„ღორონთიშ გაჩინებაფა ქუგოკონ-და, დღას ვედეთხუა იეჰოვაშ მოწმეეფს!“. თე სიტყვეფიშ მორჩქილაქ მანგარო გუმაკვირ. თი დროს იეჰოვაშ მოწმეეფწკუმა ბიბლიაშ გურაფა ახალ დოჭყაფილ მაფუდ. მორთ ჩქიმ ულირ ცხოვრებაშ გურშენ ქიგეჩიებუთ.

 დებაბდჷ სალვადორიშ ქალაქ კესალტეპეკეს. ჩქიმ მშობლეფს 15 სქუა ჸუნდეს, მა თინეფშე მამშვა ვორდჷ. მშობლეფ მოგურუანდეს, ვორდიკო პატიოსან დო კანონიშ მორჩილ. თეწკუმა ართო, ჩქინ ჸუდეშა ართ-ართ იეჰოვაშ მოწმე ლეონარდო შხვა მოწმეეფწკუმა ართო გილეშ დო ბიბლიას მოგურუანდეს. მარა მუდგას ბიბლიაშე ბგურაფლენდჷ, სერიოზულო ვა უჯინედ დო გლახა გადაწყვეტილებეფს ბღებულენდჷ. 14 წანერ ვორდინ, სკოლაშ ამხანაგეფწკუმა ართო შუმა დო ნარკოტიკეფიშ მეღება ქიდიბჭყჷ. ჭიჭე-ჭიჭეთ თინეფქ სკოლაშა გილულა მიოტეს დო ბანდას ქაკათეს. მა ხოლო თინეფიშ შარას ქიგვაჸუნ. მთელ დღას ქუჩას ვორდით, ხალხის ფარას მიდმუღანდით დო მუთ მოკოდესინ თიშო ვახარჯენდით.

 ბანდაქ ჩქიმ ოჯახო გინირთჷ. მზათ ვორდჷ თინეფიშ გურშენ დუდ ვა დამზოგებუდკო. მაგალთო, ართშა ჩქიმ მეგობარქ, ბანდაშ ართ-ართ წევრიქ, ნარკოტიკეფიშ გავლენაშ თუდო რდუნ თეშ, ჩქიმ მეზობელს ქიგიანთხჷ. თე დროს მეზობელქ ოჭოფ თინა დო პოლიციაშა რეკუა ხოლო ქაჭიშუ. ჩქიმ მეგობარ გუტუკო თიშენ, გარისხებულქ მეზობელიშ მანქანას კეტ მოვუნჭჷ დო სარკეეფ ქიმთვოტახ. თინა მოხვეწუდ, გაფჩერებედკო, მარა ჸუჯ ვა ვოთხი დო მანქანა მთლიანო დუტახი.

 18 წანერ ვორდინ, პოლიცია დო ჩქიმ ბანდაშ შქას სერიოზულ დაპირისპირებაქ ქუმოხვად. ჩქიმ ხეთ ნაკეთებ ბომბიშ ჸოთამა მოკოდუნ თეშ, უცბას ხეს ემეფეთქ. ვაფშჷ თექ მუჭო მოხვად. ხვალე თინა ფშუ, ნამდა ჩქიმ აკოქერქილ ხე ბძირ დო უკულ გურქ მიდამირთჷ. თოლ გუვონჯინ, საავადმყოფოს ვორდჷ; მარძგვან ხე ვამღუდ, ვართ მარძგვან თოლს ვორწყედ დო ვართ მარძგვან ჸუც იფრჩქილედ.

 თი ირფელიშ უმკუჯინუო, მუდგაქ მოფხვად, საავადმყოფოშე გეგშაბჭარესინ, კინ ბანდას დუვართჷ. თეშ უკულ ხეთეშე პოლიციაქ ობჭოფ დო ციხეს ქუდმოხუნეს. თექ ბანდაშ წევრეფს უმოსო დევეახლოვ. ირ ოჭმარეს მარიხუანათ იბჭყანდით, ართო ბჭკუმუნდით დო სერშახ ართო ვორდით.

 მუჟამსით ციხეს ვორდინ, ლეონარდოქ ქომძირუ. ჩიებაშ დროს თიქ ყურადღება მიაქცუ თი ტატუს, ნამუთ მარძგვან კილეს მიღუდ დო ბკითხჷ: „ქოიჩქუნო, მუს ნიშნენს თე სუმ წერტილ?“. მა ვუწი: „მუჭო ვარ?! სექსი, ნარკოტიკეფ დო როკენროლ“. თე დროს ლეონარდოქ მიწუ: „მა შხვანერო ფთქუანდჷ: საავადმყოფო, ციხე დო ღურა. საავადმყოფოს უკვე რდი, ასე ციხეს რექ დო მუქ დუგოსქიდ?!“.

 თიქ, მუთ ლეონარდოქ მიწუ ქუდომზარზალუ. თინა მართალ რდუ. სასაფლას ჩქიმ ხეთ იმნთხორუნდჷ. ლეონარდოქ ელამიჩ, ნამდა ბიბლიაშ გურაფა ქიდიბჭყიკო დო მა ხოლო დევეთანხმჷ. მუდგას ბიბლიაშე ბგურაფლენდჷ, გეგნმოჭყვიდირაფუ, დოფთირეკო ჩქიმ ცხოვრება. მაგალთო, ბიბლია იჩიებ: „გლახა საზოგადოება გილმალუანს ჯგირ ჩვევეფს“ (1 კორინთელები 15:33). თაშ ნამდა, პირველ რიგის სამეგობრო ოკო დოფთირეკო. ათეშენ ბანდაშ შეხვალამეფშა გილულაშ მანგიორო, იეჰოვაშ მოწმეეფიშ შეხვალამეფშა ქიდიბჭყჷ გილულა, ნამუთ ციხეს იტარებუდ. თექ ართ პატიმარს, ანდრესის ქეშეფხვად, ნამდგაქ ციხეს ინათჷ. თიქ მიწუ, ნამდა ოჭმარე-ოჭმარეს ართო მიჭკუმდესკო ოჭკუმალ. თეშ უკულ, ოჭმარეს მარიხუანაშ შუმათ ვებჭყანდჷ. თეშ მანგიორო, ირ ოჭმარეს მა დო ანდრესი ბიბლიურ მუხლის გენიფხილენდით.

 ბანდაშ წევრეფიშ თოლს ვამკოჩილათ, მუჭო იფთირუდ. შედეგო, ბანდაშ ართ-ართ ლიდერქ გემკომჭანუ დო მიწუ, ნამდა ჩქიმწკუმა ჩიება ოკოდ. მანგარო მაშქურინ, მუშენდა ბანდაშ დოტება მანგარ ძნელ რდუ დო ვამჩქუდ, მუშ კეთება ულამუდ. თიქ მიწუ: „ვორწყეთ, ნამდა ჩქინ შეხვალამეფშა ვეგლურქ დო იეჰოვაშ მოწმეეფიშ შეხვალამეფშა გილურქ. მუშ კეთება გილამ?“. მა გევუნწყჷ, ნამდა ბიბლიაშ გურაფაშ გაგრძელება დო ცხოვრებაშ თირუა მოკოდ. გუმაკვირ თიშ სიტყვეფქ, ნამდა იეჰოვაშ მოწმეთ გინორთა ნამდვილო ქუმოკოდ-და, თინეფ პატის ქოცენდეს ჩქიმ გადაწყვეტილებას. უკულ თეცალ მუდგარენ მიწუ: „ღორონთიშ გაჩინებაფა ქუგოკო-და, დღას ვედეთხუა იეჰოვაშ მოწმეეფს! ჩქი ბჯერა, ნამდა დუც დანებენქ გლახაშ კეთებას. მიოხვამალ ამბე რე, მუშენდა სწორ შარას გერექ. მოწმეეფ ნამდვილო ქიმგეხვარებნა. ამერიკას ვორდინ, მა ხოლო ბგურაფლენდჷ ბიბლიას თინეფწკუმა დო ჩქიმ ოჯახშე ნამთინე ასე იეჰოვაშ მოწმე რე. მუთუნშა ვა გაშქურნას, ირიათო წიმი იდჷ!“. მართალ რე, შიშიქ ჭიჭეთ იშენით ქუდმოსქიდ, მარა თიშ სიტყვეფქ მანგარო გუმახარ. გურს იეჰოვას ვუმარდუდ. დუც გალიაშე გოტებულ ჩიტცალო ბგინაფლენდჷ; ჩქიმ დუდშა გეგმოფცად იესოშ სიტყვეფ: „ქიგეგენთ ჭეშმარიტებას დო ჭეშმარიტება გუგათავისუფლენა თქვა“ (იოანე 8:32).

 გეგმოფცადესკონ თიშენ ჩქიმ ჯვეშ მეგობრეფშე ნამთინე ნარკოტიკეფს მარზიენდჷ. მინშა ვამმარიებედ თე ცდუნებაშა, მარა დროშ მიკულაწკუმა ართო, ლოცვაშ მოხვარათ საბოლათ გივორჯგინ გლახა ჩვევას (ფსალმუნი 51:10, 11).

 ციხეშე გომტეს უკულ, ბრელს ჯერდჷ, ნამდა ჯვეშ ცხოვრებას დუვართუდ, მარა თაშ ვა მომქციებინ. თეშ მანგიორო, ციხეშა უკვე თიშენ მინიფშჷ, ნამდა შხვა პატიმარეფს ბიბლია დუვოგურეკო. საბოლათ, ჩქიმ ჯვეშ მეგობრეფქ დერწმუნეს, ნამდა დიფთირ. მარა სანარღოთ, ჩქიმ ჯვეშ ნტერეფს ვა ჯერდეს თენა.

 ართ დღას, მსახურებაშ დროს მა დო ჩქიმ პარტნიორს, ვეველუდითინ თეშ, თი ბანდაშ წევრეფქ ქუგომდირთეს კრუგის, მით ადრე ჩქინ ბანდას ონტერუდ. თინეფს ჩქიმ ჸვილუა ოკოდეს. ჩქიმ პარტნიორქ მშვიდას, მარა გაბედულო გეუნწყჷ თინეფს, ნამდა მა ბანდაშ წევრ ვა ვორდჷ. ვოცადუდ, სიმშვიდე ვამდინუაფუდკო. გობლახეს დო უკულ გუმაფრთხილეს, თი ტერიტორიაშა კუჩხ ვეგემბიჯგუაფუდკო, უკულ იარაღის გიმუკინეს დო გომტეს. ბიბლიაქ დასურო დოთირუ ჩქიმ ცხოვრება. ულირს თეცალ მუდგარენ ქუმოფხვალამუდკო, მანგიორს გინუგანდჷ. მარა ასე ბიბლიურ რჩევა გეფთვალისწინ, ნამუთ 1 თესალონიკელეფიშ 5:15-ის ჭარჷ: „მითინს ვეგნუგათ მანგიორ, ირიათო ეცადით, ნამდა ჯგირ უკეთათ, მუჭოთ ართიანს თეშ შხვეფს ხოლო!“ (1 თესალონიკელები 5:15).

 თიშ უკულ, მუთ იეჰოვაშ მოწმეთ გინიფრთჷ, ვოცადუქ, პატიოსანო იფცხოვრე. ცხოვრებაშ თირუა ადვილ ვა რე. მარა იეჰოვა ღორონთიშ მოხვარათ, ბიბლიურ რჩევეფიშ მეჸუნათ დო ახალ მეგობრეფიშ ელარნათ, თეს ქიმვოჭირნე. გინოჭყვიდილ მაფჷ, მუთუნით ვა დუვართე ჯვეშ ცხოვრებას (2 პეტრე 2:22).

 აგრესიულ დო მოძალადე ვორდჷ. ცხოვრებაშ წეს ვამთირუდკო, დარწმუნებულ ვორექ, ასე ცოცხალ ვეპჸიდ. თიქ, მუთ ბიბლიაშე დიბგურე ჩქიმ ცხოვრება მთლიანო დოთირუ დო მიმეხვარ, გივორჯგინკო გლახა ჩვევეფს. თეწკუმა ართო, თინა ხოლო დიბგურე, ნამდა მშვიდობიან ვორდე არძაწკუმა, თინეფ შქას ჩქიმ ნტერეფწკუმა ხოლო (ლუკა 6:27). ასე თიცალ მეგობრეფ პჸუნს, მით ჯგირ თვისებეფიშ გავითარებას მოხვარ (იგავები 13:20). თეწკუმა ირფელწკუმა ართო, აზრიან ცხოვრება მიღჷ, მუშენდა ვომსახურუქ ღორონთის, ნამდგაქ ულირს დაშებულ ქუმაპატუ (ესაია 1:18).

 2006 წანას გამკოფრთჷ სპეციალურ სკოლა დაუქორწინებელ მაქადაგებელეფშო. მუსხირენ წანაშა დეფქორწინ დო მა დო ჩქიმ მეუღლეს ძღაბიქ ქეშმეძინეს. ასე დიდ დროს გიმურთუნქჷ შხვეფშა თი ბიბლიურ პრინციპეფიშ დოგურაფას, ნამდგაქ მა მიმეხვარ. თეს გეძინელ, ადგილობრივ კრებას უხუცესო ვმსახურენქ დო ვოცადუქ, მივეხვარე ახალგაზრდეფს, დუდ ეუჩილითუან თი შეცდომეფს, ნამდგას მა შეფხვად თინეფიშ ასაკის. თიშ მანგიორო სასაფლა ჩქიმ ხეთ გიმნთხორკო ასე ვაშენენქ ბედნერ მომავალშო, ნამდგას ღორონთ მოპირნა ბიბლიაშ საშვალებათ.