ბიბლიურ კითხვეფიშ პასუხეფ

 ნათუა ნიშნენს წყარს ბოლოშა ნწყუალას. a ბიბლიას ნათუაშ ბრელ შემთხვევა ინოჭარ (საქმეები 2:41). თინეფ შქას რე იესოშ ნათუა, ნამდგაქ მალწყარ იორდანეს ინათ (მათე 3:13, 16). წანეფიშ უკულ, ართ ეთიოპ ქომოლკოჩიქ ხოლო, ნამუთ შარას მიშჷ, წყარს დინათ (საქმეები 8:36—40).

 იესო ოგურუანდჷ, ნამდა თიშ მიმაჸუნალეფქ ოკო დინათესკო (მათე 28:19, 20). პეტრე მოციქულიშ სიტყვეფშე ხოლო ქიძირ, მუსხით მნიშვნელოვან რე თენა (1 პეტრე 3:21).

თე სტატიას ჩიება მეურს

•  მუს ნიშნენს ნათუა?

•  მუს იჩიებ ბიბლია ჭიჭე ბაღანეფიშ ნათუაშ გურშენ?

•  მუს ნიშნენს ნათუა მუმაშ, სქუაშ დო წმინდა შურიშ სახელით?

•  ცოდვა რენო კინ ნათუა?

•  ბიბლიას მოშინაფილ ნათუაშ შხვა შემთხვევეფ

•  არასწორ აზრეფ ნათუაშ გურშენ

 მუს ნიშნენს ნათუა?

 ნათუათ პიროვნება ირკოჩიშ წოხოლე არგამათ ოძირანს, ნამდა ნარღენს ცოდვეფს დო იეჰოვას არზენს პირობას, ნამდა შეასრულენს თიშ ნებას. თენა ნიშნენს, ცხოვრებას ირნერ საკითხის იეჰოვა დო იესოს დემორჩილას. ნათუათ პიროვნება მარადიულ სიცოცხლეშ შარას გიოდირთუ.

 მუს ნიშნენს ნათუა მუმაშ, სქუაშ დო წმინდა შურიშ სახელით?

 იესოქ მუშ მიმაჸუნალეფს მეჩჷ მითითება: „მეუთ არძა ერიშ ხალხშა ... დო ქიმეხვარით, ჩქიმ მოწაფეეფო გინირთან; დონათით თინეფ მუმაშ, სქუაშ დო წმინდა შურიშ სახელით, ქუდაგურეთ თი ირფელიშ მეჸუნა, მუთ ჩქიმდე დიგურეთ“ (მათე 28:19, 20). მუმაშ, სქუაშ დო წმინდა შურიშ „სახელით“ ნათუა ნიშნენს, ნამდა პიროვნებას, ნამუთ ინათუ, არჩქილე თინეფიშ ძალა დო როლ. ქიმიპჸუნათ მაგალით: მოციქულ პეტრექ დაბადებაშე ქულა კოჩის უწუ: „ნაზარეთელ იესო ქრისტეშ სახელით გირაგადუქ: გილართ!“ (საქმეები 3:6). არგამა რე, პეტრექ თე სიტყვეფით ოძირუ, მუზმათ ჯგირო არჩქილედ იესოშ როლ დო თინა, ნამდა თე სასწაულ თიშ მოხვარათ აკეთ.

•   „მუმა“ იეჰოვა c ღორონთ რე. მუჭოთ გუმაჭყაფალს, სიცოცხლეშ მიმაჩამალ დო ირფელიშშემალებე ღორონთის, იეჰოვას სრულ ძალაუფლება უღჷ (დაბადება 17:1; გამოცხადება 4:11).

•   „სქუა“ იესო ქრისტე რე, ნამდგაქ ჩქინ გურშენ ღურჷ (რომაელები 6:23). ჩქი ვა მაღვენუნა რსხება, ონდო ვენვანჭუთ იესოშ როლს, ნამუთ თის უღჷ კაცობრიობაწკუმა დაკავშირებულ ღორონთიშ განზრახვაშ შესრულებას (იოანე 14:6; 20:31; საქმეები 4:8—12).

•   „წმინდა შურ“ რე ღორონთიშ მოქმედ ძალა. d იეჰოვაქ წმინდა შურ გიმირინუ, ნამდა გაჭყუკო ირფელ, თინეფ შქას სიცოცხლე, გინოჩანდჷ ცნობეფს მუშ წინასწარმეტყველეფს დო შხვეფს დო არზენდჷ ძალას მუშ ნებაშ შეიოსრულებერო (დაბადება 1:2; იობი 33:4; რომაელები 15:18, 19). თეწკუმა ართო, ღორონთიქ მუშ წმინდა შურით გონებაშა ქინუდვჷ ბიბლიაშ მაჭარალეფს მუშ აზრეფ (2 პეტრე 1:21).

 ცოდვა რენო კინ ნათუა?

 ხშირას ადამიანეფ ითირანა რელიგიას. თინეფ მუნეფიშ ჯვეშ რელიგიაშ წესით ნათილ ქორდეს-და, ცოდვა იჸუაფნო კინ დინათანინ? ნამთინე იჩიებ, ნამდა თაშ მოქციება ცოდვა რე დო თეშ დამტკიცებელო მოჸუნა ეფესოელეფიშ 4:5, სოდეთ ჭარჷ: „ართ რე უფალ, ართ რე რწმენა, დო ნათუა ხოლო ართ რე.“ მარა, სინამდვილეს თე მუხლის თიშ გურშენ ვემურს ჩიება, ნამდა მაჟიაშა ნათუა ცოდვა რე. მუშენ იფჩიებუთ თეს?

 კონტექსტ. ეფესოელეფიშ 4:5-იშ კონტექსტის პავლე თიშე რაგადანს, ნამდა აუცილებერ რე, ჭეშმარიტ ქრისტიანეფს უღუდან ართ რწმენა (ეფესოელები 4:5, 1—3, 16). თეშო აუცილებერ რე, არძა ართ ღორონთის ომსახურდას, ართნერო ენწყუნდას ბიბლიურ გურაფეფს დო მეჸუნდას ართ დო იგივე ბიბლიურ მოთხოვნეფს ნათუაშენ.

 პავლე მოციქულქ ნამთინეს, მით უკვე ნათილ რდჷ, ელუჩ, კინ დინათკო, მუშენდა თინეფ თეშ რდეს ნათილ, ნამდა ბოლოშა ვარჩქილედეს ქრისტიანულ გურაფეფ (საქმეები 19:1—5).

 მთავარ მოთხოვნეფ ნათუაშო. ნათუა ღორონთშო მოსაწონ ქორდასინ, პიროვნებაქ დიო „ჭეშმარიტებაშ საფუძვლიან რჩქინა ოკო მიღას“ (1 ტიმოთე 2:3, 4). მიდგაინ ბიბლიას ოწინააღმდეგუნ ფერ რელიგიაშ გურაფეფით ქორე ნათილ-და, თეცალ ნათუას ღორონთიშ თოლს ფას ვა უღჷ (იოანე 4:23, 24). შილებე პიროვნებაქ ალალ გურით ინათ, მარა ზუსტას ვა უჩქუდ, „მუ რე ღორონთიშ ნება“ (რომაელები 10:2). ათეშენ, ღორონთშო მოსაწონქ ქიჸუასინ, თიქ ოკო ქიდიგურუას ბიბლიურ ჭეშმარიტება, გეგმირინუას ნაგურეფ ცხოვრებას, დუდ მეუძღვინას იეჰოვას დო კინ დინათას. მუშო ოკო რაგად, თეცალ შემთხვევას კინ ნათუა ვეჸუაფ ცოდვა.

 მუჟამსით ბიბლიას მოშინაფილ ნათუას შხვა მნიშვნელობა უღჷ

 მინშა ბიბლიას მოშინაფილ ნათუას ქრისტიანეფიშ წყარს ნწყუალათ ნათუაშე განსხვავებულ მნიშვნელობა უღუდ. გუვარჩუათ ნამთინე მაგალით.

 იოანეშ ნათუა. e იოანექ ნათჷ იუდეველეფ დო იუდეველ პროზელიტეფ, მით ღორონთშე მეჩამილ მოსეშ კანონიშ წინააღმდეგ დაშებულ ცოდვეფს ნარღენდეს. იოანე ნათუათ ადამიანეფს ამზადენდჷ თიშო, ნამდა გეგშეჩინესკო დო მიღესკო მესია, იესო ნაზარეთელ (ლუკა 1:13—17; 3:2, 3; საქმეები 19:4).

 იესოშ ნათუა. იესო იოანექ ნათჷ დო თენა არძა შხვა ნათუაშე განსხვავებულ რდჷ. თინა სრულყოფილ ადამიან რდჷ, მიდგას დღას ვეშუცოდებ (1 პეტრე 2:21, 22). თაშ ნამდა, თის ვასაჭირუდ ცოდვეფიშ მონანიება დო ვართ „ღორონთშა სუფთა სინდისიშ თხუალა“ (1 პეტრე 3:21). ნათუათ იესოქ ღორონთიშ ნებაშ შესრულებას მეუძღვინ დუდ, მუჭოთ მესიაშ გურშენ რდჷ ნაწინასწარმეტყველებ. თენა თის ხოლო ნიშნენდჷ, ნამდა ჩქინ გურშენ მუშ სიცოცხლე დათმუკო (ებრაელები 10:7—10).

 წმინდა შურით ნათუა. ქოთ იოანე დო იესო ქრისტე იჩიებდეს წმინდა შურით ნათუაშენ (მათე 3:11; ლუკა 3:16; საქმეები 1:1—5). წმინდა შურით ნათუა დო წმინდა შურიშ სახელით ნათუა ართ დო იგივე ვა რე (მათე 28:19). მუ განსხვავება რე თინეფ შქას?

 იესოშ თი მიმაჸუნალეფიშ რიცხვ, მით წმინდა შურით ინათუნა, დოდგინელ რე. თინეფ წმინდა შურით რენა ცხებულეფ, ნამდა იმსახურან ზეცას ქრისტეშ თანამეფეეფო დო მღვდელეფო f (1 პეტრე 1:3, 4; გამოცხადება 5:9, 10). თინეფ უხემძღვანელენა ქრისტეშ მილიონობით მიმაჸუნალს, მიდგას სამოთხეთ გინორთელ დედამიწას მარადიულ სიცოცხლეშ იმენდ უღუნა (მათე 5:5; ლუკა 23:43).

 ნათუა იესოწკუმა ართობას დო თიშ ღურას. თინეფ, მით წმინდა შურით ინათუნა, „ქრისტეწკუმა ართობას“ ხოლო ინათუნა (რომაელები 6:3). თეცალ ნათუას თინეფ ღებულენა, მით წმინდა შურით რენა ცხებულ დო იესოწკუმა ართო იმართველენა ზეცას. „ქრისტეწკუმა ართობას“ ნათუათ თინეფ გინირთუნა ცხებულ კრებაშ წევრეფო. იესო რე დუდ დო თინეფ რენა სხეულ (1 კორინთელები 12:12, 13, 27; კოლოსელები 1:18).

 თეს გეძინელ, ცხებულ ქრისტიანეფქ იესოშ ღურას ხოლო დინათეს, თაშ ქოფთქუათინ, „თიშ ღურას ქაკათეს“ (რომაელები 6:3, 4). იესოცალო, თინეფ მთელ ცხოვრებას ღორონთის უძღვინენა დო ზეცას ცხოვრებაშ იმენდ უღუნა დო ვართ ხოლო დედამიწას. თინეფიშ თე სიმბოლურ ნათუა თიმწკუმა ხვადუ, მუჟამსით ღურუნა დო ითელებნა ზეციერ ცხოვრებაშო, მუჭოთ სულიერ ქმნილებეფ (რომაელები 6:5; 1 კორინთელები 15:42—44).

 დაჩხირით ნათუა. მანათალ იოანექ მუშ მარჩქილეეფს უწუ: „თინა [იესო] წმინდა შურით დო დაჩხირით დორნათუნა. თის ხეს ფიარ უკინებ დო მთლიანო გოწიმინდანს მოსავალიშ ოჩაჩალ ადგილს; ქობალიშ კაკალს მაღაზას ქიმთაშაყარანს, მარა ჩენჩის უშქირატ დაჩხირს დოჭუნს“ (მათე 3:11, 12). ყურადღება ქიმიაქცით, ნამდა დაჩხირით ნათუა დო წმინდა შურით ნათუაშ შქას განსხვავება რე. მუშ რაგად ოკოდ იოანეს თე მაგალითით?

 ქობალიშ კაკალ ნიშნენს თინეფს, მით მურჩქილუანს იესოს დო დემორჩილებ თის. თინეფს აღვენუნა საშვალება დინათან წმინდა შურით. „ჩენჩ“ სიმბოლურო თინეფს ნიშნენს, მით ვა მურჩქილუანს იესოს. საბოლათ, თინეფ დაჩხირით დინათუნა, მუთ მარადიულ განადგურებას ნიშნენს (მათე 3:7—12; ლუკა 3:16, 17).