იეჰოვაშ მოწმეეფქ ნიუ-იორკიშ შტატის, ქალაქშე შორს ლურჯ ტობაშ ხოლოს ახალ მსოფლიო მთავარ სამმართველოშ შენება ქიდიჭყეს. მუჭო ულუანა იეჰოვაშ მოწმეეფი ოშენებელ ტერიტორიას მოუძუნ თი ტყას დო თექიან ცხოველეფს?

თე ტერიტორიას, სოდეთ შენება მეურსინ, გვერეფი დო წყარიშ დო ტყაშ კუეფ ხე; თინეფს მუთუნქ ვაღოლესკონ თიშენ, თექიანობას ჭიჭე ხანით ღანდა ქუგუჸუნუეს. ღანდაშ გოხოლუას ირიათო ამოწმენა, ნამდა ცხოველეფქ ვენორთან ოშენებლ ტერიტორიაშა, სოვრეშეთ გაუჭირდუნა კინ ტყაშა ულა. შენებაშ თებაშ უკულ ღანდას გონწყუნა დო შენობაშ გოხოლუას გვერეფი ქოძირეს-და, თე საქმე უჩქუნ ფერ კოჩი შენობაშ ტერიტორიაშე უნებელო გეგნიჸუნანს თინეფს.

მოწმეეფქ ზოთონჯის ეჭოფეს მოსავალი ჯალეფშე, ვაუცილებდესკო სილიაშა (ჩიტიშ ჯიში) ბუდეშ კეთებან თიშენ. შენებაშ თებაშ უკულ მოწმეეფი ჯალეფს ბუდეეფს ქიმკამარგენა, ჩიტეფქ კინ ქუმორთან თიშენ.

გიმათუთაშე მარტშახ და დო ჯიმალეფი დიხას წიმინდანა დო ამუშენა, ნამდა ქიდაჭყანუან გიშალაფაშ კარს გერენ ფერ მცენარე უსუპი. მართალ რე, 2007 წანაშე დოჭყაფილ უორიკიშ ოშენებელი ტერიტორიას თე მცენერე ვერდუ, მარა მოწმეეფი იშენით ოცადნა დიხა გეგმაშ მეჸუნელო დამუშუან.

ლურჯი ტობას, ნამუთ ოშენებელ ტერიტორიას მოუძ, ბრელნერ ჩხომ ინოხე: მაგალთო, კალმახი, წებრი დო ჭორჭილა; თაქ წყარიშ შხვა დო შხვა ფრინველი ხოლო რე. მოწმეეფი ტობაშ მცენარეეფს ხოლო ულუანა. თეშ გარდა ტობაქ ვეგლელასინ თიშენ, პროექტიშ დიზაინერეფი ეკოლოგიას ვაცილუნ ფერ შენებაშ შხვა დო შხვა მეთოდის გიმირინუანა. მაგალთო, შენობეფიშ ორთვალეფს მცენარეეფიშ რგუალას აპირენა, თიშენ ნამდა ვეგიჩიხას წყარიშ ოულარ სისტემაქ დო ეკოლოგიაქ მანგარო ვეგეფუჭას.

ართ-ართი იეჰოვაშ მოწმე, ნამუთ თე პროექტის მონაწილნედუ, იჩიებ: „მართალ რე, თე ირფელშო ახალი გეგმეფი დო უმოს დრო რე საჭირო, მარა ჩქი ირნერო ვოცადუთ ქიმკვუოჯინათ უორიკიშ ბუნებას“.