ფილიპინეფს ბრელ ტურისტ მიშჷ ჩანჩქერიშ ოძირაფშა, ნამუთ ქალაქ პაგსანჯანიშ რე. თე ქალაქის მუაჩქიმ, ნარდო ლერონ, ღარიბ ოჯახის ირდუდ. კორუფციაქ, ნამუთ ხელისუფლებაშ წარმომადგენელეფ, პოლიციელეფ დო თინეფიშ თანამშრომლეფ შქას რდუ გავრცელებურ, თინა სასტიკ პიროვნებათ გინართინუ.

 ჩქიმ მშობლეფ ბრელს ხანდენდეს, ნამდა ბრუო სქუა მურდუდესკო. თინეფ გვალას მუშენდეს დო მოსავალ მოჸუნდეს, ათეშენ ხშირას ჸუდეშე შორს ჩენდუდეს. მა დო ჩქიმ ჯიმა როდელიოს ხშირას მიხვადუდეს ჩქინ დუდიშ მიკოჯინა დო ბრელშა შქირენულო ხოლო პჸოფეთ. ბაღანეფს ვა მიღუდეს ნორმალურო ლაჸაფიშ საშვალება, მუშენდა შქვით წანერო გინიფრთუდითინ არძა ბაღანა პლანტაციეფშა მიფშით ომუშებშა დო მაღალ გვალეფს ქოქოსით ეფშა ტომარეფ გილამზინდუდეს. ტომარე ვამაღინედესინ თიცალ მონკა ქორდ-და, ოკო ვოსერგელეთკო.

 მუაჩქინ ხშირას ბლახუნდეს. მარა არძაშ უმოსო თინა მაწუხენდეს, ნამდა დიაჩქინს ხოლო ლახუნდჷ. ვოცადუდით თიშ გაჩერებას, მარა მუთუნ ვაგშმალედეს. მა დო როდელიოქ ტყობაშე მიბრაგადეთ, ნამდა მიბრდუდითინ მუმას დოპჸილუნდით. მუჭო მოკოდ, მოჸოროფე მუმა მიჸუნდუკო!

 მუაჩქიმიშ საქციელიშ გურშენ გარისხებულ დო იმენდ დინაფილ ვორდჷ, ათეშენ 14 წანერ ვორდინ, ჸუდეშე მიდაფრთჷ. დუდშე მუსხირენ ხანს ქუჩას ფცხოვრენდჷ დო მარიხუანაშ გიმორნაფა ქიდიბჭყჷ. უმოს გვიანო, სამუშა ქიფში, ტურისტეფ ნავით გილაპჸუნდჷ ჩანჩქერშა.

 მუსხირენ წანაშა მანილაშ უნივერსიტეტის ქიდიბჭყჷ გურაფა. მარა ირ საბატონ დო ჟეშხას პაგსანჯანშა გილეფშ სამუშაშ გურშენ, ათეშენ ოგურაფალო ჭიჭე დრო მოსკიდუდ. ჩქიმ ცხოვრებას მუთუნ აზრი ვა უღუდ. ჩქიმ ოწუხებელს უკვე მარიხუანა ხოლო მუთუნს ვახვარუდ. ათეშ გურშენ მეტამფეტამინიშ, კოკაინიშ დო ჰეროინიშ მეღება ქიდიბჭყჷ. ნარკოტიკეფით გაბრუებულ ვორდჷ დო უზნეობაშე ხოლო ვეფჩიებუდ ვარიას. ირდიხას სიღარიბე, უსამართლობა დო ტანჯება რდუ. ბჯოგუდ ჩქინ ქიანაშ ხელისუფლება დო ირფელს თინეფს ვაბრალუაფუდ. ღორონთის ვოკითხუდ: „მუშენ რე ცხოვრება თეცალ?“. თე კითხვაშე პასუხის შხვადოშხვა რელიგიეფს ბგორუნდჷ, მარა პასუხშა ვემმაგორუ. ხოლო უმოსო გინიფრთჷ ნარკოტიკეფშა დამოკიდებულ.

 1972 წანას ფილიპინეფს სტუდენტეფქ მთავრობაშ წინააღმდეგ აქცია მანწყის. ართ-ართ აქციას მა ხოლო მიბღჷ მონაწილება, ნამდგაქ ჩხუპით ითუ. ბრელ ოჭოფეს დო მუსხირენ თუთაშ უკულ ქიანას სამხედრო მდგომარეობა გეგმაცხადეს.

 ჭიჭე ხანშა კინ ქუჩას ქუმოფხვად. მოშკურუდ, ნამდა არეულობას მონაწილებაშ გურშენ ხელისუფლებაშ წარმომადგენლეფქ მა ხოლო ვა პჭოფესკო. ნარკოტიკეფშო ფარაშ ოშიბელო ხირუა ქიდიბჭყჷ. საბოლათ, ვართ ფარამ ხალხიშ დო ვართ უცხოელეფიშ სექსუალურ მომსახურებაშე იფჩიებუდ ვარიას. ცხოვრებაშა გურ მაფუდ ელაფირ.

 თე დროშო დიაჩქიმ დო ართ უკლაშ ჯიმაქ იეჰოვაშ მოწმეეფწკუმა ბიბლიაშ გურაფა ქიდიჭყეს. თეშ გაგებაქ მუაჩქიმ გახანგჷ დო თინეფს ბიბლიურ ლიტერატურა დოუჭვჷ. მარა თეშ უმკუჯინუო, თინეფქ იშენით გაგრძელეს ბიბლიაშ გურაფა დო ქოთ დინათეს.

 ართ დღას მუაჩქიმს იეჰოვაშ მოწმექ ქუქადაგ დო ბიბლიაშე ქაძირუ, ნამდა მომავალს დედამიწას ნამდვილ სამართლიანობა ქუდოდირთუ (ფსალმუნი 72:12—14). თექ მუაჩქიმ დაინტერეს დო გეგნოჭყვიდ, თე საკითხ მუს პირადო გეგმურკვიებუდკო. ბიბლიაშ კითხირიშ დროს თიქ ქიგეგ, ნამდა ღორონთ სამართლიან მთავრობას მოპირნა. თეს გეძინელ, თინა ხოლო ქიგეგ, მუს ითხინს ღორონთ ქომონჯეფ დო მუმალეფშე (ეფესოელები 5:28; 6:4). ჭიჭე ხანშა მუაჩქიმ დო შხვა და დო ჯიმალეფქ ხოლო იეჰოვაშ მოწმეეფო გინირთეს. მა თინეფშე შორს ფცხოვრენდჷ დო ვა მიჩქუდ, მუ ამბე რდუ ჩქიმ ჸუდეს.

 1978 წანას ავსტრალიაშა გეგნოფრთჷ ოცხოვრებშა. მარა შინაგან სიმშვიდექ თეცალ მდიდარ დო მშვიდობიან ქიანას ხოლო ვამაგორ. იშენით ვამანტინ ალკოჰოლშა დო ნარკოტიკეფშა. უმოს გვიანო, იეჰოვაშ მოწმეეფქ ქუმმაკითხეს. მიმეწონ, მუთ თინეფქ მშვიდობიან მომავალიშ გურშენ მოძირეს ბიბლიაშე, მარა თინეფწკუმა ურთიერთობას იშენით დუც ვურიდანდჷ.

 ჭიჭე ხანიშ უკულ, მუსხირენ მარაშა ფილიპინეფშა დიფრთჷ. ჩქიმ და დო ჯიმალეფქ მიწის, ნამდა მუაჩქინქ დითირ დო უჯგუშ პიროვნებათ გინირთჷ. მარა თიშე თისხი გლახა მუდგარენ ქოფშუდ, ვა მოკოდ თიწკუმა შეხვალამა.

 ჩქიმ უკლაშ დაქ ბიბლიაშე ქუმოძირუ, მუშენ რე ქიანას თესხი ტანჯება დო უსამართლობა. გამკვირდჷ, ნამდა თეცალ ჭიჭე დო გამოუცდელ ძღაბის ჩქიმ კითხვეფშა პასუხიშ მეჩამაქ შეიალებუ. ულაშ წოხოლე მუაჩქიმქ ქომუჩ ბიბლიაშა გერსხილ წიგნ a („შენ შეგიძლია მარადიული ცხოვრება სამოთხეში დედამიწაზე“). თიქ მიწუ: „დრო რე სწორ შარას ქიგედირთე. თე წიგნ მიგეხვარებ, დოგორე პასუხეფ თი კითხვეფშე, ნამუთ გიღჷ“. თინა ხოლო ელამიჩ, ავსტრალიას იეჰოვაშ მოწმეეფ დობგორკო.

 მუაჩქიმიშ რჩევა გეფთვალისწინ დო ბრიზბენს, ჩქიმ ჸუდეწკუმა ხოლოს იეჰოვაშ მოწმეეფიშ სამეფო დარბაზ დობგორ. ქიდიბჭყჷ ბიბლიაშ გურაფა. დანიელიშ მა-7 დო ესაიაშ მა-9 დუდეფს ინოჭარილ წინასწარმეტყველებეფშე ქობძირ, ნამდა ღორონთიშ სამეფო, ნამუსით მუთუნ საერთო ვა უღჷ კორუფციაწკუმა მთელ დედამიწას იმართველენს. თინა ხოლო ქიგებგჷ, ნამდა სამოთხეთ გინორთელ დედამიწას იფცხოვრენთ. მოკოდ, ღორონთიშ მოსაწონ პჸოფედკო, თეშო საჭირო რდუ, გუვაკონტროლკო ემოციეფ, მივოტეკო შუმა, ნარკოტიკეფიშ მეღება დო დუდეშქუმალირ ცხოვრება. დევეშორ თი ძღაბის, მიდგაწკუმა ართო ფცხოვრენდჷ დო ბრელ გლახა ჩვევა ხოლო მიბშორ. მუჟამსით იეჰოვას დევეახლოვ, თიშ ნდობაქ უმოსო გომრჩქინდჷ, ათეშენ ლოცვას ფთხინდჷ მოხვარას, ნამდა ხოლო უმოსო დიფთირკო.

 დროშ მიკულაწკუმა ართო, ქიმეფხვად, ნამდა თის, მუდგას ბიბლიაშე ბგურაფლენდჷ, შეულებუდ კოჩიშ თირუა. მუჭოთ ბიბლია იჩიებ, მონდომას ვადვარკენთ-და შემლებნა დიფთირათ „ახალ პიროვნებათ“ (კოლოსელები 3:9, 10). მუჟამსით პირადო მა ვოცადუდ, დიფთირკო, ქიმეფხვად, ნამდა მუთ მუაჩქიმიშ თირუაშ გურშენ გებგჷ შილებე მართალ ჸოფედკო. ჩხუპიშ მანგიორო, მოკოდ თიწკუმა მშვიდობიან ურთიერთობა მიღუდკო. საბოლათ, მუაჩქიმს ქუვაპატი დო გურშე გეშებღჷ თი ჟღამ, მუთ ბაღანობაშე მოპჸუნდჷ.

 ახალგაზრდობას ხშირას თის ვორთუდ, მუდგას შხვეფ ორთუდეს, ათეშენ ბრელ გლახა საქმეს ქუვაკათ. ბიბლიას ინოჭარილ გაფრთხილებაქ ჩქიმ ცხოვრებას გემართლჷ — გლახა საზოგადოებაქ გლახა შარას ქიგმორინუ (კოლოსელები 3:9, 10). მარა ამდღა ჩქიმ მეგობრეფ იეჰოვაშ მოწმეეფ რენა. თინეფქ მიმეხვარეს, უჯგუშ პიროვნებათ გინიფრთიკო. ქეშეფხვად ძვირფას პიროვნებას, ლორეტას, ჩქი დებქორწინით. ამდღა ართო ვოგურუანთ შხვეფს, მუჭო შეულებ ბიბლიას თინეფიშ მოხვარა.

 მუაჩქიმქ ბიბლიაშ ჭყოლოფათ დითირ. თიქ მოჸოროფე ქომონჯო, თანდაბალ დო მშვიდ პიროვნებათ გინირთჷ. 1987 წანას, მუჟამსით დიბნათ, მუაჩქიმქ ცხოვრებას პირველო მიხუტოლუ გურშა.

 ჩქიმ მშობლეფ 35 წანაშე მეტ ხანს ქადაგენდეს დო შხვეფს უცხადენდეს ბიბლიურ იმენდის. მუაჩქიმქ მოხანდე დო მზრუნველ პიროვნებათ გინირთჷ, ნამუთ ირო მზათ რდუ, შხვეფს მეხვარკო. თე პერიოდის პირველო გომრჩქინდჷ თიშ ჸოროფა დო პატიცემაქ. მოამაყუდ, ნამდა თიშ სქუა ვორდჷ! სანარღოთ, 2016 წანას მუაჩქიმქ დოღურ; ასე თის ჸოროფათ იფშინანქჷ. ბიბლიაქ ჟირხოლოშ ცხოვრება ირნერო დოთირუ უჯგუშობაშა. ამდღა უკვე ვა ბჯოგ მუაჩქიმ. ასე მანგარ ბედნერ ვორექ, ნამდა დობგორ ზეციერ მუმა, იეჰოვა, ნამუთ მოპირნა, ნამდა მოსპუნს ირნერ გაჭირებას დო პრობლემეფს არძა ოჯახის.