1, 2. ქორწინებას პრობლემეფ ქორენ-და, თენა თის ნიშნენსო, ნამდა ოჯახ ეკოცენს? გენწყჷ.

ქორწინება იეჰოვაშე საჩუქარ რე. თის ბრელ ხიოლ მოუღ, მარა თეწკუმა ართო არძა ოჯახ შეხვადუ პრობლემეფს. მინშა შილებე თეშ იძირედას, ნამდა პრობლემეფ დღას ვეთებ დო ჩილ დო ქომონჯ ვა გინაფლენდას თიცალ ხოლოშიან ურთიერთობას, მუნერით ადრე უღდეს.

² ქორწინებას მინშა პრობლემეფს სი ხოლო ქეშეხვად-და, ვა გაიკვირდას. თენა თის ვა ნიშნენს, ნამდა სქან ოჯახ ეკოცენს. თი წყვილეფქ ხოლო, მიდგას სერიოზულ პრობლემეფ უღდეს, დოგორეს საშვალებეფ, ნამდა გაუჯგუშესკო ურთიერთობეფ დო გამტკიცესკო მუნეფიშ ქორწინება. მუჭო იჸუ თექ შეიოლებერქ?

3, 4. მუქ შილებე მინშა ქორწინებას მოხვადას?

³ ქორწინება რე ჟირ შხვადოშხვანერ ადამიანიშ კავშირ. თინეფს განსხვავებულ გემოვნება, შეხედულება დო ჩვევეფ უღნა. შილებე ჩილ დო ქომონჯ შხვადოშხვა წარმოშობაშ დო კულტურაშ რდას, ათეშენ დრო დო მონდომა რე საჭირო, თინეფქ უჯგუშო გეჩინებაფუან დო ქუგუგან ართიანს.

 ⁴ დროშ მიკულაწკუმა ართო შილებე ჩილ დო ქომონჯიქ მუნეფიშ დუდშა თისხით გეგნიღან ყურადღება, ნამდა ჭიე-ჭიეთ დეშორან ართიანს. შილებე თეშ იძირედას, ნამდა თინეფ მუშ-მუშ ცხოვრებათ ცხოვრენა. მუ მეხვარებ თინეფს კინ დეახლოვან ართიანს?

5. ა) მუ მეხვარებ ქრისტიანს დეახლოვას მუშ მეუღლეს? ბ) მუჭოთ ებრაელეფიშ 13:4-ის ჭარჷ, მუჭო ოკო ვუჯინედათ ქორწინებას?

⁵ იეჰოვა მარზენა არძაშ უჯგუშ რჩევეფს, ნამუთ მიმეხვარებნა მუჭოთ ჩქი, თეშ ჩქინ მეუღლეს, დევეახლოვათ ღორონთის დო ართიანს (ფსალმუნი 25:4; ესაია 48:17, 18). თინა მირაგადნა: „არძაშ ქორწინება ღირსეულ რდას“ (ებრაელები 13:4). თის, მუთ ღირსეულო მიგორჩქ, მუშო ოკო რაგად, აფასენქ დო ირნერო ოცადუქ ქუმუთხილუე. იეჰოვას ოკო, ზუსტას თაშ ვუჯინედათ ქორწინებას.

6. მუჭო უჯინე იეჰოვა ქორწინებას, მუჭოთ თეს მათეშ 19:4—6-შე ბგებულენთ?

⁶ პირველ ოჯახის დაჭყაფ იეჰოვაქ მეჩჷ. იესოქ თქუ: „ვაიკითხირნანო, ღორონთიქ დაჭყაფუს კოჩ დო ოსურ გაჭყჷ დო თქუ, ათეშენ მიოტენს კოჩ მუმას დო დიდას, ქიმკაჭაბუ ოსურს დო ჟირ ართ ხორც იჸუაფნანია? თაშ ნამდა, თინეფ ჟირ ვარინ, ართ ხორც რენა. ათეშენ, მით ღორონთიქ შეაუღლჷ, კოჩიქ ვა დაშორას თინეფ“ (მათე 19:4—6). დაჭყაფშე იეჰოვაქ ქორწინება მუდმივ კავშირო გაჭყჷ. თის ოკოდ ჩილ დო ქომონჯის უღდესკო ართიანწკუმა ხოლოშიან ურთიერთობა, რდესკო ბედნერეფ დო გეხარესკო ართო ცხოვრებათ.

7. მუ მეხვარებ ჩილ დო ქომონჯის ქორწინებაშ გამტკიცებას?

⁷ ამდღა დაქორწინებულეფ უმოს მეტ პრობლემას დო ოწუხებელს შეხვადნა, ვინემ აიშახ რდუ. მინშა პრობლემეფ თიცალ ძალიერო მოქმედენს, ნამდა შილებე ჩილ დო ქომონჯიქ ოჯახიშ აკორღვაფაშე ხოლო ქიდიჭყას ფიქრ. მარა თე ნაბიჯის ვეგნობდგუნთ, მუჟამსით მარჩქილენა, მუჭო უჯინე იეჰოვა ქორწინებას (1 იოანე 5:3).

8, 9. ა) მუშენ ოკო მივაჸუნათ იეჰოვაშ ხემძღვანელობას, თიმწკუმა ხოლო, მუჟამსით თენა რთულ რე? ბ) მუჭო ვოძირათ, ნამდა ქორწინება ჩქინო ძვირფას რე?

⁸ იეჰოვაშ რჩევეფს ირიათო ჯგირ შედეგეფ მოჸუნს. თინა მირაგადნა: „არძაშ ქორწინება ღირსეულ რდას“ (ებრაელები 13:4; ეკლესიასტე 5:4). იეჰოვაშ ხემძღვანელობაშ მეჸუნას ჯგირობუა მოუღ თიმწკუმა ხოლო, მუჟამსით თენა რთულ რე (1 თესალონიკელები 1:3; ებრაელები 6:10).

⁹ ქორწინება ჩქინო ძვირფას რე, ათეშენ ირნერო  ვოცადუთ ვა ვაკეთათ დო ვა ფთქუათ თიცალ მუდგარენ, მუთ თის დაზარალენს. თეშ მანგიორო მოკონა, მეუღლეწკუმა ჩქინ ურთიერთობა უმოს მტკიცე რდას. მუჭო შემლებნა თეშ კეთება?

10, 11. ა) მუ სერიოზულ პრობლემაქ შილებე წიმიჭკირას ნამთინეშ ქორწინებას? ბ) მუშენ რე მნიშვნელოვან ქიდვეკვირათ, მუჭო ვეჩიებუთ მეუღლეს?

¹⁰ პიროვნებაქ მეუღლეს შილებე ბრელ მუდგარენით ქელაჭუას გურ. მუშო ოკო რაგად, მიჩქნა, ნამდა ქრისტიანშო მიუღებელ რე მეუღლეშ ფიზიკურ შეურაცხყოფა. მარა შილებე ვართ ჩქინ სიტყვეფქ მიორინუას თის ნაკლებ შეურაცხყოფა. სიტყვეფქ შილებე იარაღო გინირთას. ართ ოსურ იჩიებ: «ჩქიმ ქომონჯ მანგარო მიწყუნუანს გურს მუშ სიტყვეფით. შილებე ფიზიკურ შეურაცხყოფაშ კვალ ვეგმოხედას, მარა გურს მიჸვილუნს თიშ მწარე სიტყვეფ, მუნერით რე: „ზედმეტ ტვირთ რექ, მუთუნშა ვა ღირუქ“». ართ კოჩ, ნამდგას ოსურ ირიათო ირდენს დო ლანძღუნს, იჩიებ: „ონჯღორე მიჩქჷ ხალხწკუმა გემეობრე თიშ სიტყვეფ. ათეშენ თიწკუმა ჩიებაშ მუთუნნერ სურვილ ვა მიღჷ; თენა რე მიზეზ, მუშ გურშენით სამუშას გვიანშახ ფსქიდუქ. თექ ბრელით უმოს მშვიდას ვორექ, ვინემ ჸუდეს“. დამამცირებელ ჩიება დო მწარე სიტყვეფ, ნამუთ ამდღა ირ დიხას რე გავრცელებურ, ემოციურ ჭუას მიორინუანს პიროვნებას.

¹¹ შილებე ჩილ დო ქომონჯიქ მწარე სიტყვეფით თეშ დუნჭყოლას ართიანს გურ, ნამდა თიშ აკორდუალას დიდ დროქ დესაჭირას. არგამა რე, იეჰოვას ვაკო ჩილ დო ქომონჯიქ თაშ მექცუას ართიანს. მარა შილებე თეშ ქელაჭუე  სქან მეუღლეს გურ, შურო ვა გოხვადე. შილებე ფიქრენდე, მუთუნ გლახა ვაითქუალ, მარა მუს ფიქრენს სქან მეუღლე? სქან სიტყვეფით მეუღლეს გურს ქუწყუნუანქ-და, მზათ ქიჸუაფუქო დითირე? (გალატელები 5:15; წეკითხ ეფესოელები 4:31).

12. მუქ შილებე დაქორწინებულ პიროვნებას იეჰოვაწკუმა ურთიერთობა გილულუას?

¹² იეჰოვაშო მნიშვნელოვან რე, მუჭო ვურაგადუთ მეუღლეს ხალხწკუმა დო ხვალეიან რინაშ დროს (წეკითხ 1 პეტრე 3:7). იაკობიშ 1:26-ის მოჩამილ რე გაფრთხილება: „მიდგას დუდ ღორონთიშ თაყვანიშმცემელო მიორჩქ, მარა ნინა ვამათოკე, დუც იღორენს დო თიშ თაყვანიშცემას აზრ ვა უღჷ“.

13. მუჭო შილებე გურ ქელვოჭუათ მეუღლეს?

 ¹³ ჩილ დო ქომონჯიქ შხვა საკითხეფს ხოლო ოკო გეთვალისწინას, ართიანიშ გრძნობეფ. მაგალთო, მუჭო იგინანდ დუც სქან მეუღლე, უმოს მეტ დროს შხვას ქუთმენქ-და? შილებე თეშ მიზეზ არსებენდას, მაგალთო, მსახურებას რექ თიწკუმა ვარდა ოხვარუქ პრობლემეფიშ დროს, მარა იშენით დეფიქრ, ხომ ვა გუტირხუ გურ სქან მეუღლეს? ართ ქრისტიან და იჩიებ: „გურს მანგარო ელმოჭუანს, მუჟამსით ვორწყექ, ნამდა კრებას ჩქიმ ქომონჯ შხვა დას ბრელ დროს დო ყურადღებას უთმენს. დუც თეშ ბგინაფლენქ, ნამდა თიშო უმნიშვნელო ვორექ“.

14. ა) მუს ბგებულენთ დაბადებაშ 2:24-შე? ბ) მუ ოკო ბკითხათ ჩქინ დუც?

¹⁴ ქრისტიანეფს გარკვეულ პასუხიშმგებლობეფ მიღნა მშობლეფიშ დო თანაქრისტიანეფიშ წოხოლე. მარა დაქორწინებაშ უკულ ჩილ დო ქომონჯიშ მთავარ პასუხიშმგებლობა რე, ართმაჟიას ქიმკაჯინან. იეჰოვაქ თქუ, ნამდა ქომონჯ „ქიმკაჭაბუ ოსურს“ (დაბადება 2:24). მეუღლეშ გრძნობეფ არძაშ უმოს მნიშვნელოვან ოკო რდას ჩქინო. ქოკითხ სქან დუც: ქუთმენქო ჩქიმ მეუღლეს თისხი დროს, ყურადღებას დო ჸოროფას, მუსხის იმსახურენს?

15. მუშენ ოკო აურიდუან დუდ დაქორწინებულ წყვილეფქ შხვეფწკუმა ნამეტან ხოლოშიან ურთიერთობას?

¹⁵ ქორწინებას საფრთხეშ თუდო გივორინუანთ, მუჟამსით მეუღლეშე უმოს ხოლოშიან ურთიერთობას შხვაწკუმა იბჭყანთ. შილებე თე დროს ემოციურო დამოკიდებულქ გინიფრთათ თე პიროვნებაშა დო რომანტიკულ გრძნობეფქ გომრჩქინდან (მათე 5:28). თე გრძნობეფქ შილებე უმოსო გევითარას დო შედეგო თიცალ მუდგარენ გაკეთე, მუთ ქორწინებას შეურაცხყოფას ქიმიორინუანს.

16. მუ მითითებას არზენს ბიბლია ჩილ დო ქომონჯის?

¹⁶ ბიბლია იჩიებ: „არძაშ ქორწინება ღირსეულ რდას დო ჩილ დო ქომონჯიქ ვა უღალატას ართიანს, მუშენდა უზნეოეფს დო მრუშეფს ღორონთ გასამართლენს“ (ებრაელები 13:4; იგავები 5:18). მუჭო შეულებ ჩილ დო ქომონჯის თე ურთიერთობაშ დაფასება?

17. ა) მუჭო უჯინე ამდღა ნამთინე მეუღლეშ ღალატის? ბ) მუნერ დამოკიდებულება ოკო უღდან მეუღლეშ ღალატშე ქრისტიანეფს?

¹⁷ ამდღა ნამთინე ფიქრენს, ნამდა მუთუნ გლახა ვა რე მეუღლეშ ღალატის. მარა ჩქი ოკო ვემეფჩათ თეცალ აზროვნებას თიშ უფლება, ქიმოქმედას ჩქინწკუმა. იეჰოვა არგამათ მირაგადნა, ნამდა ჯოგჷ სექსუალურ უზნეობა დო მრუშობა (წეკითხ რომაელები 12:9; ებრაელები 10:31; 12:29). მეუღლეშ მეტ შხვაწკუმა სექსუალურ ურთიერთობა ქორწინებაშ შეურაცხყოფა რე. თეცალ საქციელით ვოძირანთ, ნამდა ვა ვაფასენთ ზნეობრივ ნორმეფს დო იეჰოვაწკუმა ურთიერთობას გილებლუანთ. ათეშენ, დუდ ოკო აურიდუათ თი პირველ ნაბიჯის ხოლო, ნამუთ მრუშობაშა მემიჸონანა. თეშა მიშურს შხვა პიროვნებაშ გურშენ არასწორ ფიქრეფიშ ჩათხინაფა (იობი 31:1).

18. ა) მუ საერთო უღჷ მრუშობას ტყურა ღორონთეფიშ თაყვანიშცემაწკუმა? ბ) მუჭო უჯინე იეჰოვა მეუღლეშ ღალატის?

¹⁸ ჯვეშ ისრაელს მოსეშ კანონით მეუღლეშ ღალატ თიცალ სერიოზულ ცოდვა რდუ, მუნერით ტყურა ღორონთეფიშ თაყვანიშცემა. ჟირხოლო შემთხვევას შემცოდველეფს ღურათ ასაჯენდეს (ლევიანები 20:2, 10). მუ საერთო უღჷ მრუშობას ტყურა ღორონთეფიშ თაყვანიშცემაწკუმა? ტყურა ღორონთეფიშ თაყვანიშცემათ ისრაელეფ გინურთანდეს მუნეფიშ პირობას, ნამდა  იჸუაფდეს იეჰოვაშ ართგურ. თეშნერო, მეუღლეშ ღალატით თინეფ გინურთანდეს მუნეფიშ პირობას, ნამდა იჸუაფდეს მეუღლეშ ართგურ (გამოსვლა 19:5, 6; კანონი 5:9; წეკითხ მალაქია 2:14). თავრეშე არგამათ ვორწყეთ, მუსხით სერიოზულ ცოდვა რდუ იეჰოვაშ თოლს მეუღლეშ ღალატ.

19. მუ მიმეხვარებნა, გინოჭყვიდილ მაფდან, ვა ვუღალატათ მეუღლეს?

¹⁹ მუშ რაგად შემლებნა ამდღარ დროშე? მართალ რე, მოსეშ კანონს ვემეპჸუნთ, მარა თე საკითხშე იეჰოვაშ დამოკიდებულება ვათირე. მუჭოთ დღას ვა ფცენდით თაყვანს ტყურა ღორონთეფს, თეშ ვართ ჩქინ მეუღლეს ოკო ვუღალატათ (ფსალმუნი 51:1, 4; კოლოსელები 3:5). თაშ ვემიფქციებუთ-და, მუჭოთ ქორწინებაშ, თეშ ღორონთიშ უპატიცემლობას ხოლო გეგმიფრჩქინანთ (ქოძირ დანართ 26).

20. მუჭო შეულებ სიბრძნეს გამანგარას ქორწინება?

²⁰ მუჭო შეილებ ქორწინებაშ გამტკიცება? ღორონთიშ სიტყვა იჩიებ: „სიბრძნეთ ეშენებ ჸუდე დო გურგოჩამილობაშ გიმორჩქინათ გემანგარებ თინა“ (იგავები 24:3). ჸუდე შილებე რდას გოჸინილ დო ცარიელ ვარდა ტიბ, კომფორტულ დო უსაფრთხო. თეცალ რე ქორწინება ხოლო. გონიერ პიროვნება ირფელს გაკეთენს, ნამდა მუშ ქორწინება რდას მტკიცე დო ბედნერ.

21. მუჭო მიგეხვარებ რჩქინა, განამტკიცე სქან ქორწინება?

²¹ ბიბლია აგრძელენს თე ჸუდეშე რაგადის: „რჩქინა გეიოფშანს დინახალენ ოთახეფს სქვამ დო ძვირფას ნივთეფით“ (იგავები 24:4). ღორონთიშ სიტყვაშე ნაგურეფ მეხვარებ ჩილ დო ქომონჯის ართიან შქას გაუჯგუშან ურთიერთობა  (რომაელები 12:2; ფილიპელები 1:9). მუჟამსით ბიბლიას დო პუბლიკაციეფს ართო კითხულენთ, ქიმსჯელით, მუჭო შეილებნა ნაგურეფუშ ცხოვრებას გიმორნაფა. დოგორით საშვალებეფ, მუჭო შეილებნა ართიანწკუმა გიმირჩქინათ ჸოროფა, პატიცემა, სიჯგირა დო ყურადღებიანობა. ქოთხი იეჰოვას, ქიმგეხვარას თიცალ თვისებეფიშ გავითარებას, მუთ განამტკიცენს სქან ქორწინებას დო უჯგუშ მეუღლეთ გინგორთინუანს (იგავები 15:16, 17; 1 პეტრე 1:7).

22. მუშენ ოკო გიმიფრჩქინათ მეუღლეშ ჸოროფა დო პატიცემა?

²² ირნერო ქივეცადათ, გეგმიფრჩქინათ მეუღლეშ პატიცემა დო ჸოროფა. შედეგო ქორწინება უმოს მტკიცე დო სასიამოვნო იჸუაფ. მუთ არძაშ უმოს მნიშვნელოვან რე, თეთ გურს გუხარენთ იეჰოვას (ფსალმუნი 147:11; რომაელები 12:10).