იეჰოვაშ მოწმეეფ ვაღნიშნენა დაბადებაშ დღას, მუშენდა თენა ღორონთშო მიუღებელ რე. მართალ რე, ბიბლია პირდაპირ ვეჩიებ, ნამდა ოკო ვაბღნიშნათ დაბადებაშ დღა, მარა თინა მოხვარნა, ქიმსჯელათ თეწკუმა დაკავშირებულ საკითხეფშე დო ქიგებგათ ღორონთიშ თვალსაზრის. გუვარჩუათ ოთხ მხარე დო თიწკუმა დაკავშირებულ ბიბლიურ პრინციპეფ.

1.   დაბადებაშ დღაშ აღნიშნება წარმართულ წეს-ჩვეულებეფშე მოურს. ართ წიგნის ენწყუმილ რე, ნამდა დაბადებაშ დღაშ აღნიშნება გერსხილ რე რწმენაშა, ნამდა თე დღას „უბადო შურეფს დო ძალეფს საშვალება უღნა, ზიან მიორინუან იუბილარს“, მარა „თე დროს მეგობრეფიშ იუბილარწკუმა რინა დო ჯგირ სურვილეფიშ რაგად, დოთხილანს იუბილარს“ (Funk & Wagnalls Standard Dictionary of Folklore, Mythology, and Legen). ხოლო ართ წიგნის ჭარჷ, ნამდა ჯვეშო დაბადებაშ დღაშ მიკოწონება „აუცილებერ რდუ ჰოროსკოპიშ შეიოდგინებელო“, მუდგას კავშირ უღუდ „ასტროლოგიაწკუმა, მუთ მისტიკურ მეცნიერება რე“. თეს გეძინელ, თე წიგნის ჭარჷ: „ხალხის ჯერდჷ, ნამდა დაბადებაშ დღაშ სანთელეფს განსაკუთრებულ მაგიურ ძალა უღუდ სურვილეფიშ შეიოსრულებერო“ (The Lore of Birthdays).

   მარა ბიბლია განსაჯენს მაგიას, მაკითხეობას,  სპირიტიზმის დო „თეცალ საქმეეფს“ (კანონი 18:14; გალატელები 5:19—21). ართ-ართ მიზეზ მუდგაშ გურშენ იეჰოვაქ დასაჯ ჯვეშ ქალაქ ბაბილონ, თინა რდუ, ნამდა თექიან მახორუეფ ასტროლოგიას გიმირინუანდეს, მუთ მაკითხეობაშ ართ-ართ ფორმა რე (ესაია 47:11—15). მართალ რე, იეჰოვაშ მოწმეეფ არძა წეს-ჩვეულებაშ დაჭყაფუს ვეგთიძიენა, მარა, მუჟამსით ბიბლიას მოჩამილ რე თეცალ პირდაპირ მითითებეფ, ჩქი დიდ ყურადღებას ვაქციენთ თინეფს.

2.   პირველ საუკუნეშ ქრისტიანეფ ვაღნიშნენდეს დაბადებაშ დღალეფს. ენციკლოპედია „უორლდ ბუკის“ ჭარჷ, ნამდა „თინეფს დაბადებაშ დღაშ აღნიშნება წარმართულ წეს-ჩვეულებათ მიორჩქუდეს“. ბიბლიაშე იძირე, ნამდა მოციქულეფქ დო შხვეფქ, ნამდგას პირადო იესო ოგურუანდჷ, მაგალით დომტეს, ნამდგას არძა ქრისტიანქ ოკო მიაჸუნას (2 თესალონიკელები 3:6).

3.   ხვალე ართ დღა, ნამდგაშ აღნიშნება ქრისტიანეფს ოვალნა, იესოშ ღურაშ დღა რე (ლუკა 22:17—20). თენა გასაკვირ ვა რე, მუშენდა ბიბლიას ჭარჷ, ნამდა „ღურაშ დღა [უჯგჷ] დაბადებაშ დღას“ (ეკლესიასტე 7:1). დედამიწას ცხოვრებაშ ბოლოს, იესოქ ჯგირ სახელ დემსახურ ღორონთიშ თოლს დო ათეშენ, მუშ ღურაშ დღაქ უმოს მნიშვნელოვანო გინირთჷ ვინემ დაბადებაშ დღაქ (ებრაელები 1:4).

4.   ბიბლიას სოთინ ვა რე მოშინაფილ, ნამდა ღორონთიშ მსახურეფ აღნიშნენდეს დაბადებაშ დღას. თეშ მიზეზ თინა ვა რე, ნამდა ბიბლიაშ მაჭარალეფს გეგშასქიდეს თეშ ჭარუაქ. თეს თიშენ იფჩიებუთ, ნამდა ბიბლიას ინოჭარილ რე დაბადებაშ დღაშ აღნიშნებაშ ჟირ შემთხვევა, ნამუთ თინეფქ აღნიშნეს, მით ვა რდეს ღორონთიშ მსახურეფ. ხვალე თენა ვარინ, ჟირხოლო შემთხვევა უარყოფითო რე მოშინაფილ (დაბადება 40:20—22; მარკოზი 6:21—29).

 მუჭოთ არძა ჯგირ მშობელ, იეჰოვაშ მოწმე მშობლეფ ხოლო მუნეფიშ ბაღანეფიშ ჸოროფას ხვალე ართ დღას ვარინ მთელ წანას გიმოხანტნა. მაგალთო, მუნეფიშ სქუალეფს საჩუქრეფს არზენა დო მხიარულ შაყარუეფს უნწყუნა. თინეფ ოცადნა, მიაჸუნან ღორონთიშ სრულყოფილ მაგალითის, მით ირიათო ირფელ ჯგირს არზენს მუშ სქუალეფს (მათე 7:11). მუჭოთ თუდო მოჩამილ კომენტარეფშე იძირე, იეჰოვაშ მოწმეეფიშ ბაღანეფ ვა ფიქრენა, ნამდა მუდგარენს მორკებულ რენა.

•   „საჩუქარიშ მეღება უმოს სახიოლო თიმწკუმა რე, მუჟამსით თის ვა ველუქ“ (12 წანერ ტამი).

•   „მართალ რე, დაბადებაშ დღას საჩუქრეფს ვა მარზენა, მარა ჩქიმ მშობლეფ შხვა დროს ირიათო მიკეთენა საჩუქარს. თენა უმოსო მოხიოლ, მუშენდა თეცალ საჩუქარ ჩქიმო სურპრიზ რე“ (11 წანერ გრეგორი).

•   „ფიქრენთო, ნამდა ვით წუთიან მხიარულობა, ნამცხვარიშ ჭკუმუა დო ართ ობირეშიშ ბირა გართობა რე? ჩქიმ ჸუდეშა ქუმორთით დო ქოძირუნთ მუნერ რე ნამდვილ გართობა!“ (6 წანერ ერიკი).