ტესტის დაჭარაფუანდ-და, თიწკუმა სექსი აღვენუდ. მუჭო მიქცუ თე ჯიმაქ? თიქ იოსებიშ მაგალითის მიაჸუნ. თინა იჩიებ: „ხეთეშე ვარია ქოვუწი. ართგურობაშ შენარჩუნებაშ შედეგო ვამდინუაფ ღირსება დო დუდიშ პატიცემა“. უზნეო საქციელით მეღებულ დროებით სიამოვნებას დიდ გურჭუა მოჸუნს (ებრაელები 11:25). თეშ გინაწონს, იეჰოვაშ მორჩილებას მარადიულ ბედნერობა მოუღ (იგავები 10:22).

22, 23. მუჭო მოხვარნა იეჰოვა თი დროს ხოლო, მუჟამსით სერიოზულო ვაშენთ?

²² სატანა ეცადებ, გეგმირინუას უზნეობა ჩქინ მიოჩილითაფარო, მუდგაქ შილებე დიდ გამოცდათ გინმართან. მინშა არძას მუმალენა არასწორ ფიქრეფ (რომაელები 7:21—25). იეჰოვას არჩქილე თენა დო ვაჭყორდუ, ნამდა „ტვერ ვორეთ“ (ფსალმუნი 103:14). ქრისტიანქ სერიოზულო ქუდაშუ-და, ნიშნენსო, ნამდა უიმენდო მდგომარეობას რე? მუშო ოკო რაგად, ვარ. თინა მთელ გურით ქონარღენს-და, იეჰოვა მზათ რე, ქაპატუას დო ქიმეხვარას თის (ფსალმუნი 86:5; იაკობი 5:16; წეკითხ იგავები 28:13).

²³ თეწკუმა ართო, იეჰოვაქ „ძღვინო მუჩეს ადამიანეფ“ — მოჸოროფე უხუცესეფ, მით ბრელს ხანდენა ჩქინო (ეფესოელები 4:8, 12; იაკობი 5:14, 15). უხუცესეფიშ საშვალებათ ღორონთ მოხვარნა, მუწკუმა ჯგირ ურთიერთობა დიფრთინუათ (იგავები 15:32).

24, 25. მუჭო მიმეხვარებნა გონიერება, დუდ ევუჩილითუათ უზნეობას?

²⁴ სწორ გადაწყვეტილებეფიშ მიოღებელო ოკო მარჩქილედან, მუ ჯგირობუა მოუღ იეჰოვაშ კანონეფს. ჩქი ვა მოკონა, ვაგურათ თი ახალგაზრდა კოც, ნამუთ ეჭარილ რე იგავეფიშ 7:6—23-ს. თიქ ვეგმირჩქინ გონიერება, ათეშენ უზნეობაშ მახეს ქინოლ. გონიერება რჩქინაშე უმოს მეტ რე. გონიერეფ ქუვორეთ-და, ვეცადებუთ, ქინვანჭათ იეჰოვაშ აზროვნებას დო გეგმიბრინუათ თინა ჩქინ ცხოვრებას. დღას ვაგგოჭყორდან თე ბრძნულ სიტყვეფქ: „მით გონიერებას ავითარენს, თის მუშ დუდ უჸორს; მიდგა გურგოჩამილობას გიმირჩქინანს, თინა ხეგომორძგვილ იჸუაფ“ (იგავები 19:8).

²⁵ ქორექო ბოლოშა დარწმუნებულ, ნამდა ღორონთიშ ნორმეფ სამართლიან რე? ქორჯერსო, ნამდა თინეფიშ მეჸუნათ ბედნერ იჸუაფუქ? (ფსალმუნი 19:7—10; ესაია 48:17, 18). დიო ხოლო ბოლოშა დარწმუნებულ ვა რექ-და, ქიგიშინ თი ირფელ, მუთ იეჰოვაქ სქანო აკეთ. ფსალმუნიშ 34:8 მირაგადნა: „გამორსით დო ქოძირუნთ, ნამდა ჯგირ რე იეჰოვა!“. მუთ უმოს ხშირას გიმირინუანქ თე რჩევას, თით უმოსო გეჸოროფებ ღორონთ. ქიჸოროფე, მუთ ღორონთის უჸორს დო გიჯოგე, მუთ თის ჯოგჷ. გონება თიცალ ფიქრეფით გეიოფშ, მუთ ჭეშმარიტ, მართალ, წმინდა, ჸოროფაშ ღირს დო ზნეობრივ რე (ფილიპელები 4:8, 9). შემლებნა მივაჸუნათ იოსებიშ მაგალითის, ნამუთ გიმირინუანდჷ იეჰოვაშ სიბრძნეს (ესაია 64:8).

26. მუს გუვარჩიენთ უკულიან დუც?

²⁶ ვა უღჷ მნიშვნელობა, დაქორწინებულ ვორეთ დო ვარ, იეჰოვას ოკო, გეფხარათ სიცოცხლეთ დო ვორდათ ბედნერეფ. თე წიგნიშ უკულიან ჟირ დუდის გარჩიებულ რე, მუ რე საჭირო თიშო, ნამდა მიღდან ბედნერ ოჯახ.