ბულგარეთის მახორუ ართ იეჰოვაშ მოწმე სახელო ონგლი ბიბლიას ოგურუანდჷ ართ ოსურს, ნამუსით ზლატკა ჯოხოდ. ზლატკაშ ქომონჯ ვა გურაფლენდჷ ბიბლიას. ონგლი იჩიებ: „ართშა ბიბლიაშ გურაფაშ დროს, მუჟამსით ოჯახურ საკითხეფიშ გურშენ იფჩიებუდით, ყურადღება გუვამახვილ, მუსხით მნიშვნელოვან რე, ჩქინ მეუღლეეფს დო სქუალეფს ვუწუათ, ნამდა მიჸორა. ზლატკაქ გურჭვილო ქინმოჯინ დო მიწუ, ნამდა ქომონჯშა დო მუშ ჩხორო წანერ ძღაბშა დღას ვა უთქუალ, ნამდა უჸორს“.

 ზლატკა იჩიებ: „მზათ ვორექ, თინეფშო ირფელ გუვაკეთე, მარა თე სიტყვეფ მუთუნით ვა მარაგადე. დიაჩქიმს ჩქიმდა დღას ვა უთქუალ, მიჸორქია. ვართ ჩქიმ ბების უთქუალ დიაჩქიმშა თე სიტყვეფ“. ონგლიქ ზლატკას ბიბლიაშე ქაძირუ, მუჭო უწუ იეჰოვაქ იესოს, ნამდა უჸორდჷ (მათე 3:17). თიქ ელუჩ ზლატკას, ქილოცკო დო ღორონთის მოხვარა ქოთხუკო. თინა ხოლო ელუჩ, ნამდა ქომონჯშა დო სქუაშა ქუთქუალუდკო, ნამდა უჸორდჷ თინეფ.

 ონგლი აგრძელენს: «ჟირ დღაშ უკულ ზლატკაქ გახარებულქ მიწუ, ნამდა ილოც დო იეჰოვას მოხვარა ქოთხუ; მუჟამსით თიშ ქომონჯიქ ჸუდეშა ქუმორთჷ, ზლატკაქ გეუნწყჷ, ნამდა ბიბლიაშე დიგურუ, მუსხით მნიშვნელოვან რე, ოსურ ირიათო გიმოხანტუნდას ქომონჯიშ პატიცემას დო ჸოროფას. ჭიჭე პაუზაშ უკულ უწუ, ნამდა მანგარო უჸორდჷ. უმოს გვიანო, მუჟამსით თიშ ძღაბიქ ჸუდეშა გემნორთჷ, ზლატკაქ გურშა ქიხუტოლუ დო თის ხოლო ქუწუ, ნამდა მანგარო უჸორდჷ. ზლატკაქ მიწუ: „ასე გურქ უმოსო ემექექ. თე წანეფიშ დინახალე ჩქიმ გრძნობეფს გურს ინიფხვილანდჷ; მარა ასე, იეჰოვაშ მოხვარათ, ჩქიმ ოჯახიშ წევრეფწკუმა შემლებ თავისფალო გიმოფხანტე ჸოროფა“».

 ონგლი იჩიებ: «ართ მარაშ უკულ ზლატკაშ ქომონჯიქ ქეშეფხვად დო მიწუ: „ბრელ მირაგად, ზლატკას ბიბლიაშ გურაფაშ უფლება ვემეჩავა, მარა არგამათ იძირე, ზლატკა ბიბლიას გურაფლენსინ თის, მთელ ოჯახშო ჯგირობუა მოუღ. ასე უმოს გემუან დო ბედნერ ოჯახ მიღნა“».