ობიშხას, 2013 წანაშ 5 კვირკვეს, შეერთებულ შტატეფიშ ბეთელიშ ოჯახიშ წევრეფქ ხიოლით შეხვადეს ხემანჯღვერე საბჭოშ წევრიშ, ენტონი მორისიშ განცხადებას: „გეფორმუ ამშვი შენობაშ გიმოჩამაშ ხელშეკრულებაქ, ნამუთ ბრუკლინს, ადამს-სტრიტიშ 117-ის დო სენდს-სტრიტიშ 90-ის რე. a ხელშეკრულებას ჭარუ, ნამდა თე წანაშ არგუსოშ შქა რიცხვეფშოთ ხუთ შენობა ოკო გოფჩოლუათ‘‘.

მუშო ოკო რაგადი თეშ კეთება გვალო ეფი საქმე ხოლო ვა რდუ. ხუთი შენობაშ მთლიან ფართი, 11 ფეხბურთიშ მოედანიშ მადიდა რე. თე შენობეფქ 60 დღაშა ოკო დიჩოლკონ.

მუსხირენ წანას, თე ხუთი შენობას ლიტერატურაშ ობეშტალ დო ეიონწყუალ დაზგეფი მილაძუდ, მარა 2004 წანას თე მონწყილობაქ ახალ შენობაშა გეგნორთუ, ნამუთ უოლკილს (ნიუ-იორკის) რე.

თეშ უკულ, თე შენობეფს მეკონ-მოკონეფიშ დანწკარალო დო ტექმომსახურებაშო გიმირინუანდეს. თეშ გარდა, თე შენობეფს ჩუანდეს ოშენებელ მასალეფს, მებელს ოფისიშო დო შხვადოშხვა მონწყილობეფს შეერთებულ შტატეფს დო საზღვარგარეთის რენ თი ოშენებელ პროექტეფშო.

თე შენობეფქ მუშ დროს გიჩოლუკონ თიშენ, საჭირო რდუ გეგმაშ გურგედვალირო მოფიქრება. გვალო დუდშე, შენობეფს რდუნ თი ნივთეფი ეჭარეს დო გეგნოჭყვიდეს, მუშ გიმოჩამა შილებედ, მუშ ჩაბარება უჯგუდ ჯართო დო მუშ ჩუალა იჸუაფუდ ჭკვერული. უკულ გეგნოჭყვიდეს, მუჭო უკეთებდესკო თე ირფელ უღამაკუო დო წკანტილო.

ბეთელიშ ოჯახის დიდ ხანდა მიშუძ თე საქმეშა. თეშ გარდა, შეერთებულ შტატეფიშ შხვადოშხვა ადგილეფშე 41 მოხალისექ ხოლო მორთ მახვარეფშა. თინეფიშ უმენტაშ ჯანღონეთ ეფშა უოსურე ბოშეფ რდეს. ბეთელს ამშვი ვარდა ვით მარას ქუმუშებდესკონ თიშენ, მოხალისეეფქ ჭიჭე ხანით ქიდიტუეს მუნეფიშ ოჯახეფი, ამხანაგეფი დო სამუშა. ქობძირათ, მუს იჩიებუნა თინეფ ბეთელიშ მუშებაშ გურშენ.

21 წანერ ჯორდანი, ვაშინგტონიშ შტატშე: „მნარღენქ განცხადება ადრე ვეშვავსინ თის“.

20 წანერ სტივენი ტეხასიშ შტატშე: „მა თი ხანდაშ მოჸოროფე დო ბედნერ ოჯახიშ წევრი ვორექ, ნამუთ მთელ მსოფლიოშ კათას აკოშაყარანს‘‘.

23 წანერ ჯასტინი: „ბეთელი ჩქიმ ჸუდეცალო მიმორჩქუ. დასურო მუშმაჯგირა რე თაქ რენ თი სულიერ სიბრძნე, ჸოროფა დო გურიშ ემაკინალ ურთიერთობა“.

20 წანერ ადლერი: „ადრე ედგინა ვა რე ეფი, მარა თაქ მანგარ ჯგირ და დო ჯიმალეფი გეფჩინებაფე დო ჩქი ირიათო მეგობრეფო დოფსკუდუთ“.

21 წანერ ვილიამი: „ბეთელს მსახურებას ბაღანობაშე ბნატრენდი. ახალ მოულირ ვორდინ, თაქიანობაშა ვამმარჩქვანედუ მიჩქუდ, მარა მანგარო ფჩირთუდი. არძაშ უჯგუშ დღალეფი ჩქიმ ცხოვრებას ბეთელს მაფუ ნაძირეფი. თეშ უჯგუშ ადგილი სოთინ ვამწონებუ‘‘.

ხომ ვეგნაჩილითუეს მოხალისეეფქ შენობეფიშ ოჩოლარო მეჩამილ დროს? მუშო ოკო რაგად, ვარ! ინა ვარ — 55 დღაშა ირფელ თებულ აფუდეს.