ობირეშიშ ტექსტიშ გინოთარგმნუა ართ ნინაშე მაჟია ნინაშა გვალო ეფი ხოლო ვა რე. ხოლო უმოს ძნელ რე ობირეშეფიშ წიგნიშ თარგმნუა, სოდეთ 135 ობირეშ რე.

იეჰოვაშ მოწმეეფქ ვადუშკურდეს თე ძნელ საქმეს დო სუმ წანაშა 116 ნინაშა თარგმნეს ახალ ობირეშეფიშ წიგნი „უბირით იეჰოვას“. თეშ გარდა, 55 ნინაშა გინორთგმნილ რე 55 ობირეში. თე ობირეშეფი ხოლო ბრელ ნინაშა ითარგმნუ.

იეჰოვაშ მოწმეეფი ბიბლიურ ლიტერატურას 600-შახ ნინაშა თარგმნუნა, თავრეშე სოდგარენ 400 ნინაშა პუბლიკაციეფი ინტერნეტის გეძუ. მარა ობირეშეფიშ წიგნიშ „უბირით იეჰოვას“ თარგმნუა , გვარიან ძნელ ქორე, მუშენდა ობირეშეფიშ მელოდიეფი ვეთირუ, მუჟამსით ტექსტი ბრელ შხვადოშხვა ნინაშა ითარგმნუ.

ობირეშეფიშ ტექსტიშ თარგმნუა ვა გუ ჟურნალიშ ტექსტიშ თარგმნუას. მუჟამსით მათარგმნალეფი ჟურნალი „საგუშაგო კოშკის“ შხვა ნინაშა თარგმნუნან, ოცადუნა, მუთუნ აზრიქ ვექშასკიდან დო ვეგნურთან ორიგინალ ტექსტის. მარა ობირეშეფიშ ტექსტიშ თარგმნუაშ დროს საქმე გვალო შხვანერო რე.

მათარგმნალეფი შხვანერო მეურენა ობირეშეფიშ ტექსტიშ გინოთარგმნუას, მუშენდა ოკონა, ტექსტი რდას აზრიანი, სქვამ დო ეფი დამახსოვრებელი.

მუჭო მიოჭირინუანა მათარგმნალეფი თე მიზანს? თინეფი ორიგინალშე ტექსტის კილკილშა ვა თარგმნუნა. მათარგმნალეფიშ ჯგუფეფი სპეციალურ ინსტრუქციეფს მეჸუნა დო ახალი ლექსის ჭარუნა, ნამუთ სრულყოფილო გინმოჩანდას იჸი ორიგინალს მოჩამილ აზრის. თინეფი ოცადუნა, ვექშიტუან თი ბიბლიურ ციტატეფი, ნამდგაშა გერსხილ რე ტექსტი. ლექსიქ ადვილ გაგებელქ დო დასამახსოვრებელქ ქიჸუასინ თიშენ, მათარგმნალეფი თის ხოლო ოცადუნა, ნამდა ფრაზეფი ბუნებრივო გეგნოთარგმნან მუნეფიშ ნინაშა.

ტექსტიშ თარგმნუაშ პირველ ეტაპის მათარგმნალეფი კილკილშა თარგმნუნა ინგლისურ ტექსტის მუნეფიშ ნინაშა. თეშ უკულ მოწმეს, ნამუსით ლექსიშ ჭარუაშ ნიჭი უღუნ, არზენა კილკილშა ნათარგმნა ტექსტის დო თხინა, ნამდა აზრიქ ვეკოცუასინ თეშ ტექსტი ლექსო გინართინუას. მათარგმნალეფი ირიათო ოცადუნა, გინნათარგმნა ტექსტი ბიბლიურ მუხლეფს ოსადაგუდას. ბოლოს მათარგმნალეფი დო კორექტორეფი ამოწმენა პოეტიშ ნაჭარა ლექსის, ქასადაგ დო ვარ ბიბლიურ გურაფას.

მთელ მსოფლიოს ბრელ იეჰოვაშ მოწმეს მანგარო ახიოლ, მუჟამსით ახალ ობირეშეფიშ წიგნიქ ქაშუ; ხოლო ბრელ იეჰოვაშ მოწმე ელუ ახალი ობირეშეფიშ გიშულას მუნეფიშ ნინაშა.