«მოკო, ინმაჭარალ სტუდია „კოლუმბიაშა“ მიდართე, ნამუთ ნიუ-იორკის რე დო ქიბირე ართ-ართ ჩქინ ობირეში. თექ ჯგირო ქინაჭარანა თე ობირეშის. თეშ გურშენ მითინს ვაუწუა».

თე დავალება უილიამ მაკრიჯის ჩარლზ ტეიზ რასელქ მეჩუ 1913 წანაშ ბოლოს. a ბრელს უკვე უჩქუდ თე ობირეში, ნამუსით ჯოხოდ „მერეთ მომავალ მელუნა!“; თინა ინოჭარილ რდუ ფირფიტას (78 რთინი წუთის). უილიამქ ჭიჭე ხანიშ უკულ ქიგეგუ, ნამდა თე ობირეში „გოჭყაფაშ ფოტოდრამაშ“ დაჭყაფ ნაწილს გიადვალუდ; „გოჭყაფაშ ფოტოდრამა“ შითმოდირთუდ მოძრავ კადრეფშე დო ფერად სლაიდეფშე, ნამუსით ბიბლიაშა გერსხილ მოხსენებეფიშ ფონოგრამა დო მუსიკა ეკოუნდ. თე ფოტოდრამაშ პრემიერაქ ქალაქ ნიუ-იორკის 1914 წანაშ იანარს იჸუ.

ჟიშე მოშინაფილ ობირეში ართ-ართ რდუ თი 50-შე მეტ ობირეშშე, ნამუსით ხალხის თიმწკუმა ორჩქილუანდეს, მუჟამსით ინგლისურ ნინაშა ფოტოდარამა მიშუ. თე ობირეშეფიშ უმენტაშ ბიბლიაშ მარკვიებელეფიშ ინნაჭარა რდუ, მარა მუსხირენ ობირეში, მაგალთო „მერეთ მომავალ მელუნა!“, შხვეფს ინაჭარაფუეს; თე ობირეშიშ ტექსტეფი მუნეფიშ ობირეშეფიშ წიგნიშე „ქრისტეშ ანთასწანიან მეფობაშ დაჭყაფშე“ რდუ ეჭოფილ.

ქიანა ხანს იეჰოვაშ მოწმეეფი თაყვანიშცემაშ დროს შხვეფიშ ნაჭარა ობირეშეფს იბირდეს. მარა მუჟამსით ქოძირეს, ნამდა ტექსტიშ ნამთინე სიტყვა ვემურედ ბიბლიაშ გურაფეფსინ, ქიდიჭყეს თიშ თირუა.

მაგალთო, ართ ობირეშის, ნამუთ ფოტოდრამას ასკვამენდუნ, ჯოხოდ „ჩქინ გომორძგვილ მეფეშ გილულა“; თენა ირ კოჩშო ნაჩინებ ობირეშიშ „რესპუბლიკაშ ოჩხუპებელ ჰიმნიშ“ გინოკეთებულ ვარიანტი რდუ. თე ობირეშიშ პირველ კუპლეტ ათაშ იჭყაფუდ: „ჩქიმ თოლეფქ განდიდებულ უფალიშ მოულა ქოძირუ“. მარა ბიბლიაშ მარკვიებელეფქ დოთირუეს თინა ათეცალ სიტყვეფით: „ჩქიმ თოლეფი ორწყე განდიდებულ უფალს, ნამუთ მოულირ რე“. თინეფქ ტექსტი თიშენ თირუეს, ნამდა, მუჭოთ წანდესინ, იესო ქრისტეშ მმართველობაშ პერიოდშა ხვალე ხალხშა პასუხიშ მოკითხირ ვარინ, მთელ თი პერიოდ მიშმეშუ, მუჟამს თინა მოულირ იჸუაფუდ, მუჭოთ მეფე (მათე 24:3).

1966 წანას გიშართ ახალ ობირეშეფიშ წიგნიქ „გურს უბირით დო განადიდით“; თე წიგნიშა ვემშიშუ ობირეშეფი, ნამუთ ვა რდუ მოწმეეფიშ ნაჭარა დო რელიგიურ გურაფეფს ხოლო ვა უკინენდ ხუჯის. თიმ წანას მოწმეეფქ ჭიჭე ორკესტრი ქუდარსხუეს დო ჟიშე მოშინაფილ წიგნიშა მიშულირ 119 ობირეში ქინაჭარეს. თე ობირეშეფს მოწმეეფი კრებაშ შეხვალამეფს იბირდეს; ნამთინე თის ჸუდეს ხოლო შურ დო გურით ურჩქილედუ.

2009 წანას იეჰოვაშ მოწმეეფქ ხოლო ართშა გეგშაშკვეს ახალ ობირეშეფიშ წიგნი „უბირით იეჰოვას“. თე წიგნიშა ენოღალირ რე გუნდიშ ნაბირა ობირეშეფი მუსხირენ ნინაშა. 2013 წანას მოწმეეფქ ქიდიჭყეს მუსიკალურ ვიდეორგოლეფიშ ინოჭარუა ბაღანეფშო. ართ-ართ რე „ირიათო ილოცი“. ვებ-გვერდშე jw.org თეცალ ვიდეორგოლეფს ირ თუთას სოდგარენ მილიონშა გინმოჭარნა.

იეჰოვაშ მოწმეეფი ღორონთიშ ოდიდებელო ბრელ ობირეშის ინმაჭარანა, ათეშგურშენ ხალხი მანგარ მარდულ რე. ართ იეჰოვაშ მოწმე ჯულია, ახალ ობირეშეფიშ წიგნიშ გურშენ იჩიებუ: „თე ობირეშეფი სარკო სკვამ რე! მუჟამსით ხვალე ვორექინ, თიცალ ობირეშეფს ურჩქილექ, ნამუთ თიმ წუთის მოსაჭირუ. თეშ უკულ უმოს ხოლოს ვორექ იეჰოვაწკუმა დო მოკო თიშო ირფელ გუვაკეთე“.

ჰეზერი, ნამუსით ჟირ სკუა ჸუნს, ჭარუნს, მუჭო მეხვარუ ვიდეორგოლქ „ირიათო ილოცი“ მუშ სქუალეფს. ართ შკვით წანერ რე, მაჟია ჩხორო. თინა იჩიებუ: „თე ვიდეორგოლ ჩქიმ ჭიჭელეფს ოხვარუ, ნამდა ხვალე ჩქინწკუმა ვარდა ოჭმარეს ვარინ, ირიათო ილოცან, მუჟამს იეჰოვაწკუმა აკორინენა რაგადი“.