1. მუჭო დებრწმუნათ, ნამდა ჩქინ თაყვანიშცემა მოსაწონ რე იეჰოვაშო დო მუშენ რე თენა მნიშვნელოვან?

იესოქ თქუ: „ჭეშმარიტ თაყვანიშმცემელეფქ მუმას შურით დო ჭეშმარიტებათ ოკო ცან თაყვან, მუშენდა მუმა ზუსტას თეცალ თაყვანიშმცემელეფს გორუნს მუშო“ (იოანე 4:23; 6:44). თითოულქ ოკო შევამოწმათ, „მუ რე მოსაწონ უფალშო“ (ეფესოელები 5:10). თეშ კეთება ირო ადვილ ვა რე. სატანა ოცად, მიმოჩილითუან დო თიშნერ მუდგარენ გუმოკეთებაფუან, მუდგათ გურს ვუწყუნუანთ იეჰოვას (გამოცხადება 12:9).

2. გენწყჷ, მუქ მოხვად სინაშ გვალას.

² მუჭო ოცად სატანა ჩქინ მეჩილითაფას? თიშ ართ-ართ მეთოდ რე, გონება ამრუან დო გამჭირდან ჯგირ დო ფურიშ გარჩიებაქ. ქიგიშინით მუქ მოხვად, მუჟამსით ისრაელეფს სინაშ გვალაწკუმა კარავეფ აფდეს გოშალირ. მოსე გვალაშა რდუ ეკულირ დო ხალხ თიშ დორთას უჯინედ. საბოლათ, მუჟამსით ჯინას დოშურდეს აარონს უწის, ნამდა თინეფშა გუკეთებუდკო ღორონთ. აარონქ თინეფს გუკეთ ოქროშ კერპ, ნამდგას გინიშ ფორმა უღუდ. თეშ უკულ ხალხიქ ზეიმ მანწყუ. თინეფ გასხაპანდეს დო თაყვანს ცენდეს კერპის დო ფიქრენდეს, ნამდა გინიშ თაყვანიშცემათ იეჰოვას ცენდეს თაყვანს. მართალ რე, ხალხის თენა „იეჰოვაშ დღახუთ“  მიორჩქუდ, მარა სინამდვილეს იეჰოვაშ თოლს თენა კერპიშ თაყვანიშცემა რდუ. შედეგო ბრელქ ღურათ დესაჯ (გამოსვლა 32:1—6, 10, 28). მუს ბგურაფლენთ თავრეშე? დუდ ვედეღორა. „უწმინდურს ვემკანჭა“ დო ქიმეჩ იეჰოვას საშვალება, ქუდგოგურუას, მუ რე ჯგირ დო ფურ (ესაია 52:11; ეზეკიელი 44:23; გალატელები 5:9).

3, 4. მუშენ რე ჯგირ გეგმიბრკვიათ, სოვრეშე მოურს ნამთინე პოპულარულ დღახუ?

³ დედამიწას ცხოვრებაშ დროს იესოქ მოციქულეფს დაგურუ, მუჭო ცესკო ღორონთის თაყვან თიშ მოსაწონო. თიშ ღურაშ უკულ მოციქულეფქ აგრძელენდეს შხვეფშა იეჰოვაშ პრინციპეფიშ გურაფას. მარა მოციქულეფიშ ღურაშ უკულ, ტყურა მასწავლებერეფქ ჭიე-ჭიეთ გემშიღეს კრებაშა არასწორ გურაფეფ, წარმართულ წეს-ჩვეულებეფ დო დღახუეფ. თინეფქ ნამთინე თეცალ დღახუს სახელ ხოლო დუთირეს, ნამდა ხალხ ქუდაჯერუესკო, ითამ თინა ქრისტიანულ რდუ (2 თესალონიკელები 2:7, 10; 2 იოანე 6, 7). თინეფშე უმენტაშ ამდღა პოპულარულ რე დო ხეს უნწყუნს ცრუ რწმენაშ დო დემონიზმიშ * გავრცელებას ხოლო (გამოცხადება 18:2—4, 23).

⁴ ამდღა დღახუეფს ხალხიშ ცხოვრებას მნიშვნელოვან ადგილ უკინებ. მარა, მუჟამსით ქიგეგენქ იეჰოვაშ თვალსაზრისის შხვადოშხვა საკითხიშ გურშენ, შილებე ნამთინე დღახუშე შეხედულებაქ გაჸუას ოთირალქ. თენა ადვილ ვა რე, მარა დარწმუნებულ რდა, ნამდა იეჰოვა მიგეხვარებ. მორთ გეგმიბრკვიათ, სოვრეშე მოურს ნამთინე პოპულარულ დღახუ, მუთ მიმეხვარებნა ქიგებგათ, მუჭო უჯინე იეჰოვა თინეფს.

5. სოვრეშე იძირე, ნამდა იესო 25 დეკემბერს ვარდა 7 იანარს ვა დაბადებე?

⁵ მსოფლიოშ ბრელ ადგილს ქირსეს 25 დეკემბერს (ვარდა 7 იანარს) აღნიშნენა, მუშენდა ხალხიშ უმენტაშ ფიქრენს, ნამდა თე დროს დებად იესო ქრისტექ. მართალ რე, ბიბლიას ვა ჭარჷ, კონკრეტულო ნამ დღას დო თუთას დებად იესოქ, მარა თინა გარკვეულ ინფორმაციას მარზენა, წარმოწანაშ ნამ დროს დებად თიქ. მოციქულ ლუკა იჩიებ, ნამდა მუჟამსით იესოქ ბეთლემს დებად, „ჭყიშეფ მინდორო რდეს დო სერით მუნეფიშ შხურეფს ყარაულენდეს“ (ლუკა 2:8—11). დეკემბერიშ თუთას ბეთლემს ჩხურ რე, ჭვენს დო მინშა თუნს, ათეშენ ჭყიშეფ მუნეფიშ შხურწკუმა ართო სერით გალე ვა გაჩერდუდეს. მუს ბგებულენთ თავრეშე? იესო ვა დაბადებე დეკემბერს, თიქ წარმოწანაშ თი დროს დებად, მუჟამსით უმოს ტიბ ამინდეფ რდუ. ბიბლიაშე დო ისტორიულ წყაროეფშე იძირე, ნამდა იესო თანამედროვე კალენდარით, სოდგარენ სექტემბერ ვარდა ოქტომბერიშ დუნაბად რე.

6, 7. ა) სოვრეშე მოურს ქირსეშ წეს-ჩვეულებეფ? ბ) მუ მიზეზით ოკო ვაჩუქათ ართიანს საჩუქრეფ?

⁶ სოვრეშე უღჷ დაჭყაფ ქირსეს? თინა მოურს თიცალ წარმართულ დღახუეფშე, მუნერით რე მაგალთო, ჯვეშ რომაულ დღახუ, სატურნალია, ნამუთ მეძღვინელ რდუ მიწათმოქმედებაშ ღორონთ სატურნშა. ართ-ართ ენციკლოპედია იჩიებ: „რომაულ დღახუს, სატურნალიას შქა დეკემბერს აღნიშნენდეს. თე დღახუშ ბრელ მხიარულ წეს-ჩვეულება ქირსეშ აღნიშნებელო გეგნიღეს. მაგალთო, თე დღახუს ჩვევათ უღდეს სუფრეფიშ გიმონწყუალა, საჩუქრეფიშ ჩუქება დო სანთელეფიშ ერზამა“ (The Encyclopedia Americana). თეს გეძინელ, 25 დეკემბერს სპარსეთიშ ჩხანაშ ღორონთ, მითრაშ დაბადებაშ დღას ხოლო აღნიშნენდეს.

 ⁷ ამდღა ხალხიშ უმენტაშ, მით ქირსეს აღნიშნენს, ვა ფიქრენს სინამდვილეს, მუნერ დაჭყაფ უღჷ თის. თინეფშო ქირსე უბრალოთ ოჯახიშ წევრეფწკუმა ართო აკოშაყარუაშ, ოჭკუმალიშ გემუანო ჭკუმუაშ დო საჩუქრეფიშ ჩუქებაშ დრო რე. მუშო ოკო რაგად, ჩქი მიჸორა ოჯახიშ წევრეფ, მეგობრეფ დო იეჰოვას ხოლო ოკო, ნამდა თიშ მსახურეფქ ართიანიშ ყურადღება გეგმირჩქინან. 2 კორინთელეფიშ 9:7 მირაგადნა, ნამდა „ღორონთის თინა უჸორს, მით ხიოლით ორთჷ ჯგირს“. იეჰოვას ვაკო, ნამდა ჩქი ხვალე განსაკუთრებულ შემთხვევეფიშ დროს ვაჩუქათ ართიანს საჩუქრეფ.  იეჰოვაშ მსახურეფ წანაშ ნებისმიერ დროს იშაყარუნა მეგობრეფ დო ოჯახიშ წევრეფწკუმა ართო დო ხიოლით არზენა ართიანს საჩუქრეფს თეშ, ნამდა მანგიორს ველნა. თინეფიშ მთავარ მოტივ ჸოროფა რე (ლუკა 14:12—14).

8. ახალდაბადებულ რდუო იესო, მუჟამსით ასტროლოგეფქ საჩუქრეფით მერთეს თიშა? გენწყით.

⁸ ქირსეშ დღახუს საჩუქრეფიშ ჩუქებას ბრელ თით ამართლენს, ნამდა, მუჭოთ ფიქრენან, ახალდაბადებულ იესოშა ხოლო საჩუქრეფით მერთჷ სუმ ბრძენ კოჩიქ. მართალ რე, იესოშა თინეფქ დასურო მერთეს საჩუქრეფით, მუშენდა ბიბლიურ დროს განსაკუთრებულ ხალხშა საჩუქრეფიშ მეღალა ჩვეულებრივ მუდგარენო ითვალუდ (1 მეფეები 10:1, 2, 10, 13). მარა ქოიჩქუდუო, ნამდა თე ქომოლკოჩეფ რდეს ასტროლოგეფ, გიმირინუანდეს მაგიას დო ვამსახურდეს იეჰოვას? თეს გეძინელ, მუჟამსით ასტროლოგეფქ იესოშ ოძირაფშა მერთეს, თინა ვა რდუ ახალდაბადებულ ბაღანა, ნამუთ ფინახარს ინოჯანუდ. ასტროლოგეფქ თიმწკუმა მერთეს იესოშა, მუჟამსით თინა უკვე მორდილ რდუ დო მშობლეფწკუმა ართო ჸუდეს ცხოვრენდჷ (მათე 2:1, 2, 11).

9. დაბადებაშ დღაშ აღნიშნებაშ ნამ შემთხვევეფ რე მოშინაფილ ბიბლიას?

⁹ ბაღანაშ დაბადება არძაშო სახიოლო რე (ფსალმუნი 127:3). მარა თენა ვა ნიშნენს, ნამდა დაბადებაშ დღალეფ ოკო აბღნიშნათ. დეფიქრ: ბიბლიას დაბადებაშ დღაშ აღნიშნებაშ ხვალე ჟირ შემთხვევა რე მოშინაფილ. პირველ შემთხვევა ეჭარუნს ეგვიპტეშ ფარაონიშ დო მაჟია — მეფე ჰეროდე ანტიპაშ დაბადებაშ დღას (წეკითხ დაბადება 40:20—22; მარკოზი 6:21—29). თინეფშე ნამთინ ვამსახურუდ იეჰოვას. ფაქტ რე, ბიბლიას სოთინ ვა ჭარჷ, ნამდა იეჰოვაშ მსახურეფ დაბადებაშ დღალეფს აღნიშნენდეს.

10. მუს ფიქრენდეს პირველ საუკუნეშ ქრისტიანეფს დაბადებაშ დღაშ აღნიშნებაშე?

 ¹⁰ ართ-ართ ენციკლოპედია იჩიებ, ნამდა პირველ ქრისტიანეფს „ნებისმიერ პიროვნებაშ დაბადებაშ დღაშ აღნიშნება წარმართულო მიორჩქუდეს“ (The World Book Encyclopedia). თეცალ დღახუეფ ტყურა რწმენაშა რდუ გერსხილ. მაგალთო, ჯვეშ ბერძნეფს ჯერდეს, ნამდა არძა პიროვნებას ჸუნდჷ შურ, ნამუთ დაბადებაშე თხილანდჷ თის. თინეფიშ აზრით თე შურს კავშირ უღუდ თი ღვთაებაწკუმა, ნამუთ თი დღას რდუ დაბადებულ, ნამდგას თე კოჩ. თეწკუმა ართო, დაბადებაშ დღალეფ დაკავშირებულ რე ასტროლოგია დო ჰოროსკოპწკუმა.

11. მუს ელჷ იეჰოვა ჩქინდე?

¹¹ ბრელს მუშ დაბადებაშ დღა განსაკუთრებულ დღათ მიორჩქ, ათეშენ შხვეფშე ჸოროფა დო პატიცემას ელჷ. მარა ჩქი მეგობრეფ დო ოჯახიშ წევრეფწკუმა ჸოროფაშ გიმოხანტუა, ხვალე თე დღას ვარინ, ირიათო შემლებნა. იეჰოვას ოკო, ნამდა სიჯგირა დო გურხვეობა ირნერ დროს გიმიფრჩქინათ (წეკითხ საქმეები 20:35). იეჰოვაქ ძვირფას ძღვინ, სიცოცხლე მაჩუქეს, ათეშენ თიშ მარდულეფ ხვალე ართ დღას ვარინ, არძა დღას ვორეთ (ფსალმუნი 8:3, 4; 36:9).

12. მუჭო შილებე ღურაშ დღა, დაბადებაშ დღას უჯგუდას?

¹² ეკლესიასტეშ 7:1 იჩიებ: „ჯგირ სახელ უჯგჷ ჯგირ ზეთის დო ღურაშ დღა — დაბადებაშ დღას“. მუჭო შილებე ღურაშ დღა, დაბადებაშ დღას უჯგუდას? ახალდაბადებულს დიო მუთუნ ვაფჷ კეთებულ, ვართ ჯგირ დო ვართ ფურ. მარა მუჟამსით ცხოვრებას იეჰოვას უძღვინენს დო ჯგირ საქმეეფიშ კეთებას იჭყანს, თეთ ღორონთიშ თოლს „ჯგირ სახელს“ იმკვიდრენს. შედეგო თე პიროვნებაქ დოღურასინ ხოლო იეჰოვას თინა დღას ვა გაჭყორდუ დო ქიგიშინანს (იობი 14:14, 15). იეჰოვაშ ხალხ ვართ მუნეფიშ  დო ვართ იესოშ დაბადებაშ დღას აღნიშნენს. სინამდვილეს, იესოქ ხვალე მუშ ღურაშ დღაშ აღნიშნება დუმავალეს (ლუკა 22:17—20; ებრაელები 1:3, 4).

13, 14. სოვრეშე უღჷ დაჭყაფ თანაფაშ წეს-ჩვეულებეფს?

¹³ ბრელს ჯერს, ნამდა თანაფაშ აღნიშნებათ იესოშ გათელებას ზეიმენა. მარა სინამდვილეს თანაფა დაკავშირებულ  რე სინთეშ დო გაზაფხულიშ წარმართულ ღორონთწკუმა, ნამდგას ანგლოსაქსეფ ეოსიშ სახელით მიშინუანდეს. ართ ლექსიკონს მოჩამილ რე, ნამდა თინა ნაყოფიერებაშ ღორონთო ხოლო ითვალუდ (The Dictionary of Mythology). თანაფაშ ნამთინე წეს-ჩვეულებას თავრეშე უღჷ დაჭყაფ. მაგალთო, ართ ენციკლოპედია იჩიებ: კვერცხ „ახალ სიცოცხლეშ დო გათელებაშ სიმბოლოთ ითვალუდ“ (Encyclopædia Britannica). თეს გეძინელ, ბრელ ხან რე კურდღელეფ ნაყოფიერებაშ სიმბოლოთ ითვალუ წარმართულ თაყვანიშცემას. არგამა რე, ნამდა თანაფას მუთუნ საერთო ვა უღჷ იესოშ გათელებაწკუმა.

¹⁴ ქუმოწონსო იეჰოვას, მუჟამსით ორწყე, ნამდა ხალხ ტყურა რელიგიაშ წეს-ჩვეულებეფს მუშ სქუაშ გათელებას მიოჭარანს? მუშო ოკო რაგად, ვარ! (2 კორინთელები 6:17, 18). არგამა რე, იეჰოვას დღას ვა უთქუალ მუშ ხალხშა, იზეიმესკო იესოშ გათელება.

15. სოვრეშე უღჷ დაჭყაფ ვალენტინობაშ დღას?

¹⁵ ართ-ართ ენციკლოპედია იჩიებ: „თე დღაწკუმა დაკავშირებულ წეს-ჩვეულებეფს . . . დაჭყაფ უღჷ ლუპერკალიაშ დღახუშე, ნამდგას ჯვეშ რომს 15 ფრევალს აღნიშნენდეს. თე დღას განსაკუთრებულ პატის ცენდეს ოსურეფიშ დო ქორწინებაშ რომაულ ღორონთის, იუნონას დო ბუნებაშ ღორონთის პანს“. მარა, მუჭო გინირთ ტყურა ღორონთეფიშ ოდიდებელ დღახუეფქ ქრისტიანულო? კინ თე ენციკლოპედია იჩიებ: „ქრისტიანობაშ გავრცელებაშ უკულ სასულიერო პირეფ ოცადდეს ქრისტიანულ სახე ქიმუჩამდესკო თე წარმართულ დღახუშა. რომიშ პაპიქ, გელასიუსიქ, 496 წანას ლუპერკალიაშ დღახუ გეგნოთირუ წმინდა ვალენტინიშ დღათ დო 15 ფრევალიშ მანგიორო თიშ  აღნიშნება 14 ფრევალს დაწეს. თე ჯვეშ დღახუშ ძირითად მნიშვნელობა ამდღარ დღაშა ვა რე თირელ“ (The World Book Encyclopedia).

16, 17. მუ საკითხეფშე ოკო დეფიფქრათ, მუჟამსით ქორწინებაშ დღაშო იმწყუაფუთ?

¹⁶ ქორწილ არძაშო სახიოლო დღა რე. თე დღას შხვადოშხვანერო აღნიშნენა ირ დიხას. ხალხიშ უმენტაშ ვა ფიქრენს, სოვრეშე უღჷ დაჭყაფ ქორწილიშ ნამთინე წეს-ჩვეულებას დო შილებე ვართ უჩქუდან, ნამდა თე წეს-ჩვეულებეფ წარმართულ რელიგიაშე მოურს. მარა ქრისტიან წყვილეფ დარწმუნებულ ოკო რდან, ნამდა მუნეფიშ ქორწილ იეჰოვაშ მოსაწონო ჩეტარებ. მუჟამსით თინეფ გეგმირკვიენა, სოვრეშე უღჷ დაჭყაფ ქორწინებაშ წეს-ჩვეულებეფს, შეიალებენა სწორ გადაწყვეტილებეფიშ მეღება (მარკოზი 10:6—9).

¹⁷ უმენტაშის ჯერს, ნამდა ნამთინე საქორწილო წეს-ჩვეულებას „ჯგირ ბედ-იღბალ“ მოუღ დაქორწინებულეფშო (ესაია 65:11). მაგალთო, ნამთინე ქიანას სინჯა დო მოჭყუდუს კამფეტის მილუჭკომუანა ვარდა სენს ოტახაფუანა. თინეფს ჯერა, ნამდა თენა წყვილს მოუღანს ბედნერობას დო დიდ ხანიშ სიცოცხლეს, აშინა ბრელ სქუა დო თხილერ იჸუაფნა ირნერ უბადოშე. მარა ქრისტიანეფ ფრთხილას ოკო რდან, ნამდა დუდ აურიდუან ნებისმიერ წეს-ჩვეულებას, ნამუთ ტყურა რელიგიაწკუმა რე დაკავშირებულ (წეკითხ 2 კორინთელები 6:14—18).

18. ხოლო ნამ ბიბლიურ პრინციპეფიშ გათვალისწინება რე საჭირო ქორწილიშ კეთებაშ დროს?

¹⁸ ქრისტიან წყვილეფს ოკონა, მუნეფიშ ქორწილქ ღირსეულო ჩეტარას, თეწკუმა ართო, თინა რდას მხიარულ დო არძაშო სასიამოვნო. ქრისტიანულ ქორწილს სტუმარეფქ  დუდ ოკო აურიდუან სექსუალურ ხასიათიშ განჩეფიშ დო თიცალ სიტყვეფიშ რაგადის, მუთ უხერხულს ქინაჸათანდ მუჭოთ სინჯა დო მოჭყუდუს, თეშ სტუმარეფს ხოლო (იგავები 26:18, 19; ლუკა 6:31; 10:27). ქრისტიანულ ქორწილიშ მიზან ოკო ვა რდას „ქონებათ ცქვაფა“ (1 იოანე 2:16). ქორწილიშ კეთება ქოილამ-და, ირფელ თეშ გაკეთ, ნამდა გოხიოლდას თიშ გოშინა (ქოძირ დანართ 28).

19, 20. სოვრეშე უღჷ დაჭყაფ სადღეგრძელოეფიშ რაგადის?

¹⁹ ამდღა ირ დიხას გავრცელებურ რე ქორწილს დო შხვა შაყარუეფს სადღეგრძელოეფიშ რაგად. სადღეგრძელოშ დროს ართიანს ჯგირს უზალანა დო თეშ დამტკიცებელო ჭირქას ეთმოჭოფუნა. მუნერ დამოკიდებულება ოკო უღდან ქრისტიანეფს თე საკითხშე?

²⁰ ართ წიგნ იჩიებ, ნამდა სადღეგრძელოეფიშ რაგად ჯვეშ წარმართულ წეს-ჩვეულებეფშე მოურს, მუ დროსით ღვინს ღორონთეფს წირენდეს დო მანგიორო სურვილიშ შესრულებას თხინდეს. თე დროს იჩიებდეს თეცალ სიტყვეფს: „ბრელ წანაშ სიცოცხლე!“, „ჯამრთელობა!“ (International Handbook on Alcohol and Culture). ჯვეშ დროს მეღებულ რდუ ჭირქეფიშ ეჭოფუა დო ღორონთეფშა ხვამაშ თხუალა. მარა ჭირქაშ ეჭოფუათ იეჰოვაშე ხვამა მითინს ვემიაღებე (იოანე 14:6; 16:23).

21. ნამ დღახუეფს ოკო აურიდუან დუდ ქრისტიანეფქ?

²¹ სოიშახ გინოჭყვიდუნდე, მიღენქ დო ვარ მონაწილებას ნამთინე დღახუს, დეფიქრ, მუნერ შეხედულებეფს დო მოქმედებეფს უნწყუნს თინა ხეს. მაგალთო, ნამთინე  დღახუს უზომეთ შუნა, უზნეოთ იქციებნა ვარდა ეროტიკულ სხაპუეფს სხაპნა. ნამთინე დღახუ ხოლო ხეს უნწყუნს ჰომოსექსუალეფიშ დო ლესბოსელეფიშ ცხოვრებაშ სტილს დო ნაციონალიზმის. თეცალ დღახუეფს მონაწილებას ქობღებულენთ-და, ქირაგადენო, ნამდა ბჯოგნა თინა, მუთ იეჰოვას ჯოგჷ? (ფსალმუნი 1:1, 2; 97:10; 119:37).

22. მუ მეხვარებ ქრისტიანს, გეგნოჭყვიდას, მიღას დო ვარ მონაწილება დღახუს?

²² ქრისტიანეფქ დუდ ოკო აურიდუან თიცალ დღახუეფს, ნამუთ ღორონთის შეურაცხყოფას მიორინუანს. პავლე მოციქულქ ჭარჷ: „ათეშენ ჭკუმუნთ, შუნთ დო ვარ შხვა მუთუნს ორთუთ, ირფელ ღორონთიშ ოდიდებელო აკეთით“ (1 კორინთელები 10:31; ქოძირ დანართ 29). მუშო ოკო რაგად, არძა დღახუს კავშირ ვა უღჷ უზნეობა, ტყურა რელიგია დო ნაციონალიზწკუმა. შემლებნა პირადო გინობჭყვიდათ, მიბღენთ დო ვარ მონაწილებას თიცალ დღახუეფს, ვა წინააღმდეგ ბიბლიურ პრინციპეფს. მარა თეწკუმა ართო, მოკონა, დეფიფქრათ, მუჭო იმოქმედენს ჩქინ გადაწყვეტილებეფ შხვეფწკუმა.

23, 24. მუჭო შემლებნა ევუნწყათ ჩქინ გადაწყვეტილება ოჯახიშ თი წევრეფს, მით ვა რენა იეჰოვაშ მოწმეეფ?

²³ შილებე უკვე ვა ღებულენქჷ მონაწილებას თიცალ დღახუეფს, ნამუთ შეურაცხყოფას მიორინუანს იეჰოვას. ათეშენ ოჯახიშ ნამთინე წევრ, მით ვა რე იეჰოვაშ მოწმე, შილებე ფიქრენდას, ნამდა ვაიჸორს თინეფ დო ვა გოკო თინეფწკუმა ურთიერთობა; თეს გეძინელ, შილებე ფიქრენდან, ნამდა დღახუეფ არძაშ უჯგუშ საშვალება რე, ნამდა ოჯახიშ წევრეფქ ართო გეკიშაყარან. მუჭო შეილებ მიქცუე? არსებენს ბრელ საშვალება, მუდგათ შეილებ დარწმუნე,  ნამდა გიჸორს დო აფასენქ თინეფს (იგავები 11:25; ეკლესიასტე 3:12, 13). მაგალთო, შეილებ შხვა დროს ქუდაპეჯე დო თინეფწკუმა ართო გატარე დრო.

²⁴ მუჟამსით ნათესეფს ოინტერესნა, მუშენ ვა ღებულენქ მონაწილებას დღახუეფს, შეილებ თე საკითხიშ გურშენ მეტ ინფორმაცია დოგორე ჩქინ პუბლიკაციეფს დო ვებგვერდის jw.org, მუთ მიგეხვარებ გეუნწყე თინეფს, მუშენ ვა ღებულენქ მონაწილებას დღახუეფს. თიცალ შთაბეჭდილება ვედიტუა, ნამდა გოკო თინეფს ნირზის გიორჯგინე ვარდა სქანცალო ოფიქრებაფუე. ქიმეხვარ ოჯახიშ წევრეფს ქოძირან, ნამდა სოიშახ თეს გინოჭყვიდუნდ, ჯგირო დეფიქრ, გეთვალისწინ ბრელ ფაქტორ დო თეშ უკულ მიღჷ პირად გადაწყვეტილება. ვადინუა სიმშვიდე დო სქან „სიტყვა ირო მარდიან რდას“ (კოლოსელები 4:6).

25, 26. მუჭო შეულებნა მშობლეფს, ქიმეხვარან სქუალეფს, ქიჸოროფუან ბიბლიურ პრინციპეფ?

²⁵ მნიშვნელოვან რე ჯგირო მარჩქილედან, მუშენ ვა ბღებულენთ მონაწილებას დღახუეფს (ებრაელები 5:14). ჩქინო მთავარ რე გურ გუხარათ იეჰოვას. მშობლეფქ დრო ოკო გეგმურთან სქუალეფს, ნამდა ქიმეხვარან თინეფს, ქინანჭან დო ქიჸოროფუან ბიბლიურ პრინციპეფ. მუჟამსით იეჰოვა თინეფშო რეალურ პიროვნებათ გინირთუ, ბაღანეფს ხოლო აღვენუნა სურვილ, გურ გუხარან იეჰოვას (ესაია 48:17, 18; 1 პეტრე 3:15).

²⁶ იეჰოვა ბედნერ რე, მუჟამსით ორწყე, ნამდა ირნერო ვოცადუთ, ჩქინ თაყვანიშცემა რდას წმინდა დო ირ საკითხის ვორდათ პატიოსნეფ (იოანე 4:23). მარა ბრელიშ აზრით ამდღა რთულ რე ირნერ საკითხის პატიოსანო მიქცუე. თაშ რენო თენა სინამდვილეს? თე საკითხის უკულიან დუც გუვარჩიენთ.