„ითამ ოჯახიქ გეკიშაყარ ოზეიმებელო‘‘. თეცალ დუდფურცელ უღუდ ართ გერმანულ ჟურნალს (Frankfurter Rundschau) ბეშტელ სტატიას. თე აზრიშ რენა თაქ აკოშაყარელ კათა ხოლო.

„ჩქიმ ჸუდეს ვორდინ მიჩქუდ“, — რაგადანს პუერტორიკოელ კარლა.

„ჩქიმ ოჯახშა მეფრთიკონ, თიცალო მიმორჩქუდ დუდი, ოღონდ შხვა ქიანას‘‘, — იჩიებ ავსტრალიელ სარა.

მუქ ორაგადაფუ თინეფს თეცალ სიტყვეფი? იეჰოვაშ მოწმეეფიშ საერთაშორისო კონგრესიქ, ნამუქით 2014 წანაშ 18—20 კვირკვეს გერმანიაშ ქალაქ ფრანკფურტის კომერცბანკ-არენაშ სტადიონს ჩეტარ. თე კონგრესის სოდგარენ 37 000 კოჩიქ დესწრუ.

კონგრესშა მოულირეფს შურ ოლუდეს ბიბლიურ რჩქინაშ მიღებაშა. პროგრამაშა მიშეშ ბიბლიაშ კითხირ, ღორონთიშ ოდიდებელ ობირეშეფი, ლოცვა, ჟირ კოსტიუმირებულ დრამა დო ბიბლიურ მოხსენებეფი.

კონგრესის აკოშაყარელ კათაშ უმენტაშ თექიან იეჰოვაშ მოწმეეფი რდეს, მარა თაქ 3 000-შე მეტ სტუმარ ხოლო რდუ მოულირ ავსტრალიაშე, ბრიტანეთშე, ლიბანიაშე, სამხრეთ აფრიკაშე, საბერძნეთშე, სერბეთშე დო შეერთებულ შტატეფშე. თეშ გარდა 70 შხვადოშხვა ქიანაშე რდუ მოულირ 234 სპეციალურ სრულ დროთ მაქადაგებელი, ნამუთ მისიონერეფო მსახურენა.

კონგრესიშ პროგრამაშ ნამთინე ნაწილ 19 შხვადოშხვა ადგილს ვებ-ტრანსლაციათ გინიჩამუდ გერმანიას; თეშ გარდა ავსტრალიას დო შვეიცარიას ხოლო. გვალო პროგრამა 204 046 კოჩიქ მირჩქილუ.

ფრანკფურტის კონგრესიშ პროგრამა ბერძნულ, გერმანულ დო ინგლისურ ნინაშა მიშუ. შხვადო მოხსენებეფი სინქრონულო 17 ნინაშა ითარგმნუდ. თე ნინეფ შქას რდუ არაბული, თურქული, ტამილური, ჩინური დო ჟირ ჟესტეფიშ ნინა.

მართალ რე, ბრელ ქიანაშე მოულირ მოწმეეფი შხვადოშხვა კულტურაშ რდეს დო შხვადოშხვა ნინაშა რაგადანდეს, მარა თინეფ გორთილ ვა რდეს, მუშენდა ჸოროფაქ აკოშაყარუ (იოანე 13:34, 35). თინეფ და დო ჯიმალეფცალო ოქცუდეს ართიანს.

„ჩქინ თოლით ქობძირით დო დებრწმუნით, ნამდა ჩქინ მსოფლიო საჯიმალო თიცალ რე, მუთუნ ვა მოცილნა ართიანწკუმა ურთიერთობას‘‘, —იჩიებუ ტობიას, ნამუთ ბრიტანეთის ცხოვრენს.

„გეფჩინებაფე 20-შე მეტი შხვადოშხვა ქიანაშე მოულირ მოწმეეფი დო თამამას შემლებ ფთქუე, ნამდა ჩქი ღორონთიშ დო ართიანიშ ჸოროფა აკოფშაყარანა‘‘, — იჩიებუ დავიანა, ნამუთ პუერტო-რიკოს ცხოვრენს.

მალკომი, ნამუთ ავსტრალიაშე რე, იჩიებუ: „მა ართი ჭიჭე ქალაქის გებგი იეჰოვაშ გურშენ დო დუდი ქიმევუძღვინ თის. თეიშა ჩქინ მსოფლიო საჯიმალოშე ხვალე თინა მიჩქუდ, მუსით პუბლიკაციეფს პკითხულენდ დო ვიდეო რგოლეფშე მაფუდ ნაძირეფი, მარა ასე მიჩქუ, მუს ნიშნენს რდე თე საჯიმალოშ ნაწილ. თაქიან რინა რწმენას მიმანგარენს‘‘.

ფრანკფურტის დო თიშ გოხოლუას 58 კრებაშ და დო ჯიმალეფქ კონგრესშა მოულირ სტუმარეფს საჩუქრეფი აჩუქეს დო ონჯუას დრო ართო გატარეს.

სინტია, ნამუთ შეერთებულ შტატეფს ცხოვერნსინ, იჩიებუ: „და დო ჯიმალეფქ სტუმარეფიშ განსაკუთრებულ ჸოროფა გიმირჩქინეს. თინეფიშ ჸოროფა დო პატიცემა ირო გიმაშინე‘‘.

„არძა გიმოხანტუნდ ართმაჟიაშ ჸოროფას. იბძიცანდით, ბლაჸაფენდით. ართიანშე ბრელ მუთუნ დიბგურეთ‘‘, — იჩიებუ სიმონი, ნამუთ გერმანიაშე რე.

„ონჯუაშ ართო გატარებულ დროქ ქუდმოჯერუ, ნამდა იეჰოვაშ მოწმეეფი ვა ვორეთ ფანატიკოსეფი დო ვემეპჸუნთ ასკეტურ ცხოვრებას. ჩქი მიჩქუნა, მუჭო ვატარათ დრო‘‘, — იჩიებუ ემი, ნამუთ ავსტრალიას ოხორანს.

ფრანკფურტი 9 ქიანა შქას ართ-ართ რდუ, სოდეთ საერთაშორისო კონგრესიქ ჩეტარ.

ართ მოწმე, ნამუთ ფრანკფურტის საერთაშორისო კონგრესის ოსწრუდუნ, იჩიებუ: „დაუშვათ, ქოძირით ხოლოშიან ნათესე, მაგალთო ჯიმა, ნამუშ გურშენ თეიშახ დღას ვაგაიგონებუ. თინა გურშა გიხუტოლუანა დო ჸუდეშა გაპეჯენა. ნინათ ვეგკარაგადენან თიცალ ხიოლ გიღუნა. ასე წერმედგინით, მუჭო იპჸიდ 37 000 და დო ჯიმა შქას. ზუსტას თეცალ ხიოლ მიღუდ საერთაშორისო კონგრესის‘‘.