1, 2. მუს გინაფლენს იეჰოვა, მუჟამსით ორწყე, ნამდა პატიოსანო ფცხოვრენთ?

წერმიდგინ, ბაღანა ბოშ მოურს სკოლაშე დო შარას ფარათ ეფშა კაშილოკ ქოძირ. მუს ქიმინუნს თინა? ბაღანას შეულებ თე ფარა გეჭოფას დო ჯიბეშა ქენიდვას, მარა თეშ მანგიორო თინა ფარას მინჯეს ურთინუანს. მუჟამსით დიდა გებულენს მუშ ბაღანაშ თეცალ საქციელიშ გურშენ, გურ ხიოლით ეიაფშაფუ დო მანგარო ოამაყ მუშ ჭიჭე ბოშიშ საქციელ.

² მშობლეფიშ უმენტაშის ოხიოლ, მუჟამსით მუნეფიშ ბაღანეფ პატიოსანო იქციებნა. ჩქინ ზეციერ მუმა, იეჰოვა, „ჭეშმარიტებაშ ღორონთ“ რე დო ბედნერ რე, მუჟამსით ორწყე, ნამდა პატიოსანო ფცხოვრენთ (ფსალმუნი 31:5). ჩქი მოკონა, გურ გუხარათ ღორონთის დო „ირფელს პატიოსანეფ ვორდათ“ (ებრაელები 13:18). მორთ გუვარჩუათ ოთხ მხარე, სოდეთ შილებე პატიოსნებაშ გიმორჩქინაქ გამჭირდან. თეშ უკულ ქიგებგენთ, მუ ჯგირობუა მოუღ პატიოსნებაშ გიმორჩქინას.

3—5. ა) მუჟამ შილებე დუდ დებღორათ? ბ) მუ მიმეხვარებნა ჩქინ დუდწკუმა პატიოსანეფ ვორდათ?

³ ქუგოკო, შხვეფწკუმა პატიოსნება გეგმირჩქინე-და, დიო სქან დუდწკუმა ოკო რდე პატიოსან. თენა ირო ადვილ  ვა რე. პირველ საუკუნეს, ლაოდიკეაშ კრებაშ და დო ჯიმალეფ ფიქრენდეს, ნამდა ღორონთიშ მოსაწონო ცხოვრენდეს, მარა სინამდვილეს თენა თაშ ვა რდუ დო დუც იღორენდეს (გამოცხადება 3:17). შილებე ჩქი ხოლო თაშ ფიფქრენდათ ჩქინ დუდშე.

⁴ მოციქულ იაკობიქ თქუ: „მიდგას დუდ ღორონთიშ თაყვანიშმცემელო მიორჩქ, მარა ნინა ვამათოკე, დუც იღორენს დო თიშ თაყვანიშცემას აზრ ვა უღჷ“ (იაკობი 1:26). დუდიშ ღორება გიშმალენა, მუჟამსით ფიფქრენთ, ნამდა რახანს ბრელ ხან რე ჯგირ საქმეეფს ვორთუთ, ღორონთ თოლს დოწკურუნს ჩქინ უხეშ სიტყვეფშე, სარკასტულ ჩიებაშე ვარდა ტყურეფიშ რაგადშე. მუ მიმეხვარებნა დუდ ვედებღორათ?

⁵ სარკეშ ინოჯინათ ჩქინ გარეგნობას ვორწყეთ, მარა ბიბლიაშ კითხირით — ჩქინ შინაგან პიროვნებას. თინა მოხვარნა, ქობძირათ ჩქინ ჯგირ დო გლახა მხარეეფ. ბიბლიაშ გურაფა მოხვარნა, ქობძირათ, მუ მაფნა ოთირალ აზროვნებას, საქმეეფს დო ჩიებას (წეკითხ იაკობი 1:23—25). მარა, მუჟამსით ფიფქრენთ, ნამდა მუთუნნერ კილ ვამღუნა, დღას ვეშმალებენა უჯგუშობაშა თირუა. თაშ ნამდა, საჭირო რე ბიბლიაშ საშვალებათ ალალას შევამოწმათ ჩქინ დუდ (გოდება 3:40; ანგია 1:5). თეს გეძინელ, ლოცვა მოხვარნა, ქობძირათ, მუნერეფ ვორეთ სინამდვილეს. შემლებნა ლოცვას ქოფთხუათ იეჰოვას, შეამოწმას ჩქინ გურ დო ქუმოძირან, მუ მაფნა ოთირალ (ფსალმუნი 139:23, 24). ჩქი ოკო ფშუდან, ნამდა „იეჰოვას ჯოგჷ სიავეშ მაკეთებელ, მარა მართალეფწკუმა მეგობრენს“ (იგავები 3:32).

6. მუშენ ოკო რდას ჩილ დო ქომონჯ ართიანწკუმა პატიოსან?

⁶ პატიოსნებაშ გიმორჩქინა არძაშ უმოს მთავარ რე  ოჯახის. მუჟამსით ჩილ დო ქომონჯ ართიანწკუმა გურ გონწყუმილ რენა, თინეფ დუც თხილერო გინაფლენა დო უმოსო ონდუნა ართიანს. უპატიოსნობაქ ჩილ დო ქომონჯ შქას შილებე შხვადოშხვანერო ქირჩქინას დუდ. მაგალთო, დაოჯახებულ პიროვნება შილებე უჯინედას პორნოგრაფიას, უღდას ფლირტ ვარდა ტყობაშე გავითარას რომანტიკულ ურთიერთობა შხვაწკუმა. დეფიქრ, მუ თქუ ფსალმუნმაბირექ: „მეტყურე ხალხწკუმა საქმეს ვებკინენქ დო დუც ვურიდანქ თიცალ კათას, მით ფულუნს, სინამდვილეს, მუნერ რე“ (ფსალმუნი 26:4). მეუღლეწკუმა პატიოსან სქან ფიქრეფს ხოლო ვა რექ-და, თენა დაზარალენს ქორწინებას.

7, 8. მუჭო შეილებ ბაღანეფს ბიბლიაშე ქუდაგურუე, მუშენ რე პატიოსნება მნიშვნელოვან?

 ⁷ აუცილებერ რე ბაღანეფქ ხოლო ქიდიგურუან, ნამდა პატიოსნება მნიშვნელოვან რე. მშობლეფს შეულებნა ბიბლიაშ გიმორნაფათ ქუდაგურუან ბაღანეფს პატიოსნება. ბიბლიას ეჭარილ რე თი ხალხიშ გურშენ, მიდგაქ უპატიოსნოთ მიქცუ. მაგალთო, აქანქ მახინჯო გინირთჷ; გეხაზიქ ფარაშ გურშენ ტყურა ქოთქუ; იუდაქ ფარა მიხირ დო უმოს გვიანო იესო 30 ვარჩხილშა გეგმოჩ (იესო ნავეს ძე 6:17—19; 7:11—25; 2 მეფეები 5:14—16, 20—27; მათე 26:14, 15; იოანე 12:6).

⁸ მარა ბიბლიას პატიოსან ხალხიშ მაგალითეფ ხოლო რე ეჭარილ: მაგალთო, იაკობიქ მუშ სქუალეფს უწუ, ნამდა დართინესკო ნაძირეფ ფარა; იფთახი დო თიშ ოსურსქუაქ ვეგნურთეს ღორონთშა მეჩამილ სიტყვას; იესოქ არძაშ უმოს რთულ სიტუაციეფს ხოლო გიმირჩქინ პატიოსნება (დაბადება 43:10—14; მსაჯულები 11:30—40; იოანე 18:3—11). თე მაგალითეფს შეულებ ქიმეხვარას ბაღანეფს, ნამდა ქინანჭან, მუშენ რე პატიოსნება მნიშვნელოვან.

9. მუჭო მეხვარებ ბაღანეფს მშობლეფიშ პატიოსნებაშ მაგალით?

⁹ მნიშვნელოვან რე, მშობლეფს არჩქილედან ბიბლიურ პრინციპ: „შხვეფს მუჭო დაგურუანქ, მუჟამსით სქან დუც ვაგურუანქ?! ქადაგენქ ვეხირავა დო ხირულენქო?!“ (რომაელები 2:21). ბაღანეფ ჯგირო ორწყენა, მუჟამსით მშობლეფ იჩიებნა ართის დო ორთნა მაჟიას. ათეშენ, მუჟამსით თინეფს ვურაგადუთ რდან პატიოსანეფ, მარა ჩქი თაშ ვეფქციებუთ, თინეფს გუჭირდუნა პატიოსნებაშ დოგურაფა. მუჟამსით ბაღანეფ ქოძირნა, ნამდა მშობლეფ ტყურას იჩიებნა, ვა უღჷ მნიშვნელობა, თენა ჭიჭე ტყურა რდას ხოლო, ადვილ შეიოლებერ რე თინეფქ ხოლო ტყურეფიშ რაგად ქიდიჭყან (წეკითხ ლუკა 16:10). მარა, მშობლეფ ირნერ  საკითხის პატიოსანეფ ქორენან-და, ქიმეხვარებნა სქუალეფს, მომავალს თინეფქ ხოლო ჯგირ მშობლეფქ ქიჸუან (იგავები 22:6; ეფესოელები 6:4).

10. მუს ნიშნენს, ვორდათ პატიოსანეფ თანაქრისტიანეფწკუმა ურთიერთობაშ დროს?

¹⁰ ჩქი თანაქრისტიანეფწკუმა ურთიერთობაშ დროს ხოლო პატიოსანეფ ოკო ვორდათ. ადვილო შილებე ჩვეულებრივ თემეფშე ჩიებაქ ჭორაობაშა ვარდა ტყურაშ ეკოწამებაშა გეგნორთას. მუჟამსით შხვეფწკუმა იმეობრენთ დაუზუსტებელ ინფორმაციას, შილებე ტყურაშ გავრცელებას შევუნწყუათ ხე. ათეშენ ირფელიშ უჯგუშ იჸუაფ, ჩქინ ნინა მოფთოკათ (იგავები 10:19). პატიოსნება ვა ნიშნენს, ფთქუათ ირფელ, მუდგას ფიფქრენთ, მიჩქნა ვარდა გებგონით. თიმწკუმა ხოლო, მუჟამსით სიმართლეშ რაგად მილამნა, ოკო დეფიფქრათ: ქოღირუნო თეშ რაგად? ქორენო თენა ჩქიმ საქმე? ქიჸუაფუდუო თეშ რაგად ჯგირ საქციელ? (1 თესალონიკელები 4:11). ნამთინე მუშ პირდაპირ ნარაგადის თაშ ამართლენს: „მა სიმართლეს იფჩიებუქ“. მარა იეჰოვაშ მსახურეფს მოკონა, ჩქინ სიტყვეფ ირიათო მარდიან რდას (წეკითხ კოლოსელები 4:6).

11, 12. ა) მუშენ ვა რე ჯგირ დაშებულიშ ფულუა? ბ) მუ კითხვეფშე ოკო დეფიქრე, მუჟამსით მეგობარ სერიოზულო აშენს? გ) მუჭო შემლებნა პატიოსნებაშ გიმორჩქინა იეჰოვაშ ორგანიზაციას?

¹¹ იეჰოვაქ უხუცესეფს დავალ, ნამდა ქიმკაჯინან კრებას. უხუცესეფშო უმოს ადვილ რე მიმეხვარან, მუჟამსით თინეფს ვა ვუფულუნთ სიმართლეს. მუშენ? წერმიდგინ, დელახ დო ექიმშა ქიმერთჷ. დუფულუნდიო ვარდა ბოლოშა ვა უწინდიო ექიმს, მუდგას გაჭუნ თის? თაშ ქიმიქციებუდ-და, ქეშიალებედუო თის სქან მოხვარა? თეცალო, მუჟამსით სერიოზულო მაფნა დაშებულ ტყურა ოკო ვა ფთქუათ,  გეგმიფრჩქინათ პატიოსნება, ქიმეფრთათ უხუცესეფშა დო ირფელ ალალას ქუწუათ (ფსალმუნი 12:2; საქმეები 5:1—11). ასე წერმიდგინ შხვა სიტუაცია: მაგალთო, ქიგეგ, ნამდა სქან მეგობარქ სერიოზულო ქუდაშუ. მუჭო მიქციებუდ თეცალ დროს? (ლევიანები 5:1). ხომ ვეფიქრენქ, ნამდა ნამდვილ მეგობარ ქორექ-და, ოკო დოფულე თენა? დო ვარ ელუჩანქ, ქიმერთას უხუცესეფშა, ნამდა თინეფქ ქიმეხვარან იეჰოვაწკუმა ჯგირ ურთიერთობაშ დორთინაფას? (ებრაელები 13:17; იაკობი 5:14, 15).

¹² თეს გეძინელ, პატიოსნებას იეჰოვაშ ორგანიზაციას ხოლო გიმიფრჩქინანთ, მუჟამსით სამქადაგებლო მსახურებაშ ანგარიშეფს ვაბარენთ დო ვავსენთ პიონერობაშ ვარდა მსახურებაშ შხვა ნამთინე ბლანკის (წეკითხ იგავები 6:16—19).

13. მუჭო შემლებნა პატიოსნებაშ გიმორჩქინა და დო ჯიმალეფწკუმა საქმიან ურთიერთობეფიშ დროს?

¹³ ქრისტიანეფქ საქმიან ურთიერთობეფ დო ღორონთიშ თაყვანიშცემა ართიანს ოკო ვაუკათუან. მაგალთო, სამეფო დარბაზის ვარდა მსახურებაშ დროს ბიზნესიშ საქმეეფით ოკო ვა ვორდათ დაკავებულ. თეს გეძინელ, და დო ჯიმალეფიშ ხარჯშა ოკო ვა ვოცადუდათ სარგებელიშ მეღებას. სამუშაშა მოწმეეფს გეჭოფუნქ-და, დროულო გინუგ თისხი თანხა, მუსხი დეპირ დო საშვალება ქიმეჩ, გეგმირინუას კანონით გათვალისწინებურ შეღავათეფ, მაგალთო სამედიცინო დაზღვევა დო ანაზღაურებად შვებულება (1 ტიმოთე 5:18; იაკობი 5:1—4). მარა სი ქორექ იეჰოვაშ მოწმეწკუმა დასაქმებულ-და, ვემითხუა განსაკუთრებულ შეღავათეფ (ეფესოელები 6:5—8). დერწმუნ, ნამდა სამუშა დროს სწორას გიმირინუანქ დო ბოლოშა ორთუქ თი საქმეს, მუდგაშე ფარას გიგანა (2 თესალონიკელები 3:10).

14. მუშ კეთება იჸუაფ ჯგირ საქმიან ურთიერთობეფიშ დოჭყაფაშახ?

 ¹⁴ მუ ოკო ვაკეთათ, მუჟამსით და დო ჯიმალეფწკუმა საქმიან ურთიერთობას იბჭყანთ? თე დროს შილებე ფარაშ მიშადვალაქ ვარდა სესხიშ ეჭოფუაქ დეგესაჭირას. თეცალ სიტუაციას, ართ ბიბლიურ პრინციპ ოკო გეთვალისწინე: ირფელ წერილობით გაფორმ! მუჟამსით წინასწარმეტყველ იერემიაქ დიხა ქიჸიდ, ჟირ საბუთ გაფორმჷ დო დაჩუალაფუ; თავრეშე ართ საბუთ მოწმეეფიშ ხემოჭარილ რდუ (იერემია 32:9—12; თეს გეძინელ, ქოძირ დაბადება 23:16—20). ნამთინეშ აზრით, ხელშეკრულებაშ გაფორმება ოძირანს, ნამდა ვა ვონდუთ ჩქინ და დო ჯიმალეფს. მარა სინამდვილეს თე ირფელიშ წერილობით გაფორმებათ ბრელ გაუგებრობას, გურიშ გოტახუას დო პრობლემას ევუჩილითუანთ დუც. საქმიან ურთიერთობეფიშ დროს ირიათო რშუდას, ნამდა ირფელშე მნიშვნელოვან კრებას მშვიდობაშ შენარჩუნება რე (1 კორინთელები 6:1—8; ქოძირ დანართ 30).

15. მუჭო უჯინე იეჰოვა უპატიოსნო საქციელს?

¹⁵ ჩქი არძაწკუმა ოკო გიმიფრჩქინათ პატიოსნება, თინეფ შქას თი ხალხწკუმა, მით ვა რე იეჰოვაშ მოწმე. თენა იეჰოვაშ თოლს მანგარ მნიშვნელოვან რე. ბიბლია იჩიებ: „იეჰოვას ჯოგჷ ტყურა სასწორ, მარა ზუსტ სასწორ მოსაწონ რე თიშო“ (იგავები 11:1; 20:10, 23). ბიბლიურ დროს სასწორს ხშირას გიმირინუანდეს ვაჭრობაშ დროს. მარა ნამთინე ვაჭარ მუშ კლიენტეფს წონაშე აღორენდჷ დო მუდგა ღირუდ თიშე უმოსის ოგაფუანდჷ. მუჭოთ ჯვეშ დროს თეშ, ამდღა ხოლო უპატიოსნო საქციელ ჩვეულებრივ რე ვაჭრობას, მარა იეჰოვაშ დამოკიდებულება ვათირე; თის ამდღა ხოლო ჯოგჷ უპატიოსნობა.

16, 17. ხოლო მუ სიტუაციეფს ოკო გიმიფრჩქინათ პატიოსნება?

 ¹⁶ არძა შეფხვალამუთ თიცალ სიტუაციეფს, მუჟამსით შილებედ უპატიოსნოთ ქიმიფქცითკო, მაგალთო, სამუშაშ დოჭყაფაშ, საბუთეფიშ შევსებაშ ვარდა სკოლას გამოცდეფიშ დროს. ბრელიშ აზრით მუთუნ გლახა ვა რე, ტყურა ქოთქუე, ინფორმაციას ქუმუძინე ვარდა სქან პასუხეფით მითინ შეცდომაშა გემშეჸუნე. თენა ვამკვენა, მუშენდა ბიბლიას ნაწინასწარმეტყველებ რე, ნამდა ბოლო დღალეფს ხალხ იჸუაფუდ „დუდიშ მოჸოროფე, ფარაშ მოჸოროფე . . . ჯგირ ჯოგუნ ფერ“ (2 ტიმოთე 3:1—5).

¹⁷ მინშა შილებე თეშ იძირედას, ნამდა ამდღარ ქიანას უპატიოსნო კათა უმოს წარმატებულ რე (ფსალმუნი 73:1—8). პატიოსან საქციელიშ გურშენ ქრისტიანს შილებე სამუშაქ მეუდინას, ფინანსურო დეზარალას ვარდა თანამშრომელეფქ გლახათ მექცუან. მარა მუჭოდგა ვა რდას, პატიოსნება ღირჷ ირნერ მსხვერპლშა. მუშენ შილებე თეშ რაგად?

18. მუშენ რე მნიშვნელოვან, მიღდან ჯგირ რეპუტაცია?

¹⁸ პატიოსან დო სანდო კათა მთელ მსოფლიოს დაფასებულ რე, მარა სანარღოთ თეცალ პატიოსან კათას იშვიათო შეხვადუქ. თეშ უმკუჯინუო, პატიოსან პიროვნებაშ რეპუტაცია არძას შემლებნა მიღდან (მიქა 7:2). მართალ რე, ნამთინექ შილებე ქუგგოძიცუას სქან პატიოსნებაშ გურშენ, მარა რენა თიცალეფ ხოლო, მით დუგაფასენა დო სქან ნდობა აღვენუნა. მთელ მსოფლიოს იეჰოვაშ მოწმეეფს იჩინენა, მუჭოთ პატიოსან კათას, ათეშენ ნამთინე დამსაქმებელს უსხუნ იეჰოვაშ მოწმეეფ გეჭოფას სამუშაშა. ბრელშა ჸოფე შემთხვევა, მუჟამსით უპატიოსნობაშ შედეგო შხვეფქ მიოდინეს სამუშა, მარა იეჰოვაშ მოწმეეფქ  მუნეფიშ პატიოსნებაშ გურშენ ქუდოსქიდეს სამუშას.

19. მუჭო მოქმედენს პატიოსნება იეჰოვაწკუმა სქან ურთიერთობაშე?

¹⁹ მუჟამსით ირნერ საკითხის პატიოსნებას გიმიფრჩქინანთ, სუფთა სინდის დო შინაგან სიმშვიდე მაღვენუნა. თეცალ დროს პავლეცალო, ჩქი ხოლო შემლებნა ფთქუათ: „დარწმუნებულ ვორეთ, ნამდა სუფთა სინდის მიღნა“ (ებრაელები 13:18). მუთ არძაშ უმოს მნიშვნელოვან რე, ჩქინ მოჸოროფე ზეციერ მუმა, იეჰოვა, ორწყე მუჟამსით ოცადუქ ირნერ საკითხის პატიოსან რდე დო დაფასენს სქან მონდომას (წეკითხ ფსალმუნი 15:1, 2; იგავები 22:1).