ღორონთის შეულებ ძირას ირფელ დო ნებისმიერ ადგილს იმოქმედას თეშ, მუჭოთ მაკორინე (იგავები 15:3; ებრაელები 4:13). მარა ბიბლია ვაგურუანს, ნამდა ღორონთ იფრელს დო ირდიხას რე. თეშ მანგიორო, ბიბლიაშე ბგებულენთ, ნამდა თინა პიროვნება რე დო მუშ სულიერ სამყაროს მკვიდრენს.

•   მუნერ რე ღორონთ: ღორონთ სულიერ პიროვნება რე (იოანე 4:24). თიშ ძირაფა ადამიანეფს ვეშულებნა (იოანე 1:18). ბიბლიას მოჩამილ ხილუეფშე, სოდეთ ღორონთ ხოლო რდუ, ბგებულენთ, ნამდა თის ართ კონკრეტულ ადგილ უღჷ, სოდეთ მკვიდრენს (ესაია 6:1, 2; გამოცხადება 4:2, 3, 8).

•   ადგილ, სოდეთ ღორონთ მკვიდრენს: ღორონთ სულიერ სამყაროს მკვიდრენს, ნამუთ გენესხვავებ ფიზიკურ სამყაროშე. ბიბლიაშე ბგებულენთ, ნამდა ღორონთ ზეციურ სამყაროს მკვიდრენს (1 მეფეები 8:30). თეს გეძინელ, ბიბლიას მოჩამილ რე შემთხვევა, მუჟამსით სულიერ ქმნილებეფქ „იეჰოვაშა“  a ქიმერთეს, მუთ მეუთითენს, ნამდა ღორონთის ართ კონკრეტულ ადგილ უღჷ, სოდეთ მკვიდრენს.

ღორონთ ირდიხას ვარენ-და, შეიალებენო პირადო ჩქიმდე იზრუნას?

 მუშო ოკო რაგად, ქო. ღორონთ თითოულ ადამიანშე ზრუნენს. თიშ უმკუჯინუო, ნამდა ღორონთ სულიერ სამყაროს მკვიდრენს, თინა ყურადღებას აქციენს არძას, მიდგას მთელ გურით ოკო ასიამოვნას თის დო მოქმედენს თინეფიშ საჯგირობუოთ (1 მეფეები 8:39; 2 მატიანე 16:9). მორთ, გუვარჩუათ, მუჭო ზრუნენს იეჰოვა მუშ ართგურ თაყვანიშმცემელეფშე:

•   მუჟამსით ლოცულენთ: ღორონთის ნებისმიერ დროს შეულებ მირჩქილუას თქვან ლოცვა (2 მატიანე 18:31).

•   მუჟამსით ოწუხებელ გიღნა: „იეჰოვა ხოლოს რე გურგოტახილეფწკუმა დო შურაკოჭირებულეფს ირსხენს“ (ფსალმუნი 34:18).

•   მუჟამსით ხემძღვანელობა გოსაჭირნა: იეჰოვა მუშ სიტყვაშ, ბიბლიაშ საშვალებათ ქიმერჩანა „ინონჭაფაშ უნარს დო ქიგგოწურუანა შარას“ (ფსალმუნი 32:8).

არასწორ შეხედულებეფ თიწკუმა დაკავშირებით, ნამდა ღორონთ ირფელს დო ირდიხას რე.

 არასწორი შეხედულება: ფსალმუნიშ 139:8-ს ინოჭარილ სიტყვეფ ამტკიცენს, ნამდა ღორონთ ირდიხას რე. თექ ბკითხულენთ: „ზეცაშა გეკოფრთენ, თექ ხოლო სი რექ, სამარეშა გენოფრთენ, თექ ხოლო სი იჸუაფუქ“.

 სიმართლე: თე მუხლის ჩიება ვემურს, სო რე ღორონთ. თინა მხატვრულ სტყვეფით ეჭარუნს ღორონთიშ ულიებ ძალას დო მარწმუნენა, ნამდა სოდგა ვა ვორდათ, თის შეულებ მიმეხვარან.