ქო! ბიბლია რე ღორონთშე, „მით გურშეჭირებულეფს გურშა ეუქექუანს“ (2 კორინთელები 7:6). მართალ რე, ბიბლია ვა რე ფსიქოგოლიურ სახემძღვანელო, მარა თიქ ბრელ პიროვნებას მეხვარ, გიორჯგინკო დუდიშ ჸვილუაშენ ფიქრის. თექ მოჩამილ პრაქტიკულ რჩევეფს თქვან მოხვარა ხოლო შეულებ.

•  მუ პრაქტიკულ რჩევეფს ირზენს ბიბლია?

•  ინოჭარნო ბიბლიას თიცალ კათაშენ, მიდგას ღურა ოკოდეს?

•  ნამ ბიბლიურ მუხლეფ მიგეხვარებნა, ჩეთხინუათ დუდიშ ჸვილუაშენ ფიქრეფ?

•  მუ ოკო აკეთათ, მუჟამსით მეგობარ გირაგადნა: „ღურა მოკო“?

•  მუჭო ოკო მიქცუათ, დუდიშ ჸვილუას ართშა უკვე ქეცადით-და?

• ● გეგმოხანტით თქვან გრძნობეფ.

   მუს იჩიებ ბიბლია: „ნამდვილ მეგობარს ირიათო უჸორდენ იჸი; თინა გაჭირებაშო დაბადებულ ჯიმა რე“ (იგავები 17:17).

   მნიშვნელობა: ჩქი შხვეფიშ მოხვარა მოსაჭირნა, მუჟამსით უარყოფით ფიქრეფ მუმაკათუნა.

   თქვან გრძნობეფიშ გურშენ შხვეფწკუმა ვეჩიებუთ-და, შილებე უარყოფით ფიქრეფქ ცხოვრება გაინწარან, მარა თეშენ შხვეფს ქეჩიებუთ-და, უჯგუშო ქიგინანთ დუდის დო საკითხეფს იმენდიშ თოლით ქუდუჭყანთ ჯინას.

   თაშ ქოცადით: ამდღა ხოლო ქუდურაგადეთ ოჯახიშ წევრის ვარდა სანდო მეგობარს a. შეილებნა თქვან გრძნობეფ ფურცელშა ხოლო გეგნიღათ.

• ● მიღით სამედიცინო მოხვარა.

   მუს იჩიებ ბიბლია: „ექიმ ჯამრთელეფს ვარინ, ლეხეფს ოსაჭირ“ (მათე 9:12).

   მნიშვნელობა: გლახათ ვორეთინ თიმწკუმა სამედიცინო მოხვარა ოკო მიბღათ.

   დუდიშ ჸვილუაშენ ფიქრეფ შილებე თიშენ გაწუხენდან, ნამდა ფსიქოლოგიურ ვარდა ემოციურ პრობლემეფ გიღნა. მუჭოთ ფიზიკურ ჭუა, თეშ ფსიქოლოგიურ ვარდა ემოციურ პრობლემეფ ხოლო ვა რე საონჯღორო. თეშა მიხვარებე.

   თაშ ქოცადით: მუთ შილებე მალას ქუდურაგადეთ კვალიფიციურ ექიმს.

• ● რშუდან, ნამდა ღორონთ ალაირენა.

   მუს იჩიებ ბიბლია: „ხუთ ბეღურას ჟირ მონეტაშა ვეგმოჩანანო? მარა ღორონთის თინეფშე ნამთინ ვაჭყორდუ … ვა გაშქურნან; ანაყუ ბეღურაშე უმოს ძვირფასეფ რეთ“ (ლუკა 12:6, 7).

   მნიშვნელობა: თქვა ძვირფას რეთ ღორონთშო.

   შილებე დუდის ხვალახეთ გინაფლენდათ, მარა ღორონთის არჩქილე თქვან გურჭუა. თინა ზრუნენს თქვანდე თიმწკუმა ხოლო, მუჟამსით ფიქრენთ, ნამდა ცხოვრებაშ გაგრძელებას აზრ ვა უღჷ. ფსალმუნიშ 51:17 იჩიებ: „მომნანიებელ დო მოდირაკილ გურიშ გურშენ სი ვარიას ვა თქუანქ, ღორონთ“. ღორონთის ოკო იცოცხლათ, მუშენდა თის უჸორთ.

   თაშ ქოცადით: გეგმირკვით ბიბლიაშე თიშ მტკიცებულებეფ, ნამდა ღორონთის უჸორთ. მაგალთო, ქოძირით ბიბლიაშ გურაფას მოხვარნან ფერ წიგნშე „დეახლოვით იეჰოვას“ 24-ა დუდ.

• ● ქილოცით.

   მუს იჩიებ ბიბლია: „არძა ოწუხებელ თის [იეჰოვას] მიანდით, მუშენდა თინა ზრუნენს თქვანდე“ (1 პეტრე 5:7).

   მნიშვნელობა: ღორონთის ოკო, გურ გეგნუფაჩათ დო ქეჩუათ ირფელ, მუთ გაწუხენა.

   ღორონთის შეულებ მერჩან შინაგან სიმშვიდე დო გარზებელ ძალა (ფილიპელები 4:6, 7, 13). თაშ ნამდა, თინა ალურე თინეფს, მით შურდოგურით მიმართენს (ფსალმუნი 55:22).

   თაშ ქოცადით: ამდღა ხოლო ქუდურაგადეთ ღორონთის ლოცვათ. ლოცვაშ დროს ქიმიშინეთ თიშ სახელ, იეჰოვა, დო ქეჩით თქვან გრძნობეფიშ გურშენ (ფსალმუნი 83:18). ქოთხით, ქიმგეხვარან რთულ მდგომარეობაშე გიშულას.

• ● ქიფიქრით ბიბლიას მოჩამილ იმენდშენ.

   მუს იჩიებ ბიბლია: „ჩქი მიღნა სანდო დო მტკიცე იმენდ, ნამუთ ღუზაცალო რე ჩქინო დო თის ფარდაშ იშო მინოპჸუნთ“ (ებრაელები 6:19).

   მნიშვნელობა: მუჭოთ ქარბორია ოლაჸაფინუანს გემს, თეშ შილებე თქვან განწყობა ხოლო ხშირას ითირუდას, მარა ბიბლიას მოჩამილ იმენდის შეულებ მიგეხვარან, ვადინუათ წონასწორობა.

   თე იმენდ ვა რე ხვალე ოცნება, ნამუთ დღას ვეშესრულებ. თენა რე ღორონთიშ დუნაპირებ, ნამდა მოსპუნს ირფელს, მუდგას ჭუა მოუღ (გამოცხადება 21:4).

   თაშ ქოცადით: ქიგეგით უმოს ბიბლიურ იმენდიშ გურშენ. თეშო წეკითხით მა-5 გაკვეთილ ბროშურაშე „სახიოლო ამბე ღორონთშე!“.

• ● აკეთით გიჸორან ფერ საქმე.

   მუს იჩიებ ბიბლია: „ხიოლით ეფშა გურ მკურნალცალო რე“ (იგავები 17:22).

   მნიშვნელობა: ჩქინ ემოციურ დო ფსიქოლოგიურ ჯამრთელობაშო ჯგირ რე, მუჟამსით მიჸორან ფერ საქმეეფს ვორთუთ.

   თაშ ქოცადით: გაკეთით თიცალ მუდგარენეფ, მუდგას ხიოლ მოუღ თქვანდა. მაგალთო, ქურჩქილით თიცალ მუსიკას, ნამუთ ჯგირ ხასიათის გიგორინუანა, წეკითხით მუდგაინ გურიშემაკინალ ვარდა შხვა გიჸორან ფერ საქმე გაკეთით. თეს გეძინელ, შხვეფშა ჯგირიშ კეთება, ჭიჭე მუდგარენით რდასინ ხოლო, დუდის ბედნერო გოგინაფუანა (საქმეები 20:35).

• ● ქიმკაჯინით თქვან ფიზიკურ ჯამრთელობას.

   მუს იჩიებ ბიბლია: „ფიზიკურ ვარჯიშ … სასარგებლო რე“ (1 ტიმოთე 4:8).

   მნიშვნელობა: ჩქინ ორგანიზმშო ჯგირ რე ფიზიკურ ვარჯიშ, დასაბაღ ლურ დო ჯანსაღ ოჭკუმალ.

   თაშ ქოცადით: ჩქარ ნაბიჯეფით გილართით დღაშე 15 წუთის რდასინ ხოლო.

• ● რშუდან, ნამდა ცხოვრებას ირფელ ითირუ, თინეფ შქას თქვან გრძნობეფ ხოლო.

   მუს იჩიებ ბიბლია: „ვაიჩქუნა, მუს მოიღანა ჭუმანერ დღა“ (იაკობი 4:14).

   მნიშვნელობა: თი პრობლემა დო გასაჭირ ხოლო, ნამუთ თეშ იძირე, ნამდა მუთუნ ვა მიხვარებე, შილებე დროებით რდას.

   ამდღა მუდგანერ რთულ სიტუაციას ვა რდათინ, ჭუმან შილებე თიქ დითირას. თაშ ნამდა, გორით პრობლემაშ გერჯგინაშ საშვალებეფ (2 კორინთელები 4:8). დროშ მიკულაწკუმა ართო, თქვან მდგომარეობაქ შილებე დითირას, მარა დუდის დიჸვილუნთ-და, სიცოცხლე უკახლე ვადგართინნენა.

   თაშ ქოცადით: წეკითხით ბიბლიაშე თი კათაშ ისტორიეფ, მით გაჭირებაშ გურშენ ღურას ნატრენდეს. ქოძირით, მუჭო დითირ თინეფიშ ცხოვრებაქ უჯგუშობაშა; ნამთინეს წარმოდგენილ ხოლო ვა აფუდ, თაშ ქუმოხვადუდუნ. ქობძირათ ნამთინე თეცალ მაგალით.

 ქო. ბიბლიას მოჩამილ რე თიცალ კათაშ მაგალითეფ, მით რთულ მდგომარეობაშ დროს ღურას ნატრენდეს. ღორონთის თინეფშა ვეგურაგადაფ, თიქ მეხვარ. თის შეულებ თქვა ხოლო მიგეხვარან.

ელია

•  ● მი რდჷ თინა? ელია რდჷ უშქურანჯ წინასწარმეტყველ, მარა თის ხოლო უტირხუდ გურ. იაკობიშ 5:17-ის ბკითხულენთ: „ელია ხოლო ჩქინცალ ადამიან რდჷ.“ (იაკობიშ 5:17).

•  ● მუშენ ნატრენდჷ ღურას? ართ მომენტის ელიაქ დუდ ხვალახეთ იგინ, დოშქურდჷ დო უღირსობაშ გრძნობაქ ქაშუ. თინა ოხვეწუდ ღორონთის: „ვამაცოცხლა, იეჰოვა“ (1 მეფეები 19:4).

•  ● მუქ მეხვარ თის? ელიაქ გურ გეგნუფაჩ ღორონთის. მუჭო ელუკინ გურშა იეჰოვაქ თის? ღორონთიქ ქაგინაფუ, ნამდა თიშე ზრუნენდჷ დო მუშ ძალა ქაძირუ. თეს გეძინელ, თიქ დარწმუნ ელია, ნამდა საჭირო პიროვნება რდჷ დო ქიმეხვარ.

•  ▸ წეკითხით ელიაშ გურშენ: 1 მეფეები 19:2—18.

იობ

•  ● მი რდჷ თინა? იობ რდჷ მდიდარ კოჩ დო ჸუნდჷ დიდ ოჯახ. თინა ართგურო ომსახურუდ ჭეშმარიტ ღორონთის.

•  ● მუშენ ნატრენდჷ ღურას? იობიშ ცხოვრებას მითინ ველუდუნ თეშ ირფელქ გლახაშა დითირ. თიქ მიოდინუ მთელ ქონება. იობიშ არძა სქუაქ უბედურ შემთხვევაშ დროს დოღურ. მუს საშინელ ლახალაქ გურჩქინდჷ. თეს გეძინელ, თინა ხოლო ქეკაწამეს, ნამდა ხვადუდუნ, თიშენ აღოლ თე ირფელქ. იობიქ თქუ: „რინაქ გემეჯოგ. ვა მოკო ცხოვრება“ (იობი 7:16).

•  ● მუქ მეხვარ თის? იობ ლოცულენდჷ დო მუშ გრძნობეფიშ გურშენ შხვეფს ეჩიებუდ (იობი 10:1:3). თის გურშა ელუკინ მუშ მეგობარ ელიჰუქ, ნამდგაქ გურიშ ხოლოშა მიღჷ თიშ გაჭირება. თიქ მეხვარ იობის, შხვა კუნთხუშე ქუჯინკო მუშ მდგომარეობას. მუთ მთავარინ, იობიქ მიღჷ ღორონთიშ რჩევა დო მოხვარა.

•  ▸ წეკითხით იობიშ გურშენ: იობი 1:1—3, 13—22; 2:7; 3:1—13; 36:1—7; 38:1—3; 42:1, 2, 10—13.

მოსე

•  ● მი რდჷ თინა? მოსე რდჷ ჯვეშ ისრაელიშ წინამძღოლ დო ართგურ წინასწარმეტყველ.

•  ● მუშენ ნატრენდჷ ღურას? მოსეს მანგარ დიდ პასუხიშმგებლობა უღუდ. თის ირიათო აკრიტიკენდეს, მუთ ძალეფს მიდუღანდჷ. ართშა გურელაჭვილ მოსექ ღორონთის უწუ: „დოპჸილ“ (რიცხვები 11:11, 15).

•  ● მუქ მეხვარ თის? მოსექ ქეჩუ ღორონთის, მუჭო გინაფლენდჷ დუდის. იეჰოვაქ ეუქექუ თის ოღალ, მუთ სტრესშე გეგშეჸონანდჷ.

•  ▸ წეკითხით მოსეშ გურშენ: რიცხვები 11:4—6, 10—17.