დებაბდჷ ჰონდურასიშ ქალაქ ლა-სეიბას. ჩქიმ მშობლეფს ჩქიმ მეტ ბოშ ვა ჸუნდეს, მა ოთხ და პჸუნდჷ დო არძაშ უკლაშ ვორდჷ. ოჯახის ხვალე მა ვორდჷ ჸუც ვერჩქილე დო ვარაგადენ ფერ. ოჯახის საშვალება ვამღუდეს; ჩქი საშიშ უბანს ფცხოვრენდით. ცხოვრებაქ ხოლო უმოსო გემეუფრაშეს, მუჟამსით მუაჩქიმქ სამუშას დემარცხჷ დო დოღურ. თე დროს მა ოთხ წანერ ვორდჷ.

 დიაჩქიმ მუთ შეულებუდ, ირფელს ორთუდ ჩქინო, მარა ირო ვა მიღუდეს თისხი ფარა, ნამდა ბარგ ქიპჸიდითკო. ჭვემა დღალეფს ხშირას ბრგიდუდ, მუშენდა ტიბ ბარგ ვა მიღუდ.

 გემწიბრდინ, ჰონდურასულ ჟესტურ ნინა ქიდიბგურე დო თეშნერო შემალებუ ურთიერთობაქ თინეფწკუმა, მით ჸუც ვერჩქილე დო ვარაგადე. მარა დიაჩქიმ დო ჩქიმ დალეფს ვა უჩქუდეს ჟესტურ ნინა. თინეფ, ძირითადო, მუნეფიშ გიმოგონილ ჟესტეფით მირაგადუდეს. დიაჩქიმს მანგარო ვუჸორდჷ, ათეშენ მუსხირენ ჟესტიშ საშვალებათ, ნამუთ უჩქუდ, მოგურუანდჷ, ნამდა დუდ აურიდეკო პაპიროსის დო შუმას. მთელ გურით ვუმარდუქ დიაჩქიმს, მუშენდა თიშ მოხვარათ თე მავნე ჩვევეფიშ მონათ ვაგნოფრთექ.

 ბაღანობას დიაჩქიმს კათოლიკურ ეკლესიაშა გილაპუნდჷ, მარა მუთუნ ვა მარჩქილედ, მუშენდა ჟესტურ ნინაშა მითინ ვამთარგმნუნდჷ. ათეშ გურშენ გურქ გემიოლ თე ირფელშა დო ვით წანერ ვორდინ თეშ, მივოტე ეკლესიაშა გილულა. მარა იშენით მოკოდ, უმოს მეტ გებგიკო ღორონთიშ გურშენ.

 1999 წანას 23 წანერ ვორდინ, გეფჩინებაფე ართ ოსურკოჩ შეერთებულ შტატეფშე, ნამუთ ევანგელისტურ ეკლესიაშ მსახურ რდუ. თინა ბიბლიურ გაკვეთილეფს მიტარენდჷ დო ამერიკულ ჟესტურ ნინას ხოლო მოგურუანდჷ. თე გაკვეთილეფ თეშ მობწონდჷ, ნამდა გეგნობჭყვიდ მოძღვარო გინიფრთიკო. ათეშენ პუერტო-რიკოშა გეგნოფრთჷ, ნამდა ართ-ართ ქრისტიანულ-საგანმანათლებლო ცენტრის ჟესტურ ნინაშა სპეციალურ მომზადებაშ კურს გემკოფრთკო. 2002 წანას ლა-სეიბაშა დიფრთჷ დო მეგობრეფიშ მოხვარათ გომწყჷ ეკლესია თინეფშო, მიდგას ვარჩქილე დო ვარაგადე. თი მეგობრეფშე ართ-ართ რდუ პატრიცია, ნამუთ ოსურო ქიმიპჸონ.

 მრევლშო ბიბლია უმოს ადვილ გასაგებ ქოჸოფედკონ თიშენ, მუჭოთ ეკლესიაშ მოძღვარ ქადაგებეფს ჟესტურ ნინაშა ვატარენდჷ, ვოძირანდჷ სურათეფს დო ვაკეთენდჷ დადგმეფს, სოდეთ ბიბლიურ ისტორიეფ რდუ ეჭარილ. თეს გეძინელ, ვაკითხანდჷ გოხოლუა ქალაქეფს მახორუ ხალხის, გურშა ევუქექუანდჷ დო ვოხვარუდჷ პრობლემეფიშ მოგვარებას. თეწკუმა ართო, მისიონერულ მოგზაურობა ქიდიბჭყჷ შეერთებულ შტატეფს დო ზამბიას. სინამდვილეს მა თვითონ ვამჩქუდ ჯგირო ბიბლია. ჩქიმ მრევლის ხვალე თის ვურაგადუდ, მუთ შხვეფშე მიჩქუდ დო სურათეფშე მიძირ. მართალ ქოიწუათინ, კითხვეფ უმოს მიღუდ, ვინემ პასუხეფ.

 ართ დღას ქიგებგჷ, ნამდა ჩქიმ მრევლშე ნამთინექ ტყურა გომსიმუ, ითამ შუმილია ვორდჷ დო ოსურს ბღალატენდჷ. გეპჸალ დო ირფელშე გურქ გემიოლ. ჭიჭე ხანშა მა დო პატრიციაქ ეკლესიაშე მალაფრთით.

 იეჰოვაშ მოწმეეფ ხშირას მიშეს ჩქინ ჸუდეშა, მარა თინეფშა დღას ვა მომრჩქილუაფნა. მარა ეკლესიაშე მალაფრთითინ თიშ უკულ პატრიციაქ ბიბლიაშ გურაფა ქიდიჭყჷ; თის იეჰოვაშ მოწმე ჩილ დო ქომონჯ, თომას დო ლისი, ოგურუანდეს ბიბლიას. მართალ ქოიწუათინ, ჭიჭე გამკვირდჷ, თინეფს ჟესტურ ნინა უჩქუდესინ, მუშენდა ქოთ ჸუც არჩქილედეს დო ქოთ რაგად შეულებდეს. ათეშენ ხეთეშე მა ხოლო ქიდიბჭყჷ ბიბლიაშ გურაფა.

 ჩქი მუსხირენ თუთას ბგურაფლენდით ბიბლიას დო ვუჯინედით ვიდეოეფს ჟესტეფიშ ნინაშა. მარა თი პერიოდის ჩქინ ჟირ მეგობარქ მიწის, ნამდა იეჰოვაშ მოწმეეფ ღორონთიშ ვარინ კოჩიშ მიმაჸუნალეფ რდეს, ათეშენ ჩქი ხეთეშე მივოტეთ ბიბლიაშ გურაფა. თომასიქ ბრელ მტკიცებულება მოძირუ თიწკუმა დაკავშირებით, ნამდა თენა დიდ ტყურა რდუ, მარა მა იშენ ვა დუჯერ თის.

 მუსხირენ თუთაშ უკულ პატრიციას ძლიერ დეპრესიაქ ქუდაჭყჷ; თინა ღორონთის ლოცვას თხინდჷ, ნამდა იეჰოვაშ მოწმეეფს კინ ქუმურთუმდესკო ჩქინდა. ჭიჭე ხანშა ჩქინ მეზობელქ, ნამუთ იეჰოვაშ მოწმე რდუ პატრიციაშ ოძირაფშა ქუმორთჷ დო კითხჷ, ქაკოდ დო ვარ პატრიციას, ლისიქ კინ ქუმაკითხუკო თის. ლისიქ ჩქინწკუმა ნამდვილ მეგობრობა გეგმირჩქინ. თინა ირ მარას აკითხანდჷ პატრიციას, გურშა ეუქექუანდჷ დო ბიბლიას ოგურუანდჷ. მარა მა იშენით ვა მოსვანჯუანდჷ ეჭვეფ.

 2012 წანას იეჰოვაშ მოწმეეფქ ქიმწიჭყეს სპეციალურ კამპანია; თინეფ ხალხის ჰონდურასულ ჟესტურ ნინაშა ოჯინუანდეს ვიდეოს „გოკონანო გიჩქუდან სიმართლე?“. ლისიქ ჩქი ხოლო ქუმოძირეს თე ვიდეო. მუჟამსით თის ვუჯინ, მანგარო გამკვირდჷ, ნამდა მუდგას ადრე ვოგურუანდჷ მაგალთო, ჯოჯოხეთიშ დო შურ ვა ღურუნ თიშ გურშენ, ვა ჸოფე ბიბლიურ გურაფეფ.

 უკულიან მარას იეჰოვაშ მოწმეეფიშ სამეფო დარბაზშა მიდაფრთჷ, ნამდა თომასი ქობძირკო. თის ვუწი, ნამდა მოკოდ, ჸუც ვერჩქილენა დო ვარაგადენან ფერეფშო ბიბლია დომგურუაფუდკო, ოღონდ თეშ ვარ, მუჭოთ იეჰოვაშ მოწმეს. გეგმას მიღუდ, თინეფშო ახალ დო დამოუკიდებელ ეკლესია გომწყიკო. თომასის ახიოლ, მუჟამსით ჩქიმ მონდომა კინ ქოძირ დო მთელ გურით ქუმოცქუ. მარა თიქ ეფესოელეფიშ 4:5 წამკითხჷ დო ქუმოძირუ, მუსხით მნიშვნელოვან რე ქრისტიანულ კრებაშ ართობა.

 თეწკუმა ართო თომასიქ ქომუჩ ამერიკულ ჟესტურ ნინაშა გიშაშქუმალირ ვიდეო („იეჰოვას მოწმეები — ცოცხალი რწმენა, ნაწილი 1: სიბნელიდან გამოსულნი“). თე ვიდეოს ძირაფილ რდუ, მუჭო ირკვიენდჷ ბიბლიაშ ძირითად გურაფეფს მუსხირენ ქომოლკოჩშე შითმოდირთუდუნ ფერ ჯგუფ. თე ვიდეოშ ჯინათ ქიმეფხვად, მუს გინაფლენდეს თინეფ, მუშენდა თინეფცალო მა ხოლო ბგორუნდჷ ჭეშმარიტებას. თე ვიდეოქ დუმარწმუნ, ნამდა იეჰოვაშ მოწმეეფ ჭეშმარიტებას ოგურუანდეს, მუშენდა თინეფიშ მრწამს ხვალე ბიბლიაშა რდუ გერსხილ. თაშ ნამდა, კინ გუვაგრძელ ბიბლიაშ გურაფა დო 2014 წანას მა დო პატრიციაქ დიბნათით.

 იეჰოვაშ მოწმეეფ სიტყვათ დო საქმეთ წმინდეფ რენა, მუშენდა წმინდა ღორონთის ომსახურნა. თინეფს ართიანწკუმა მშვიდობიან ურთიერთობა უღნა დო ართიანს გურშა ელუკინანა. ვა უღჷ მნიშვნელობა, ნამ ქიანაშე რენა ვარდა ნამ ნინაშა იჩიებნა, თინეფს ართობა უღნა დო ართ ბიბლიურ ჭეშმარიტებას ოგურუანა.

 ჩქიმდა ხიოლ მოუღ თის, მუდგას ბიბლიაშე ბგურაფლენქ. მაგალთო, ქიგებგჷ, ნამდა იეჰოვა რე ირფელიშშემალებე ღორონთ, ნამუთ უზენაეს მართველ რე მთელ დედამიწას. თინა გიშაკერძაფას ვეგმირჩქინანს დო არძა უჸორს თინეფ ხოლო, მით ჸუც ვერჩქილე დო ვარაგადე. თე ჸოროფას თეშ ვაფასენქ, მუჭოთ ძვირფას განძის. თეწკუმა ართო ქიგებგჷ, ნამდა მალას დედამიწა სამოთხეთ გინირთუ, ირკოჩის სრულყოფილ ჯამრთელობა მაღვენუნა დო გეფხარენთ მარადიულ სიცოცხლეთ. შურ მოლჷ, მუჟამს მიბღენქ თე კურთხევეფს!

 მა დო პატრიციას მანგარო მოსიამოვნუნა ბიბლიაშე ჩიება თინეფწკუმა, მით ჸუც ვერჩქილენა დო ვარაგადენა. ჩქი ასე ბიბლიას ვოგურუანთ თინეფშე ნამთინეს, მით ადრე ჩქიმ მრევლ რდუ. მუჟამსით მოძღვარ ვორდჷ მა თვითონ ვა მარჩქილედ ბოლოშა თი საკითხეფ, მუდგას ვოგურუანდჷ. მარა ასე იეჰოვაშ მოწმეეფწკუმა ბიბლიაშ გურაფაშ ჭყოლოფათ არძა ჩქიმ კითხვაშე ქიმიბღჷ პასუხ.