მთელ მსოფლიოს იეჰოვაშ მოწმეეფიშ 15 ფილიალს ლიტერატურაშ ბეშტუა მეურს. ართ-ართ რე ცენტრალურ ევროპაშ ფილიალი ქალაქ ზელტერსის (გერმანია), ნამუსით შტაინფელსიშ სახელით იჩინენა. „შტაინფელსი“ გერმანულ სიტყვა რე დო მარგალურო „ქუაშ კირდეს“ ნიშნენს.

2014 წანაშ 23—25 მესის იეჰოვაშ მოწმეეფიშ ცენტრალურ ევროპაშ ფილიალქ ღია კარიშ დღაშა დაპეჯუ გოხოლუას მახორუ ხალხი, ბიზნესმენეფი დო მთავრობაშ კათა. თე ღონისძიებას ჯოხოდ „30 წანა ზელტერსის“, მუშენდა ფილიალი ოფიციალურო 30 წანაშ წოხოლე, 1984 წანაშ 21 აპრილს გონწყეს.

ღია კარიშ დღაშა 3 000-შე მეტ სტუმარქ მერთუ. „ირიათო, მუჟამსით იეჰოვაშ მოწმეეფიშ ფილიალშა მეურქინ, თექ ნაძირეფი ტვინშე დღას ვეშმალასუ“, — თქუ ქალაქიშ მერქ, ნამუთ უკვე 30 წანა რე მთავრობას მუშენს. თინა იჩიებუ: „ამდღარშა გოკვირინაფილ ვორექ, მუშმამალას გედგეს თე შენობა; შენებაქ 1979 წანას დიჭყუ დო 1984 წანას შტაინფელსის უკვე ფილიალიშ შენობა გედგუდ“.

თაქ გამოფენა ხოლო მანწყუეს, ნამუსით ჯოხოდ „იეჰოვაშ ხალხი ცენტრალურ ევროპას“. სტუმარეფს შეულებდეს გუგებდესკო, მუს ორთუდეს იეჰოვაშ მოწმეეფი თე რეგიონს სოდგარენ 120 წანაშ დინახალე. ხალხის ამდღა ხოლო შეულებუ თე ისტორიულ გამოფენაშ ძირაფა ფილიალს.

ფილიალს ხოლო ართ გამოფენა მანწყუეს, სოდეთ იშვიათ დო განსაკუთრებულ ბიბლიაშ თარგმანეფი უღუდეს. მაგალთო, 1534 წანას გიშაშკუმალირ გერმანულ ბიბლიაშ თარგმანი დო 1599 წანაშ ელიას ჰატერიშ ბიბლიაშ თარგმანიშ ნაწილი, ნამუთ ბრელ ნინაშა რე გიშაშკუმალირ; ბიბლიაშ თე თარგმანიშ ტექსტი 12 შხვადოშხვა ნინაშა რე. თეშ გარდა გამოფენას შხვადოშხვა ნაშრომეფ, დიაგრამეფ დო ვიდეორგოლეფ რდუ, სოვრეშეთ ქიძირუ, მუსხით პრაქტიკულ დო ღირებულ რე ბიბლიურ პრინციპეფი ამდღა ხოლო.

სტუმარეფს შეულებდეს მუნეფიშით ჩეტარესკონ ჟირ ექსკურსია. თინეფქ ქიგეგეს, მუჭო მუშენს დო ცხოვრენს 1 000-შე მეტ კოჩი დო ოსური თე ფილიალს. ართი ექსკურსიაშ დროს, ნამუშ სახელ რე „მუჭო ფცხოვრენთ“, სტუმარეფქ მუსხირენ ოთახის გაჯინეს, თეშ გარდა ოსადილებერ ოთახის ოჭკუმალ ჭკუმეს დო ბაღის ხოლო გიგულუეს. ართი სტუმარქ თქუ: „მანგარ სქვამ ადგილ რე!“.

მაჟია ექსკურსიას ჯოხოდ „გიშაშკუმალა“; სტუმარეფქ გაჯინეს სტამბას, კინძუაშ დო ჯღონაშ განყოფილებას. თინეფქ მუნეფიშ თოლით ქოძირეს, მუჭო ბეშტანა დო კინძუნა ბიბლიურ ლიტერატურას დო მუჭო ოჯღონანა 50-შე მეტ ქიანაშა. ართი ქომოლკოჩიქ თეცალ სიტყვეფი თქუ: „დღას ვეფიფქრენდ, იეჰოვაშ მოწმეეფიშ ორგანიზაცია მთელ მსოფლიოს ორთუ თე საქმესინ. თინეფიშ პუბლიკაციეფი დედამიწაშ არძა კუნთხუს ონჭუ. გასაკვირ რე, ნამდა თეშმადიდა საქმეს მოხალისეეფი ორთუნა!“.

სტუმარეფშო არძაშ უმოს საინტერესო რდუ იეჰოვაშ მოწმეეფიშ ოფიციალურ ვებ-გვერდიშ, jw.org-იშ, სტენდი. თაქ მოულირეფს, მუჭოთ ახალგაზრდეფს, თეშ ხანშა მიშულირეფს, შეულებდეს უჯინესკო ვიდეორგოლეფშა დო შხვადოშხვა პრეზენტაციეფშა; თინეფქ ბრელ კითხვაშ პასუხი ქიგეგეს.

ექსკურსიაშ ჭყოლოფუათ სტუმარეფქ უმოს მეტი ქიგეგეს იეჰოვაშ მოწმეეფიშ გურაფაშ მიოღებელ საქმეშ გურშენ, ნამუთ მთელ მსოფლიოს მეურს. თინეფს მანგარო მეწონეს ირფელქ დო გაკვირებულქ ქიდოსკიდეს. ართი კოჩიქ თქუ: „ბრელ არასწორ აზრი მიღუდ იეჰოვაშ მოწმეეფშე. ასე იფრელშე ჯგირო ოკო დეფიფქრე“. ართი ოსურქ ხოლო ართ დო იგივე ბრელშა თქუ: „თე დღა ბრელს არასწორ აზრის გეკურღვანს“.