2014 წანას, არგუსოს, იეჰოვაშ მოწმეეფქ მთელ მსოფლიოს ავრცელეს სპეციალურ ბუკლეტი, ნამუთ ხალხის ოჩინებაფუანდუ ვებ-გვერდის jw.org. თეშ ჭყოლოფუათ, სოდგარენ 65 000 000-შა მიშართეს თე ვებ-გვერდშა; თენა თის ნიშნენს, ნამდა 20 პროცენტით მაძინ ვებ-გვერდშა მიშმაულარეფიშ რიცხვის. მთელ მსოფლიოს სოდგარენ 10 000 კოჩიქ მითხუ ბიბლიაშ უფარეთ გურაფა ჩქინ ვებ-გვერდით, მუთ თის ნიშნენს, ნამდა 67 პროცენტით მაძინ ბიბლიაშ გურაფა ოკონან თინეფიშ რიცხვის ულირ თუთეფიშ გინაწონს. თე კამპანიაქ მანგარო მეხვარუ მსოფლიოშ შხვადოშხვა კუნთხუს მახორუ ხალხის.

კამპანიაშ დროს კანადას მახორუ მადლენქ ლიფტის ართ იეჰოვაშ მოწმეს შეხვადუ, ნამუქით მიარზუ ბუკლეტი „მნიშვნელოვან კითხვეფიშ პასუხეფი“. მადლენქ თქუ, ნამდა წოხოლენ სერს აბარწას ეწორდუ დო ღორონთის მთელ გურით ოხვეწუდ, ქიმუხვარებუდკო თეცალ კითხვეფშა პასუხეფიშ მეღებას. თეიშახ შხვადოშხვა ეკლესიეფს თხინდუ ბიბლიაშ გურაფას, მარა ტყურათ. იეჰოვაშ მოწმეწკუმა შეხვალამაშ უკულ ბრელ დროს ვამკურთუმუნ თეშ, თიქ ბიბლიაშ გურაფა ქიდიჭყუ მოწმეეფწკუმა.

ფილიპინეფს მახორუ როვენაქ ართ ჩინელ კოჩის დურაგადუ, ნამუთ ჩქარ ჭკუმუაშ ობიექტიწკუმა გერდუ. როვენაქ თის ბუკლეტი მიარზუ დო უწუ, ნამდა იეჰოვაშ მოწმეეფი ხალხის ბიბლიას უფარეთ ოგურუანა.

თურმე თე კოჩის ბიბლია დღას ვა ჸოფუ ნაძირეფუ. როვენაწკუმა რაგადიშ უკულ თიქ კონგრესშა ულა გეგნოჭყვიდუ. კონგრესიშ უკულ თიქ მოწმეეფს უწუ, ნამდა ოკოდ მეტი გეგუკო ღორონთიშ სიტყვაშ გურშენ დო ვებ-გვერდშე ბიბლიაშ გინოჭარუა ულამუდ.

ესპანეთის ართ ჯიმაქ, გუილერმოქ, ნამუთ ჸუჯის ვერჩქილე, კამპანიაშ დროს მუშ სკოლელს, ხორხეს ქიშეხვადუ. ხორხე ხოლო ჸუჯის ვერჩქილედ; თიქ გუილერმოს უწუ, ნამდა ამარდეცალო დიდაქ უღურუ დო ბრელ კითხვა უღუდ, ნამუთ ვასვანჯუანდ. გუილერმოქ თის თიმ თუთაშ ოვრცელებელ ბუკლეტი მეჩუ დო ოძირუ, მუჭო შეულებუდ ვებ-გვერდის jw.org ინფორმაციაშ გორუა ჟესტეფიშ ნინაშა დო თი კითხვეფშე პასუხეფიშ გაგება, ნამუთ სვანჯის ვარზენდუ. თიქ ხორხე სამეფო დარბაზშა დაპეჯუ. ხორხექ ქიმერთუ სამეფო დარბაზშა დო თიმ დღარშე კრება ართშა ხოლო ვა გუჩილითუაფ, თიშ უმკუჯინუო, ნამდა ჸუდეშე დარბაზშა 60 კილომეტრი მეუძუდ.

გრენლანდიას მახორუ ჟირი წყვილქ, ნამუთ იეჰოვაშ მოწმეეფ რენა, ართ-ართი მიკოლაფირ ადგილშა გეგნოჭყვიდეს ოქადაქებშა ულა. თიშ უმკუჯინუო, ნამდა თე ირფელს ბრელ ფარა ოკოდუ დო ნავით ამშვი საათი ოკო ულინუდესკონ, თინეფი მზათ რდეს 280 მახორუშა გეგნუჩამდესკო სახიოლო ამბე. ქადაქიშ დროს თინეფქ ბრელ ბუკლეტი გავრცელეს დო თექიანეფს გრენლანდიურ ნინაშა ქაძირუეს ვიდეორგოლი, ნამუთ ხალხის ჩქინ ვებ-გვერდის ოჩინებაფუანს. თეშ გარდა თინეფქ ბიბლიაშ გურაფა ქიდიჭყეს ართი წყვილწკუმა დო ასე თინეფს მარაშე ჟირშა ტელეფონით ოგურუანა ბიბლიას.

მოწმეეფი გრენლანდიაშ ჭიჭე სოფელეფს ხვალე ვა ქადაქენა. თინეფქ ნიკარაგუას, კარიბიშ ზღვა პიჯის დო ტყას ცხოვრენან ფერ მაიანგნა ნინაშა მარაგადე ხალხის ხოლო უქადაქეს დო ბუკლეტეფი მეჩეს. ხალხი ოხორანსინ ფერ ადგილშა ქიმეურთუმდესკონ, დიო აკოცუმილ ავტობუსით ეკოტახილ შარას 20 საათი ოკო ულინუდესკო, თეშ უკულ კუჩხით 11 კილომეტრი აფდეს ოულარ, სოდეთ ნამთინე ადგილს ბირგულშა ლეტა რდუ. თექიან მახორუეფი გაკვირებულ დო ხიოლით ეფშა რდეს, მუჟამს მოწმეეფი მაიანგნა ნინაშა ბუკლეტეფს ურიგენდეს დო ვიდეორგოლს ოძირანდეს.

ბრაზილიას, ამაზონიშ ტროპიკულ ტყაშ შქაგურს, სოდეთ ბრელ ხალხი ვახორანს, ართი მოწმექ, ესტელაქ ართი ქომოლკოჩის, ნამუთ თე სოფელს მიკმიშუ, ბუკლეტი მიარზუ. თე კოჩიქ ბუკლეტი გეჭოფუ დო ჯიბეშა ქელიდუ, მარა იშენდოიშენ ბრელი ინტერესი ვაგმურჩქინუ. ჸუჩა ირთუდუნ თიმ დროს, თიშ ნავქ გილელუ დო შქა წყარს გაჩერდუ. სოიშა მეხვარებდესკონ თეიშა, თე კოჩიქ ჯიბეშე ბუკლეტი გექშიღუ დო ბოლოშა წეკითხუ. თიქ ტელეფონით ბუკლეტის მოჩამილ ვებ-გვერდშა მიშილუ, სოდეთ მუსხირენ სტატია წეკითხუ დო ვიდეორგოლეფი ხოლო გეგნიჭარუ. მუსხირენ დღაშ უკულ თე კოჩიქ ესტელაშ ქომონჯის ქიშეხვადუ დო მადლობა მეუჩინ ესტელას ბუკლეტი მეჩუნ თიშენ. თინა იჩიებუ: „თე სტატიეფქ, ნამუთ თიმწკუმა იპკითხი, მუჟამს ნავს ვორდი დო მოხვარას ველუდინ, მართალო დიდი სიმშვიდე მუჩუ. ჩქიმ სქუალეფს მანგარო ქეჸოროფეს მათეშ ვიდეოეფქ. მა ანწი ხოლო ბრელშა მიშურქ თქვან ვებ-გვერდშა“.