არასწორ: იეჰოვაშ მოწმეეფს ვა ჯერა, ნამდა წამალეფს ვარდა ექიმეფს შეულებ მოხვარა.

 სწორ: ჩქი ბგორუნთ არძაშ უჯგუშ მკურნალობაშ მეთოდის ჩქინო დო ჩქინ ოჯახშო. მუჟამსით ჯამრთელობაშ პრობლემეფ მიღნა, ჩქი მევურთ გამოცდილ ექიმშა დო ქირურგშა, ნამუთ ვეგმირინუანს ზისხირს. ჩქი ვაფასენთ თი წარმატებას, ნამდგას მიოჭირინუ მედიცინაქ. ფაქტ რე, ნამდა ზისხირიშ უმშო მკურნალობაშ მეთოდეფ გავითარეს იეჰოვაშ მოწმე პაციენტეფშო, ნამდგას ასე შხვეფ ხოლო გიმირინუანა. ბრელ ქიანას ნებისმიერ პაციენტის შეულებ ვეგნიბას ზისხირ, ნამდა დუდ ეუჩილითუას თიცალ რისკეფს, მუნერით რე ზისხირით გინმადვალუნ ფერ ლახალა, იმუნურ სისტემაშ გილალუაფა დო კოჩიშ დაშვებულ შეცდომეფ.

 არასწორ: იეჰოვაშ მოწმეეფს წანა, ნამდა რწმენას შეულებ ლახალაშე კოჩიშ სქილადა.

 სწორ: ჩქი ვეგმიბრინუანთ რწმენას ხალხიშ ოსქილიდაფარო.

 არასწორ: ზისხირიშ უმშო მკურნალობა მანგარ ძვირ რე.

 სწორ: მკურნალობა ზისხირიშ უმშო უმოს ეფ რე. a

 არასწორ: ირ წანას ბრელ იეჰოვაშ მოწმე, თინეფ შქას ბაღანეფ ღურნა თიშ გურშენ, ნამდა ზისხირს ვეგნიბუნა.

 სწორ: თე განცხადება ვა რე მართალ. ქირურგეფ რეგულარულო აკეთენა ზისხირიშ გინობუნაშ უმშო თიცალ რთულ ოპერაციეფს, მუნერით რე გურიშ ოპერაცია, ორთოპედიულ ოპერაცია დო ორგანოეფიშ გადანერგვა. b პაციენტეფ, თინეფ შქას ბაღანეფ, მით ვეგნიბუნა ზისხირს, უმოს მალას გიშეჯგირებნა ვინემ თინეფ, მით ზისხირს გინმიბუნა. c ფაქტ რე, მითინს ვარაგადე, ნამდა პაციენტიქ ზისხირ ვეგნიბ-და, დოღურუ ვარდა გეგნიბ-და, გინასქიდუ.

 თეშ მიზეზ რე რელიგია დო ვართ ხოლო მედიცინა. ჟირხოლო, ჯვეშ დო ახალ აღთქმა არგამა მითითებას მარზენა, ნამდა დუდ აურიდუათ ზისხირს (დაბადება 9:4; ლევიანები 17:10; კანონი 12:23; საქმეები 15:28, 29). ღორონთიშ თოლს ზისხირით წარმოდგენილ რე სიცოცხლე (ლევიანები 17:14). თაშ ნამდა, ჩქი დუც ვურიდანთ ზისხირიშ გიმორნაფას, თიშენ ნამდა დიდ პატის ფცენთ თის, მიდგაქ სიცოცხლე მუჩეს დო ვართ ხოლო ხვალე თიშენ, ნამდა ვომორჩილუთ ღორონთის.

 ადრე მედიცინაშ მუშაკეფს ზისხირიშ გინობუნაშე ვარიაშ რაგად დუდიშ ჸვილუაცალო მიორჩქუდეს, მარა ბოლო წანეფს თინეფიშ თვალსაზრისიქ დითირ. მაგალთო, 2004 წანას ართ-ართ სამედიცინო ჟურნალს იჭარ სტატიაქ, სოდეთ რაგადებულ რდუ: „მკურნალობაშ ბრელ მეთოდიქ, ნამუთ იეჰოვაშ მოწმე პატიენტეფშო გევითარ, თე ბოლო წანეფს დემკვიდრჷ მედიცინას“. d 2010 წანას გიშაშკუმალირ ართ-ართ ჟურნალს ჭარუდ: „ზისხირიშ უმშო ოპერაციეფქ ხვალე იეჰოვაშ მოწმე პაციენტეფშა ვარინ, შხვა პაციენტეფშა ხოლო ოკო იკეთინას“ (Heart, Lung and Circulation).

 ამდღარ დროს მთელ მსოფლიოს ანთასობით ექიმ გიმირინუანს ზისხირიშ დაზოგებაშ მეთოდეფს, მუჟამსით აკეთენს რთულ ქირურგიულ ოპერაციეფს ზისხირიშ გინობუნაშ უმშო. ზისხირიშ გინობუნაშ თეცალ ალტერნატიულ მეთოდეფს გავითარებად ქიანეფს ხოლო გიმირინუანა; თეს გეძინელ, თეცალ მეთოდეფს ითხინა პაციენტეფ, მით ვა რე იეჰოვაშ მოწმე.