ირ წანას ვით ანთასობით კოჩი მოურს ნიუ-იორკიშ შტატშა იეჰოვაშ მოწმეეფიშ მსოფლიო მთავარ სამართველოშ დო შეერთებულ შტატეფიშ ფილიალეფიშ გაჯინუშა. თე ადგილეფს ჯოხო „ბეთელი“, ნამუთ ებრაულო „ღორონთიშ ჸუდეს“ ნიშნენს. სტუმარეფი მსოფლიოშ არძა კუნთხუშე მოულა, ნამდა მუნეფიშ თოლო ქოძირან მუჭო იბეშტუ ლიტერატურა დო მუჭო რე ორგანიზებულ იეჰოვაშ მოწმეეფიშ საქმე. ნამთინე მუშ მეგობრეფიშ ოძირაფშა მოურს, ნამუთ ბეთელს მსახურენა. ჭიჭე ხანიშ წოხოლე ართი იეჰოვაშ მოწმექ ზუსტას თიშგუშენ იდუ ნიუ-იორკიშ შტატშა, ნამდა ქოუძირუდკო ბეთელი.

თის მარსელესი ჯოხო; თინა ალასკაშ შტატშე (აშშ), ანკორიჯიდაშე რე. a მუსხირენ წანაშ წოხოლე თიქ ინსულტი მიღუ დო თიშ მანწარას უჭირს რაგად, ნამდა ხვალე მუსხირენ სიტყვაშ ეკორაგდ შეულებუ. თინა ინვალიდიშ სავარძელს გეხე დო მუშით მუთუნიშ კეთება ვეშულებუ. თეშ უმკუჯინუო, თის მანგარო ოკოდუ ბეთელიშ ძირაფა. ჭიჭე ხანიშ წოხოლე თის ნანატრიქ გეურთუ.

„თის მანგარო ოკოდ ბეთელიშ ძირაფა — იჩიებუ მარსელესიშ მეგობარი, კორი, ნამუქით ულას მეხვარუ. — თინა ირიათო მირეკუნდუ, ირფელ კილ-კილშა ქუგუგებუდკონ თიშენ. მარსელესის თიშმანწარათ უჭირს რაგად, ნამდა რაგადიშ დროს ხვალე ჟირ სიტყვას იჩიებუ — ქო დო ვარ. ათეშგურშენ, მუჟამსით მირეკუნდუ, ბრელს ვოკითხუდი, ქიგამგებუდკო მუ ოკოდუნ თიშენ. ჩქი ათეშნერო ურაგადუდით ართიანს:

— გოკონო სკანდა მეფრთენ?

— ვარ.

— ექიმშა ბრეკაო?

— ვარ.

— ბეთელიშ გურშენ ხომ ვა გოინტერეს მუთუნ?

— ქო.

უკულ კილ-კილშა ურაგადუდ, მუჭო მიშუ ნიუ-იორკშა ულაშ ამბე. მანგარო მახიოლ, ნამდა მარსელესიქ მუშ მიზანს ქიმიოჭირინუ“.

მარსელესის ბრელ პრობლემაქ აჸუ გინაღალარქ, მიზანშა ქიმუჭირინუაფუდკო თიშენ. თინა ჟირ წანას შაყარანდუ ოულარ ფარას, ნამუთ 5 400 კილომეტრით რე შორს მუშ ქალაქშე. გლახა ჯამრთელობა უღუდუნ თიშენ, მიდგაინ საიმენდო კოჩი ოკო დუგორუდკო, მით აჸუნუდ თეშმაშორა შარაშა. თეშ გარდა, ნიუ-იორკიშ ოულარო ექიმშე ნებართვა აფუდ ეიოჭოფალ დო თე ნებართვაქ თის ულაშახ მუსხირენ დღათ ადრე მოურთუ.

მუჟამსით მარსელესიქ ნიუ-იორკშა ქიმერთუ, თის ბრუკლინს, პატერსონს დო უოლკილს ბეთელიშ შენობეფიშ ექსკურსია ჩაუტარეს. თიქ მუშ თოლო ქოძირუ, ვებერთელა ობეშტალ მანქანეფ, სოდეთ ბიბლიეფი დო შხვა წიგნეფი იბეშტუ. თეშ გარდა, თიქ ბრელ მუთუნ გეგუ ჩქინ საქმეშ ორგანიზებაშ გურშენ. ქოძირ გამოფენეფი, ნამუშ სახელ რე „ბიბლია დო ღორონთიშ სახელი“ დო „ხალხი იეჰოვაშ სახელშო“. მარსელესიქ ბრელ და დო ჯიმა გეჩინებაფუ. თენა თის დასურო დღას ვაგაჭყორდუ!

ბრელს ნინათ ვეკარაგადე ბეთელს ნაძირეფ. მარა მუჟამსით მარსელესის კითხეს, ქოუღირუდ დო ვარ თეშმაშორა შარაშე მოულა, თიქ სუმშა თქუ: „ქო! ქო, ქო!“

ბჯერა, ნამდა მარსელესცალო თქვა ხოლო დღას ვაგგოჭყორდუნა ბეთელიშ ძირაფა. შურ დო გურით გაპეჯენთ არძას მსოფლიოშ შხვადოშხვა კუნთხუშე!