ბიბლიას ტატუეფიშ გურშენ ხვალე ართ დიხას მეურს ჩიება. ლევიანეფიშ 19:29-ს ჭარჷ: „სხეულშა მუთუნ ვეგიხანტათ“. ღორონთიქ ისრაელეფს უზოჯ, ნამდა გიშართილ რდესკო მეზობელ ერეფშე, მით სხეულშა მუნეფიშ ღორონთეფიშ სახელეფს ვარდა სიმბოლოეფს გიხანტანდეს (კანონი 14:2). ამდღა ქრისტიანეფს ვემეთხიებნა ისრაელეფშა მეჩამილ კანონეფიშ დაცვება, მარა თექ მოჩამილ პრინციპეფს სერიოზულ ყურადღება ოკო მიაქცუან.

ოკო იკეთასო ქრისტიანქ ტატუ ვარდა იხანტასო სხეულ?

 თუდო მოჩამილ ბიბლიურ მუხლეფ მიგეხვარებნა სწორ დასკვნაშა მეულას:

•   ოსურეფ „კდემამოსილებათ ისქვამენდან დუდის“ (1 ტიმოთე 2:9; ზ. კიკნაძეშ დო მ. სონღულაშვილიშ თარგმან). თე ბიბლიურ პრინციპ ოხუ მუჭოთ ოსურს, თეშ კოჩის ხოლო. ჩქი პატი ოკო ფცათ შხვეფიშ გრძნობეფს დო ზედმეტ ყურადღება ოკო ვემიფქცუათ.

•   ნამთინე ტატუს თიშენ იკეთენს, ნამდა ოკო, ქაძირუას მუშ პიროვნება, დამოუკიდებლობა დო თინა, ნამდა მუშ სხეულიშ მინჯე მუ თვითონ რე. მარა ბიბლია ქრისტიანეფს ელუჩანს: „მეუძღვინით თის [ღორონთის] თქვან სხეულ ცოცხალ, წმინდა, თიშო მოსაწონ მსხვერპლო, მუთ ნიშნენს, გააზრებულო ემსახურათ თის“ (რომაელები 12:1). ჯგირო ოკო დეფიქრათ, მუშენ გოკონა ტატუშ კეთება. თეშ მიზეზ თინა ხომ ვა რე, ნამდა გოკონა, მოდას მიაჸუნათ ვარდა ხალხიშ ნამდგაინ კატეგორიას მუწონუათ დუდ? თაშ ქორენ-და, რშუდან, ნამდა თქვან სურვილეფქ შილებე დროშ მიკულაწკუმა ართო დითირას, მარა ტატუ ირიათო გაღვენუნა. მთელ გურით დაფიქრება, მუშენ გოკონა თეშ კეთება, მიგეხვარებნა ბრძნულ გადაწყვეტილებაშ მეღებას (იგავები 4:7).

•   „მოხანდეშ გეგმეფ აუცილებერო შისრულებ, მარა ჩქარენსინ ფერ კოჩ გაჭირებას იჸუაფ“ (იგავები 21:5). ხშირ შემთხვევას ტატუშ კეთებას უდუფიქრებუო გინოჭყვიდნა დო ოჭყორდუნა, ნამდა თის შეულებ, იმოქმედას შხვეფწკუმა ურთიერთობეფშა დო სამუშაშ შიბაშა. ტატუშ კეთება ვა ღირჷ ეფჷ დო თიშ ჩათხინაფა ხოლო მანგარ მტკივნეულ რე. გამოკვლევეფქ ოძირუ, ნამდა ტატუშ ჩათხინაფა მომგებიან ბიზნეს რე დო თინეფიშ უმენტაშ, მით ტატუს იკეთენს, საბოლათ ნარღენს თეს.