დებაბდჷ ტონგას, ნამუთ წყნარ ოკეანეშ სამხრეთ-დასავლეთით რე დო 170 კუნძულშე შითმოდირთუ. ოჯახის იშენდოიშენ ბრელ საშვალება ვამღუდეს, ვართ დენ მიღდეს დო ვართ მანქანა პჸუნდეს, მარა წყარ მიღდეს დო მუსხირენ ქოთომ მიჸუნდეს. სკოლაშ არდადეგეფიშ დროს მა დო ჩქიმ ჟირ ჯიმა მუაჩქინწკუმა ართო პლანტაციას მუფშენდით. მოპჸუნდეს ბანან, ჩინურ კარტოფილ, ტარო დო მანიჰოტი. მუაჩქიმ ეჭოფილ მოსავალს გიმოჩანდჷ, თეწკუმა ართო, შხვადოშხვა ჭიჭე სამუშას ხოლო მუშენდჷ დო თეშნერო ეიჯუმუანდჷ ოჯახის. წყნარ ოკეანეშ კუნძულეფს მახორუ ხალხცალო ჩქი ხოლო ვაფასენდით ბიბლიას დო რეგულარულო გილეფშით ეკლესიაშა. მარა ბჯერდეს, ნამდა ბედნერ ცხოვრება ხვალე თიწკუმა მაღვენუდეს, მუჟამსით მდიდარ ქიანაშა გეგნიფშით ოცხოვრეფშა.

 16 წანერ ვორდინ, ჩქიმ ბიძიაქ მიმეხვარეს, ოჯახით კალიფორნიაშა (აშშ) გეგნოფრთითკო ოცხოვრეფშა. ახალ კულტურაშა მერჩქვანაქ მანგარო გამჭირდეს. ჩქინ მატერიალურ მდგომარეობაქ ჭიჭეთ გეუჯგუშ, მარა ღარიბეფიშ დასახლებას ფცხოვრენდით, სოდეთ ბრელ ნარკომან დო კრიმინალ რდუ. სერით ხშირას მარჩქილედეს ჸოთამაშ ხონარ დო ხალხის ხოლო ოშქურუდ კრიმინალურ დაჯგუფებეფშა. ხალხიშ უმენტაშის დუდიშ დაცვებელო იარაღ გილუღუდ, მუშენდა ქუჩას ჩხუპ დო საქმეშ გარჩევეფ რდუ. თეცალ ჩხუპიშ დროს მა ხოლო მოფხვად ტყვიაქ, ნამუთ კიდირს, გურიშ ხოლოს, ამდღარშახ მაფჷ ინოსქილადირ.

 გემწიბრდინ, მოკოდ ჩქიმ მახანა ბაღანეფს ქუვაგურკო დო თინეფცალ პჸოფედკო, ათეშენ ხშირას გილეფშჷ თექ, სოდეთ თინეფ იშაყარდეს; თექ ბრელს ფშუნდჷ, ფჩხუპენდჷ დო ნარკოტიკეფს ბღებულენდჷ. საბოლათ, კოკაინშა დამოკიდებულქ გინიფრთჷ. ხირუა ქიდიბჭყჷ, ნამდა წამალიშ ოჸიდე ფარა ქიფშიკო. ჩქიმ ოჯახიშ წევრეფ რეგულარულო გილეშეს ეკლესიაშა, მარა თინეფშე დღას ვემემღებ თიცალ რჩევა, ნამუთ ჩქიმ მახანეფიშ გლახა გავლენაშე დოფთხილანდჷ. ბრელშა ბჭოფეს ჩხუპიშ გურშენ. ჩქიმ ცხოვრება უკახალე მიშჷ! საბოლათ, ბრელ ხანით ქუდმოხუნეს ციხეს.

 1997 წანას, მუჟამსით ციხეს ვოხედ, ართ პატიმარქ ქოძირ, ნამდა ხეს ბიბლია მიკინებუდ. თენა ახალ წანაშ პერიოდ რდუ; ტონგას მახორუ ხალხის თე დღესასწაულ წმინდათ მიორჩქუდ. პატიმარქ ბკითხჷ, ქომჩქუდ დო ვარ სინამდვილეს, მუს იჩიებ ბიბლია იესოშ დაბადებაშენ. მა ვუპასუხ, ნამდა აზრის ვა ვორდჷ, მუს იჩიებუდ თეშ გურშენ ბიბლია. უკულ თიქ ბიბლიაშე ქუმოძირუ თი მონაკვეთ, სოდეთ იესოშ დაბადებაშენ ჭარჷ; მა ქობძირ, ნამდა მუდგას ქირსეშ დღახუს ხალხ ტრადიციულო ორთუდ, ბიბლიას შურო ვარდჷ მოშინაფილ (მათე 2:1—12; ლუკა 2:5—14). გუმაკვირ ბიბლიაშე ნაკითხერქ დო მოკოდ, ხოლო უმოს ქიგებგიკო. თე კოჩ იეჰოვაშ მოწმეეფიშ შეხვალამას ოსწრუდ, ნამუთ ირ მარას იტარებუდ ციხეს დო მა ხოლო გინობჭყვიდ, თეს ქუდაბსწრებედკო. კრებას წიგნ გამოცხადებას გენიხილენდეს. მართალ რე, ბრელ მუთუნ ვეგებგჷ, მუდგა თექ იჩის, მარა ქიმეფხვად, ნამდა ირფელ, მუდგას იჩიებდეს ბიბლიაშე რდუ.

 მუჟამსით იეჰოვაშ მოწმეეფქ ბიბლიაშ გურაფა შემოფთავაზეს, მა ხოლო ხიოლით დევეთანხმჷ. პირველო გებგჷ, ნამდა ბიბლია მოპირნა, მომავალს დედამიწას სამოთხე იჸუაფ (ესაია 35:5—8). ქიმეფხვად, ნამდა ღორონთიშ მოსაწონ ქიპიკონ, საჭირო რდუ, სრულაშე დოფთირეკო ცხოვრებაშ წეს. თეწკუმა ართო, თინა ხოლო ქიგებგჷ, ნამდა გლახა ჩვევეფს ვემვოტენდ-და, იეჰოვა ვამჩანდჷ უფლებას, ქიფცხოვრიკო სამოთხეს (1 კორინთელები 6:9, 10). ათეშენ გეგნობჭყვიდ, მიფშორკო ჩქიმ ფიცხ ხასიათ, მივოტეკო პაპიროს, ნარკოტიკეფიშ მეღება დო შუმა.

 1999 წანას, სოიშახ საბოლათ გუმათავისუფლენდეს, საემიგრაციო ბანაკშა გეგნომიჸონეს. ართ წანაშე მეტ ხანს მოწმეეფწკუმა მუთუნნერ კონტაქტ ვამღუდ, მარა თეშ უმკუჯინუო, გინოჭყვიდილ მაფუდ, ვემვოტეკო ცხოვრებაშ თირუა. 2000 წანას მთავრობაქ ვარია მიწუ ამერიკაშ შეერთებულ შტატეფს ცხოვრებაშე დო ტონგაშა დუმორთინეს.

 ტონგაშა დიფრთინ, ქიგებგჷ, სო რდუ იეჰოვაშ მოწმეეფიშ კრებაშ შეხვალამეფ დო კინ გუვაგრძელ ბიბლიაშ გურაფა. მუდგას ბგურაფლენდინ, ირფელ მობწონდჷ. ჩქიმდე მანგარო იმოქმედ თიშ ძირაფაქ, ნამდა თე კუნძულს მახორუ იეჰოვაშ მოწმეეფ ირფელს, მუდგას ოგურუანდეს, ბიბლიაშა რდუ გერსხილ, მუჭოთ თეს ამერიკას მახორუ მოწმეეფ ორთუდეს.

 ჩქინ მხარეს მუაჩქიმს ჯგირო იჩინენდეს, მუშენდა საპასუხიშმგებლო ადგილ უკებუდ ადგილობრივ ეკლესიას. ათეშენ დუდშე ჩქიმ ოჯახიშ წევრეფ გენიცადენდეს დო ნერვიანენდეს, ნამდა იეჰოვაშ მოწმეეფს დევეახლოვ. უმოს გვიანო, ჩქიმ მშობლეფქ ქოძირეს, ნამდა ბიბლიურ პრინციპეფიშ გიმორნაფათ მივოტე გლახა ჩვევეფ დო თეს ხიოლით ქეშეხვადეს.

 ართ-ართ, მუდგაშ მეტებაქ არძაშ უმოსო გამჭირდჷ, თენა რდუ ალკოჰოლურ ოშუმალ კავა, ნამუთ ჩქინ კულტურას რდუ გავრცელებურ. ტონგას მახორუ ქომოლკათა ირ მარას საათობით ხენა დო შუნა კავას. თე ოშუმალ მანგარო ოშუმუანს; თის ტყარ ზაფანაშ ჩხვიჩხვეფშე ამზადენა. მუჟამსით ჩქიმ ქიანაშა დიფრთჷ, კავაშ ბარშა დახე ირ სერს გილეფშჷ დო დონთხაფაშა ფშუნდჷ. ხოლო ართ პრობლემა თინა რდუ, ნამდა თიცალ ხალხწკუმა მიღუდ ხოლოშიან ურთიერთობა, ნამუთ ვაფასენდჷ ღორონთიშ ნორმეფს. საბოლათ, იეჰოვაშ მოწმეეფქ ქუმოძირეს, ნამდა ჩქიმ თეცალ საქციელით იეჰოვას გურს ელვოჭუანდჷ. ჭიე-ჭიეთ დიფთირე, ნამდა ღორონთიშ მოწონა დო კურთხევა მიბღიკო.

 ქიდიბჭყჷ იეჰოვაშ მოწმეეფიშ შეხვალამეფშა გილულა დო ვა ვოჩილითუანდჷ. თი ხალხწკუმა ურთიერთობა, მით ოცად, რდას ღორონთიშ მოსაწონ, მა ხოლო მოხვარუდ, მივერიკო ცდუნებას. 2002 წანას დიბნათ.

 ჩქიმდე მანგარო იმოქმედ თიშ გაგებაქ, მუთ ღორონთიშ გურშენ ბიბლიას ჭარჷ: „იეჰოვა ... გითვინენა, მუშენდა ვაკო მითინქ დოღურას, თის ოკო, არძაქ მინანუას“ (2 პეტრე 3:9). ღორონთის შეულებუდ ბრელ ხანიშ წოხლე მუღკო ბოლო თე უზნეო ქვეყნიერებას, მარა თიშ გიმორჩქინელ მოთვინება ჩქიმცალ ადამიანეფს საშვალებას არზენს, დეახლოვან თის. მოსიამოვნჷ თიშე ფიქრჷ, ნამდა შილებე იეჰოვაქ მა ხოლო გეგმომრნუას შხვეფიშ მახვარებელო.

 იეჰოვაშ მოხვარათ ნორმალურ ცხოვრება დიფრთინე. ნარკოტიკეფიშ მეღება მივოტე დო ხირუას ხოლო დუდ დუვანებ. ასე ირნერო ვოცადუქ, მივეხვარე შხვეფს, გინირთან იეჰოვაშ მეგობრეფო. იეჰოვაშ მოწმეეფს დევეახლოვინ, გეფჩინებაფე ჩქიმ საჸოროფო მეუღლე, თეა. მა დო თეას ართ ბოშ პჸუნა დო ბედნერ ოჯახ მიღნა. ჩქი ართო ვოხვარუთ შხვეფს თიშ გაგებას, მუდგას ბიბლია მოპირნა, ნამდა მომავალს დედამიწას სამოთხე დო მშვიდობიან ცხოვრება იჸუაფ.