1—3. ა) ნამ რე თი ართ-ართ ძღვინ, ნამუთ იეჰოვაქ მაჩუქეს? მუჭო შილებე არასწორო გეგმიბრინუათ თინა? ბ) მუჭო ოკო გიმიბრინუათ რაგადიშ ძღვინ?

მუმა მუშ ბოშის ველისპეტის აჩუქენს. თის ოხიოლ, ნამდა შეულებ სქუას თეცალ საჩუქარ გუკეთას. მარა ბაღანა ფრთხილას ვეჸუაფ, შხვას ქარაგუ დო დაზიანენს-და, მუჭო იგინანს მუმა დუც?

² „არძანერ ჯგირ დო სრულყოფილ ძღვინ“ იეჰოვაქ მუჩეს (იაკობი 1:17). ართ-ართ ძვირფას ძღვინ რაგადიშ უნარ რე. თენა მარზენა საშვალებას, გეგმოფხანტათ ჩქინ ფიქრეფ დო გრძნობეფ. თეს გეძინელ, შემლებნა ჩქინ სიტყვეფით ქიმვეხვარათ დო გურშა ელუკინათ შხვეფს. მარა თეწკუმა ართო, ჩქინ სიტყვეფით შილებე გურ ქელვოჭუათ დო ვოწყინებაფუათ თინეფს.

³ სიტყვეფს დიდ ძალა უღჷ, ათეშენ იეჰოვა მოგურუანა, მუჭო გიმიბრინუათ რაგადიშ უნარ სწორას. ღორონთ მირაგადნა: „დღას ვეკიშქვათ გლახა სიტყვა, ხვალე ჯგირ სიტყვა თქვით, ნამდა გურშა ელუკინათ დო გამანგარათ მარჩქილე“ (ეფესოელები 4:29). მორთ გუვარჩუათ, მუჭო შემლებნა რაგადიშ უნარით განვადიდათ იეჰოვა დო გურშა ელუკინათ შხვეფს.

4, 5. მუს მოგურუანა ბიბლია სიტყვეფიშ ძალაშ გურშენ?

⁴ სიტყვეფს დიდ ძალა უღჷ, ათეშენ ოკო ქიდვეკვირათ, მუს იფჩიებუთ დო მუჭო იფჩიებუთ. იგავეფიშ 15:4 იჩიებ: „მშვიდას მორაგადე ნინა სიცოცხლეშ ჯა რე, კვარჩხულ რაგადის ხოლო გურიშ გოტახუა მოჸუნს“. მუჭოთ მანგარ ჩხანა დღას, გოფალირ ჯაშ ორო გიშაცოცხალენს კოც, თეშ გემუან სიტყვეფს ხოლო შეულებ კოჩიშ გიშაცოცხალება. მარა მწარე სიტყვეფ შხვეფს გურს უტახუნს დო გლახათ ოგინაფუანს დუც (იგავები 18:21).

⁵ იგავეფიშ 12:18 იჩიებ: „გურუგუჩამუო ჩიება ხამუშ გეშქუმალაცალ რე“. ნამდვილო, გურუგუჩამუო ჩიებას შეულებ ემოციურ ჭუაშ მერინაფა დო ურთიერთობეფიშ გილალუაფა. შილებე რშუდას თიცალ შემთხვევა, მუჟამსით მიდგარენქ მუშ სიტყვეფით გურ მანგარო ქელგოჭუ. მარა ქიდეკვირ, ხოლო მუს იჩიებ თე მუხლი: „ბრძენიშ ნინა — ოსქილიდუანს“. გურგოჩამილ ჩიებას შეულებ დასქილიდუას წყუნაფილ გურ დო აღადგინას მეგობრულ ურთიერთობეფ, ნამუთ გაუგებრობაქ გილალუ (წეკითხ იგავები 16:24). მუჟამსით ირო ქოფშუნა, ნამდა ჩქინ სიტყვეფს დიდ ძალა უღჷ, თენა მიმეხვარებნა, ჯგირო ქიდვეკვირათ, მუს იფჩიებუთ.

6. მუშენ ვა რე ადვილ ნინაშ კონტროლ?

⁶ მაჟია მიზეზ, მუშ გურშენით ფრთხილას ოკო ვორდათ ჩიებაშ დროს, თინა რე ნამდა არძა არასრულყოფილეფ ვორეთ. ბიბლია იჩიებ: „კოჩიშ გურ ჭიჭენობაშე უბადობაშა ინჭუაფ“, ათეშენ ჩქინ სიტყვეფ ხშირას გიმაარგამენს, მუთ გურს მიღნა (დაბადება 8:21; ლუკა 6:45). მართალ რე, ადვილ ვა რე ნინაშ კონტროლ (წეკითხ იაკობი 3:2—4). მარა ირო ოკო ვეცადათ ჩქინ ჩიებაშ გაუჯგუშებას, ნამდა თინა შხვეფშო გურიშ ემაკინალ რდას.

7, 8. მუჭო შეულებ ჩქინ სიტყვეფს იმოქმედას იეჰოვაწკუმა ჩქინ ურთიერთობას?

 ⁷ ხოლო ართ მიზეზ, მუშენ ოკო დევეკვირათ ჩქინ ჩიებას თინა რე, ნამდა იეჰოვაშ წოხოლე მიმეთხუებნა პასუხ თიშ გურშენ, მუს დო მუჭო იფჩიებუთ. იაკობიშ 1:26 იჩიებ: „მიდგას დუდ ღორონთიშ თაყვანიშმცემელო მიორჩქ, მარა ნინა ვამათოკე, დუც იღორენს დო თიშ თაყვანიშცემას აზრ ვა უღჷ“. სიტყვეფ „აზრ ვა უღჷ“ ორიგინალ ნინაშა „პოტიკის“ ხოლო ნიშნენს (1 კორინთელები 15:17). ათეშენ გურუგუჩამუო ქიფჩიებუთ-და, თეს შეულებ იეჰოვაწკუმა მეგობრულ ურთიერთობა გილამლუან (იაკობი 3:8—10).

⁸ არგამა რე, ჩქი საფუძვლიან მიზეზეფ მიღნა, ქიდვეკვირათ, მუს იფჩიებუთ დო მუჭო იფჩიებუთ. მორთ ქობძირათ, მუს ოკო აურიდუათ დუდ, ნამდა იეჰოვაშ ძღვინ — რაგადიშ უნარ თიშ მოსაწონო გეგმიბრინუათ.

9, 10. ა) მუნერ სიტყვეფიშ გიმორნაფა ითვალუ ჩვეულებრივო ამდღარ დროს? ბ) მუშენ ოკო ვეგმიბრინუათ უწმაწურ სიტყვეფ?

⁹ ამდღარ დროს ჩვეულებრივო ითვალუ უწმაწურ სიტყვეფიშ გიმორნაფა. ბრელ ფიქრენს, ნამდა გორაფა დო უწმაწურ სიტყვეფ ოხვარ აზრეფიშ გიმოხანტუას. ხალხ გაძიცინუან თიშენ, იუმორისტეფ ხშირას გიმირინუანა უწესო ციგანობეფს დო უწმაწურ სიტყვეფს. მარა პავლე მოციქულქ თქუ: „მარა ასე ოკო მიოტუათ გაჟღამება, გურიშ მოულა, უბადობა, ლანძღუა დო უწესო სიტყვეფ“ (კოლოსელები 3:8). თიქ თქუ, ნამდა ჭეშმარიტ ქრისტიანეფ შქას ოკო ვა რდას „უწესო ციგანობა“ (ეფესოელები 5:3, 4).

¹⁰ უწესო სიტყვეფიშ გიმორნაფა ვართ იეჰოვას მოწონს დო ვართ თინეფს, მიდგას ღორონთ უჸორს. ბიბლიას სიტყვა „უწუნდურობა“ ხორციშ საქმეეფ შქას რე მოშინაფილ (გალატელები 5:19—21). „უწუნდურობაშა“ შხვადოშხვა ცოდვა მიშურს დო ართ უწმინდურ ჩვევაშ გავითარებას მაჟია უწმინდურ ჩვევა მაჸუნუ. პიროვნებაქ, მიდგას ჩვევას უღჷ უწმაწურ დო გლახა სიტყვეფიშ გიმორნაფა დო ვაკო თიშ მეტება, შილებე კრებაშე გერიცხას (2 კორინთელები 12:21; ეფესოელები 4:19; ქოძირ დანართ 23).

11, 12. ა) მუ რე ჭორაობა? ბ) მუშენ ოკო აურიდუათ დუდ შხვეფშა ტყურაშ ეკოწამებას?

¹¹ თეს გეძინელ, დუდ ოკო ევუჩილითუათ ჭორაობას. ბუნებრივ რე, მოინტერესდან შხვეფიშ ამბე დო ართიანწკუმა ქობრაგადუათ მეგობრეფიშ დო ოჯახიშ წევრეფიშ გურშენ ახალ ამბეფ. პირველ საუკუნეშ ქრისტიანეფს ხოლო ოინტერესდეს, მუ მდგომარეობას რდეს და დო ჯიმალეფ დო მუჭო შეულებდეს თინეფიშ მოხვარა (ეფესოელები  6:21, 22; კოლოსელები 4:8, 9). მარა თეცალ ჩიებაქ შილებე ადვილო გეგნორთას ჭორაობაშა. შხვაშ ნარაგადის ქიმეობრენთ-და, შილებე თიცალ მუდგარენეფ ქოფთქუათ, მუთ ვა რე მართალ ვარდა საიდუმლო ოკო ჸოფედკო. მუჟამსით ფრთხილას ვეპჸით, თეცალ უარყოფით ჩიებათ შილებე მიდგარენს ბრალ ქიგებდვათ ვარდა ტყურა ქეკვაწამათ. ფარისეველეფ იესოს თიცალ მუდგარენს ეკაწამენდეს, მუთ ვა უკეთებ (მათე 9:32—34; 12:22—24). ტყურაშ ეკოწამება გილმალუანს პიროვნებაშ რეპუტაციას, მოჸუნს ნირზი, გურჭუა დო აკმარღვანს მეგობრობას (იგავები 26:20).

¹² იეჰოვას ოკო, ჩქინ სიტყვეფით მივეხვარათ დო გურშა ელუკინათ შხვეფს დო მეგობრეფ ნტერეფო ვეგნიფრთინუათ. იეჰოვას ჯოგჷ თინეფ, „მით ჯიმალეფ შქას ნდურიას თასუნს“ (იგავები 6:16—19). პირველ ტყურაშ ეკმაწამებელ სატანა რდუ, ნამდგაქ ღორონთის ტყურა ქეკაწამ (გამოცხადება 12:9, 10). ამდღა ხოლო ჩვეულებრივ რე ართიანშა ტყურაშ ეკოწამება. მარა ქრისტიანულ კრებას თაშ ოკო ვეჸუას (გალატელები 5:19—21). ათეშენ საჭირო რე, ფრთხილას ვორდათ დო დეფიფქრათ, ონდო მუთუნს ფთქუანდათ. სოიშახ შხვაშ ნარაგადის გემეორენდე, ქოკითხ სქან დუც: ქორენო სიმართლე თინა, მუდგას იფჩიებუქ? ქიმიღანსო თენა ჯგირობუას? ქიმეხვარებნო მითინს? ქოფთქუანდიო თეს თი პიროვნება ირჩქილენ თეშ? მა მუჭო იბგინანდჷ დუც, ჩქიმდე ხოლო თეცალ მუდგარენ ქუთქუალდესკო? (წეკითხ 1 თესალონიკელები 4:11).

13, 14. ა) მუჭო მოქმედენს დამამცირებელ ჩიება შხვეფწკუმა? ბ) მუ რე ლანძღუა? მუშენ ოკო აურიდუან ქრისტიანეფქ დუდ შხვეფიშ ლანძღუას?

¹³ მინშა ჩქი ხოლო შილებე თიცალ მუდგარენ ქოფთქუათ, მუდგას უკულ დემნარღენთ. მარა ვა მოკონა ჩვევათ გინმართან შხვეფიშ კრიტიკაქ ვარდა მწარე რაგადიქ.  ჩქინო მიუღებელ რე დამამცირებელ რაგად. დამამცირებელ სიტყვეფ შხვეფს პირად ღირსებას უდინუანს დო ოფიქრებაფუანს, ნამდა მუთუნიშ მოღე ვა რე. მაგალთო, ბაღანეფს ადვილო ელაჭუნა გურ, ათეშენ განსაკუთრებულ სიფრთხილე მოსაჭირნა, ნამდა ჩქინ სიტყვეფით გურ ვა ვუწყუნუათ თინეფს (კოლოსელები 3:21).

¹⁴ ბიბლია მაფრთხილენა დამამცირებელ ჩიებაშ არძაშ უფრაშ ფორმაშე, თენა რე ლანძღუა. პავლექ თქუ: „მიოტეთ ირნერ გაჟღამება, გამწარება, რისხუა, ღვარაფ დო ლანძღუა“ (ეფესოელები 4:31). ლანძღუა ნიშნენს შხვაშ გარძახ შეურაცხყოფას, ნამდა დამცირე დო გურ ქელაჭუე თის. მანგარ გლახა რე, მუჟამსით ნამთინე თაშ ურაგად მუშ მეუღლეს ვარდა სქუალეფს. პიროვნება, ნამუთ გაფრთხილებაშ უმკუჯინუო აგრძელენს შხვეფიშ ლანძღუას, კრებაშე გერიცხებ (1 კორინთელები 5:11—13; 6:9, 10). მუჭოთ გებგით, ტყურაშ რაგადის, უწესო დო უბადო სიტყვეფიშ გიმორნაფას ვემვოტენთ-და, ურთიერთობა გილმელებნა მუჭოთ იეჰოვაწკუმა თეშ, შხვეფწკუმა ხოლო.

15. მუნერ ჩიება უნწყუნს ხეს ჯგირ ურთიერთობას?

¹⁵ მუჭო შემლებნა იეჰოვაშ მოსაწონო გეგმიბრინუათ რაგადიშ ძღვინ? მართალ რე, ბიბლია ვა მარზენა კონკრეტულ წესის, მუ ფთქუათ დო მუ ვარ, მარა მირაგადნა, ჩქინ ჩიებათ გურშა ელუკინათ დო გუვამანგარათ მარჩქილეეფ (ეფესოელები 4:29). სიტყვეფ, ნამუთ გურშა მოუჰამუანს კოც, რე სუფთა, ჯგირ დო სწორ. იეჰოვას ოკო ჩქინ სიტყვეფით ქიმვეხვარათ დო გურშა ელუკინათ შხვეფს. თეშ კეთება შილებე ირო ადვილ ვა რდას. ჯგირ სიტყვეფიშ რაგადის უმოს მეტ მონდომა ოსაჭირ, ვინემ მწარე დო გურუგუჩამ ჩიებას (ტიტე 2:8). მორთ გუვარჩუათ ნამთინე საშვალება,  მუჭო შემლებნა ჩქინ სიტყვეფით გურშა ელუკინათ შხვეფს.

16, 17. ა) მუშენ ოკო ვოცქუათ შხვეფს? ბ) მის შემლებნა ვოცქუათ?

¹⁶ იეჰოვა დო იესო ოცქვაფურ სიტყვეფიშ რაგადიშ ჯგირ მაგალითის მარზენა, ნამდგას მოკონა მივაჸუნათ (მათე 3:17; 25:19—23; იოანე 1:47). შხვეფს შურ დო გურით ქუვოცქუათ დო გურშა ელუკინათინ, საჭირო რე გეგმიფრჩქინათ ყურადღებიანობა დო პირად ინტერეს. იგავეფიშ 15:23 იჩიებ: „მუ ჯგირ რე მუშ დროს ნათქუელ სიტყვა!“. მუშო ოკო რაგად, მუჟამსით მთელ გურით მოცქვანა ვარდა მარდულობას გიმოხანტუნა ჯგირო კეთებულ საქმეშე, თენა ჩქინო ხოლო გურიშ ემაკინალ რე (წეკითხ მათე 7:12; ქოძირ დანართ 27).

¹⁷ მუჟამსით ჩვევას მაღვენნა შხვეფიშ ჯგირ მხარეეფიშ ძირაფა, უმოს ადვილ მაჸინა მთელ გურით ქუვოცქუათ თინეფს. მაგალთო, ქოძირ, ნამდა კრებას მიდგარენქ ჯგირო აკეთ დავალება ვარდა დიდ მონდომა გიმირჩქინ კომენტარიშ ოკეთებელო. შილებე ახალგაზრდა პიროვნებაქ გაბედულება გიმირჩქინ სკოლას რწმენაშ დაცვებელო, ვარდა ხანშამიშულირ თანაქრისტიან რეგულარულო მსახურენს. თეცალ დროს ოცქვაფურ სიტყვეფიშ რაგადით შეილებ გურშა ელუკინე თინეფს. თეს გეძინელ, მნიშვნელოვან რე, ქომონჯიქ ქუწუას მუშ ოსურს, ნამდა უჸორს დო აფასენს (იგავები 31:10, 28). მუჭოთ მცენარეს ოსაჭირ სინთე დო წყარ, ადამიანეფს ხოლო ოსაჭირნა, დაფასებულო იგინან დუდ. თენა არძაშ უმოსო ბაღანეფშო რე მნიშვნელოვან. მზათ რდა, ირო ქაცქუე ბაღანეფს ჯგირ თვისებეფშე დო გიმორჩქინელ მონდომაშე. ცქვაფას შეულებ ქიმეჩას თინეფს მეტ გაბედულება, მუშ დუდიშ რწმენა დო ქიმეხვარას, უმოსო ქიმინდომან თიშ კეთება, მუთ სწორ რე.

18, 19. მუშენ ოკო ვეცადათ ირნერო, ნამდა გურშა ელუკინათ შხვეფს? მუჭო შემლებნა თეშ კეთება?

 ¹⁸ იეჰოვაშ მაგალითის მეპჸუნთ, მუჟამსით გურშა ელუკინანთ დო ეუქექუანთ შხვეფს. ღორონთ განსაკუთრებულო თინეფს ვარკენს ყურადღებას, მით თანდაბალ დო დაჩაგრებულ რე (ესაია 57:15). იეჰოვას ოკო, „გურშა ელუკინათ ართიანს“ დო „ეუქექუათ გურაკოჭირებულეფს“ (1 თესალონიკელები 5:11, 14). მუჟამსით ვოცადუთ თაშ მიფქცუათ, იეჰოვა ორწყე თეს დო აფასენს ჩქინ მონდომას.

¹⁹ შილებე ქოძირ, ნამდა კრებას მიდგარენ მოწყინაფილ ვარდა გურგოტახილ რე. მუ შეილებ უწუე თის, ნამდა გურშა ეუქექუე? მართალ რე, შილებე თიშ პრობლემაშ მოგვარებაქ  ვეშქალებუას, მარა შეილებ ქაძირუე, ნამდა გაწუხენს თიშ მდგომარეობა დო გოკო ქიმეხვარე. მაგალთო, შეილებ დრო გეგმურთე თის, წუკითხე გურიშ ემაკინალ ბიბლიურ მუხლ დო ქილოცე თიწკუმა ართო (ფსალმუნი 34:18; მათე 10:29—31). დარწმუნ, ნამდა კრებას და დო ჯიმალეფს მანგარო უჸორა თინა (1 კორინთელები 12:12—26; იაკობი 5:14, 15). თეშ ქუდურაგადე, ნამდა ქიგინას, შურ დო გურით გოინტერეს თიშ მდგომარეობა დო დარწმუნებულ რექ სქან სიტყვეფშა (წეკითხ იგავები 12:25).

20, 21. მუ დროს შილებე რჩევაქ ადვილ მიოღებელქ იჸუას?

²⁰ ჩქი გურშა ელუკინანთ შხვეფს თიმწკუმა ხოლო, მუჟამსით ჯგირ რჩევეფს ქიმეფჩანთ. რჩევეფ არძას  მოსაჭირნა, მუშენდა არასრულყოფილეფ ვორეთ. იგავეფიშ 19:20 იჩიებ: „ქიმირჩქილე რჩევა დო ქიგეგონე დარიგება, ნამდა დებრძენე“. ხვალე უხუცესეფს ვავალნა შხვეფშა რჩევეფიშ მეჩამა. მაგალთო, საჭირო რე, მშობლეფქ მუნეფიშ სქუალეფ ქიგიოწურუან (ეფესოელები 6:4). თეწკუმა ართო, ქრისტიან დალეფს ხოლო შეულებნა ჯგირ რჩევეფ მეჩან ართიანს (ტიტე 2:3—5). ჩქი მიჸორა და დო ჯიმალეფ, ათეშენ მოკონა, თეშ მეფჩათ რჩევეფ, ნამდა დუდ გლახათ ვეგინან. მუჭო შემლებნა თეშ კეთება?

²¹ შილებე რშუდას შემთხვევა, მუჟამსით თეშ მერჩეს რჩევა, ნამდა ადვილ მიოღებელქ გაჸუ. მუშენ რდუ თიშ მეღება ადვილ? ალბათ ქიგინ, ნამდა პიროვნება, მიდგაქ რჩევა მერჩჷ, მართალო დაინტერესებულ რდუ სქან მდგომარეობათ ვარდა თიქ გემუანო დო ჸოროფათ დოირაგადუ (კოლოსელები 4:6). მუშო ოკო რაგად, თე რჩევა ბიბლიაშა იჸუაფუდ გერსხილ (2 ტიმოთე 3:16). თაშ ნამდა, ვა უღჷ მნიშვნელობა, პირდაპირ ბიბლიაშე ეშებკითხენთ დო ვარ, მეჩამილ რჩევა ბიბლიაშა ოკო რდას გერსხილ. მითინს ვა უღჷ უფლება შხვეფს დანძალას მუშ შეხედულებეფიშ მეღება ვარდა მუშ აზრეფიშ გამართლებერო ბიბლიურ მუხლეფ არასწორო გეგმირინუას. ვაგგოჭყორდას, პირადო სი მუნერო მერჩეს რჩევა, თენა მიგეხვარებ თი დროს, მუჟამსით სი არზენქ შხვას რჩევას.

22. მუჭო გიმირინუანქ რაგადიშ უნარს?

²² რაგადიშ უნარ ღორონთიშ ძღვინ რე დო ღორონთიშ ჸოროფაქ ოკო მიმეხვარან, თინა სწორას გეგმიბრინუათ. რშუდას, ნამდა სიტყვეფს დიდ ძალა უღჷ, თის შეულებ გურ გუტახას ვარდა გურშა ელუკინას შხვეფს. ათეშენ, მორთ ირფელ გუვაკეთათ, ნამდა ჩქინ სიტყვეფით გუვამანგარათ დო გურშა ელუკინათ შხვეფს.