ზარინა, ნამუთ ცენტრალურ აზიაშე რე, რუსეთის ცხოვრენდჷ, სოდეთ იეჰოვაშ მოწმეთ გინირთჷ. ნათუაშ უკულ თიქ გინოჭყვიდ, დირთკო მუშ ქიანაშა, ნამდა მუშ ჟირ ძღაბის ქუდაგურუკო ბიბლიურ ჭეშმარიტება. საშვალება ვა უღუდუნ თიშენ, თინა სქუალეფწკუმა ართო ცხოვრენდჷ ართოთახიან ბინას, სოდეთ მუშ მშობლეფ, ჯიმა დო ნოსა ხოლო რდეს. მშობლეფ ზარინას უკრძალენდჷ მუშ ბაღანეფშა ბიბლიურ ჭეშმარიტებაშ დოგურაფას. თეწკუმა ართო, ბაღანეფს ხოლო ურაგადდეს, დიდაწკუმა ვეჩუესკო თე საკითხიშ გურშენ.

 ზარინა ბრელს ფიქრენდჷ, მუჭო მეხვარკო სქუალეფს იეჰოვაშ გაჩინებაფას (იგავები 1:8). თინა მთელ გურით ლოცულენდჷ დო იეჰოვას თხინდჷ ხემძღვანელობას დო სიბრძნეს. უკულ ზარინაქ ქიდიჭყჷ თიშ მეჸუნა, მუდგას ლოცვაშ დროს თხინდჷ ღორონთის. მაგალთო, მუჟამსით მუშ ბაღანეფ ოსეირნეფშა გილაჸუნდჷ, თინა ღორონთიშ სარკო გუნაჭყეფუშ გურშენ ეჩიებუდ თინეფს. თეცალ ჩიებაშ შედეგო ბაღანეფს გევითარეს ინტერესიქ, უმოსო გეჩინებაფესკო გუმაჭყაფალ.

 თეშ უკულ ზარინაქ ქიმიფიქრჷ მეთოდ, მუჭო დუგურუაფუდკო ბაღანეფშა უმოს მეტ; თეშო გეგმირინუ წიგნ „მუს მოგურუანა ბიბლია სინამდვილეს?“. a თინა თე წიგნშე კილ-კილშა ეშმიჭარუნდჷ აბზაცეფს დო კითხვეფს. თე ნაჭარას მუსხირენ წინადადებას ხოლო გეუძინანდჷ, ნამდა ბაღანეფქ უჯგუშო ქიგეგესკო. თეშ უკულ, თე ფურცელ დო პასტას ონახვალ მანქანაშ თუდო მითატყობინუანდჷ. მუჟამსით ბაღანეფ თე ოთახშა გემნიშეს, ფურცელშე კითხულენდეს ნაჭარას დო პასუხეფს თექ მეუჭარანდეს.

 თე მეთოდიშ გიმორნაფათ ზარინაქ თე წიგნშე მუშ ბაღანეფწკუმა ჟირ დუდ გენიხილ, სიოშახ თინეფწკუმა ართო შხვა ადგილშა გინიშ ოცხოვრებშა. უკვე თის შეულებუდ მითინ ვეცილებუდუნ თეშ, ოგურუკო ბაღანეფს. 2016 წანაშ ოქტომბერს ჟირხოლოქ დინათ. თინეფ გახარებულ რენა, მუშენდა დიდაქ გეგმირჩქინ სიბრძნე დო ბრელ იხანდჷ თინეფშო, მუდგაქ ხე შეუნწყუ თინეფიშ სულიერო წიმი ულას.