1, 2. ა) მიშ ხემძღვანელობას ოკო მივაჸუნათ? ბ) მუ კითხვეფს გუვარჩიენთ თე დუდის?

ბაღანობას შილებე ირო ვა გოკოდ თიშ კეთება, მუდგას მშობლეფ რთხინდეს. მართალ რე, გიჸორდჷ მშობლეფ დო გიჩქუდ, ნამდა ოკო დუჯერკო თინეფს, მარა შილებე იშენდოიშენ ვა გოხიოლუდ თეშ კეთება.

² მიჩქნა, ნამდა იეჰოვას, ჩქინ ზეციერ მუმას ვუჸორთ. თინა მარზენა ირფელს, მუთ მოსაჭირნა, გეფხარათ სიცოცხლეთ. თეს გეძინელ, მარზენა ხემძღვანელობას, ნამუთ მოხვარნა წარმატებაშ მეჭირნაფას. ნამთინეშა ღორონთ ჩქინ გიოწურაფალო ადამიანეფს გიმირინუანს, ათეშენ პატი ოკო ფცათ იეჰოვაშ უფლებამოსილებას (იგავები 24:21). მარა მუშენ ვა რე მინშა ადვილ ხემძღვანელობაშ მეჸუნა? მუშენ ფთხინა იეჰოვა, მივაჸუნათ თიშ მითითებეფს? მუჭო შემლებნა ვოძირათ, ნამდა პატის ფცენთ თიშ უფლებამოსილებას? (ქოძირ დანართ 9).

3, 4. მუშენ ვორეთ ამდღა არძა არასრულყოფილ? მუშენ შილებე ადვილ ვა რდას შხვეფიშ ხემძღვანელობაშ მეჸუნა?

³ თიშ უკულ, მუთ ადამ დო ევაქ შეცოდეს, ადამიანეფს ჩვევათ გინართეს მუნეფიშ გემოშა აკეთან  ირფელ. პირველ ადამიანეფ სრულყოფილო რდეს გოჭყაფილ, მარა იშენით მიდართეს ღორონთიშ უფლებამოსილებაშ წინააღმდეგ. თევრეშე მოჸუნაფილ, არძა არასრულყოფილეფ ვორეთ. თენა რე ართ-ართ მიზეზ, მუშ გურშენით ადვილ ვა რე, მივაჸუნათ იეჰოვაშ ხემძღვანელობას დო თინეფს, მიდგას უფლებამოსილება უღნა. მაჟია მიზეზ რე თინეფიშ არასრულყოფილება, მიდგას იეჰოვა ჩქინ გიოწურაფალო გიმირინუანს (დაბადება 2:15—17; 3:1—7; ფსალმუნი 51:5; რომაელები 5:12).

⁴ არასრულყოფილებაშ გურშენ მინშა სიამაყეს გიმიფრჩქინანთ, მუთ ხემძღვანელობაშ მეჸუნას მოცილნა. მაგალთო, ჯვეშ ისრაელს იეჰოვაქ მოსე გეგშეგორ მუშ ხალხიშ ხემძღვანელო. კორახი წანეფ ომსახურუდ იეჰოვას, მარა თის სიამაყექ მერუ დო მოსეშ დიდ უპატიცემლობა გეგმირჩქინ. თიშ გინაწონს, მოსე, ნამუთ ღორონთიშ ხალხის ხემძღვანელენდჷ ამაყ ვა რდუ. სინამდვილეს, ბიბლია თის თანდაბალ პიროვნებათ მიშინუანს. მარა კორახიქ ვემიაჸუნ მოსეშ ხემძღვანელობას. თიქ გეგნიბირუ ხალხ, ნამდა მოსეშ წინააღმდეგ მიდართესკო. მუქ აღოლეს კორახის დო თინეფს, მიდგაქ თიშ მხარეშა გინორთეს? თინეფქ არძაქ ღურათ დესაჯეს (რიცხვები 12:3; 16:1—3, 31—35). ბიბლიას ბრელ მაგალით რე მოჩამილ, სოვრეშეთ იძირე, ნამდა სიამაყეს ირიათო გლახა შედეგეფ მოჸუნს (2 მატიანე 26:16—21; ქოძირ დანართ 10).

5. მუჭო ოძირუ ნამთინექ, ნამდა სწორას ვეგმირინუანდჷ ძალაუფლებას?

⁵ შილებე გუნაგონ გაფდან თეცალ ნარაგად: „ძალაუფლება კოც გილმალუანს“. კაცობრიობაშ ისტორია ოძირანს, ნამდა ბრელქ სწორას ვეგმირინუ მუშ ძალაუფლება (წეკითხ ეკლესიასტე 8:9). მაგალთო, საული ჯგირ დო  თანდაბალ კოჩ რდუ, მუჟამსით იეჰოვაქ თინა ისრაელიშ მეფეთ გიშეგორ. მარა თიქ სიამაყე დო მენჯარიშობა გავითარ; შედეგო დავითის ქუდუჭყჷ თხოზინ, ნამდგას მუთუნ ბრალ ვა უღუდ (1 სამუელი 9:20, 21; 10:20—22; 18:7—11). უმოს გვიანო, იეჰოვაქ დავითის ქიმეჩ მეფობა; თინა არძაშ უჯგუშ მეფე რდუ მთელ ისრაელს. მარა დრო-ხანიშ უკულ თიქ ხოლო სწორას ვეგმირინუ მუშ ძალაუფლება. დავითიქ ურიაშ ოსურ, ბათშებაწკუმა ქიმრუშ დო მუშ გლახა საქციელიშ ოფულარო თიშ ქომონჯ ჩხუპის დაჸვილაფუ (2 სამუელი 11:1—17).

6, 7. ა) მუშ კეთებაშ გინმოჭყვიდირაფუანა ღორონთიშ ჸოროფა? ბ) მუ მიმეხვარებნა ქუდვაჸუნათ ღორონთის თიმწკუმა ხოლო, მუჟამსით თეშ კეთება ადვილ ვა რე?

⁶ ჩქი პატის ფცენთ იეჰოვაშ უფლებამოსილებას, მუშენდა ირფელშე დო არძაშე უმოსო მიჸორა თინა დო მოკონა, გურ გუხარათ თის (წეკითხ იგავები 27:11; მარკოზი 12:29, 30). სატანაქ დიო ხოლო ედემიშ ბაღის ეჭვიშ თუდო ქიგიორინუ იეჰოვაშ უფლებამოსილებაშ საკითხ. თის ოკო, მოფიქრებაფუან, ნამდა იეჰოვას ვა უღჷ უფლება მიწუან, მუჭო მიფქცუათ. მარა მიჩქნა, ნამდა თენა ტყურა რე. ჩქი ვოთანხმუთ ბიბლიას ინოჭარილ სიტყვეფს: „სი ღირს რექ, იეჰოვა, ჩქინ ღორონთ, მიღე დიდება, პატი დო ძალიერება, მუშენდა ირფელ სი გაჭყჷ, სქან ნებათ არსებენს დო გოჭყაფილ რე“ (გამოცხადება 4:11).

⁷ ბაღანობას ალბათ გოგურუანდეს, ნამდა ოკო დუჯერკო მშობლეფს თიმწკუმა ხოლო, მუჟამსით თენა ბრელს ვა გოხიოლუდ. თერიგო, მინშა შილებე ჩქი ხოლო ძნელ მაფდან იეჰოვაშ მორჩილება, მარა ღორონთიშ ჸოროფა  დო პატიცემა მოხვარნა, დევემორჩილათ თის. იესოქ თეშ ჯგირ მაგალით დომტუეს. თინა იეჰოვას თიმწკუმა ხოლო დოჸუნდჷ, მუჟამსით თეშ კეთება ადვილ ვაფუდ. ათეშენ თის შეულებუდ მუმაშა უთქუალუდკო: „ჩქიმ ნება ვარინ, სქან ნება რდას“ (ლუკა 22:42; ქოძირ დანართ 11).

8. ნამ საშვალებეფით გიმოწურუანა იეჰოვა? (ქოძირ ჩარჩო „ქურჩქილ რჩევას“).

⁸ ამდღა იეჰოვა შხვადოშხვა საშვალებათ გიმოწურუანა. მაგალთო, თიქ მუჩეს ბიბლია. თეს გეძინელ, უხუცესეფიშ საშვალებათ ხოლო მოხვარნა. ჩქი ვაფასენთ იეჰოვაშ უფლებამოსილებას, მუჟამსით პატის ფცენთ თინეფს, მიდგას იეჰოვა ჩქინ გიოწურაფალო გიმირინუანს. თინეფიშ მითითებეფს ვემეპჸუნთ-და, თეთ იეჰოვაშ ხემძღვანელობაშე ვარიას იფჩიებუთ. მაგალთო, მუჟამსით ისრაელეფქ ვედემორჩილეს მოსეს, იეჰოვაქ თენა მუშ დაუმორჩილებლობათ მირჩქინ (რიცხვები 14:26, 27; ქოძირ დანართ 12).

9. მუჭო მიმეხვარებნა ჸოროფა, მივაჸუნათ ღორონთიშ ხემძღვანელობას?

⁹ მუჟამსით პატის ფცენთ უხუცესეფიშ უფლებამოსილებას, თეთ და დო ჯიმალეფიშ ჸოროფას ხოლო გიმიფრჩქინანთ. მაგალთო, სტიქიურ უბედრობეფიშ დროს, ბრიგადა, ნამუთ დაზარალებურეფს ოხვარ, ართო ხანდენს, ნამდა მუთ შილებე მეტ ხალხ გინასქილიდუას. მარა თინეფიშ ხანდას ჯგირ შედეგიქ ქუმაჸუნასინ, საჭირო რე, ჸუნდან ხემძღვანელ დო არძა წევრ თიშ მითითებეფს მეჸუნდას. მუ მოხვადუ, მუჟამსით ბრიგადაშ ართ-ართ წევრ ვემიაჸუნუ მითითებას დო მუშ გემოშა ქიდიჭყანს საქმეშ კეთებას? მუდგა ჯგირ მოტივეფ ვა უღდას, ხემძღვანელობას ვემიაჸუნ-და, თენა პრობლემეფს გურჩქინანს ბრიგადაშ შხვა წევრეფს დო შილებე თინეფ მანგარო დაზარალას. თეშნერო, მუჟამსით ვემეპჸუნთ მითითებეფს, ნამდგას  იეჰოვა დო თიშ დანიშნულ ხემძღვანელ ჯიმალეფ მარზენა, შილებე ჩქინ გურშენ შხვეფქ დეზარალან. მარა იეჰოვაშ მორჩილებათ ვოძირანთ, ნამდა პატის ფცენთ თიშ უფლებამოსილებას დო მიჸორა და დო ჯიმალეფ (1 კორინთელები 12:14, 25, 26).

10, 11. მუს გუვარჩიენთ?

¹⁰ ირფელ მუდგაშ კეთებას იეჰოვა ჩქინდე ითხინს, კინ ჩქინ საჯგირობუოთ რე. თინეფიშ პატიცემას, მიდგას ხემძღვანელობა ოვალ ოჯახის, კრებას ვარდა ხელისუფლებას, არძაშო სარგებელ მოუღ (კანონი 5:16; რომაელები 13:4; ეფესოელები 6:2, 3; ებრაელები 13:17).

¹¹ უმოს ადვილ რე მორჩილება, მუჟამსით ჯგირო მარჩქილენა, მუშენ ითხინს იეჰოვა შხვეფიშ პატიცემას. მორთ გუვარჩუათ სუმ მხარე, სოდეთ მოსაჭირნა მორჩილებაშ გიმორჩქინა.

12. მუჭო ოძირანს ოჯახიშ დუდ, ნამდა აფასენს იეჰოვაშ უფლებამოსილებას?

¹² ოჯახ იეჰოვაქ გაჭყჷ დო თითოულ წევრის მუშ პასუხიშმგებლობა ქიმეჩ. ოჯახის უმოს ართობა დო ბედნერობა რე, მუჟამსით თითოულს ჯგირო არჩქილე, მუს ელჷ იეჰოვა თინეფშე (1 კორინთელები 14:33). იეჰოვაქ ოჯახიშ ხემძღვანელობა ქომონჯის დავალ, ათეშენ ელჷ, ნამდა თინა ყურადღებას ვემიარკენს მუშ ჩილ დო სქუას. ოჯახიშ დუდ ღორონთიშ წოხლე ვალდებულ რე შეასრულას მუშ პასუხიშმგებლობა. ქრისტიან ქომონჯ მოჸოროფე რე დო მუშ ოჯახის თეშ ოქცუ, მუჭოთ ქრისტე კრებას. თეცალ მოქმედებათ ოძირანს, ნამდა აფასენს იეჰოვაშ უფლებამოსილებას (ეფესოელები 5:23; ქოძირ დანართ 13).

13. მუჭო ოძირანს ოსურ, ნამდა პატის ცენს ქომონჯიშ უფლებამოსილებას?

 ¹³ ქრისტიან ოსურს ხოლო მნიშვნელოვან დო ღირსუან პასუხიშმგებლობა უღჷ ოჯახის. თინა ხუც ელურე ქომონჯის დო ოხვარ, რდას ოჯახიშ ჯგირ ხემძღვანელ. ბაღანეფიშ რდუალა ჟირხოლოშ პასუხიშმგებლობა რე. დიდა მუშ მაგალითით ოგურუანს ბაღანეფს შხვეფიშ პატიცემას (იგავები 1:8). ქრისტიან ოსურ პატის ცენს ქომონჯის დო ხუც უკინენს თიშ გადაწყვეტილებეფს. თინა პატიცემათ გიმოხანტუნს მუშ აზრის თი დროს ხოლო, მუჟამსით ვათანხმ ქომონჯის. ქრისტიან ოსურ განსაკუთრებულ სირთულეეფს შეხვადუ, მუჟამსით ქომონჯ იეჰოვაშ მოწმე ვა რე. მარა ქომონჯწკუმა ჸოროფა დო პატიცემაშ გიმორჩქინათ, შილებე თიქ ხოლო გეგნოჭყვიდას იეჰოვაშ მსახურება (წეკითხ 1 პეტრე 3:1).

14. მუჭო ოძირანს ბაღანა, ნამდა პატის ცენს მშობლეფიშ უფლებამოსილებას?

¹⁴ იეჰოვას მანგარო უჸორს ბაღანეფ დო უჩქჷ, ნამდა თინეფს განსაკუთრებულ ხემძღვანელობა დო თხილუა ოსაჭირნა. ბაღანეფ მორჩილებათ გურს უხარენა მშობლეფს დო მუთ არძაშ უმოს მთავარ რე, პატის ცენა დო ახარენა იეჰოვას (იგავები 10:1). ბრელ ოჯახის ბაღანეფს ხვალე ართ მშობელ რდუნს. შილებე თენა მანგარ ძნელ რდას, მუჭოთ მშობელშო თეშ ბაღანეფშო ხოლო. მარა ოჯახის ნაკლებ პრობლემა იჸუაფ, მუჟამსით ბაღანეფ ურჩქილენა დო დოჸუნა მშობელს. ამდღა სრულყოფილ ოჯახ ვა არსებენს, მარა არძა ოჯახის შეულებ რდას ბედნერ, მუჟამსით თითოულ წევრ მეჸუნს იეჰოვაშ მითითებეფს. თენა განადიდენს ოჯახიშ გუმაჭყაფალს, იეჰოვა ღორონთის (ეფესოელები 3:14, 15).

15. მუჭო შემლებნა ვოძირათ, ნამდა პატის ფცენთ კრებას მეთაურობაშ პრინციპის?

¹⁵ იეჰოვა მითითებეფს მარზენა კრებაშ საშვალებათ, ნამუშ ხემძღვანელო ქრისტე დანიშნჷ (კოლოსელები 1:18). იესოქ „ართგურ დო გონიერ მონას“ დავალ, ნამდა ღორონთიშ ხალხშო იხანდას (მათე 24:45—47). ამდღა „ართგურ დო გონიერ მონა“ ხემძღვანელ საბჭო რე. თინა დროულო მარზენა სულიერ საზრდოს, მუთ საჭირო რე ძალიერ რწმენაშ გავითარებელო. უხუცესეფ, მომსახურეეფ დო რაიონულ ზედამხედველეფ, მთელ მსოფლიოს ხუც უკინენა კრებეფს დო მითითებეფს ღებულენა ხემძღვანელ საბჭოშე. თე ჯიმალეფს ოვალნა, იხანდან ჩქინო. თინეფ ღორონთიშ წოხლე რენა პასუხიშმგებელეფ, მუჭო შეასრულენა მენდებულ დავალებას. თაშ ნამდა, მუჟამსით პატის ფცენთ პასუხიშმგებელ ჯიმალეფს, თეთ იეჰოვაშ პატიცემას გიმოფხანტუნთ (წეკითხ 1 თესალონიკელები 5:12; ებრაელები 13:17; ქოძირ დანართ 14).

16. მუშენ შემლებნა ფთქუათ, ნამდა უხუცესეფ დო მომსახურეეფ წმინდა შურით რენა დანიშნულ?

¹⁶ უხუცესეფ დო მომსახურეეფ კრებაშ წევრეფს ოხვარნა, ქუდოსქიდან ართგურეფქ დო უღდან ართობა. მარა მუშო ოკო რაგად, თინეფ ხოლო ჩქინცალ არასრულყოფილეფ რენა. მუჭო ღებულენა თინეფ პასუხიშმგებლობეფს? თე ჯიმალეფ ბიბლიას მოჩამილ მოთხოვნეფიშ შესაბამისო ოკო ცხოვრენდან (1 ტიმოთე 3:1—7, 12; ტიტე 1:5—9). იეჰოვაქ ბიბლიაშ მაჭარალეფს მუშ წმინდა შურით ოჭარაფუ თე მოთხოვნეფ. უხუცესეფ ლოცულენა დო იეჰოვას თხულენა წმინდა შურს, სოიშახ გინოჭყვიდნა, მი დანიშნან კრებას უხუცესო ვარდა მომსახურეთ. არგამა რე, კრებეფს იეჰოვა დო იესო ხემძღვანელენა  (საქმეები 20:28). პასუხიშმგებელ ჯიმალეფ, ნამუთ დანიშნულ რენა, ნამდა ხუც ქელამდირთან, დიდ საჩუქარ რენა ღორონთშე (ეფესოელები 4:8).

17. მუჭო ოძირანს და, ნამდა პატის ცენს იეჰოვაშ დოდგინელ მეთაურობაშ პრინციპის?

¹⁷ მინშა კრებას შილებე ვეჸუან უხუცესეფქ ვარდა მომსახურეეფქ. თეცალ დროს ნათილ ჯიმას შეულებ ქეთირას თინეფს, მარა ნათილ ჯიმალეფშე ხოლო მითინ ვა რენ-და, შილებე დაქ შეასრულას ნამთინე თი დავალება, ნამდგას ჯიმალეფ ასრულენა. თეცალ დროს დაქ დუდშა ქიცა ვარდა ქუდ ოკო გირთვას (1 კორინთელები 11:3—10). თეთ ოძირანს, ნამდა პატის ცენს მეთაურობაშ პრინციპის, ნამუთ იეჰოვაქ დადგინ ოჯახის დო კრებას (ქოძირ დანართ 15).

18, 19. ა) მუს ბგურაფლენთ რომაელეფიშ 13:1—7-ის ინოჭარილ სიტყვეფშე? ბ) მუჭო ვოძირანთ, ნამდა პატის ფცენთ ხელისუფლებაშ წარმომადგენელეფს?

¹⁸ იეჰოვა ამდღა ნებას არზენს მთავრობეფს, უღდან გარკვეულ ძალაუფლება, ათეშენ პატი ოკო ფცათ თინეფს. მთავრობეფ ხეს უნწყუნა, ნამდა ქიანას წესრიგ რდას დო ხალხიქ შხვადოშხვა მომსახურება გეგმირინუას. ქრისტიანეფ მეჸუნა თი მითითებას, ნამუთ მოჩამილ რე რომაელეფიშ 13:1—7-ის (წეკითხ). ჩქი პატის ფცენთ „ხელისუფლებას“ დო მეპჸუნთ თი ქიანაშ კანონეფს, სოდეთ ფცხოვრენთ. თე კანონეფ მოქმედენს ჩქინ ოჯახ, სამუშა ვარდა საკუთრებაწკუმა. მაგალთო, ჩქი ბგაფულენთ ოგაფურეფს დო ვა ფუბლუნთ თიცალ ინფორმაციას, ნამდგას მთავრობა ითხინს ჩქინდე. მარა მუ ოკო ვაკეთათ, მუჟამსით მთავრობა ჩქინდე თიცალ მუდგარენიშ კეთებას ითხინს, მუთ ოწინააღმდეგ ღორონთიშ კანონს? მოციქულ პეტრექ თქუ: „ჩქი  ადამიანეფშე უმოსო ღორონთის ოკო დევემორჩილათ, მუჭოთ მართველს“ (საქმეები 5:28, 29).

¹⁹ მუჟამსით მთავრობაშ წარმომადგენელეფწკუმა მიღნა საქმე, მაგალთო, მუნერით რე, მოსამართლე ვარდა პოლიციელ, თინეფიშ პატიცემა ოკო გიმიფრჩქინათ. ახალგაზრდა ქრისტიანეფ პატის ცენა მუნეფიშ მასწავლებერეფს დო თინეფს, მით მუშენა სკოლას. სამუშას ჩქინ უნჩაშის პატის ფცენთ თიწკუმა ხოლო, მუჟამსით შხვა მუშეფ თაშ ვექციებნა. თეცალ მოქმედებათ მეპჸუნთ მოციქულ პავლეშ მაგალითის, ნამუთ პატის ცენდჷ ხელისუფლებაშ წარმომადგენელეფს თიშ უმკუჯინუო, ნამდა მინშა თეშ კეთება ვარდჷ ადვილ (საქმეები 26:2, 25). თაშ ნამდა, თი დროს ხოლო, მუჟამსით შხვეფ გლახათ მოქცუნა, ჩქი იშენით გიმიფრჩქინანთ თინეფიშ პატიცემას (წეკითხ რომაელები 12:17, 18; 1 პეტრე 3:15).

20, 21. მუ ჯგირ შედეგიქ შილებე მაჸუნას შხვეფიშ პატიცემაშ გიმორჩქინას?

²⁰ ამდღა ხალხის ართიანიშ პატიცემა აფჷ დინაფილ. მარა იეჰოვაშ ხალხ შქას თაშ ვა რე. ჩქინ მიზან რე, არძას პატი ფცათ დო მივაჸუნათ მოციქულ პეტრეშ მითითებას: „პატი ცით არძას“ (1 პეტრე 2:17). ხალხ გინაფლენს, მუჟამსით პატიცემათ ვოქცუთ თინეფს. იესოქ დომჩინეს: „თქვან სინთე ხოლო სინთანდას ხალხიშ წოხოლე, მუშენდა ორწყედან თქვან ჯგირ საქმეეფს დო განადიდენდან თქვან ზეციერ მუმას“ (მათე 5:16).

²¹ ოჯახის, კრებას ვარდა შხვა ნებისმიერ ადგილს პატიცემაშ გიმორჩქინათ შხვეფს ჯგირ მაგალითის ვარზენთ დო შედეგო შილებე, ქიმინდომან იეჰოვაშ გურშენ მეტიშ გაგება. თეწკუმა ართო, შხვეფიშ პატიცემათ იეჰოვაშ პატიცემას გიმიფრჩქინანთ. თენა გურს უხარენს ღორონთის დო თეს გეძინელ, ჸოროფას ვუმტკიცენთ თის.