1, 2. მუშენ გიჸორს იეჰოვა ღორონთ?

ქოიჸორსო ღორონთ? მუშო ოკო რაგად, თაშ რე. შილებე ღორონთიშ ძალიერ ჸოროფაქ მიგეხვარ, დუდ მეუძღვინკო თის. ალბათ გინაფლენქ, ნამდა თინა სქან არძაშ უჯგუშ მეგობარ რე. იეჰოვაქ დიო ხოლო თეიშახ ქოიჸოროფუ, სოიშახ სი იჸოროფუანდჷ თის. ბიბლიას ბკითხულენთ: „ჩქი მიჸორა, მუშენდა პირველო თიქ ქომიჸოროფეს“ (1 იოანე 4:19).

² დეფიქრ, მუჭო გიმირჩქინ იეჰოვაქ ჩქინ ჸოროფა. თიქ მაჩუქეს სქვამას მონწყილ ჸუდე — პლანეტა დედამიწა, ნამუთ ეიოფშჷ ირფელით, მუთ მოსაჭირნა, ნამდა ბედნერეფ ვორდათ (მათე 5:43—48; გამოცხადება 4:11). ღორონთის ოკო, ნამდა მუწკუმა ჯგირ ურთიერთობა მიღდან, ათეშენ მუშ დუდ გუმოჩინებაფეს. ბიბლიაშ კითხირიშ დროს იეჰოვას ვურჩქილეთ, ლოცვაშ დროს თინა მირჩქილენა (ფსალმუნი 65:2). ღორონთ მოხვარნა დო ელამრენა მუშ დიდ ძალათ — წმინდა შურით (ლუკა 11:13). თეს გეძინელ, თიქ ქუმაშქვჷ მუშ ძვირფას სქუა, ნამდა მირსხესკო ცოდა დო ღურაშე (წეკითხ იოანე 3:16; რომაელები 5:8).

3. მუ რე საჭირო, ნამდა ვა ვოდინუათ იეჰოვაწკუმა ჯგირ ურთიერთობა?

 ³ ალბათ გიჸუნა თიცალ ხოლოშიან მეგობარ, ნამუთ ირიათო ელაირენა მუჭოთ ჯგირ, თეშ გლახა დროს ხოლო. თეცალ მეგობრობა ვა ვოდინუათინ, დიდ მონდომა მოსაჭირნა. თეშ რაგად შილებე იეჰოვაწკუმა ურთიერთობაშე ხოლო, მუშენდა თინა ჩქინ არძაშ უხოლაშ მეგობარ რე. ჩქინ მეგობრობა მარადიულო გეგრძელებ. ბიბლიას ჭარჷ: „ირო რდათ ღორონთიშ ჸოროფაშ ღირსეფ“ (იუდა 21). მუჭო შემლებნა თეშ კეთება? ბიბლია მირაგადნა: „ღორონთიშ ჸოროფა თინა რე, ნამდა მივაჸუნათ თიშ მცნებეფს დო თიშ მცნებეფ დუმამონკებელ ვა რე“ (1 იოანე 5:3).

4, 5. ა) მუს ნიშნენს „ღორონთიშ ჸოროფა“? ბ) მუჟამს გორჩქინდჷ სქან გურს იეჰოვაშ ჸოროფაქ?

⁴ მუს ნიშნენს ბიბლიას მოჩამილ სიტყვეფ: „ღორონთიშ ჸოროფა“? თენა ვა ნიშნენს თი ჸოროფას, ნამდგას ღორონთ გიმირჩქინანს ჩქინწკუმა; თენა ნიშნენს თი ჸოროფას, მუდგასით ჩქი გიმიფრჩქინანთ ღორონთწკუმა. შეილებნო ქიგიშინე, მუჟამს გორჩქინდჷ პირველო სქან გურს იეჰოვაშ ჸოროფაქ?

⁵ ქიგიშინ, მუ იგინ, მუჟამსით პირველო გეგჷ, ნამდა იეჰოვას ოკო, მარადიულო იცხოვრე ახალ ქიანას. თიქ ირფელ გაკეთ თეშო დო მუშ ძვირფას სქუაშ სიცოცხლე ხოლო დათმჷ. თეშე დაფიქრებაქ მიგეხვარ, ღორონთიშ დიდებულ ძღვინიშ დაფასებას (მათე 20:28; იოანე 8:29; რომაელები 5:12, 18). მუჟამსით ქიგეგ, მუშმადიდათ უჸორქ იეჰოვას, თექ სქან გურს მანგარო იმოქმედ დო სი ხოლო გურქ ეგაფშჷ ჸოროფათ (წეკითხ 1 იოანე 4:9, 10).

6. მუს ვორთუთ, მუჟამსით მიდგარენ მიჸორა? მუს მიგეხვარ ღორონთიშ ჸოროფაქ?

 ⁶ მარა ღორონთიშ ჸოროფას ბგინაფლენდათინ, ხვალე თენა ვა რე დასაბაღ. მაგალთო, მუჟამსით მიდგაინ მიჸორან, საჭირო რე უმოსიშ კეთება, ვინემ ხვალე თიშ რაგად: „მა სი მიჸორქ“. ჸოროფა თიცალ საქმეეფს მოკეთებაფუანა, მუთ გახარენს თე პიროვნებას. თეშნერო, იეჰოვაშ ჸოროფაქ მიგეხვარ თიშ მოსაწონო იცხოვრიკო. თე ჸოროფაქ მირდჷ დო შედეგო დუდ მეუძღვინ იეჰოვას დო დინათ. დუდიშ მეძღვინუათ იეჰოვას მეჩჷ პირობა, ნამდა მარადიულო ემსახურებუდ თის (წეკითხ რომაელები 14:7, 8). მუ მიგეხვარებ თე პირობაშ შესრულებას?

7. მუს გუვაკეთენთ, იეჰოვა ქომიჸორან-და? ნამ რე თიშ ნამთინე მითითება?

⁷ ჩქი მიჸორა იეჰოვა, ათეშენ მეპჸუნთ თიშ მცნებეფს. ბიბლიაშე ბგურაფლენთ ღორონთიშ თვალსაზრისის, მუჭო ოკო იფცხოვრათ. მაგალთო, თინა მირაგადნა, ნამდა ჯოგჷ გინოჸუნელ შუმა, ხირუა, ტყურაშ რაგად, უზნეობა დო მუშ მეტ შხვა მიდგარენიშ ვარდა მუდგარენიშ თაყვანიშცემა (1 კორინთელები 5:11; 6:18; 10:14; ეფესოელები 4:28; კოლოსელები 3:9).

8, 9. მუჭო გებგათ, მუს ითხინს იეჰოვა ჩქინდე თიცალ სიტუაციეფიშ დროს, ნამუშ გურშენ ბიბლიას კონკრეტულ კანონ ვა რე მოჩამილ? ქიმიჸონ მაგალით.

⁸ მარა იეჰოვაშ მოსაწონეფ ვორდათინ, უმოს მეტ რე საჭირო, ვინემ უბრალოთ თიშ მითითებეფიშ დოჸუნა. თის ვამუჩამ ჩქინდა კანონეფიშ დიდ სია, ნამუთ ცხოვრებაშ არძა სიტუაციას ოხუ. ათეშენ მინშა მაღვენნა სიტუაციეფ, მუჟამსით ბიბლიას ვა ბძირუნთ კონკრეტულ კანონს, მუჭო ოკო მიფქცუათ. მუ მიმეხვარებნა სწორ გადაწყვეტილებეფიშ  მეღებას? (ეფესოელები 5:17). ბიბლიას მოჩამილ რე პრინციპეფ, სოვრეშეთ იძირე, მუს ფიქრენს იეჰოვა შხვადოშხვა საკითხშე. მუჟამსით ღორონთიშ სიტყვას ბკითხულენთ, თე დროს ბგებულენთ, მუნერ პიროვნება რე თინა, მუნერ აზროვნება უღჷ, მუ უჸორს დო მუ ჯოგჷ (წეკითხ ფსალმუნი 97:10; იგავები 6:16—19; ქოძირ დანართ 1).

⁹ მაგალთო, მუ ოკო ვაკეთათ, ნამდა გურ ვა ვუწყუნუათ იეჰოვას, მუჟამსით ტელევიზორს ვუჯინეთ ვარდა ინტერნეტის მუდგარენ ინფორმაციას ბგორუნთ? იეჰოვა კონკრეტულო მუთუნს ვამრაგადნა, მუ ოკო ვაკეთათ თეცალ დროს, მარა მარზენა პრინციპეფს, ნამუთ მიმეხვარებნა საკითხეფიშ სწორას გინოჭყვიდუას. ამდღარ ქიანა ეფშა რე ძალადობათ დო უზნეობათ. იეჰოვა მირაგადნა, ნამდა „ძალადობაშ მოჸოროფე ჯოგჷ თის“ დო თინა „გასამართლენს მეძავეფს“ (ფსალმუნი 11:5; ებრაელები 13:4). მუჭო მოხვარნა თე პრინციპეფ სწორ გადაწყვეტილებეფიშ მეღებას? მუჟამსით ქიგებგენთ, მუ ჯოგჷ იეჰოვას დო მუ მიორჩქ უზნეობათ, დუდ ოკო ევუჩილითუათ თე ირფელს.

10, 11. მუშენ ვომორჩილუთ იეჰოვას?

¹⁰ მუშენ ოკო დევემორჩილათ იეჰოვას? თიშ გურშენ ვარ, ნამდა დუდ ევუჩილითუათ დასაჯებას ვარდა თი გლახა შედეგეფს, მუთ ჩქინ გადაწყვეტილებეფს მაჸუნუ (გალატელები 6:7). იეჰოვას თიშენ ვომორჩილუთ, ნამდა მიჸორა თინა. მუჭოთ ჭიჭე ბაღანეფს ოკონა მუმაშ გურიშ გახარება, თეშ ჩქი ხოლო მოკონა, გურ გუხარათ ჩქინ ზეციერ მუმას. მუ რე თიშე უჯგუშ, მუჟამსით გიჩქჷ, ნამდა გურს უხარენქ ღორონთის?! (ფსალმუნი 5:12; იგავები 12:2; ქოძირ დანართ 2).

 ¹¹ ჩქი ხვალე თი დროს ვა ვომორჩილუთ იეჰოვას, მუჟამსით თენა ადვილ რე ვარდა შხვა შარა ვამღუნა; ვართ თის გიშაბგორუნთ, ნამ მითითებას მივაჸუნათ დო ნამუს ვარ (კანონი 12:32). თეშ მანგიორო, ჩქი ირნერ საკითხის დოპჸუნთ იეჰოვას ფსალმუნმაბირეცალო, ნამდგაქ თქუ: „ქიპჸოროფუანქ სქან მცნებეფს, მიჸორს თინეფ“ (ფსალმუნი 119:47; რომაელები 6:17). მოკონა, მივაჸუნათ ნოეშ მაგალითის, ნამდგაქ ირფელს ქუდაჸუნ იეჰოვას დო თეთ ქაძირ, ნამდა მანგარო უჸორდჷ თინა. ბიბლია იჩიებ, ნოექ ირფელ „ზუსტას თეშ გაკეთ“, მუჭოთ იეჰოვაქ დავალ (დაბადება 6:22). ქუგოკონო, იეჰოვაქ სქან გურშენ ხოლო თეცალ სიტყვეფ თქუას?

12. მუჭო შემლებნა გურ გუხარათ იეჰოვას?

¹² მუს გინაფლენს იეჰოვა, მუჟამსით ვურჩქილეთ დო მეპჸუნთ თის? თე დროს თიშ გურ ხარენს (იგავები 11:20; 27:11). წერმიდგინ, მუშმადიდა ხიოლ მოუღ ქიანაშ გუმაჭყაფალშა, მუჟამსით თის ვომორჩილუთ. მარა ღორონთ ვა მანძალენა თეშ კეთებას. თიქ მუჩეს ნებაშ თავისუფლება, მუთ ნიშნენს, ნამდა მიღნა ჯგირ დო ფურიშ გიშაგორუაშ უფლება. იეჰოვას ოკო, ნამდა თიშ ჸოროფაქ მიმეხვარან, მიბღათ სწორ გადაწყვეტილებეფ დო გეფხარათ ბედნერ ცხოვრებათ (კანონი 30:15, 16, 19, 20; ქოძირ დანართ 3).

13, 14. სოვრეშე მიჩქნა, ნამდა იეჰოვაშ მცნებეფ ვა რე ძნელ დაცვებელ? ქიმიჸონ მაგალით.

¹³ მუ ოკო აკეთე, მუჟამსით ფიქრენქ, ნამდა იეჰოვაშ მცნებეფ ძნელ დაცვებელ რე ვარდა თავისუფლებას მიდაიღანს? ბიბლია არგამათ იჩიებ: „თიშ მცნებეფ დუმამონკებელ  ვა რე“ (1 იოანე 5:3). შხვა მუხლეფს თე ბერძნულ სიტყვა, ნამუთ ითარგმნუ, მუჭოთ „დუმამონკებელ“ გიმირინუაფ უაზრო კანონეფიშ ვარდა თიცალ ხალხიშ ეიოჭარალო, მით ოცად შხვეფ გაკონტროლას დო დაზარალას (მათე 23:4; საქმეები 20:29, 30). იეჰოვაშ მცნებეფ „დუმამონკებელ“ ვა რე, ათეშენ ძნელ ვა რე თიშ მეჸუნა. ირფელ, მუდგას თინა ითხინს, გონივრულ დო მარგებელ რე ჩქინო.

¹⁴ მაგალთო, წერმიდგინ, ოხვარუქ მეგობარს, ნამუთ ახალ ჸუდეშა გინმურს. თის ირფელ ყუთეფშა აფჷ ინონწყილ. ნამთინე ქექე რე ოღალარო, მარა ნამთინე თიცალ მონკა რე, ნამდა თიშ ეჭოფუას ჟირ კოჩ ოსაჭირ. მუჭო ფიქრენქ, ქოიწინდუო მეგობარ ხვალე გეიჭოფუდკო დო მიდაიღალუდკო არძაშ უმოს მონკა ოღალ? მუშო ოკო რაგად, ვარ, მუშენდა თის ვაკო, მუთუნ იწყუნუე. თეშნერო, იეჰოვა ხოლო ვა მოფთხინა თის, მუდგაშ კეთება ვეშმალებენა (კანონი 30:11—14). იეჰოვა მიჩინენა დო „ჯგირო უჩქჷ, მუნერეფ ვორეთ დო ვაჭყორდუ, ნამდა ტვერ ვორეთ“ (ფსალმუნი 103:14).

15. მუშენ შემლებნა ვორდათ დარწმუნებულ, ნამდა იეჰოვაშ მცნებეფს ჩქინდა ჯგირობუა მოუღ?

¹⁵ მოსექ უწუ ისრაელეფს, ნამდა იეჰოვაშ მცნებეფ მუნეფიშ საჯგირობუოთ რდუ დო თიშ მეჸუნა სიცოცხლეს მოუღანდჷ თინეფს (კანონი 5:28—33; 6:24). ამდღა ხოლო თაშ რე. ირფელ, მუდგაშ კეთებას იეჰოვა მირაგადნა, ჩქინ ცხოვრებას უჯგუშობაშა თირანს (წეკითხ ესაია 48:17). ჩქინ მუმას, იეჰოვას, უჩქჷ, მუ რე ჩქინო არძაშ უჯგუშ (რომაელები 11:33). ბიბლიას ბკითხულენთ: „ღორონთ ჸოროფა რე“ (1 იოანე 4:8). თენა თის ნიშნენს, ნამდა იეჰოვა ირფელს ჸოროფათ ორთჷ.

16. სოვრეშე მიჩქნა, ნამდა შემლებნა დევემორჩილათ ღორონთის, თიშ უმკუჯინუო, უბადო ქიანას ფცხოვრენთ დო არასრულყოფილეფ ვორეთ?

 ¹⁶ ამდღა ჩქი ფცხოვრენთ უბადო ქიანას, სოდეთ სატანა მართველენს, ათეშენ ადვილ ვა რე, ირო მივაჸუნათ ღორონთიშ მითითებეფს. სატანა ირნერო ოცად ხალხის თიცალ მუდგარენ გაკეთებაფუას, მუთ ღორონთიშ თოლს გლახა რე (1 იოანე 5:19). თეს გეძინელ, ოკო ვებრძოლათ ჩქინ არასწორ ფიქრეფს დო გრძნობეფს, მუდგაშ გურშენ შილებე გამჭირდან ღორონთიშ მორჩილებაქ (რომაელები 7:21—25). მარა იეჰოვაშ ჸოროფა ძალას მარზენა, ვაკეთათ თინა, მუთ სწორ რე. ღორონთ ორწყე ჩქინ მონდომას, ნამდა მოკონა, დევემორჩილათ თის, ათეშენ მარზენა მუშ წმინდა შურს (1 სამუელი 15:22, 23; საქმეები 5:32). წმინდა შურ მოხვარნა, გუვავითარათ თიცალ თვისებეფ, ნამუთ უმოსო მიადვილენა ღორონთიშ მორჩილებას (გალატელები 5:22, 23).

17, 18. ა) მუს გებგენთ თე წიგნშე? ბ) მუს გუვარჩიენთ უკულიან დუც?

¹⁷ თე წიგნშე ქიგებგენთ, მუჭო შემლებნა იფცხოვრათ იეჰოვაშ მოსაწონო. თეს გეძინელ, ქობძირუნთ, მუჭო შემლებნა ღორონთიშ პრინციპეფიშ დო ზნეობრივ ნორმეფიშ გიმორნაფა. ირიათო რშუდას, ნამდა იეჰოვა დღას ვადმანძალენა მორჩილებას. მუჟამსით თიშ მორჩილებას გინოჭყვიდუნქ, სქან ცხოვრება უჯგუშობაშა დითირუ დო გაღვენუ მარადიულ სიცოცხლეშ იმენდ. მუთ არძაშ უმოს მთავარ რე, მორჩილებათ ღორონთის ვოძირანთ, ნამდა მანგარო მიჸორა თინა (ქოძირ დანართ 4).

¹⁸ იეჰოვაქ არძას მუჩეს სინდის, ნამუთ მოხვარნა ჯგირ დო ფურიშ გარჩიებას. სინდისიშ გოწაფუა მიმეხვარებნა, მივაჸუნათ ღორონთიშ მცნებეფს. მუ რე სინდის დო მუჭო შემლებნა თიშ გოწაფუა? თეს უკულიან დუც გუვარჩიენთ.