1987 წანას ვალენსიას (ვენესუელა) იეჰოვაშ მოწმეეფიშ თიმწკუმაიან ხემანჯღვერე საბჭოშ წევრიქ, ლაიმან სვინგლიქ „პლაზა მონუმენტალიშ“ სახელით იჩინენან ფერ კორიდაშ მოედანს შაყარელ 63 580 კოჩიშ წოხოლე გიშართუ. ჯიმა ლაიმანშა ქუმურჩქილუაფუდესკონ თიშენ, ბრელს მთელ სერს ავტობუსით აჸუ ოულარქ. თიქ შაყარელ ხალხის უწუ: „ართ დროს თე ქიანას მაუწყებელეფი ბრელ ვა რდით, მარა ასე თაშ ვერაგადე. საქმე თეშ მეურს, ნამდა მალას 100 000-ის ქიმიოჭირინუანთ!“.

1987 წანას ვენესუელას 38 000-შე უმოს იეჰოვაშ მოწმე დუდგინოდვალირო ქადაგენდუ სახიოლო ამბეს სამეფოშ გურშენ. თიმ დროს 100 000-შე უმოს მაუწყებელი ხვალე ბრუო ქიანას რდუ.

მთელ მსოფლიოს იეჰოვაშ მოწმეეფიშ რიცხვიშ მოძინა მართალო დიდებულ რე. პირველ მსოფლიო ჩხუპიშ უკულ ხვალე მუსხირენ ანთას იეჰოვაშ მოწმე ქადაქენდუ ღორონთიშ სამეფოშ გურშენ, მარა 1943 წანას „იეჰოვაშ მოწმეეფიშ ირ წანაშ წიგნის“ ათეცალ მუდგარენ ჭარუ: „1942 წანაშ ანგარიში გასაკვირ რე. მონაცემეფი ბოლოშა ვამღუნა არძას ვა ვონჭუთინ თიშენ ... თე ანგარიშშე იძირე, ნამდა ამდღა მთელ მსოფლიოს 106 000-შე უმოს კოჩი ქადაქენს [სახიოლო ამბეს]“. მართალ რე თიმ დროს მაჟია მსოფლიო ჩხუპი რდუ, მარა ბრელქ ჯგირო მირჩქილუ ბიბლიურ ჭეშმარიტება. 1950 წანას შეერთებულ შტატეფი პირველ ქიანა რდუ, სოდეთ მაუწყებელეფიშ რიცხვიქ 100 000-ის მიკულუ.

შეერთებულ შტატეფიშ უკულ 1974 წანას ნიგერია პირველ ქიანა რდუ, სოდეთ 100 000 მაუწყებელი რდუ.

უკულიან წანას ბრაზილიას დო გერმანიას მაუწყებელეფიშ რიცხვიქ 100 000-ის მიკულუ. ოთხ კონტინენტის თეცალ შედეგეფი თის ოძირანს, ნამდა ბიბლიურ ჭეშმარიტება მთელ მსოფლიოშ არძა კუნთხუს ოინტერესნა.

მთელ მსოფლიოს ირიათო იძინანდუ თი კათაშ რიცხვი, მისით გურშა ენახუნტუდ სახიოლო ამბე. თე ირფელი მეურედ ბიბლიურ წინასწარნარაგადას: „აკაბურცხა ანთასო გინირთუ, ჭიჭე — მანგარ კათათ. მა, იეჰოვა, მუშ დროს ქუნჭუანქ თეს“ (ესაია 60:22).

2014 წანაშ სამსახურებრივ წანაშ ანგარიშშე იძინე, ნამდა ეჩდოოთხი ქიანას 100 000-შე უმოს მაუწყებელი რდუ. თინეფიშ რიცხვიშა ვენესუელა ხოლო მიშეშუ, მუშენდა 2007 წანას მაუწყებელეფიშ რიცხვიქ რეკორდულო მიძინუ. ამდღა მთელ მსოფლიოს 8 201 545 იეჰოვაშ მოწმე 115 416 კრებას მსახურენს.