სამხრეთ აფრიკას მახორუ ართ იეჰოვაშ მოწმე სახელო დანიელაქ ართ-ართ კაფეს ქოძირ, მიდგარენს სუმკა ქუდოსქილად, ნამდგას ფარა დო ბანკიშ ბარათეფ ინოძუდ. დანიელაქ გონწყჷ სუმკა, ნამდა მინჯეშ ტელეფონიშ ნომერ დო მისამართ ქოძირუკო, მარა ხვალე მინჯეშ სახელს ქიმიოგორუ. თიქ ქეცად, თე ძირაფილ ბარათეფით ბანკის დეკავშირკო დო მინჯე დოგორკო, მარა იშენით ვემიაგორუ. დანიელას ვემუტებ გორუა. თიქ დორეკ თი ექიმიშ ნომერშა, ნამდგაშ გიშაჭარილ რეცეპტ სუმკას ძირჷ. საავადმყოფოშ მიმღების უწუეს, ნამდა სუმკაშ მინჯეს ქიმეჩანდეს დანიელაშ ნომერს.

 სუმკაშ მინჯეს მანგარო გუკვირდჷ, მუჟამსით საავადმყოფოშე ურეკეს დო უწუეს, ნამდა დანიელაქ თიშ სუმკა ქოძირ დო ოკოდ, მინჯეს გეგნოჩკო. დანიელაქ მუამუშწკუმა ართო ქეშეხვად თე კოჩის. თინეფქ სიტუაცია გეგმირინუეს დო სუმკაშ მინჯეს გეუნწყეს, მუშენ გორუნდეს თაშ. თეს გეძინელ, უწუეს, ნამდა იეჰოვაშ მოწმეეფ რდეს დო ბიბლიურ პრინციპეფით ცხოვრენდეს. თინა ხოლო უწუეს, ნამდა ზუსტას ათეშენ, ირიათო ოცადდეს პატიოსანო მიქცისკო (ებრ. 13:18).

 მუსხირენ საათიშ უკულ თე კოჩიქ დანიელას დო თიშ მუმას წერილ ქიმეჭარ, სოდეთ მარდულობას გიმოხანტუნდჷ, ნამდა სუმკა დო კაშილოკ დურთინუეს. თინა ჭარუნდჷ: „მანგარო ვაფასენქ, ნამდა ირნერო ეცადით დოიგორუდითკო. ჩქიმო სასიამოვნო რდუ თქვანწკუმა შეხვალამა დო თქვან ოჯახიშ გაჩინებაფა. დღას ვეგიბჭყოლიდუანქ თქვან გიმორჩქინელ ჯგირობუა დო პატიცემას. მარდულობას გიმოფხანტუნქ დო მოკო, ფარა გაჩუქათ. მიჩქჷ, მანგარ მსხვერპლშა მეურთჷ, ნამდა თქვან ღორონთის ემსახურათ. თქვან საქციელშე იძირე, ნამდა პატიოსან დო წესიერ ხალხ რეთ. თაშ ნამდა, ხოლო ართშა გირაგადუთ მადლობას. ღორონთიქ აკურთხას თქვან მსახურება“.

 მუსხირენ თუთაშ უკულ თე კოჩიქ კინ დეკავშირ დანიელაშ მუმას დო ქეჩუ, მუქ მოხვად თე შემთხვევაშ უკულ ხეთეშე. მუჟამსით მუდგარენეფიშ ოჸიდირშა რდუ ულირ, თუდო დოლაფირ კაშილოკ ქუძირ, დუგორ თიშ მინჯე დო დურთინუაფ თიშა. თე კოჩიქ კაშილოკის მინჯეს, ნამუთ ოსურკოჩ რდუ, ქეჩუ, ნამდა ჭიჭე ხანით ადრე მუს ხოლო მეუდინ სუმკაქ დო დურთინუეს, მუდგაქ გინაჭყვიდირაფუ თაშ მიქცუკო. თე კოჩიქ დანიელაშ მუმას თეცალ სიტყვეფ უწუ: „ართ ჭიჭე სიკეთე დო პატიოსნება შხვეფს ხოლო გინაჭყვიდირაფუანს თაშ მოქციებას. საბოლათ, თენა ხალხიშ ცხოვრებას უჯგუშობაშა თირანს“.