მუნერ რდჷ იესო გარეგნულო?
მუ პასუხის მარზენა ბიბლია:
მითინს ვა უჩქჷ, სინამდვილეს მუნერ გარეგნობა უღუდ იესოს, მუშენდა თიშ გარეგნობა ბიბლიას ვა რე ეჭარილ. თენა ამტკიცენს, ნამდა იესოშ გარეგნობა ვა რე ბრელით მნიშვნელოვან. მარა ბიბლია გარკვეულ ინფორმაციას მარზენა იესოშ გარეგნობაწკუმა დაკავშირებით.
სახე: იესო იუდეველ რდჷ დო საეგებიოთ, დიამუშიშ ჯვეშეფიშ გენეტიკა აღვენუდ (ებრაელები 7:14). იესო შხვეფშე ბრელით განსხვავებულ ვეჸუაფუდ. ართშა თიქ გალილეაშე იერუსალიმშა თეშ ინორთჷ, ნამდა მითინქ ვეჩინ (იოანე 7:10, 11). იესო ვართ მუშ მოციქულეფშე გენესხვავებუდ. ქიგიფშინათ, ნამდა იუდა ისკარიოტელს იესოშ მაჭოფალეფშა, ნიშან ოკო მეუჩამუდკო თიშ გიშაჩინებელო (მათე 26:47—49).
თუმაშ სიგინძა: საეგებიოთ, იესოს ვა უღუდ გინძე თუმა, მუშენდა ბიბლია იჩიებ, ნამდა „გინძე თუმა საონჯღორო რე კოჩშო“ (1 კორინთელები 11:14).
ბჟაკე: იესოს უღუდ ბჟაკე. თინა მეჸუნდჷ იუდაურ კანონს, ნამუთ კოჩეფშე ითხინდჷ, ნამდა ვეხოკესკო ბჟაკე (ლევიანები 19:27; გალატელები 4:4). თეს გეძინელ, იესოშ ტანჯებაშ გურშენ ბიბლიას ინოჭარილ ართ-ართ წინასწარმეტყველებას მოშინაფილ რე იესოშ ბჟაკე (ესაია 50:6).
ტან: ბიბლიაშე ბგებულენთ, ნამდა იესო ძალიერ რდჷ. მუშ მსახურებაშ განმავლობას თინა ქიანაშის გილეშ (მათე 9:35). თიქ ჟირშა გასუფთჷ იუდაურ ტაძარ, ფარაშ გინმახურდალეფს სტოლ გემნურთინუ დო შოლტით გეგმორაჸ ტაძარშე (ლუკა 19:45, 46; იოანე 2:14, 15). მაკ-კლინტოკიშ დო სტრონგიშ ენციკლოპედიას რაგადებულ რე: „იესოშ გურშენ სახარებეფს ინოჭარილ ინფორმაცია მოგებაფუანა, ნამდა თინა ძალიერ დო ენერგიულ რდჷ“ (ტ. IV, გვ. 884).
სახეშ გამომეტყველება: იესო რდჷ მოჸოროფე დო გურშა მეუღუდ შხვეფიშ გაჭირება დო მუშო ოკო რაგად, თენა თიშ სახეშ გამომეტყველებაშე ხოლო იძირედკონ იჸიდ (მათე 11:28, 29). არძანერ ადამიან მიშჷ თიშა, ნამდა გურიშ ელაკინა დო მოხვარა მეუღებდესკო (ლუკა 5:12, 13; 7:37, 38). ბაღანეფს ხოლო ვა უღდეს მორდება თიწკუმა მეულაშა (მათე 19:13—15; მარკოზი 9:35—37).
არასწორ შეხედულებეფ იესოშ გარეგნობაშ გურშენ
არასწორ შეხედულება: ნამთინე ამტკიცენს, ნამდა იესო აფრიკულ გარეგნობა უღუდ, მუშენდა ბიბლიაშ წიგნ „გამოცხადებას“ თიშ თუმა შედარებულ რე მონტყორწკუმა დო კუჩხეფ — სუფთა სპილენძწკუმა (გამოცხადება 1:14, 15).
სიმართლე: წიგნ „გამოცხადებას“ ბრელ მუდგარენ სიმბოლურო რე რაგადებულ (გამოცხადება 1:1). იესოშ თუმა დო კუჩხწკუმა მოჩამილ თე შედარება სიმბოლურ ნინაშა ეჭარუნს თიშ თვისებეფს გათელებაშ უკულ დო ვართ ხოლო თიშ ფიზიკურ გარეგნობას დედამიწას ცხოვრებაშ დროს. გამოცხადებაშ 1:14 ინოჭარილ სიტყვეფ, „დუდ დო თუმა მონტყორცალ დო თირცალ ჩე უღუდ“, იესოშ თუმაშ ფაქტურას ვეჭარუნს. ჩე თუმა მეუთითენს სიბრძნეშა, ნამუთ ასაკის მოჸუნს (გამოცხადება 3:14). თე მუხლის მონტყორ დო თირ თიშენ რე მოშინაფილ, ნამდა ჟირხოლო ჩე ფერ რე; ჩე ფერიშ თუმა იესოშ სიბრძნეს ოძირანს.
თე ხილუას იესოშ კუჩხეფ „დაჩხირს გოთართალაფირ სუფთა სპილენძცალ რე“ (გამოცხადება 1:15). თეს გეძინელ, თის სახე „თოლს ჭკირუნსინ ფერ ჩხანაშა უგუდ“ (გამოცხადება 1:16). დედამიწას ნამთინ ეროვნებაშ კათას ვა უღჷ თეცალ ფერიშ კან, ათეშენ თე ხილუა ეჭარუნს გათელებურ იესოს, მით „კვიდრენს უჭირნაფ სინთეს“ (1 ტიმოთე 6:16).
არასწორ შეხედულება: იესო სუსტ დო უჭყანიე რდჷ.
სიმართლე: იესო გაბედულ რდჷ. მაგალთო, თიქ მუშ ოჭოფშა მეულირ ხალხის ვაშქურნებუნ თეშ გუცხად მი რდჷ (იოანე 18:4—8). თეწკუმა ართო, იესო ფიზიკურო ძალიერ რდჷ, მუშენდა ჯაშ მოხელე რდჷ დო ბრელს ხანდენდჷ (მარკოზი 6:3).
თაშ ქორენ-და, მუშენ დესაჭირ იესოს მოხვარაქ წამებაშ ბოძიშ ღალას? დო მუშენ ღურჷ თინეფშე ადრე, მით თიშ ხასლას ბოძის რდეს მიკოჭკადილ? (ლუკა 23:26; იოანე 19:31—33). წერმიდგინით, ღურაშ წოხოლე იესო ძალაგიშალიებურ რდჷ. თიქ მთელ სერ გათანუ, მუშენდა ემოციურო იტანჯებუდ (ლუკა 22:42—44). თეწკუმა ართო, თიმ სერს თინა იუდეველეფქ მანგარო ლახეს დო მაჟია ოჭმარეს რომაელეფქ აწამეს (მათე 26:67, 68; იოანე 19:1—3). მუჭოთ იძირე, თე ირფელქ დაჩქარ თიშ ღურა.
არასწორ შეხედულება: იესო ირიათო მოწყინაფილ დო უხასიათოთ რდჷ.
სიმართლე: იესო თვისებეფიშ გიმორჩქინას სრულყოფილო მეჸუნდჷ მუშ ზეციერ მუმაშ მაგალითის, ნამდგაშ გურშენ ბიბლია იჩიებ, ნამდა „ბედნერ ღორონთ“ რე (1 ტიმოთე 1:11; იოანე 14:9). იესო ოგურუანდჷ შხვეფს, მუჭო მიოჭირინესკო ბედნერობას (მათე 5:3—9; ლუკა 11:28). თე ფაქტეფ ოძირანს, იესოშ სახეშ გამომეტყველებაშე იძირედ, ნამდა თინა ბედნერ რდჷ.
შილებე თექ ხოლო მიგეწონან
ᲫᲘᲠᲘᲗᲐᲓ ᲑᲘᲑᲚᲘᲣᲠ ᲒᲣᲠᲐᲤᲔᲤ
სოვრეშე მიჩქუნა, ნამდა ბიბლია ჭეშმარიტებას იჩიებუ?
ბიბლია ღორონთიშ ნაჭარა ქორენ-და, თინა არძა წიგნიშე ოკო გენესხვავებდას.
ᲩᲥᲘᲜ ᲒᲣᲠᲨᲔᲜ
გოკონანო, დეგეკავშირან იეჰოვაშ მოწმეეფქ?
გარჩით ბიბლიურ საკითხეფ ვარდა მეტ ქიგეგით იეჰოვაშ მოწმეეფიშ გურშენ.