დუდი 10
ქორწინება — საჩუქარ ღორონთშე
„ადვილო ვა ხორცქუ სუმფა ძაფ“ (ეკლესიასტე 4:12).
1, 2. ა) მუშ იმენდ უღნა ახალ დაქორწინებულეფს? ბ) მუ კითხვეფს გუვარჩიენთ თე დუდის?
წერმიდგინით, ქორწილიშ დღას სქვამას მონწყილ, ბედნერ მოჭყუდ დო სინჯა. თინეფ ხიოლით დო იმენდით რენა ეფშა, ნამდა დიდხანს დო ბედნერო იცხოვრენა.
2 ბრელ ქორწინება ჯგირო იჭყაფ, მარა დრო-ხანიშ უკულ შილებე მუდგარენქ დითირას. ათეშენ ბედნერ ქორწინებაშო საჭირო რე, ჩილ დო ქომონჯიქ ღორონთიშ ხემძღვანელობას მიაჸუნას. მორთ ქობძირათ, მუჭო პასუხენს ბიბლია თუდო მოჩამილ კითხვეფს: მუ ჯგირობუა მოუღ ქორწინებას? დაქორწინებაშე ქოფიქრენქ-და, მუჭო შეილებ გიშეგორე მომავალ მეუღლე? მუს ნიშნენს, რდე ჯგირ ქომონჯ ვარდა ოსურ? მუ რე საჭირო ბედნერ ქორწინებაქ დიდხანს გეგრძელას? (წეკითხ იგავები 3:5, 6).
დეფქორწინაო?
3. სქან აზრით, ქორწინებაშა რენო დამოკიდებულ ბედნერობა? გენწყჷ.
3 ნამთინე ფიქრენს, ნამდა ქორწინებაშ უმშო პიროვნება ბედნერ ვეჸუაფ. მარა თენა თაშ ვა რე. იესოქ თქუ, ნამდა დაუქორწინებლობა ძღვინ რე (მათე 19:11, 12). თეს გეძინელ, პავლე მოციქულქ მიშინუ დაუქორწინებლობაშ უპირატესობეფ (1 კორინთელები 7:32—38). დექორწინებუქ დო ვარ, თენა პირადო სქან გინაჭყვიდირალ რე, ათეშენ ვეიაჸუნა მეგობრეფიშ დო ოჯახიშ წევრეფიშ ნარაგადის ვარდა სქან ტერიტორიას გავრცელებურ ტრადიციეფს.
4. მუ სარგებელ მოუღ ჯგირ ქორწინებას?
4 ბიბლია იჩიებ, ნამდა დაუქორწინებლობაწკუმა ართო ქორწინება ხოლო ღორონთიშ ძღვინ რე დო თის ხოლო მუშ უპირატესობეფ უღჷ. იეჰოვაქ ადამიშ გურშენ თქუ: „ვა რე ჯგირ კოჩიშ ხვალეიან რინა. გურჩქინანქ დამხმარეს, ნამუთ თიშ შესაფერის იჸუაფ“ (დაბადება 2:18). იეჰოვაქ ადამიშ ოსურო ევა გაჭყჷ დო თაშ გორჩქინდჷ პირველ ოჯახიქ. ჩილ დო ქომონჯიქ ირნერო ოკო ეცადას, ნამდა სქუალეფ სტაბილურ გარემოს მორდას. მარა ქორწინებაშ მთავარ მიზან ხვალე ბაღანეფიშ ერჩქინა დო რდუალა ვა რე (ფსალმუნი 127:3; ეფესოელები 6:1—4).
5, 6. მუჟამ შილებე ქორწინება რდას, მუჭოთ „სუმფა ძაფ“?
5 მეფე სოლომონქ ჭარჷ: „ჟირიშ ართო რინა უჯგჷ ხვალე რინას, მუშენდა ჯილდოს მიღენა მუნეფიშ ხანდაშე. ართიქ ქუდანთხ-და, მაჟია გემწადგინუანს. მარა მუ ოხვარ ხვალახეს, ქუდანთხასინ, მი მიწადგინუანს?! . . . ადვილო ვა ხორცქუ სუმფა ძაფ“ (ეკლესიასტე 4:9—12).
6 ბედნერ ქორწინებას ჩილ დო ქომონჯ არძაშე უმოს ხოლოშიან მეგობრეფ რენა, ნამუთ ელურენა, გურშა ელუკინანა დო თხილანა ართიანს. ჸოროფას შეულებ ქორწინებაშ გამანგარება, მარა თინა ხოლო უმოსო მტკიცე იჸუაფ, მუჟამსით ჩილ დო ქომონჯ ართო ომსახურ იეჰოვას. თეცალ დროს თინეფიშ ქორწინება სუმფა ძაფცალ რე, ნამუთ მანგარო რე ართიანშა მეშილ. თეცალ ძაფ უმოს მანგარ რე, ვინემ ჟირფა ძაფ. თეშნერო, ქორწინება ძალიერ იჸუაფ, მუჟამსით იეჰოვას თექ მუშ ადგილ უკებ.
7, 8. მუ რჩევას ირზენს პავლე დაქორწინებაშ გურშენ?
7 ქორწინებაშ უკულ ჩილ დო ქომონჯის შეულებ, დაკმაყოფილან ართიანიშ სექსუალურ მოთხოვნილებეფ (იგავები 5:18). მარა პიროვნებაშო მთავარ ხვალე თენა ქორენ-და, თის გონივრულო ვეგშაგორე მეუღლე. ახალგაზრდულ ასაკის სექსუალურ ლტოლვა ძლიერ რე, ათეშენ ბიბლია ელამჩანა, ნამდა პიროვნებაქ თიმწკუმა ოკო დექორწინას, მუჟამსით „ახალგაზრდულ ვნებეფ“ გინულუანს (1 კორინთელები 7:36). უჯგუშ იჸუაფ ვედექორწინე, სოიშახ ახალგაზრდულ ვნებეფ ვეგნოილუანს, მუშენდა თეშ უკულ უმოს საღას იაზროვნენქ დო უჯგუშ გადაწყვეტილებას მიღენქ (1 კორინთელები 7:9; იაკობი 1:15).
8 დაქორწინებაშე ქოფიქრენქ-და, ჯგირ იჸუაფ რეალურო ქუჯინე თე საკითხის დო გიჩქუდას, ნამდა არძა ოჯახის იჸუაფ პრობლემეფ. პავლექ თქუ, ნამდა დაქორწინებულეფს „ხორციელ გასაჭირ“ აღვენუდეს (1 კორინთელები 7:28). პრობლემეფ ჯგირო მენწყილ ოჯახეფს ხოლო აღვენუ. თაშ ნამდა, დაქორწინებას გეგნოჭყვიდუნქ-და, ჯგირო დეფიქრ, მი გიშეგორე მეუღლეთ.
მი გიშებგორა მეუღლეთ?
9, 10. მუ შედეგ მაჸუნუ თიცალ პიროვნებაწკუმა ქორწინებას, მით ვამსახურ იეჰოვას?
9 მომავალ მეუღლეშ გიშაგორუაშ დროს მნიშვნელოვან რე ფშუდან ბიბლიურ პრინციპ, ნამუთ მოჩამილ რე 2 კორინთელეფიშ 6:14-ის: „დუდ ვაუსქუათ ართმანგ ვა რენ ფერ უღუს ურწმუნოწკუმა“. თე მუხლის გიმორნაფილ მაგალით ეჭოფილ რე სოფელიშ ცხოვრებაშე. დიხაშმოხანდე დღას ვა უსქუანს უღუს ართო ჟირ შხვადოშხვა ზომაშ დო ძალაშ საქონელს. თენა უდუნდებელ მოქციება იჸუაფ, მუშენდა თე დროს ჟირხოლო საქონელ იწვალებ. თეშნერო, ქორწინებას ბრელ პრობლემას ქეშეფხვადუთ, მუჟამსით იბქორწინებუთ თიცალ პიროვნებაწკუმა, მით ვამსახურ იეჰოვას. ათეშენ ბიბლია მარზენა გონივრულ რჩევას, დეფქორწინათ ხვალე თი პიროვნებაწკუმა, მით იეჰოვაშ მეძღვინელ მსახურ რე (1 კორინთელები 7:39).
10 შილებე ნამთინე ქრისტიანქ იფიქრას, ნამდა ხვალეიან რინას უჯგჷ დექორწინას თი პიროვნებაწკუმა, მით ვამსახურ იეჰოვას. მარა მუჟამსით ვეფთვალისწინენთ ბიბლიურ რჩევას, თეს ხშირას გურჭუა დო ოწუხებელ მოჸუნს. ჩქინო, იეჰოვაშ მსახურება ცხოვრებას არძაშ უმოს მნიშვნელოვან რე. მუჭო იგინანქ დუც, მუჟამსით ვეშქალებე მეუღლეს გაუზიარე თინა, მუთ არძაშ უმოს მნიშვნელოვან რე სქანო? ბრელს გინოჭყვიდილ აფჷ ხვალე ქუდოსქიდას, ვინემ დექორწინას თიცალ პიროვნებაწკუმა, მიდგას ვა უჸორს იეჰოვა დო ვამსახურ თის (წეკითხ ფსალმუნი 32:8).
11. მუჭო შეილებ გონივრულო გიშეგორე მომავალ მეუღლე?
11 თენა თის ვა ნიშნენს, ნამდა არძა, მით იეჰოვას ომსახურ, ჯგირ ქომონჯ ვარდა ჯგირ ოსურ იჸუაფ. დაოჯახებაშე ქოფიქრენქ-და, დოგორ თიცალ პიროვნება, მით ნამდვილო მიგეწონებ დო მიდგაწკუმა ჯგირო იგინანქ დუც. ვეჩქარა თე ნაბიჯიშ გინოდგუმა ონდო ვეშეხვადუქ თიცალ პიროვნებას, მიდგას სქანნერ მიზნეფ უღჷ დო მიდგაშო ღორონთიშ მსახურება ირფელშე უმოს მნიშვნელოვან რე ცხოვრებას. დრო გეგმურთ, ნამდა წეკითხე დო დეფიქრე თი რჩევეფშე, ნამდგას ართგურ დო გონიერ მონა მარზენა ქორწინებაშ გურშენ (წეკითხ ფსალმუნი 119:105).
12. მუ რჩევეფს მარზენა ბიბლია გარიგებათ ქორწინებაშე?
12 ნამთინე კულტურას მეღებულ რე, მშობლეფქ გიშუგორან მუნეფიშ სქუას საქომონჯო ვარდა საოსურო. ბრელ ფიქრენს, ნამდა მშობლეფს უმოსო უჩქჷ, მი იჸუაფ მუნეფიშ სქუაშო არძაშ უჯგუშ. თეცალ წეს-ჩვეულება ბიბლიურ დროს ხოლო რდუ გავრცელებურ. ოჯახის, სოდეთ თეცალ ტრადიცია რე მეღებულ, მშობლეფქ ბიბლიას მოჩამილ რჩევეფით ოკო იხემძღვანელან, ნამდა ქოძირან, ნამ თვისებეფს მიაქცუან ყურადღება. მაგალთო, მუჟამსით აბრაამ მუშ სქუა ისაკშო საოსუროს გორუნდჷ, თიშო მთავარ ფარა ვარდა სოციალურ მდგომარეობა ვარდჷ. თეშ მანგიორო, თიცალ სანოსოს გორუნდჷ, ნამდგას იეჰოვაშ ჸოროფა აღვენუდ (დაბადება 24:3, 67; ქოძირ დანართ 25).
მუჭო მივემზადა ქორწინებაშო?
13—15. ა) მუჭო შეულებ ქომოლკოჩის მემზადას, ნამდა ქიჸუას ჯგირ მეუღლექ? ბ) მუჭო შეულებ ოსურს მემზადას, ნამდა ქიჸუას ჯგირ მეუღლექ?
13 დაქორწინებაშო ქოფიქრენქ-და, დერწმუნ, ნამდა მზათ რექ თე მნიშვნელოვან ნაბიჯიშ გინადგუმალო. შილებე ფიქრენდე, ნამდა მზათ რექ, მარა მორთ ქობძირათ, სინამდვილეს მუს ნიშნენს, მზათ რდე ქორწინებაშო. პასუხიქ შილებე გუგაკვირას.
დრო გეგმურთ, წეკითხე დო დეფიქრე ქორწინებაშ გურშენ ღორონთიშ სიტყვას მოჩამილ რჩევეფშე
14 ბიბლია ოძირანს, ნამდა ჩილ დო ქომონჯის შხვადოშხვა როლ უღჷ ოჯახის. ათეშენ ბუნებრივ რე, თინეფქ შხვადოშხვანერო ოკო მემზადან ქორწინებაშო. ქომოლკოჩიქ, ნამუთ ქორწინებას აპირენს, ოკო დეფიქრას ქორენ დო ვარ მზათ, ქიჸუას ოჯახიშ დუდიქ. იეჰოვა მელჷ, ნამდა ქომონჯ ქიმკაჯინე ოსურიშ დო ბაღანეფიშ მუჭოთ ფინანსურ, თეშ ემოციურ მოთხოვნილებეფს. მარა არძაშ უმოს მნიშვნელოვან რე, ოჯახის ქიმეხვარას, თაყვან ქოცან იეჰოვას. ბიბლია იჩიებ, ნამდა კოჩ, ნამუთ ოჯახის ვემკაჯინე, „ურწმუნოშე უფრაშ რე“ (1 ტიმოთე 5:8). სი ხოლო დაოჯახებაშე ქოფიქრენქ-და, დეფიქრჷ, მუჭო შეილებ გეგმირინუე თე ბიბლიურ პრინციპ: „მეუ ომუშებშა დო დამუშე სქან დიხა, უკულ გეიაშენ სქან ოჯახი“. შხვა სიტყვეფით ქოფთქუათინ, სოიშახ დეოჯახებუქ ოკო დერწმუნე, ნამდა ზუსტას თიცალ ქომონჯ იჸუაფუქ, მუნერსით იეჰოვას ითხინს სქანდე (იგავები 24:27).
15 ოსურქ, ნამუთ დაქორწინებაშე ფიქრენს, მუშ დუც ოკო ქოკითხას, ქორენ დო ვარ მზათ, შეასრულას ოსურიშ დო დიდაშ მოვალეობეფ. ბიბლიას ბრელ რჩევა რე მოჩამილ, მუჭო შეულებ ჯგირ ოსურს იხანდას მუშ ქომონჯ დო ბაღანეფშე (იგავები 31:10—31). ამდღა ბრელ ოსურ დო კოჩ ხვალე თიშე ფიქრენს, მუ ჯგირობუას მოუღანს პირადო მუნეფს ქორწინება. მარა იეჰოვას ოკო, ნამდა დეფიფქრათ, ჩქი მუშ კეთება შემლებნა მეუღლეშო.
16, 17. მუ საკითხეფშე ოკო დეფიქრე სოიშახ დეოჯახებუქ?
16 სიოშახ დეოჯახებუქ, დეფიქრ, მუს იჩიებ იეჰოვა ჩილ დო ქომონჯიშ გურშენ. ოჯახიშ მეთაურობა ვა ნიშნენს, ქომოლკოჩიქ ემოციურ დო ფიზიკურ ჭუა მიორინუას მეუღლეს. ოჯახიშ ჯგირ მეთაურ იესოშ მაგალითის მეჸუნს, ნამუთ ირიათო ჸოროფას დო სიჯგირას გიმირჩქინანდჷ თინეფწკუმა, მიდგაშ მიკოჯინა ოვალუდ (ეფესოელები 5:23). ოსურქ ხოლო ოკო დეფიქრას, მუჭო შეულებ ხუჯ ქუდუკინას ქომონჯიშ გადაწყვეტილებეფს დო ითანამშრომლას თიწკუმა (რომაელები 7:2). თიქ ალალას ოკო ქოკითხას მუშ დუც, ქიჸუაფუნო ბედნერ თიმწკუმა, მუჟამსით არასრულყოფილ კოჩის ოკო დემორჩილას. თეშ კეთება გაუჭირდუ ქოფიქრენს-და, უჯგუშ იჸუაფ ვეჩქარას თე ნაბიჯიშ გინოდგუმა.
17 დაქორწინებულეფ პირველ რიგის მუნეფიშ დუდშე უმოსო მეუღლეშ ბედნერობაშე ოკო ფიქრენდან (წეკითხ ფილიპელები 2:4). პავლექ ჭარჷ: „თითოულს მუშ დუდცალო ოკო უჸორდას მუშ ოსურ, ოსურ ხოლო დიდ პატის ოკო ცენდას ქომონჯის“ (ეფესოელები 5:21—33). ოჯახის ჩილ დო ქომონჯ ართიანშე ჸოროფას დო პატიცემას ოკო გინაფლენდას. ქორწინებაქ ბედნერ ქიჸუასინ, ქომონჯის განსაკუთრებულო ოსაჭირ გინაფლენდას, ნამდა მუშ ოსურ დიდ პატის ცენს დო ოსურს განსაკუთრებულო ოსაჭირ, გინაფლენდას, ნამდა ქომონჯის მანგარო უჸორს.
18. მუშენ ოკო რდან ფრთხილას წყვილეფ ჸოროფილობაშ დროს?
18 ჸოროფილობაშ დრო სასიამოვნო პერიოდ რე. თე დროს ძღაბ დო ბოშიქ უჯგუშო ოკო გეჩინებაფუან ართიან, რდან ართიანწკუმა ალალეფ დო თოლ გუსწორან რეალობას. შედეგო შეიალებენა, ქოძირან, ნამდვილო ქაკონან დო ვარ მთელ ცხოვრებაშ ართო გატარება. გაჩინებაფაშ პერიოდის ძღაბ დო ბოშის შეულებნა ქიდიგურუან, მუჭო მექცუან ართიანს დო ქინანჭან, მუნერეფ რენა სინამდვილეს. მუთ უმოს ხოლოშიან ურთიერთობას ავითარენა, თით უმოსო ოკონა, ართიანიშ ხოლოს რდან. მარა დაქორწინებაშახ თინეფქ ოკო გაკონტროლან მუნეფიშ გრძნობეფ, ნამდა უზნეობას ვეიაჸუნან. ნამდვილ ჸოროფა მეხვარებნა, გეგმირჩქინან დუდშეკება და ვაკეთან თიცალ მუდგარენ, მუთ გილულუანა მუჭოთ ართიანწკუმა, თეშ იეჰოვაწკუმა ურთიერთობას ხოლო (1 თესალონიკელები 4:6).
ჸოროფილობაშ დროს ძღაბ დო ბოშ გურაფლენა ართიანწკუმა ურთიერთობას
მუ რე საჭირო, ბედნერ ქორწინებაქ დიდხანს გეგრძელას
19, 20. მუნერ დამოკიდებულება ოკო უღდან ქრისტიანეფს ქორწინებაშე?
19 ბრელ წიგნის დო კინოს ქორწინება დიდ დო ხიოლით ეფშა კამპანიათ ითებ. მარა სინამდვილეს თენა ხვალე დაჭყაფ რე. იეჰოვაქ ქორწინება მარადიულ კავშირო გაჭყჷ (დაბადება 2:24).
20 ამდღა ბრელშო ქორწინება დროებით კავშირ რე. თინეფ ადვილო იქორწინებნა დო ადვილო ეთხიებნა ართიანს. ნამთინე ფიქრენს, ნამდა ოჯახის პრობლემეფქ ქაშუეს-და, თინა ჩათხიებათ მიგვარებ. მარა ქიგიფშინათ ბიბლიურ მაგალით სუმფა ძაფშე. თეცალ ძაფ დიდ წინააღმდეგობაშ დროს ხოლო ვახორცქუ. მუჟამსით პრობლემაშ მაგვარებელო იეჰოვაშ ხემძღვანელობას მეპჸუნთ, თეს შეულებ გინასქილიდუას ჩქინ ქორწინება აკოცუმაშე. იესოქ თქუ: „მით ღორონთიქ შეაუღლჷ, კოჩიქ ვა დაშორას თინეფ“ (მათე 19:6).
21. მუ მეხვარებ ჩილ დო ქომონჯის უჸორდან ართიან?
21 ჩქი არძას მიღნა დადებით დო უარყოფით მხარეეფ. ადვილ რე შხვეფიშ, განსაკუთრებულო მეუღლეშ, სუსტ მხარეეფიშ ძირაფა. მარა თაშ მოქციება ბედნერობას ვა მომღანა. თეშ გინაწონს, მეუღლეშ დადებით მხარეეფშა ყურადღებაშ გინოღალა, ოჯახიშ ბედნერობას უნწყუნს ხეს. მარა ჩქინ მეუღლე არასრულყოფილ რე. ათეშენ, ქორენო შეიოლებერ, ყურადღება ხვალე თიშ ჯგირ მხარეეფშა გეგნიღე? ქო, თენა შეიოლებერ რე! იეჰოვას უჩქჷ, მუსხით შორს ვორეთ სრულყოფილებაშე, მარა თინა ჩქინ ჯგირ მხარეეფს ოკვირ. წერმიდგინ, მუჭო იჸუაფუდ ჩქინ საქმე, თენა თაშ ვა რდასინ! ფსალმუნმაბირე იჩიებ: „დაშებულს ქაკვირუდენ, იაჰ, მითინ ქიჸუაფუდუო მართალ, იეჰოვა?!“ (ფსალმუნი 130:3). თაშ ნამდა, წყვილეფქ იეჰოვაშ მაგალითის ოკო მიაჸუნან, ყურადღება მეუღლეშ ჯგირ თვისებეფშა გეგნიღან დო მზათ რდან, ხეთეშე ქაპატუან ართიანს (წეკითხ კოლოსელები 3:13).
22, 23. მუ ჯგირ მაგალითის არზენს აბრაამ დო სარა დაქორწინებულეფს?
22 წანეფიშ მიკულაწკუმა ართო შილებე ქორწინებაქ უმოსო გემანგარას. აბრაამ დო სარას უღდეს ბედნერ ქორწინება, ნამდგაქ სიცოცხლეშ ბოლოშა გეგრძელ. მუჟამსით იეჰოვაქ აბრაამს უწუ, ქუდუტებუდკო მუშ ჸუდე ქალაქ ურს, სარა სოდგარენ სუმენეჩ წანას რდუ გინოჩილათირ. წერმიდგინ, მუნერ რთულ იჸუაფუდ თიშო კომფორტულ ჸუდეშ დოტება დო კარავს ცხოვრება. მარა სარა ჯგირ მეგობარ დო მეუღლე რდუ. თინა დიდ პატის ცენდჷ აბრაამს, ხუც უკინენდჷ თიშ გადაწყვეტილებეფს დო ოხვარუდ თინეფიშ შესრულებას (დაბადება 18:12; 1 პეტრე 3:6).
23 მუშო ოკო რაგად, ჯგირ ქორწინება ვა ნიშნენს, ჩილ დო ქომონჯ ირო დო ირფელს ოთანხმუდან ართიანს. ართშა, მუჟამსით აბრაამქ ვედეთანხმჷ სარას, იეჰოვაქ თის უწუ: „ქუმურჩქილე თის“. აბრაამქ ხოლო თაშ მიქცუ დო თეს ჯგირ შედეგეფქ ქუმაჸუნ (დაბადება 21:9—13). მუჟამსით სი დო სქან მეუღლე მუდგარენ საკითხის ართიანს ვათანხმუთ, გურქ ვა გოიტირხას. თეცალ დროს მნიშვნელოვან რე ართიანიშ პატიცემა დო ჸოროფაშ გიმორჩქინა.
ქორწინებაშ პირველ დღაშე ღორონთიშ სიტყვა რდას მნიშვნელოვან თქვან ოჯახის
24. მუჭო შეულებ ჩქინ ქორწინებას, განადიდას იეჰოვა?
24 იეჰოვაშ ორგანიზაციას ბრელ ბედნერ წყვილ რე. დაოჯახება ქოილამ-და, რშუდას, ნამდა მეუღლეშ გიშაგორუა არძაშ უმოს სერიოზულ გადაწყვეტილება რე. თის შეულებ დიდ გავლენა უღდას მთელ სქან ცხოვრებას, ათეშენ ქოთხი იეჰოვას ხემძღვანელობა დო მიაჸუნ თიშ მითითებეფს. თენა მიგეხვარებ გონივრულო გეგშაგორე მომავალ მეუღლე, მემზადე ქორწინებაშო დო გავითარე ხოლოშიან ურთიერთობა სქან მეუღლეწკუმა. თეშნერო სქან ქორწინება დიდებას მოუღანს იეჰოვას.
