1—3. ა) მუშენ ოკო დიდას, მუშ ბაღანა სუფთა რდას? ბ) მუშენ ოკო იეჰოვას, მუშ ხალხ სუფთა დო წმინდა რდას?

წერმიდგინ, მოჸოროფე დიდა, ნამუთ მუშ ჭიჭე ბაღანას სკოლაშა ოულარო ამზადენს. თინა დარწმუნებულ რე, ნამდა ბაღანას სუფთას დო კოხტას მიკაქუნს. დიდაშო მნიშვნელოვან რე, ბაღანა ჯამრთელ რდას დო შხვეფ ხოლო ორწყედან, ნამდა მშობლეფ თის ჯგირო ულუანა.

² ჩქინ ზეციერ მუმას, იეჰოვას ოკო სუფთეფ დო წმინდეფ ვორდათ (ფსალმუნი 18:26). თის უჩქჷ, ნამდა სისუფთავეშ  დაცვებას ჩქინო ჯგირობუა მოუღ; თეწკუმა ართო, სისუფთავეშ დო სიწმინდეშ დაცვებათ გუმაჭყაფალს ხოლო განვადიდენთ (ეზეკიელი 36:22; წეკითხ 1 პეტრე 2:12).

³ მუს ნიშნენს ვორდათ სუფთეფ დო წმინდეფ? მუშენ რე თენა ჩქინო ჯგირ? თე კითხვეფიშ გარჩიებაშ დროს შილებე ქობძირათ მუსხირენ მხარე, ნამუთ გიშასწორებელ მაფნა.

4, 5. ა) მუშენ ოკო ვორდათ სუფთეფ? ბ) მუჭო იძირე გუნაჭყეფშე იეჰოვაშ დამოკიდებულება სისუფთავეშე?

⁴ სისუფთავეშ დო სიწმინდეშ მაგალითის იეჰოვა მარზენა (ლევიანები 11:44, 45). თაშ ნამდა, მთავარ მიზეზ, სუფთეფ ვორდათ თინა რე, ნამდა მოკონა, მივაჸუნათ ღორონთიშ მაგალითის (ეფესოელები 5:1).

⁵ ირფელ, მუთ ღორონთიქ გაჭყჷ, ოძირანს მუნერ დამოკიდებულება უღჷ თის სისუფთავეშე. იეჰოვაქ თიცალ ბუნებრივ ციკლეფ გაჭყჷ, ნამუთ ასუფთენს ჰაერს დო წყარს (იერემია 10:12). დეფიქრ, დედამიწას შეულებ მუშ დუდიშ გასუფთება; თეს თიმწკუმა ხოლო ორთჷ, მუჟამსით ადამიანეფ აბინძურენა თის. მაგალთო, ღორონთიქ გაჭყჷ აკაბურცხა მიკრობეფ, ნამუშ ძირაფა ხვალე მიკროსკოპით რე შეიოლებერ. თინეფს შეულებნა შხამიან ნარჩენეფ მოცილე ვა რენ ფერ ნივთიერებათ გინაშქვან. თენა სარკო პროცეს რე. მეცნიერეფ თე მიკრობეფშე ნამთინეს გარემოშ ოსუფთებელო გიმირინუანა (რომაელები 1:20).

6, 7. მუჭო იძირე მოსეშ კანონშე, ნამდა იეჰოვაშ თაყვანიშმცემელეფ სუფთეფ ოკო რდან?

⁶ მოსეშ კანონშე, ნამუთ იეჰოვაქ ისრაელეფს მეჩჷ, ჯგირო იძირე, მუსხით მნიშვნელოვან რე სისუფთავეშ დაცვება. მაგალთო, ისრაელეფიშ თაყვანიშცემა იეჰოვაშო ხვალე  თი დროს იჸუაფუდ მისაღებ, მუჟამსით თინეფ სისუფთავეს დეცვენდეს. გიშაჸიდირალიშ დღას, მღვდელმთავარქ ჟირშა ოკო გიბონუკო (ლევიანები 16:4, 23, 24). შხვა მღვდელეფქ მსხვერპლიშ შეწირუაშახ ხე დო კუჩხ ოკო გიბონესკო (გამოსვლა 30:17—21; 2 მატიანე 4:6). ნამთინე შემთხვევას, სიწმინდეშ გურშენ მეჩამილ კანონიშ დაუმორჩილებლობას, ღურა მოჸუნდჷ (ლევიანები 15:31; რიცხვები 19:17—20).

⁷ მუ სარგებელ მოუღ თე ინფორმაციას ჩქინო? მოსეშ კანონშე ბრელ მუთუნს ბგურაფლენთ იეჰოვაშ პრინციპეფშე (მალაქია 3:6). თავრეშე არგამათ იძირე, ნამდა იეჰოვაშ თაყვანიშმცემელეფქ ოკო დეცვან სისუფთავე. იეჰოვაშ ნორმეფ ვათირე. თინა ამდღა ხოლო ითხინს მუშ თაყვანიშმცემელეფშე, სისუფთავეშ დო სიწმინდეშ დაცვებას (იაკობი 1:27).

8. მუს ნიშნენს, ვორდათ სუფთეფ?

⁸ იეჰოვაშ თოლს სისუფთავე უმოს მეტ რე, ვინემ ჸუდეშ დო მიკაქუნალიშ სუფთაშე დაცვება ვარდა პირად ჰიგიენა. თეშა მიშურს, მთელ ჩქინ ცხოვრება — ჩქინ თაყვანიშცემა, საქციელ დო ფიქრეფ სუფთა დო წმინდა რდას. იეჰოვაშ თოლს სუფთეფ ქიპჸუათინ, საჭირო რე სისუფთავე დო სიწმინდეშ დაცვება ცხოვრებაშ ირნერ მხარეს.

9, 10. მუნერ თაყვანიშცემა რე წმინდა იეჰოვაშ თოლს?

⁹ წმინდა თაყვანიშცემა. ჩქი მუთუნნერ კავშირ ოკო ვამღუდან ტყურა რელიგიაწკუმა. ბაბილონიშ ტყვეობაშ დროს ისრაელეფიშ გოხოლუას ცხოვრენდჷ თიცალ ხალხ, მით თაყვანს ცენდჷ ტყურა ღორონთეფს დო უზნეო რიტუალეფს ატარენდჷ. ესაიაქ იწინასწარმეტყველ, ნამდა ისრაელეფ დირთუდეს მუნეფიშ ქიანაშა დო აღადგინენდეს  წმინდა თაყვანიშცემას. იეჰოვაქ თინეფს უწუ: „გეგშართით, უწუნდურს ვემკანჭათ! გეგშართით თიშე დო წმინდეფ რდათ“. თინეფს იეჰოვაშ თაყვანიშცემაშა ოკო ვა უკათუაფდესკო ბაბილონს გავრცელებურ ტყურა რელიგიურ გურაფეფ, წეს-ჩვეულებეფ დო ტრადიციეფ (ესაია 52:11).

¹⁰ ამდღა ხოლო ჭეშმარიტ ქრისტიანეფ ვემკანჭუნა ტყურა რელიგიას (წეკითხ 1 კორინთელები 10:21). მსოფლიოს გავრცელებურ რე თიცალ ტრადიციეფ, წეს-ჩვეულებეფ დო შეხედულებეფ, ნამუთ ტყურა რელიგიურ გურაფეფშა რე გერსხილ. მაგალთო, ბრელ კულტურას ხალხის წანს, ნამდა ღურაშ უკულ სიცოცხლე იგრძელებ, დო წეს-ჩვეულებეფიშ უმენტაშ თე გურაფაშე მოურს (ეკლესიასტე 9:5, 6, 10). შილებე ჩქინ ოჯახიშ წევრეფ მანძალენდან, მონაწილება მიბღათ თეცალ წეს-ჩვეულებეფს, მარა ქრისტიანეფქ დუდ ოკო აურიდუან თის. ჩქი მოკონა, სუფთეფ ვორდათ იეჰოვაშ თოლს, ათეშენ თეცალ საკითხეფს შხვეფიშ აზრის ვევაჸუნუთ (საქმეები 5:29).

11. მუნერ საქციელ რე სუფთა იეჰოვაშ თოლს?

¹¹ სუფთა საქციელ. იეჰოვაშ თოლს სუფთეფ იპჸით, მუჟამსით ირნერ უზნეობაშე შორს იპჸუაფუთ (წეკითხ ეფესოელები 5:5). იეჰოვა მაფრთხილენა: „ვემკანჭათ უზნეობას!“. ღორონთ არგამათ მირაგადნა, ნამდა მით ვემეჸუნს თიშ ზნეობრივ ნორმეფს, ვედემკვიდრენს ღორონთიშ სამეფოს (1 კორინთელები 6:9, 10, 18; ქოძირ დანართ 22).

12, 13. მუშენ ოკო მიღდან სუფთა ფიქრეფ?

¹² სუფთა ფიქრეფ. ფიქრეფს მოქმედებაშა მეპჸუნთ (მათე 5:28; 15:18, 19). სუფთა ფიქრეფ ჯგირ საქმეეფს მოკეთებაფუანა. მუშო ოკო რაგად, არძა არასრულყოფილეფ ვორეთ დო მინშა გლახა ფიქრეფ მუმალენა. თეცალ დროს ხეთეშე ოკო მიფშორათ თინეფ. თაშ ვემიფქცით-და,  დრო-ხანიშ უკულ შილებე ქეშვატყვათ, ნამდა ჩქინ გურქ ჭიე-ჭიეთ გილელ დო შილებე თიცალ მუდგარენ გუმოკეთებაფუან, მუდგაშეთ ადრე ფიფქრენდით. ათეშენ გონება სუფთა აზრეფით ოკო ევოფშათ (წეკითხ ფილიპელები 4:8). თაშ ნამდა, ვარია ოკო ქოფთქუათ თიცალ გართობაშე, მუდგას უზნეობა დო ძალადობა ოკათ. თეს გეძინელ, ფრთხილას ოკო ვორდათ, მუჟამსით გიშაბგორუნთ, მუ იბკითხათ, მუს ვუჯინათ ვარდა მუ თემაშე ბრაგადუათ (ფსალმუნი 19:8, 9).

¹³ ღორონთიშ ჸოროფა ვა ვოდინუათინ, საჭირო რე ჩქინ თაყვანიშცემა, საქციელ დო ფიქრეფ სუფთა რდას. თეწკუმა ართო, იეჰოვაშო მნიშვნელოვან რე, დეფცვათ ფიზიკურ სისუფთავე.

14. მუშენ რე მნიშვნელოვან, დეფცვათ ფიზიკურ სისუფთავე?

¹⁴ მუჟამსით იფცვენთ პირად ჰიგიენას დო სისუფთავეს თექ, სოდეთ ვორეთ თეს მუჭოთ ჩქინო, თეშ შხვეფშა ხოლო მოუღ სარგებელ. სისუფთავე არძაშო სასიამოვნო რე. მარა მიღნა უმოს მნიშვნელოვან მიზეზ, მუშ გურშენით ოკო ვორდათ სუფთეფ; ჩქი თეთ იეჰოვას განვადიდენთ. წერმიდგინ ბაღანა, ნამუთ ირო უბონ-ურცხონ გილურს. ალბათ თიშ მშობლეფშე ჯგირს მუთუნს ვეფიქრენდით. თეცალო, მუჟამსით პირად ჰიგიენას ვეფცვენთ დო ხეს ვა ვუნწყუნთ სისუფთავეს, ხალხ გლახას იფიქრენს იეჰოვა ღორონთშე. პავლექ თქუ: „ჩქი მუთუნშე ვებრზენთ დაბრკოლებაშ მიზეზის, ნამდა კილქ ვა გორან ჩქინ მსახურებაშა, თეშ მანგიორო, ირნერ საქმეს ღირსუანო იფქციებუთ“ (2 კორინთელები 6:3, 4).

15, 16. მუჭო ოკო დეფცვათ ფიზიკურ სისუფთავე?

¹⁵ პირად ჰიგიენა დო მიკაქუნალ. საჭირო რე, ჩვევას  მიღდან პირად ჰიგიენაშ დაცვება. მაგალთო, რეგულარულო ოკო იბომნათ, შეიოლებერ ქორენ-და, ირ დღას. ხელეფ საპონით ოკო გიბომნათ, განსაკუთრებულო თიმწკუმა, მუჟამსით იბჭყანთ ოჭკუმალიშ კეთებას ვარდა ჭკუმუას. თეს გეძინელ, ხელეფიშ ბონუა საჭირო რე ტუალეტშე გიმულაშ ვარდა მუდგარენ წინდამშა ხეშ მოთხუმაშ უკულ. ხელეფიშ ბონუა შილებე უმნიშვნელოთ მიფრჩქინათ, მარა თენა აუცილებერ რე, ნამდა ბაქტერიეფქ დო ლახალაქ ვეგევრცელას. ხელეფიშ ბონუაქ შილებე ჩქინ სიცოცხლე ირსხას. ჸუდეს ტუალეტ ვარდა კანალიზაცია ვამღუნან-და, იშენით შილებე გამოსავალიშ გორუა. მაგალთო, ჯვეშო ისრაელს ვა უღდეს საკანალიზაციო სისტემა, ათეშენ თინეფ განავალს თიცალ ადგილს ინანთხორანდეს, ნამუთ შორს რდუ ჸუდეშე დო ოშუმალ წყარშე (კანონი 23:12, 13).

 ¹⁶ აუცილებერ ვა რე ჩქინ მიკაქუნალ ძვირიან დო ბოლო მოდაშ რდას, მარა აუცილებერ რე სუფთა დო კოხტა რდას (წეკითხ 1 ტიმოთე 2:9, 10). ჩქინ გარეგნობათ მოკონა, ირიათო განვადიდათ იეჰოვა (ტიტე 2:10).

17. მუშენ ოკო რდას ჩქინ ჸუდე დო პირად ნივთეფ სუფთა?

¹⁷ ჩქინ ჸუდე დო პირად ნივთეფ. მნიშვნელობა ვა უღჷ, სო ფცხოვრენთ, ჩქინ ჸუდე ირიათო სუფთა ოკო რდას. თეწკუმა ართო, ჩქინ მანქანა, მოტოციკლეტ, ველისპეტ, ვარდა შხვა ტრანსპორტ სუფთათ ოკო მიჸუნდან, განსაკუთრებულო თი დროს, მუჟამსით შეხვალამეფშა ვარდა ოქადაგეფშა მევურთ. ჩქი ხომ ხალხის თის ვუქადაგუთ, ნამდა დედამიწას სამოთხეს წესრიგ დო სისუფთავე იჸუაფ?! (ლუკა 23:43; გამოცხადება 11:18). მუჟამსით ირფელს ვორთუთ, ნამდა ჩქინ ჸუდე დო პირად ნივთეფ სუფთა რდას, თეთ ვოძირანთ, ნამდა ასეშე ვემზადებუთ ახალ ქიანას ოცხოვრებელო.

18. მუშენ ოკო რდას ჩქინ თაყვანიშცემაშ ადგილ სუფთა დო მიკოლუაფირ?

¹⁸ თაყვანიშცემაშ ადგილ. სამეფო ვარდა საკონგრესო დარბაზეფიშ დონწყუალა დო მიკოლუაფათ ვოძირანთ, ნამდა სისუფთავეშ დაცვება ჩქინო მნიშვნელოვან რე. თინეფს, მით პირველო მოურს სამეფო დარბაზშა, ხეთეშე თექიან სისუფთავე მოუოლუ თოლშა. თენა განადიდენს იეჰოვას. კრებაშ თითოულ წევრის შეულებ მონაწილება მიღას სამეფო დარბაზიშ დონწყუალა დო მიკოლუაფას (2 მატიანე 34:10).

19. მუს ოკო ევუჩილითუათ დუდ?

¹⁹ ბიბლიას ვენოჭარ არძა გლახა ჩვევა, ნამდგას დუდ ოკო ევუჩილითუათ, მარა თექ მოჩამილ რე პრინციპეფ, ნამუთ  მოხვარნა იეჰოვაშ თვალსაზრისიშ გაგებას. მაგალთო, თინა ვეწონუანს სიგარეტიშ შუმას, ზედმეტ ალკოჰოლიშ მეღებას ვარდა ნარკოტიკეფიშ გიმორნაფას. ღორონთიშ მეგობრეფ ქუვორეთ-და, დღას ვემკვანჭუთ თეცალ მუდგარენეფს, მუშენდა მანგარო ვაფასენთ სიცოცხლეს, ნამუთ ღორონთიშ საჩუქარ რე. თეცალ ჩვევეფ საფრთხეს ინაჸათანს მუჭოთ ჩქინ, თეშ შხვეფიშ სიცოცხლეს დო ჯამრთელობას ხოლო. ამდღა ბრელ ოცად, დუდ დანებას გლახა ჩვევეფს, ნამდა ქუმუთხილუას მუშ ჯამრთელობას. მარა ჩქი, იეჰოვაშ მეგობრეფს უმოს მიზეზ მიღნა, მივოტუათ თეცალ ჩვევეფ, მუშენდა მიჸორა ღორონთ. ართ ახალგაზრდა ძღაბ იჩიებ: „იეჰოვაშ მოხვარათ გლახა ჩვევეფს დუდ დუვანებ . . . ფიფქრენქ, ხვალე ჩქიმ ძალეფით ვეშმალებედ ცხოვრებაშ თირუა“. მორთ გუვარჩუათ ხუთ ბიბლიურ პრინციპ, მუთ მიმეხვარებნა, დუდ დუვანებათ გლახა ჩვევეფს.

20, 21. ნამ გლახა ჩვევეფ ოკო მივოტუათ, ნამუთ ვა მოწონს იეჰოვას?

²⁰ „ძვირფასეფ, რახანს თე დუნაპირებ მიღნა, გეფსუფთათ თი ირფელშე, მუთ გილმალუანს სხეულს დო გონებას, დო ღორონთიშ შიშით ქიმვოჭირინუათ სრულ სიწმინდეს“ (2 კორინთელები 7:1). იეჰოვას ოკო, მიფშორათ გლახა ჩვევეფ, ნამდგაქ შილებე დაზიანას ჩქინ სხეულ დო გონება.

²¹ ართ-ართ სერიოზულ მიზეზ „გეფსუფთათ თი ირფელშე, მუთ გილმალუანს სხეულს დო გონებას“, ინოჭარ 2 კორინთელეფიშ 6:17, 18-ს. იეჰოვა მირაგადნა: „უწმინდურს ვემკანჭათ“, დო „მა მეიღენთ თქვა“. „მა იპჸიქ თქვან მუმა, თქვა ხოლო ჩქიმ ქომოლსქუალეფ დო ოსურსქუალეფ იჸუაფუთ“. იეჰოვა მოპირნა, ნამდა მუჭოთ მუმა იჸოროფუანს სქუას, თეშ ქომიჸოროფუანა, მუჟამსით ვემკვანჭუთ მუთუნს, მუთ თიშ თოლს ვა რე სუფთა.

22—25. ნამ ბიბლიურ პრინციპეფ მიმეხვარებნა გლახა ჩვევეფიშ მეტებას?

 ²² „გიჸორდას იეჰოვა, სქან ღორონთ, მთელ გურით, მთელ შურით დო მთელ გონებათ“ (მათე 22:37). თენა არძაშ უმოს მნიშვნელოვან მცნება რე (მათე 22:38). იეჰოვა იმსახურენს, შურ დო გურით მიჸორდან თინა. მარა ქეშემლებნანო ქოფთქუათ, მთელ გურით მიჸორა ღორონთ, მუჟამსით სიცოცხლეს საფრთხეშა ინიპჸოთანთ ვარდა გონებას გილმებლუანთ? იეჰოვა ნამდვილო ქომიჸორან-და, ირფელს გუვაკეთენთ, ნამდა დუვაფასათ სიცოცხლე, ნამუთ თიქ მაჩუქეს.

²³ „[იეჰოვა] არზენს არძას სიცოცხლეს, შურიშ ოღალს დო ირფელს“ (საქმეები 17:24, 25). მაგალთო, მეგობარიშ ნაჩუქერ ძვირფას საჩუქარს ხომ ვა გაფუჭენქ დო ვეგნაჸათანქ? სიცოცხლე ძვირფას საჩუქარ რე იეჰოვაშე. ჩქი მანგარო ვაფასენთ თის. ათეშენ მოკონა, თეშ იფცხოვრათ, ნამდა განვადიდათ ჩქინ გუმაჭყაფალ (ფსალმუნი 36:9).

²⁴ „მოყვას სქან დუდცალო გიჸორდას“ (მათე 22:39). გლახა ჩვევეფ ხვალე ჩქი ვარინ, თის ხოლო ოცილ, მით ჩქინ გვერდით რე. უმოს ხშირას, თინეფ რენა ჩქინ ნათესეფ დო მეგობრეფ. მაგალთო, შილებე პიროვნებას ჯამრთელობაშ სერიოზულ პრობლემეფ გურჩქინას სიგარეტიშ კუმაქ, მუჟამსით ცხოვრენს თიწკუმა, მით სიგარეტის შუნს. თაშ ნამდა, გლახა ჩვევეფიშ მეტებათ ვოძირანთ, ნამდა მიჸორა თინეფ, მით ჩქინ გვერდით რე (1 იოანე 4:20, 21).

²⁵ „კინ ქუგაშინ ჯიმალეფს, ქურჩქილან დო დემორჩილან მთავრობეფს დო ხელისუფლებეფს“ (ტიტე 3:1). ბრელ ქიანას კანონით ვარიებულ რე ნარკოტიკეფიშ ჩუალა დო გიმორნაფა. იეჰოვა ჩქინდე ითხინს, ნამდა პატი ფცათ მთავრობეფს, ათეშენ ვომორჩილუთ თინეფიშ დოდგინელ კანონეფს (რომაელები 13:1).

26. ა) მუ ოკო ვაკეთათ, ნამდა იეჰოვაქ მიწონუას ჩქინ თაყვანიშცემა? ბ) მუშენ რე სუფთათ ცხოვრება ღორონთიშ თოლს მნიშვნელოვან?

 ²⁶ იეჰოვაწკუმა მეგობრობა ქუმოკონან-და, შილებე ქობძირათ, ნამდა ცხოვრებას მუდგარენიშ თირუა მოსაჭირნა. თაშ ქორენ-და, ასეშე ქიდიჭყ თეშ კეთება. მართალ რე, ირო ვა რე ადვილ გლახა ჩვევეფიშ მეტება, მარა სი შეგალებე თენა! იეჰოვა მოპირნა, ნამდა ქიმმეხვარებნა. თინა იჩიებ: „მა, იეჰოვა, სქან ღორონთ ვორექ, მა გოგურუანქ სქან საჯგირობუოთ დო გილაიჸონანქ თი შარათ, ნამდგათ ოკო გილართე!“ (ესაია 48:17). მუჟამსით ირნერო ვოცადუთ სისუფთავე დო სიწმინდეშ დაცვებას, შემლებნა დარწმუნებულ ვორდათ, ნამდა თეთ განვადიდენთ ჩქინ ღორონთის.