ქო, იეჰოვაშ მოწმეეფ ოხვარნა სტიქიურ უბედრობეფიშ დროს დაზარალებურეფს. ჩქი ვოხვარუთ, მუჭოთ იეჰოვაშ მოწმეეფს თეშ თინეფს ხოლო, მით ვა რენა იეჰოვაშ მოწმეეფ, თე დროს იფთვალისწინენთ ბიბლიურ მითითებას: „სოიშახ დრო ხეს მინწყუნა, არძას ჯგირობუა ვუკეთათ, განსაკუთრებულო თინეფს, მით რწმენათ ჩქინიან რე“ (გალატელები 6:10). თეწკუმა ართო, ჩქი ემოციურო დო სულიერო ვოხვარუთ დაზარალებურეფს, მუთ თე დროს მანგარო ოსაჭირნა (2 კორინთელები 1:3, 4).

 მოხვალამირ უბედრობაშ უკულ, კრებაშ უხუცესეფ ოცადნა, დეკავშირან თი ტერიტორიას რენ ფერ კრებეფს, ნამდა ქიგეგან, მუ სიტუაცია უღნა დო მუშ მოხვარა ოსაჭირნა. უკულ უხუცესეფ ადგილობრივ ფილიალს უჯღონანა ანგარიშის, მუ მდგომარეობა რე დო მუნერო მეხვარეს დაზარალებურეფს.

 დაზარალებურეფიშ მოხვარა ადგილობრივ კრებეფს ვეშულებნა-და, თე დროს იეჰოვაშ მოწმეეფიშ ხემძღვანელ საბჭო ორგანიზებას გუკეთენს თის, ნამდა, თინეფქ მიღან საჭირო მოხვარა. ზუსტას თაშ ოხვარდეს ართიანს პირველ საუკუნეშ ქრისტიანეფ შქირენაშ დროს (1 კორინთელები 16:1—4). ადგილობრივ ფილიალ დანიშნენს ჯიმალეფს დაზარალებურეფიშ მოხვარაშ კომიტეტის, ნამდა ქუხემძღვანელან თე საქმეს. თეს გეძინელ, შხვადოშხვა ტერიტორიაშე მოულირ იეჰოვაშ მოწმე მოხალისეეფ მუნეფიშ დროს დო ფინანსეფს ვა ზოგენა, ნამდა ქიმეხვარან დაზარალებურეფს (იგავები 17:17).

 შესაწირავეფს, ნამუთ კეთებულ რე იეჰოვაშ მოწმეეფიშ ფილიალს, გიმირინუაფ სტიქიურ უბედრობეფიშ დროს დაზარალებურეფიშ მახვარებელო (საქმეები 11:27—30; 2 კორინთელები 8:13—15). მოხალისეეფ უფასოთ ასრულენა საქმეს, ათეშენ შაყარელ ფარა გიმირინუაფ დაზარალებურეფშო დო ვართ ხოლო თინეფშო, მით მონაწილებას ღებულენს თე საქმეს. შესაწირავეფ გონივრულო გიმირინუაფ (2 კორინთელები 8:20).