მაუდი, ნამუთ საფრანგეთის ცხოვრენს, თიცალ სკოლას მუშენს, სოდეთ უნარშეზღუდულეფ გურაფლენა. ამარდე მასწავლებერ კლასის ჰოლოკოსტიშ დო ნაცისტურ ბანაკეფიშ ისტორიას გენიხილენდჷ. ბანაკიშ პატიმარეფს ბარგშა შხვადოშხვა ფერიშ ნოჭკერ აფდეს მიკოჭელ. ნოჭკერიშ ფერ დო ზომა თიშა მიანიშნენდჷ, მუშენ რდუ კოჩ ჭოფილ.

 მუჟამსით მასწავლებერქ თი პატიმარეფიშ გურშენ იჩუ, მიდგას იაშფერ სამკუთხედ უკეთდეს, თიქ თქუ: „მა ფიფქრენქ, თენა ჰომოსექსუალეფს უღდეს“. მარა გაკვეთილეფიშ უკულ, მაუდიქ მასწავლებერს ქუდურაგადუ დო გეუნწყჷ, ნამდა ნაცისტურ ბანაკეფს იაშფერ სამკუთხედ იეჰოვაშ მოწმეეფს უკეთდეს. a თიქ მასწავლებერს შეთავაზ, ნამდა სურვილ ქუღუდ-და, თე საკითხწკუმა დაკავშირებით უმოს მეტ ინფორმაციას გეგნოჩანდჷ. მასწავლებერქ დეთანხმჷ თიშ შემოთავაზებას დო ქოთხუ მაუდის, მოსწავლეეფს ხოლო გეგნოჩკო თე ინფორმაცია.

 შხვა კლასის ართ-ართ მასწავლებერქ ხოლო დიჭყჷ თე საკითხშე ჩიება. თიქ გიმირინუ დიაგრამა, სოდეთ ძირაფილ რდუ, მუ სიმბოლოეფ უღდეს ნაცისტურ რეჟიმიშ პატიმარეფს. თე დიაგრამას მოჩამილ რდუ, ნამდა იაშფერ სამკუთხედ იეჰოვაშ მოწმეეფს უკეთდეს. გაკვეთილიშ უკულ მაუდიქ მასწავლებერს უწუ, ნამდა შეულებუდ მეტ ინფორმაცია გეგნოჩკო თე საკითხწკუმა დაკავშირებით. მასწავლებერქ დეთანხმჷ თიშ შეთავაზებას დო ქოთხუ, ნამდა მოსწავლეეფს ხოლო გეგნოჩკო თე ინფორმაცია.

 მაუდიქ 15 წუთიან პრეზენტაცია მამზად, მარა, მუჟამსით თე დროქ გემკორთჷ, მასწავლებერქ უწუ: „თე საკითხშე ოჩიებელო შეილებ ართ საათ გიმირინუე“. მაუდიქ მოსწავლეეფს დოკუმენტურ ვიდეო ქაძირუ, სოდეთ ძირაფილ რდუ, მუჭო თხოზუდეს ნაცისტურ რეჟიმიშ დროს იეჰოვაშ მოწმეეფს. თი მომენტის, მუჟამსით ვიდეოს ოძირანდეს, ნამდა ნაცისტეფქ 800 იეჰოვაშ მოწმე ბაღანა დაშორეს მშობლეფს, მაუდიქ გაჩერ ვიდეო დო წეკითხჷ სუმ ბაღანაშ ისტორია, მიდგაქ ბოლოშა ართგურო ქუგურზჷ თე განსაცდელს. ვიდეოშ თებაშ უკულ, მაუდიქ წეკითხჷ 19 წანერ ავსტრალიელ იეჰოვაშ მოწმეშ გერჰარდ შტაინახერიშ წერილ, ნამდგას 1940 წანას ნაცისტეფქ განაჩენ გიშუღეს დო დოჸვილეს. სოიშახ ჸვილუნდეს, თიქ მუსხირენ საათით ადრე წერილ მეჭარ მუშ მშობლეფს. b

 მაუდიქ შხვა კლასწკუმა ხოლო აკეთ თე პრეზენტაცია. თიშ გიმორჩქინელ გაბედულებაშ ჭყოლოფათ ჟირხოლო მასწავლებერ აუცილებერო ქეჩიებ მუშ მოსწავლეეფს იეჰოვაშ მოწმეეფიშ გურშენ, მუჟამსით ჰოლოკოსტიშ დო ნაცისტურ საკონცენტრაციო ბანაკეფიშ გურშენ აღვენუნა ჩიება.