„მანგარ დიდ ჸოროფა იბგინით!“, — თქუ ართ უკრაინელ ოსურქ, მუჟამსით გურიშ ემაკინალ წერილ მირჩქილუ, ნამუთ იეჰოვაშ მოწმეეფიშ ხემანჯღვერე საბჭოშ წევრიქ, სტივენ ლეტიქ იკითხუ. თინა ართ-ართ რდუ თი 165 000 იეჰოვაშ მოწმეშე, ნამუქით მუშ ქიანას 2014 წანაშ 10, 11 მესის და დო ჯიმალეფიშ ოძირაფშა მოულირ ჯიმა სტივენიშ სიტყვეფი მირჩქილუ.

ბიბლიაშა გერსხილ მოხსენებეფი დო წერილი, ნამუთ ჯიმა სტივენ ლეტიქ იკითხუ, ხუთ ნინაშა თარგმნეს დო მთელ უკრაინას სოდგარენ 700 სამეფო დარბაზის შაყარელ ხალხიქ მირჩქილუ.

თი მარაშ საბატონ დო ჟეშხას ხემანჯღვერე საბჭოშ ხოლო ართ წევრიქ, მარკ სანდერსონქ კინ თი წერილ იკითხუ რუსეთის, მუჟამსით და დო ჯიმალეფიშ ოძირაფშა მერთუ. პროგრამაქ 14 ნინაშა გინითარგმნუ დო 180 413 და დო ჯიმაქ მირჩქილუ 2500-შე მეტ კრებას ბელორუსიას დო რუსეთის.

ხემანჯღვერე საბჭოშ წერილი რუსეთი დო უკრაინაშ არძა კრებაშა რდუ მოჯღონელი. მუჟამსით ჯიმა მარკიქ წერილ რუსულო წეკითხუნ, რუსეთიშ ფილიალქ ათეცალ სიტყვეფი მეჭარუ: „და დო ჯიმალეფს გურქ გოუტიბეს, მუჟამს ქიგეგეს, ნამდა ხემანჯღვერე საბჭოშ წევრეფშო თინეფი არძა ართ ვა რდეს დო თინეფიშ ამბე მანგარო ოინტერესუდეს. არძაქ თიცალო იბგინით, ითამ ხემანჯღვერე საბჭოქ გურშა ქომხუტოლეს“.

ხემანჯღვერე საბჭოშ წერილქ გურშა ელუკინ დო გამანგარ და დო ჯიმალეფი, მით პოლიტიკურ რია-რია რენ ფერ ადგილს ცხოვრენა. თე წერილით და დო ჯიმალეფს უწუეს, ნამდა თე ქვეყნიერებაშე დუდ შორს დეკინან დო ვემშართან პოლიტიკურ საქმეეფშა (იოანე 17:16).

ხემანჯღვერე საბჭოქ და დო ჯიმალეფს უწუ, ნამდა ლოცვათ, პირად გურაფათ დო ღორონთიშ სიტყვაშე ფიქრით შეულებდეს იეჰოვაწკუმა ხოლოს ჸოფედესკონ. ხალხის თინა ხოლო ქიგაშინეს, ნამდა მუდგა პრობლემაქ ვაშუანი, ჯერდან იეჰოვაშ დუნაპირებუშ, ნამუთ ესაიაშ 54:17-ის ინოჭარუ: „სკან გიოწურაფალო კეთებულ იარაღის ვაღვენუ ხვამა“.

წერილ ათეცალ სიტყვეფით ითებუ: „ჩქი არძას მანგარო მიჸორთ. ირიათო თქვანო ფიფქრენთ დო მთელ გურით ვოხვეწუთ იეჰოვას თქვანიშ გურშენ“.

თე მონახულებაშ გურშენ იეჰოვაშ მოწმეეფიშ უკრაინაშ ფილიალ ჭარუნს: „ხემანჯღვერე საბჭოქ აკეთუნ თეს შურო ვეველუდით. თინეფქ მუშმადიდა ჸოროფა დო მზრუნველობა გიმირჩქინეს. ართ დო იგივე მარას ჯიმა სტივენ ლეტიშ დო მარკ სანდერსონიშ მეულაქ უკრაინაშა დო რუსეთშა ოძირუ, ნამდა ღორონთიშ ხალხწკუმა ართობა რე დო იეჰოვა დო იესო ზრუნენა მსოფლიო საჯიმალოშე. ჩქი არძა ხუჯის ვუკინენთ თი აზრის, ნამდა ჩქინ ოძირაფშა მოულა დროულ რდუ, თექ ძალეფი ქომჩეს ვემსახურათ იეჰოვას პრობლემეფიშ უმკუჯინუო!“