ართ იეჰოვაშ მოწმე, ელისო, ბიბლიას ოგურუანდჷ ართ ოსურკოჩის, ნამდგაშა ველუდუნ თეშ სტუმარო ქუმორთეს მღვდელ დო მუშ ოსურქ. ელისოს გაგებულ აფუდ, ნამდა ბრელ ხან ვარდჷ მიკულირ, მუთ თინეფს ართ კაკალ სქუაქ უღურეს.

 თიშ უკულ, მუთ ელისოქ ქიმიანარღჷ დო გურჭუა გიმოხანტჷ, თინეფს დუდიქ ვეშიაკინეს დო ხონარმაღალო ქინგარეს. გურაკოჭირებულ მღვდელქ იკითხჷ: „ვა მარჩქილე, ღორონთიქ მუშენ მუმორინუ თეშმადიდა განსაცდელ?! მუშენ მიდამიღ ჩქიმ ართ კაკალია სქუა?! 28 წანა რე, მუთ ღორონთის ვომსახურუქ დო ჯგირიშ მეტ მუთუნ ვამკეთებ დო თაშ მუშენ გინომიგ?! მუშენ მიჸვილ ღორონთიქ სქუა?!“.

 ელისოქ გეუნწყჷ თინეფს, ნამდა ღორონთის ვაუჸვილ თინეფშა სქუა. თეს გეძინელ, გეუნწყჷ გიშაჸიდირალშე, გათელებაშე დო თიშ გურშენ, მუშენ უშვენს ღორონთ უბადობას. თინეფქ უწის ელისოს, ნამდა ზუსტას თი კითხვეფშე მიღეს პასუხეფ, მუდგას ღორონთის ოკითხუდეს ლოცვაშ დროს.

 უკულიან მარას მღვდელქ დო მუშ ოსურქ კინ ქუმაკითხეს თე ოსურკოჩის, ნამდა ბიბლიაშ გურაფას ქიდესწრესკო. ელისო წიგნშე „მუს მოგურუანა ბიბლია სინამდვილეს“ გენიხილენდჷ მა-7 დუდის, ნამუშ სათაურ რე „მუ იმენდ არსებენს ღურელეფშო“. თე ჩილ დო ქომონჯ ხოლო მონაწილენდეს თე გარჩიებას.

 უმოს გვიანო მღვდელქ მუშ ოსურწკუმა ართო ქართის ქიდესწრჷ იეჰოვაშ მოწმეეფიშ სპეციალურ კონგრესის. თინეფ მანგარო გაკვირ თი ჸოროფა დო ართობაქ, ნამუთ თექ ძირეს დო ნამდგაშ გურშენ თესხი წანას ოგურუანდეს მრევლის, მარა უშედეგოთ.