სქუალეფს მშობლეფშე ზრუნვაშ პასუხიშმგებლობა უღნა. ბიბლია იჩიებ, ნამდა თინეფქ ღორონთიშ ართგურობა ოჯახის ოკო გიმირჩქინან დო ქიზრუნან მშობლეფშე, „მუშენდა თენა მოსაწონ რე ღორონთშო“ (1 ტიმოთე 5:4). სქუალეფ ხანშამიშულირ მშობლეფიშ მიკოჯინათ ომორჩილნა ბიბლიას მოჩამილ მითითებას, ნამდა პატი ცან მშობლეფს (ეფესოელები 6:2, 3).

 ბიბლია კონკრეტულ მითითებეფს ვერზენს, მუჭო ოკო იბზრუნათ ხანშამიშულირ მშობლეფშე, მარა თექ მოჩამილ რე თი ოსურკათაშ დო ქომოლკათაშ მაგალითეფ, მით თეს ორთუდეს. თეს გეძინელ, ბიბლია პრაქტიკულ რჩევეფს ხოლო მარზენა.

•  მუჭო ზრუნენდჷ ბიბლიურ დროს ნამთინე მუშ ხანშამიშულირ მშობლეფშე?

•  მუ პრაქტიკულ რჩევეფს არზენს ბიბლია თინეფს, მით ხანშამიშულირ მშობლეფშე ზრუნენს?

•  იჩიებნო ბიბლია, ნამდა ოჯახიშ წევრეფქ ხანშამიშულირ მშობლეფს იშენდოიშენ ჸუდეს ოკო მიკაჯინან?

 თინეფს შხვადოშხვანერ მდგომარეობა უღდეს, ათეშენ შხვადოშხვანერო ორთუდეს თეს.

•   იოსებ მუშ ხანშამიშულირ მუმაშე, იაკობშე, შორს ცხოვრენდჷ, მარა საშვალებაქ ქიმიაჩუნ, მუშ ხოლოს ქუდახორუ. თეშ უკულ თინა ირიათო ზრუნენდჷ, ნამდა იაკობის უღუდკო დუდიშგითაფორაფალ დო ოჭკუმალ დო ჸოფედკო თხილერ (დაბადება 45:9—11; 47:11, 12).

•   რუთიქ მუშ დიანთილიშ ქიანაშა გეგნორთჷ ოცხოვრებშა დო უშულადუო მუშენდჷ, ნამდა ქიზრუნკო თიშე (რუთი 1:16; 2:2, 17, 18, 23).

•   იესოქ ღურაშახ მიკმალუაფარ ქიმურჩქინ მუშ დიდას, მარიამს, ნამუთ თი დროს, მუჭოთ იძირენ, ქომონჯღურელ რდჷ (იოანე 19:26, 27). a

 ბიბლიას მოჩამილ პრინციპეფ ოხვარ სქუალეფს, მით ხანშამიშულირ მშობლეფს ულუანა, ქუგურზან სირთულეეფს, ნამდგას მოჸუნს ფიზიკურ დო ემოციურ გინოშულადა.

•   პატი ქოცით მშობლეფს.

   მუს იჩიებ ბიბლია: „პატი ქოც სქან მუმას დო დიდას“ (გამოსვლა 20:12).

   მუჭო შილებე თე პრინციპიშ გიმორნაფა? მშობლეფიშ პატიცემას გეგმირჩქინანთ, მუჟამსით ქიმეჩანთ თინეფს თიზმა თავისუფლებას, მუზმაშ საშვალებას მდგომარეობა არზენს. მაგალთო, ქიმეჩით საშვალება, მუნეფქ გეგნოჭყვიდან საკითხეფ, ნამუთ თინეფიშ მიკოლუაფას ოხუ. თეს გეძინელ, მშობლეფიშ მახვარებელო მუთ შეილებნან ირფელს ქართუთ-და, თეშნერო პატიცემას გიმოხანტუნთ თინეფიშ მიმართ.

•   ქუგუგით დო ქაპატით

   მუს იჩიებ ბიბლია: „გურგოჩამილობა რისხუას აჩერენს; დაშებულიშ ელალუაფა ოსქვანს კოჩის“ (იგავები 19:11).

   მუჭო შილებე თე პრინციპიშ გიმორნაფა? მუჟამსით ხანშამიშულირ მშობელ მუშ სიტყვეფით გურს ქალგოჭუანა ვარდა გოფიქრებაფუანა, ნამდა ვაფასენს თქვან ხანდას, დეფიქრით: თიშ ადგილს ქუვორდენ, მა მუჭო იბგინანდჷ დუდის?“. მუჟამსით ოცადუთ, ქუგუგათ დო ქაპატუათ, თეშნერო ეიჩილითუანთ რთულ მდგომარეობაშ უმოსო გაუფრაშებას.

•   ქიკითხით რჩევა.

   მუს იჩიებ ბიბლია: „მორაგადაფაშ უმშო გეგმეფ ეკოცენს, ბრელ ელმაჩამალ რენ თექ, საქმე ხოლო იკეთებ“ (იგავები 15:22).

   მუჭო შილებე თე პრინციპიშ გიმორნაფა? გეგმირკვით, მუჭო შილებე მშობლეფს მეხვარათ, ქუგურზან მუნეფიშ ლახალას. ქიგეგით, მუ საშვალებეფ რე თქვანო ხეშამალაფარ, ნამდა უჯგუშო შეგალებუან თინეფშე ზრუნვაქ. რჩევა ქელაკითხეთ თინეფს, მიდგას ხანშამიშულირ მშობლეფიშ მიკოლუაფაშ გამოცდილება უღნა. და დო ჯიმალეფ ქორჸუნან-და, ართო მირაგადეთ, მუ ოსაჭირნა თქვან მშობლეფს, მუჭო იზრუნათ თინეფშე დო მუჭო გირთათ საქმე.

•   რდათ მოკრძალებურ

   მუს იჩიებ ბიბლია: „მოკრძალებურ ბრძენ რე“ (იგავები 11:2).

   მუჭო შილებე თე პრინციპიშ გიმორნაფა? ქიგნაჯინით, მუსხიშ კეთება შეილებნა. მაგალთო, არძას შეზღუდულ რაოდენობაშ დრო დო ენერგია უღჷ. თენა გინოჭყვიდუნს, რეალურო მუსხიშ კეთება შეილებნა თქვან მშობლეფშო. ხანიერ მშობლეფიშ მიკოლუაფა თქვანო მონკა ოღალ რენ თეს ქარწყეთ-და, ქოთხით მოხვარა ოჯახიშ შხვა წევრეფს ვარდა შხვა კვალიფიციურ ადამიანეფს.

•   ქიმკაჯინით თქვან დუდის

   მუს იჩიებ ბიბლია: „დღას მითინს ვა გოჯოგაფ მუშ სხეულ, პირიქით ოდიარუანს დო ულუანს თის“ (ეფესოელები 5:29).

   მუჭო შილებე თე პრინციპიშ გიმორნაფა? მართალ რე, მშობლეფშე ზრუნვაშ პასუხიშმგებლობა გიღნა, მარა თქვან დუდშე დო, დაქორწინებულ ქორეთ-და, თქვან ოჯახშე ხოლო ოკო იზრუნათ. ყურადღება ოკო ქიმიაქცუათ, მუს ჭკუმუნთ, მუჭო რლურა დო მუჭო ისვანჯუთ (ეკლესიასტე 4:6). მუჟამსით შეგალებენა, ჯგირ იჸუაფ ჭიჭე ხანით ქიმისვანჯათ, ნამდა ემოციურო, გონებრივო დო ფიზიკურო ძალეფ დირთინუათ. თენა მიგეხვარებნა, უჯგუშო მიკულუათ მშობლეფს.

 ბიბლიას კონკრეტულო ვა ჭარჷ სქუალეფქ ხანშამიშულირ მშობლეფშე იშენდოიშენ ჸუდეს ოკო იზრუნან დო ვარ. ნამთინე ოჯახის უსხუნ, ნამდა ონდო შეულებნან, ჸუდეს მიკულუან ხანიერ მშობლეფს, მარა შილებე დროშ მიკულაშ უკულ გინოჭყვიდან, ნამდა მოხუცებულეფიშ თავშესაფარს უჯგუშო ქიმკაჯინენა თინეფს. მთელ ოჯახიქ ოკო დიშაყარას დო ქიმირაგადუას, მუ იჸუაფ არძაშო მოხუჯურ (გალატელები 6:4, 5).