სომხეთიშ რაიონულ ზედამხედველ, ჯიმა არტურ, იეჰოვაშ მოწმეეფიშ ართ-ართ კრებას იძირუანდჷ. თიქ ქოძირ, ნამდა თე კრება დიო ხოლო ვა ღებულენდჷ მონაწილებას საზოგადოებაშ შაყარუაშ ადგილეფს სტენდით მსახურებას. კრებაშ წევრეფს მსახურებაშ თეცალ სფეროს მონაწილებაშ სურვილ გურჩქინუკო, არტურქ, თიშ ოსურ ანაქ დო ხოლო ართ მოწმექ, ჟერარქ, სტენდ ქუდოდგეს ართ ჭიჭე ქალაქის. თინეფქ თიცალ ადგილ გეგშაგორეს, სოდეთ ბრელ ხალხ მიკმიშ.

 მიკმაულარეფქ ხეთეშე ქოძირეს სტენდ დო ლიტერატურაშ ეჭოფუა ხოლო ქიდიჭყეს. მარა თე სტენდიქ მოწინააღმდეგეეფს ხოლო ქუმუოლეს თოლშა. სტენდშა ჟირ მღვდელქ ქიმერთჷ დო ართ-ართიქ ვა გუფრთხილებუნ თეშ კუჩხ ქიმიოგ თის. უკულ თიქ არტურს თიშმანწარას ქიმიოგ სახეს, ნამდა არტურს აჩქეფქ თუდო ქუდუოლ. არტურ, ანა დო ჟერარ ოცადუდეს, დაწყნარესკო მღვდელეფ, მარა მუთუნქ ვეგშურთეს. თინეფ კუჩხის მიოგანდეს სტენდის დო ლიტერატურას თავრე-თევრე ორღვანდეს. თეს გეძინელ, ლანძღუნდეს დო ორცქინანდეს მოწმეეფს, დო უკულ, მუთ იჸუ, მიდართეს.

 არტურ, ანა დო ჟერარქ პოლიციაშ ადგილობრივ განყოფილებაშა მიდართეს დო საჩივარ გემშიღეს; თინეფქ გეუნწყეს პოლიციელეფს, მუდგაქ მოხვად დო მოკლეთ ქეჩის მუნეფიშ რელიგიურ პოზიციაშ გურშენ. თეშ უკულ, სუმხოლო მიდეჸონეს გამომძიებელშა, ნამდგაქ თინეფიშ დაკითხვა ქიდიჭყჷ. მარა, მუჟამსით თიქ ქიგეგ, ნამდა არტურქ, ფიზიკურო ჸონიერ კოჩიქ, ხე ვეკნურთინუ თინეფს, მიოტუ თე ამბეშე კითხვეფიშ დოსუმალა დო რწმენაშ გურშენ ქიდიჭყჷ გითოკითხირ. თე ჩიებაქ სოდგარენ ოთხ საათის გეგრძელ. გამომძიებელ თიცალ გაკვირვებულ რდუ, ნამდა ქიმიოძახჷ: „მუ მანგარ რელიგია რე! მა ხოლო მოკო თქვანწკუმა ვორდე“.

 მაჟია დღას, მუჟამსით არტურქ კინ დართჷ თე ადგილს დო ქიდიჭყჷ სტენდით მსახურება, თიშა ქიმერთჷ ართ კოჩიქ, მიდგაქ წოხოლენ დღას ძირჷ მღვდელიშ საქციელ. თიქ ოცქუ არტურს თიშენ, ნამდა სიმშვიდე ვა უდინუაფ დო ვა უჩხუპებ მღვდელეფშა. ბოლოს, თიქ თქუ, ნამდა წოხლენ დღაშ ნაძირებუქ გლახათ იმოქმედ თიწკუმა დო თექ წარმოდგენა მეუდინუ მღვდელეფშე.

 თიმ ონჯუას გამომძიებელქ არტურ კინ ქიჭანუ განყოფილებაშა, მარა თიშ მანგიორო, თე შემთხვევაშე უჩიებინდესკო, თიქ ხოლო უმოს მეტ კითხვეფ ქუდუსვჷ ბიბლიურ საკითხეფშე. თე ჩიებას ხოლო ჟირ პოლიციელქ ქიმიაძინ.

 უკულიან დღას არტურქ კინ ქიმიაკითხუ თე გამომძიებელს დო ბიბლიაშა გერსხილ ვიდეოეფშა ქაჯინუ. გამომძიებელქ შხვა პოლიციელეფს ხოლო ქუდუძახ, ნამდა თინეფს ხოლო ქუჯინდესკო.

 მღვდელეფიშ გლახა საქციელიშ შედეგო მუსხირენ პოლიციელს მუნეფიშ ცხოვრებას პირველო ქიმიაჩ თიშ საშვალებაქ, ქიმირჩქილუესკო სახიოლო ამბე. თე შემთხვევაქ თინეფს იეჰოვაშ მოწმეეფშე ჯგირ შთაბეჭდილება ქუდუტუ.