•  სოვრეშე უჩქუნა იეჰოვაშ მოწმეეფს, ნამ დღესასწაულ რე მისაღებ ღორონთშო დო ნამ — ვარ?

•  ქოუჸორანო იეჰოვაშ მოწმეეფს ოჯახიშ წევრეფ, თიშ უმკუჯინუო, ნამდა თინეფწკუმა ართო ვა ზეიმენა ნამთინე დღესასწაულს?

•  ელუჩანანო იეჰოვაშ მოწმეეფ შხვეფს, ნამდა ვეზეიმან ნამთინე დღესასწაულ?

 იეჰოვაშ მოწმეეფ ბიბლიას ირინუანა ხემძღვანელობაშო დო თიშ გაგებელო, ნამ დღესასწაულ აღნიშნან დო ნამ — ვარ. თინეფ ვა ზეიმენა თიცალ დღესასწაულს, ნამუთ პირდაპირ ოწინააღმდეგ ბიბლიურ პრინციპეფს. შხვა შემთხვევეფს თითოულ იეჰოვაშ მოწმე პირადო გინოჭყვიდუნს, მიღას დო ვარ მონაწილება დღესასწაულს თეშ, ნამდა ვადინუას სუფთა სინდის „ღორონთ დო ხალხიშ წოხოლე“ (საქმეები 24:16).

 თუდო მოჩამილ რე მუსხირენ კითხვა. თე კითხვეფშე დაფიქრება ოხვარ იეჰოვაშ მოწმეეფს, გინოჭყვიდან, მიღენა დო ვარ მონაწილებას ნამთინე დღესასწაულს. a

•   არაბიბლიურ გურაფეფშა რენო გერსხილ თე დღესასწაულ?

   ბიბლიურ პრინციპ: „გეგშართით თინეფშე დო ვა რდათ თინეფწკუმა, — იჩიებ იეჰოვა, — უწმინდურს ვემკანჭათ“ (2 კორინთელები 6:15—17).

   სულიერო უწმინდურ გურაფეფს ვემკანჭანინ, იეჰოვაშ მოწმეეფ ვა ზეიმენა თიცალ დღესასწაულეფს, მუნერით რე:

   დღესასწაულეფ, ნამუთ დაკავშირებულ რე ტყურა ღორონთეფიშ თაყვანიშცემაწკუმა. იესოქ თქუ: „იეჰოვას, სქან ღორონთის ქოცჷ თაყვან დო ხვალე თის შეუსრულ წმინდა მსახურება“ (მათე 4:10). იეჰოვაშ მოწმეეფ მეჸუნა თე მითითებეფს დო ვა ზეიმენა თიცალ დღესასწაულეფს, მუნერით რე: ქირსე, თანაფა დო პირველ მესიშ დღესასწაულ, მუშენდა თე დღესასწაულეფ იეჰოვაშ თაყვანიშცემაწკუმა ვარინ, ტყურა ღორონთეფიშ თაყვანიშცემაწკუმა რე დაკავშირებულ. თეს გეძინელ, თინეფ მონაწილებას ვა ღებულენა თუდო მოჩამილ დღესასწაულეფს:

  •  კვანზაა. სახელ „კვანზაა“ «მოურს სუაჰილურ სიტყვეფშე „მატუნდა ია კვანზა“, ნამუთ ნიშნენს „პირველ ნაყოფის“. თე დღესასწაულ გერსხილ რე პირველ მოსავალიშ დღესასწაულშა, ნამდგაშ გურშენ ჩიება მეურს აფრიკულ ისტორიულ ნაჭარეფს» (Encyclopedia of Black Studies). მართალ რე, ნამთინეს „კვანზაა“ არარელიგიურ დღესასწაულო მიორჩქ, მარა „აფრიკულ რელიგიაშ ენციკლოპედია“ თე დღესასწაულს აკავშირენს დღესასწაულწკუმა, მუჟამსით პირველ ენაჭოფა მოსავალს სიმარდულიშ გიმახანტალო წირენდეს ღორონთეფს დო მუნეფიშ ჯვეშეფს. თეს გეძინელ, თექ ჭარჷ: «აფრო-ამერიკულ დღესასწაულიშ, „კვანზააშ“, დროს ხალხ მუნეფიშ ჯვეშეფიშ მარდულობას გიმოხანტუნს თინეფშე მოჩამილ სიცოცხლეშ ძღვინიშ გურშენ».

  •  შქა დამორჩილიშ დღესასწაულ. „თე დღესასწაულით პატის ცენა თუთაშ ქალღმერთის“ (Holidays, Festivals, and Celebrations of the World Dictionary).

  •  ნავრუზ (ნოვრუზ). „თე ჯვეშ დღესასწაულ ზოროასტრიზმშე მოურს დო ჯვეშ ზოროასტრულ კალენდარს წმინდა დღალეფ შქას რე მოშინაფილ ... [რაპითვინიშ] სახელით მოშინაფილ ნაონდღერიშ შურ, ნამდგაშე ფიქრენა, ითამ გოჸინილ თუთეფიშ დროს ზოთონჯიშ შურქ ენიჸუნ დიხაშა, ზოროასრულ ტრადიციათ, ნავრუზიშ დღესასწაულს ნაონღერშო ირთუ უკახალე“ (United Nations Educational, Scientific and Cultural Organization).

  •  ახალ წანა. თე დღესასწაულიშ გურშენ ენციკლოპედია „უორლდ ბუკის“ ჭარჷ: „რომაელ მართველქ, იულიუს კეისარქ, ჯვ. წ. 46 წანას დაწეს, ნამდა ახალ წანაქ 1 იანარშე დიჭყკო. თე დღას რომაელეფ იანუსის — კარმინოლეფიშ, მინაულარ-გიმაულარეფიშ დო ირფელიშ გუმარჩქინე ღორონთის — უძღვინენდეს. იანუსიშ საპატიცემლოთ წანაშ პირველ თუთას იანარ ქიგიოდვეს. იანუსის ჟირ სახე უღუდ, ართ წოხოლე იჯინედ, მაჟია — უკახალე“.

  •  მარდულობაშ დღა. თე დღესასწაულ მოურს მოსავალიშ ეჭოფუაშ ჯვეშ დღესასწაულეფშე, ნამუთ განადიდენდჷ შხვადოშხვა ღორონთის. დროშ მიკულაშ უკულ „თე ჯვეშ ხალხურ ტრადიციეფქ ქრისტიანულ ეკლესიას დემკვიდრჷ“ (A Great and Godly Adventure​—The Pilgrims and the Myth of the First Thanksgiving).

   დღესასწაულეფ, ნამუთ ცრურწმენაშე დო ბედ-იღბალიშ გურშენ გურაფაშე მოურს. ბიბლიას ჭარჷ: „თქვა ოჭიშ ქურთინეთ იეჰოვას ... იღბალიშ ღორონთის უფაჩუნთ სუფრას“ (ესაია 65:11) ათეშ გურშენ, იეჰოვაშ მოწმეეფ ვა ზეიმენა თუდო მოჩამილ დღესასწაულეფს: ბედობა (ბედობაშ დღა). „ახალ წანაშ მაჟია დღა — 2 იანარ (ხალხ ფიქრენს, ნამდა მუჭოთ თე დღას აკუჩხუ ადამიანს, მთელ წანას თეშ იცხოვრენს)“ (ქორთულ ნინაშ განმარტებით ლექსიკონ, ახალ რედაქცია, ტ. 1; გვ. 989).

  •  ივან კუპალა. „გავრცელებურ აზრით, თე დღესასწაულიშ [ივან კუპალაშ] პერიოდის ბუნება ათავისფალენს მაგიურ ძალეფს დო თე ძალაშ ნაწილს ღებულენა გაბედულ დო ბედ უღუნ ფერ ადამიანეფ“ — ჭარჷ ართ წიგნის (The A to Z of Belarus). სინამდვილეს, თენა რდჷ წარმართულ დღესასწაულ, მუჟამსით ზეიმენდეს ზაფხულიშ ბჟაბუდობას. მარა, მუჭოთ „თანამედროვე რუსულ კულტურაშ ენციკლოპედიას“ რე მოშინაფილ, „თიშ უკულ, მუთ წარმართეფქ ქრისტიანობა მიღეს, თე დღესასწაულქ ეკლესიურ დღესასწაულიშ ნაწილო გინირთჷ [იოანე ნათლისმცემელშა მეძღვინელ „წმინდანიშ დღაშ“]“.

  •  თუთაშ ახალ წანა (ჩინურ ახალ წანა ვარდა კორეულ ახალ წანა). „ოჯახიშ წევრეფიშ, მეგობრეფიშ დო ნათესეეფიშ მთავარ ოფიქრებელ რე, ნამდა თე წანას ჯგირ იღბალქ ქუკუჩხუან, განადიდან ღორონთეფ დო შურეფ დო ართიანს წიმი ულა დო ბედნერობა უზალან (Mooncakes and Hungry Ghosts—Festivals of China). თეშნერო, კორეულ ახალ წანას ხოლო თაყვანს ცენა მუნეფიშ ჯვეშეფს, უბადო შურეფიშ ჩათხინაფალო ატარენა რიტულეფს, ნამდა მომავალ წანას ჯგირ იღბალქ ქაშუან; თეს გეძინელ, მარჩიელენა, ნამდა ქიგეგან, მუს მიღანს მომავალ წანა“ (Encyclopedia of New Year’s Holidays Worldwide).

   დღესასწაულეფ, ნამუთ დაკავშირებულ რე შურიშ უკვდავებაშ გურაფაწკუმა. ბიბლია არგამათ იჩიებ, ნამდა შურ ღურუ (ეზეკიელი 18:4). თაშ ნამდა, იეჰოვაშ მოწმეეფ ვა ზეიმენა თიცალ დღესასწაულეფს, ნამდგას შურიშ უკვდავებაშ აზრ ინოძ. მაგალთო:

  •  ღურელეფიშ მოშინაფაშ დღალეფ. „ღურელეფიშ მოშინაფაშ დღაწკუმა დაკავშირებულ ნამთინე წარმოდგენა წარმართობაშე, მანგარ ჯვეშ დროშე, მოურს. ბრელ კათოლიკურ ქიანას ხალხის ჯერს, ნამდა თე დღესასწაულიშ სერს ღურელეფ მუნეფიშ ჸუდეეფს ართუნა დო ცოცხალეფწკუმა ართო ჭკუმნა ოჭკუმალს“ („ენციკლოპედია „ბრიტანიკა“ ტ. 1, გვ. 709). საკურთხუა. „საკურთხ რე ღურელიშ სახელშო მომზადებულ სტოლ, ნამდგას მღვდელ აკურთხენს. თე დროს ღურელეფიშ შურიშ ოჩხონაფალო კითხულენა ლოცვეფს, ეიორზანა სანთელს, გიოჸოთანა საკმელს, გაჩხაპუანა აიაზმას [ნაკურთხ წყარს]“ (ჟურნალ „კარიბჭე“, № 2, 2004 წ.).

  •  ჩინგ-მინგიშ დღესასწაულ დო შქირენულ შურეფიშ დღესასწაულ. თე ჟირ დღესასწაულს ჯვეშეფიშ პატიშოცემებელო ზეიმენა. ართ-ართ წყარო იჩიებ, ნამდა ჩინგ-მინგიშ დღესასწაულიშ დროს „ოჭკუმალს, ოშუმალს დო ქარღადიშ ფარას დაჩხირშა უტენა, ნამდა ღურელეფქ ვა დოსქიდან შქირენულ დო ჸუმენულქ დო ვართ ფარაქ დაკორდან“. კინ თე წიგნის ბკითხულენთ: „[მონაწილეეფს ჯერა], ნამდა შქირენულ შურეფიშ დღესასწაულს, ნამდგას უმენტაშო გოფშა თუთაშ სერს ზეიმენა, განსაკუთრებულ ურთიერთობა რჩქინდუ ღურელეფ დო ცოცხალეფ შქას, ვინემ შხვა სერეფს; ათეშენ, მანგარ მნიშვნელოვან რე, ირფელქ გეკეთინას წინასწარ შურეფიშ დამშვიდებელო დო ჯვეშეფიშ პატიშოცემებელო“ (Celebrating Life Customs Around the World​—From Baby Showers to Funerals).

  •  ჩუსოკ. „თე კორეულ დღესასწაულიშ დროს ღურელეფშო გიმანწყუნა ოჭკუმალს დო ღვინს“. საკურთხიშ გიმონწყუალა გერსხილ რე „რწმენაშა, ნამდა ღურაშ უკულ ადამიანიშ შურ აგრძელენს არსებობას“ (The Korean Tradition of Religion, Society, and Ethics).

   დღესასწაულეფ, ნამუთ დაკავშირებულ რე ოკულტიზმწკუმა. ბიბლიას ჭარჷ: „ვა რდას თქვან შქას თიცალ, მით მუშ ქომოლსქუას ვარდა ოსურსქუას დაჩხირს მიშაჸათანს შესაწირო, ვართ მარჩიელ, ვართ ჯადოქარ, ვართ მისან, ვართ გრძნეულ, ვართ ჯადოშ მაკეთებელ, ვართ თინა, მით რჩევას ელაკითხანს შურეფიშ გიმმაძახებელს ვარდა მაკითხეს, დო ვართ თინა, მით ღურელეფს გიმოკითხენს. თეშ მაკეთებელ ჯოგჷ იეჰოვას“ (კანონი 18:10—12). ოკულტიზმწკუმა, თინეფ შქას, ასტროლოგიაწკუმა (მაკითხეობაშ ართ-ართ ფორმა), მუთუნნერ კავშირ ვა უღდანინ თიშენ, იეჰოვაშ მოწმეეფ ვა ზეიმენა თიცალ დღესასწაულეფს, მუნერით რე: ჰელოუინ. „ენციკლოპედია ამერიკანას“ ბკითხულენთ: „ჰელოუინწკუმა დაკავშირებულ წეს-ჩვეულებეფ დრუიდეფიშ [ჯვეშ კელტეფიშ ქურუმეფ], ქრისტიანობაშახიან, რიტუალეფშე მოურს. კელტეფ ჟირ მთავარ ღორონთიშ — ჩხანაშ ღორონთიშ დო ღურელეფიშ ღორონთიშ — პატიშოცემებელო დღესასწაულეფს ონწყუნდეს. ღურელეფიშ ღორონთიშ დღესასწაულს ზეიმენდეს 1 ნოემბერს, მუჟამსით კელტეფშო ახალ წანა იჭყაფუდ. თე დღესასწაულწკუმა დაკავშირებულ რიტუალეფქ ჭიე-ჭიეთ ქრისტიანობაშა გემშართჷ“ (1977, ტ. XIII, გვ. 725).

  •  ჭიაკოკონობა. „თე დღესასწაულს ქრისტიანობაწკუმა მუთუნ კავშირ ვა უღჷ. საქორთუოშ ნამთინე კუნთხუს გავრცელებურ რწმენა, ითამ ჭიაკოკონობაშ სერს თი ადგილეფ, სოდეთ დაჩხირ რე გერზამილ მაზაკვალეფშე იწიმინდუ, გინოთირელ, ქრისტიანულ ელემენტეფით ეფშა გვიანო მუშულირ [ტრადიცია] რე. თე ტრადიციაშ ჩხვიჩხვეფ უმოს შორს მეურს დო წარმართულ პერიოდის ანჭუ“ (ჟურნალ „კარიბჭე“, აპრილი, 2004 წ.).

  •  სინჰალა დო ტამილურ ახალ წანა. „თე დღესასწაულს ისრულებ ტრადიციულ რიტუალეფ ... თეს გეძინელ, ისრულებ ასტროლოგიურ რიტუალეფ, ნამდა ქიგეგან, მუჟამ იჸუაფ იღბალიშ მუმაღალარ მუდგარენ საქმეშ კეთება“ (შრი-ლანკაშ ენციკლოპედია).

  •  სონგკრან. თე აზიურ დღესასწაულიშ სახელ «მოურს სანსკრიტულ სიტყვაშე ... ნამუთ ნიშნენს „ადგილიშ გინოთირუას“, „თირუას“. თე დღესასწაულით ზეიმენა ჩხანაშ მოძრაობას ვერძიშ ზოდიაქოშ თანავარსკვლავედიშ მხარეშა» (Food, Feasts, and Faith—An Encyclopedia of Food Culture in World Religions).

   დღესასწაულეფ, ნამდგაშ დაცვება მოსეშ კანონით მითხუებუდ დო იესოშ მსხვერპლით გეუქმჷ. ბიბლიას ჭარჷ: „კანონიშ ბოლო ქრისტე რე“ (რომაელები 10:4). ამდღარ ქრისტიანეფშო ხოლო მოუღ ჯგირობუა თი პრინციპეფიშ დაცვებას, ნამუთ ისრაელეფშა მეჩამილ მოსეშ კანონს ენოჭარუდ. მარა თინეფ ვა ზეიმენა კანონს ენოჭარილ თიცალ დღესასწაულეფს, ნამდგაშე ნამთინე ხალხის გაშინანდჷ მესიაშ მოულას, მუშენდა ქრისტიანეფს წანა, ნამდა მესიაქ უკვე ქუმორთჷ. ბიბლიას ბკითხულენთ: „თე ირფელ მომავალიშ ლანდ რე დო სინამდვილე — ქრისტეშ“ (კოლოსელები 2:17). ჟიშე მოჩამილიშ დო, თეწკუმა ართო, თი მიზეზიშ გურშენ, ნამდა ნამთინე დღესასწაულშა მიშაღალირქ იჸუ არაბიბლიურ წეს-ჩვეულებეფქ, იეჰოვაშ მოწმეეფ ვა ზეიმენა თუდო გიმოკოროცხილ დღესასწაულეფს:

  •  ხანუკა. თე დღესასწაულს იერუსალიმს იუდეველეფიშ ტაძარიშ მეძღვინუაშ აღნიშნებელო ზეიმენდეს. მარა ბიბლია იჩიებ, ნამდა იესოქ გინირთჷ მღვდელმთავარო „უმოს დიდ დო უმოს სრულყოფილ კარავით [ტაძარით], ნამუთ ხეშნაკეთებ ვა რე, შხვა სიტყვეფით ქოფთქუათინ, შხვანერო რე გოჭყაფილ“ (ებრაელები 9:11). ქრისტიანეფშო თე სულიერ ტაძარქ იერუსალიმიშ ფიზიკურ ტაძარ დოთირუ.

  •  როშ-ჰაშანა. ებრაულ კალენდარით თენა რე წანაშ პირველ დღა. ჯვეშ დროს თე დღესასწაულს ღორონთშა განსაკუთრებულ მსხვერპლ მეუღდეს (რიცხვები 29:1—6). თეშ უმკუჯინუო, იესო ქრისტექ, მუჭოთ მესიაქ, „[მიოტუ] მსხვერპლ დო საძღვინო შესაწირიშ შეწირუა“ დო თე დღესასწაულს შენაწირ მსხვერპლიქ ხოლო ღორონთიშ თოლს ძალა მიოდინუ (დანიელი 9:26, 27).

•   მიშუწყორუანსო თე დღესასწაულ ართიანს შხვადოშხვა რელიგიას?

   ბიბლიურ პრინციპ: „მუ საქმე უღჷ მორწმუნეს ურწმუნოწკუმა? მუ კავშირ უღჷ ღორონთიშ ტაძარს კერპეფწკუმა?“ (2 კორინთელები 6:15—17).

   იეჰოვაშ მოწმეეფ ოცადნა, არძაწკუმა მშვიდობიანო რდან დო პატის ცენა ადამიანიშ უფლებას, ირწმუნას თინა, მუთ ოკო. მარა ვა ზეიმენა თიცალ დღესასწაულეფს, ნამუთ ხეს უნწყუნს რელიგიეფიშ აკოწყორუას თუდო მოჩამილ საკითხეფს:

   დღესასწაულეფ, ნამუთ მეძღვინელ რე ნამთინე რელიგიურ ლიდერშა ვარდა მოვლენაშა დო ხეს უნწყუნს შხვადოშხვა რწმენაშ ადამიანეფიშ გაერთიანებას. მუჟამსით იეჰოვა ებრაელეფს აწოჸუნდჷ დუნაპირებ დიხაჸურე, სოდეთ შხვა რელიგიაშ ხალხ ცხოვრენდჷ, გაფრთხილ: „ვა დოდვა შეთანხმება ვართ თინეფწკუმა დო ვართ თინეფიშ ღორონთეფწკუმა ... თინეფიშ ღორონთეფს ქემსახურებუქ-და, მახეთ გინგართუ თენა“ (გამოსვლა 23:32, 33). ათეშ გურშენ, იეჰოვაშ მოწმეეფ ვა ღებულენა მონაწილებას თიცალ დღესასწაულეფს, მუნერით რე:

  •  ლოი კრატონგ. თე ტაილანდურ დღესასწაულს «მცენარეეფიშ ფურცელეფშე აკეთენა ჭიჭე ჯამეფს, სოდეთ გიამარგენა სანთელეფს ვარდა ჯგირ შურ უღუნ ფერ ჩხირეფს, წყარშა უტენა დო იჩიებნა: „მიდეღ გლახა ბედ ჩქინდე“. სინამდვილეს თე დღესასწაულიშ მონაწილეეფ განადიდენა ბუდაშ წმინდა ნოქურს» (ბუდიზმიშ ენციკლოპედია).

  •  ეროვნულ პატიებაშ დღა. პაპუა-ახალ გვინეაშ ართ გაზეთის, ართ-ართ სახელმწიფოშ წარმომადგენელ იჩიებ: „თე დღესასწაულიშ მონაწილეეფ ქრისტიანულ მოძღვრებაშ მთავარ გურაფეფიშ გურშენ ართ აზრშა მეულა. თე დღა ხეს უნწყუნს მთელ ქიანას ქრისტიანულ პრინციპეფიშ გამტკიცებას“ (The National).

  •  ვესაკ. „თენა რე ბუდისტეფიშ წმინდა დღა ბუდაშ დაბადებაშ, გაბრწყინებაშ, ღურაშ ვარდა თიშ აღნიშნებელო, ნამდა თიქ ნირვანას ქიმიოჭირინუ“ (Holidays, Festivals, and Celebrations of the World Dictionary).

   დღესასწაულეფ, ნამუთ გერსხილ რე არაბიბლიურ რელიგიურ რიტუალეფშა. იესოქ რელიგიურ ლიდერეფს უწუ: „თქვა თქვან ადათ-წესეფით პატი გეუჸოთით ღორონთიშ სიტყვას“. თეშ უკულ თინეფიშ თაყვანიშცემა პოტიკო მიშინუ, მუშენდა ადამიანეფიშ გიმოგონილ წესეფს ოგურუანდეს (მათე 15:6, 9). იეჰოვაშ მოწმეეფ მეჸუნა იესოშ თე გაფრთხილებას დო ვა ზეიმენა თიცალ რელიგიურ დღესასწაულეფს, ნამდგას ქვეყნიერება ზეიმენს.

  •  ეპიფანია. (სუმ მეფეშ დღა, ტიმკატ ვარდა ლოს რაეს მაგოს). თე დღესასწაულს ნამთინე ადგილს ახალდაბადებულ იესოშა ასტროლოგეფიშ მეულას აღნიშნენა დო ნამთინე ადგილს — იესოშ ნათუას. თე დღესასწაულ რე „გაზაფხულიშ წარმართულ დღესასწაულეფიშ გაქრისტიანებულ ფორმა, ნამდგაშ დროს განადიდენდეს წყარეფიშ, მალწყარეფიშ დო წყურგილეეფიშ ღორონთეფს“ (The Christmas Encyclopedia). თეცალ შინაარსიშ დღესასწაულ რე „ტიმკატ“ ხოლო, ნამუთ „მთლიანო ტრადიციეფშა რე გერსხილ“ (Encyclopedia of Society and Culture in the Ancient World).

  •  ქალწულ მარიამიშ ზეცაშა ეშულაშ დღა (მარაშნა). თე დღესასწაულს ზეიმენა იესოშ დიდაშ, მარიამიშ, ზეცაშა ხორციელო ეშულას. ნაშრომს „რელიგია დო საზოგადოება — ფუნდამენტალიზმიშ ენციკლოპედია“ ჭარჷ: „თე გურაფა უცხო რდჷ პირველ ქრისტიანეფშო დო მუთუნნერ საერთო ვა უღჷ წმინდა წერილეფწკუმა“.

  •  წმინდათ ჩასახვაშ დღესასწაულ. „[მარიამიშ] წმინდათ ჩასახვაშ გურშენ გურაფა სოთინ ვა ჭარჷ წმინდა წერილეფს ... თენა ეკლესიურ გურაფა რე“ (ახალ კათოლიკურ ენციკლოპედია).

  •  დიდმარხვა. მუჭოთ „ახალ კათოლიკურ ენციკლოპედიას“ ბკითხულენთ, მონანიებაშ დო მარხვაშ თე პერიოდიქ მუშაღალირქ იჸუ „მანთხა საუკუნეს“, ბიბლიაშ ჭარუაშ თებაშე 200 წანაშ უკულ. დიდმარხვაშ პირველ დღაშ გურშენ თე ენციკლოპედიას ჭარჷ: „ტუტაშ ჯუმაშხას მღვდელეფ მუნეფიშ მრევლის ტუტათ ჯვარს მიკახანტანა ჸვას, მუდგათ გაშინანა, ნამდა მონანიება ოსაჭირნა. თე წეს პირველო კათოლიკურ ეკლესიაშა 1091 წანას მიშეღეს“.

  •  მესკელ (მასკალ). თე ეთიოპიურ დღესასწაულს ხალხ გორუნს ჭეშმარიტ ჯვარს (ჯვარს, ნამდგას ქრისტე მიკაჭკადეს). დარზანა დაჩხირს დო გასხაპანა თის“ (Encyclopedia of Society and Culture in the Medieval World). იეჰოვაშ მოწმეეფ თაყვანიშმცემლობას ჯვარს ვერინუანა.

•   განადიდენსო თე დღესასწაულ ნამთინე ადამიანს, ორგანიზაციას ვარდა ეროვნულ სიმბოლოს?

   ბიბლიურ პრინციპ: „თეს იჩიებ იეჰოვა: „ჭყელ რდას თინა, მით კოჩშა რე დაიმენდებულ, კოჩიშ ძალას ონდჷ დო მიდგაშ გურ ეთხიებ იეჰოვას“ (იერემია 17:5).

   მართალ რე, იეჰოვაშ მოწმეეფ დიდ პატის ცენა არძას დო ლოცულენა თინეფშო, მარა მონაწილებას ვა ღებულენა დღესასწაულს, მუჟამსით:

   განადიდენს ნამთინე მართველს ვარდა საზოგადო მოღვაწეს. ბიბლიას ჭარჷ: „თქვანო იჸუაფ ჯგირ, ვემიენდათ კოჩის, ნამდგას თეიშახ უდგჷ შურ, სოიშახ სუნთქენს; მი რე თინა, ნამდა ღირდას თიშა მენდება?!“ (ესაია 2:22). ათეშენ იეჰოვაშ მოწმეეფ მონაწილებას ვა ღებულენა მართველეფიშ დაბადებაშ დღალეფშა მეძღვინელ ღონისძიებეფს.

   განადიდენს სახელმწიფო დროშას. იეჰოვაშ მოწმეეფ ვა ზეიმენა დროშაშ დღას, მუშენდა ბიბლიას ჭარჷ: „სქუალეფ, დუდ დითხილეთ კერპეფშე“ (1 იოანე 5:21). ნამთინე ამდღა დროშას კერპო ვემირჩქინანს, მარა თეშ გურშენ ისტორიკოს კარლტონ ჰეიზ იჩიებ: „დროშა რე ნაციონალიზმიშ არძაშ უმოს მთავარ სიმბოლო დო თაყვანიშცემაშ საგან“.

   განადიდენს წმინდანეფს. მუქ მოხვად, მუჟამსით ართ ღორონთიშმოშიშ კოჩიქ მოციქულ პეტრეს ქოცჷ თაყვან? ბიბლიას ბკითხულნეთ: „პეტრექ გეიოდგინუ დო უწუ: „გედირთ, მა ხოლო ადამიან ვორექ“ (საქმეები 10:25, 26). პეტრეშო დო შხვა მოციქულეფშო განსაკუთრებულ პატიცემა დო თაყვანიშცემა მიუღებელ რდჷ. იეჰოვაშ მოწმეეფ ხოლო მონაწილებას ვა ღებულენა თიცალ დღესასწაულეფს, სოდეთ განდიდებულ რენა წმინდანეფო მერჩქინელ ადამიანეფ. თეცალ დღესასწაულეფ რე:

  •  არძა წმინდაშ დღა. „დუდ ვეგიდგინე სოვრეშე მოურს დღესასწაულ, ნამდგას არძა წმინდაშ პატიშოცემებელო აღნიშნენა“ (ახალ კათოლიკურ ენციკლოპედია).

  •  წმინდა გვადალუპეშ დღესასწაულ. თე დღესასწაულიშ დროს განადიდენა „მექსიკაშ მთავარ მფარველ წმინდანს“. გვადალუპეს იესოშ დიდათ, მარიამო, მირჩქინანა. იჩიებნა, ნამდა თიქ სასწაულებრივო ეწაძირ ართ გლეხის 1531 წანას (The Greenwood Encyclopedia of Latino Literature)..

  •  სახელიშ მოშინაფაშ დღა. ართ ნაშრომს ჭარჷ: „სახელიშ მოშინაფაშ დღა რე თი წმინდანშა მეძღვინელ დღა, ნამდგაშ სახელს გიოდვანა ბაღანას ნათუაშ ვარდა მირონიშ მიკოსუმალაშ დღას. თე დღესასწაულს დიდ რელიგიურ მნიშვნელობა უღჷ“ (Celebrating Life Customs Around the World—From Baby Showers to Funerals).

   დაკავშირებულ რე პოლიტიკურ ვარდა სოციალურ ღონისძიებეფწკუმა. ბიბლია იჩიებ: „იეჰოვაწკუმა დუდიშ გითოფორაფა უჯგჷ ადამიანშა მენდებას“ (ფსალმუნი 118:8, 9). იეჰოვაშ მოწმეეფს წანა, ნამდა მსოფლიო პრობლემეფს ღორონთ გეგნოჭკირუნს; თინეფ მონაწილებას ვა ღებულენა თიცალ დღესასწაულეფს, მუნერით რე, „ახალგაზრდეფიშ საერთაშორისო დღა“ ვარდა „ოსურკათაშ დღა“, მუშენდა მითინს თიცალ აზრიქ ვა დასქიდას, ნამდა თინეფ ადამიანეფშა ვარდა ადამიანეფიშ ნამთინე ჯგუფშა რენა დაიმენდებულ. თე დღესასწაულეფ გერსხილ რე პოლიტიკურ ვარდა სოციალურ მოვლენეფშა. ათეშენ იეჰოვაშ მოწმეეფ ვა ღებულენა მონაწილებას ეროვნულ გამათავისფალებერ ვარდა თეცალ შინაარსიშ დღესასწაულეფს. თეშ გინაწონს, თინეფს წანა, ნამდა ღორონთიშ სამეფო გეგნოჭკირუნს თი პრობლემეფს, ნამუთ დაკავშირებულ რე რასიზმ დო უთანასწორობაწკუმა (რომაელები 2:11; 821).

•   გიორინუანსო თე დღესასწაულ ართ ქიანას ვარდა ეთნიკურ ჯგუფის მაჟიაშე მაღალას?

   ბიბლიურ პრინციპ: „ღორონთ ვეგმირჩქინანს გიშაკერძაფას დო არძა ხალხშე, მიდგას თიშ შიშ უღჷ დო სიმართლეს ორთჷ, მოსაწონ რე თიშო“ (საქმეები 10:34, 35).

   მართალ რე, იეჰოვაშ მოწმეეფს უჸორა მუნეფიშ ქიანა, მარა დუდის ურიდანა თიცალ დღესასწაულეფს მონაწილებაშ მეღებას, ნამუთ ნამთინე ქიანას განსაკუთრებულო განადიდენს დო შხვა ქიანეფშე მაღალ ადგილს გიორინუანს. მაგალთო:

   დღესასწაულ, ნამუთ განადიდენს სამხედრო ძალეფს. იესო ვეწონუანდჷ ომს. თიქ მუშ მიმაჸუნალეფს უწუ: „გიჸორდან თქვან ნტერეფ დო ილოცით თინეფშო, მით რთხოზნა“ (მათე 5:44). ათეშენ იეჰოვაშ მოწმეეფ ვა ზეიმენა დღესასწაულეფს, ნამუთ განადიდენს ჯარიშკოჩეფს დო მებრძოლეფს. თეცალ დღესასწაულეფ რე:

  •  ანზაკიშ დღა. «თენა რე ავსტრალიაშ დო ახალ ზელანდიაშ შეიარაღებულ ძალეფიშ დღა. დროშ მიკულაწკუმა ართო „ანზაკიშ“ დღესასწაულქ ომს ღურელეფიშ მოშინაფაშ დღათ გინირთჷ» (Historical Dictionary of Australia).

  •  ვეტერანეფიშ დღა (გოშინაშ დღა, გოშინაშ მარა, მემორიალურ დღა). „ენციკლოპედია ბრიტანიკას“ ბკითხულენთ: „თე დღესასწაულეფიშ დროს განადიდენა შეიარაღებულ ძალეფიშ ვეტერანეფს დო თინეფს, მიდგაქ ომს ღურეს“.

   ნამთინე ქიანაშ ისტორიაშა დო დამოუკიდებლობაშა მეძღვინელ დღესასწაულეფ. იესოქ მუშ მიმაჸუნალეფიშ გურშენ თქუ: „თინეფ ვა რენა ქვეყნიერებაშ ნაწილ, მუჭოთ მა ვა ვორექ ქვეყნიერებაშ ნაწილ“ (იოანე 17:16). მართალ რე, იეჰოვაშ მოწმეეფს ოინტერესნა მუნეფიშ ქიანაშ ისტორია, მარა მონაწილებას ვა ღებულენა მუნეფიშ ქიანაშ ისტორიაშა დო დამოუკიდებლობაშა მეძღვინელ დღესასწაულეფს, მუნერით რე:

  •  ავსტრალიაშ დღა. ართ-ართ ენციკლოპედია იჩიებ, თე დღესასწაულ რე „თი დღაშ აღნიშნებელო, მუჟამსით ინგლისელ ჯარიშკოჩეფქ დროშა ქიგიორინუეს დო თეთ ავსტრალია ახალ კოლონიათ გეგმაცხადეს. თექ მოხვად 1788 წანას“ (Worldmark Encyclopedia of Cultures and Daily Life).

  •  გაი ფოკსიშ დღა. თე დღესასწაულს იშინანა „გაი ფოკსიშ დო თიშ კათოლიკე ხუჯიშდუმაკინებელეფიშ უშედეგო მცდელობას, დოჸვილესკო მეფე ჯეიმზ I დო ინგლისიშ პარლამენტიშ წევრეფ 1605 წანას“ (A Dictionary of English Folklore)..

  •  დამოუკიდებლობაშ დღა. ნამთინე ქიანას „ზეიმენა ეროვნულ დღესასწაულეფს, ნამუთ დაკავშირებულ რე თარიღწკუმა, მუჟამსით თე ქიანაქ დამოუკიდებლობა მიღჷ“ (Merriam-Webster’s Unabridged Dictionary).

•   გარყვნილება დო უზნეობა ხომ ვაკათ თე დღესასწაულს?

   ბიბლიურ პრინციპ: „თინა ხოლო დასაბაღ რე, ნამდა თეიშახ ქვეყნიერებაშ ნებაშა ეჸუნდით დუდეშქუმალირობას, ვნებეფს, ლოთობას, ღრეობას, გინოჸუნელ შუმას დო საზიზღარ კერპთაყვანიშმცემლობას“ (1 პეტრე 4:3).

  მუჭოთ თე ბიბლიურ პრინციპიშე იძირე, იეჰოვაშ მოწმეეფ ვა ღებულენა მონაწილებას თიცალ დღესასწაულეფს, სოდეთ ხვადუ უზომე შუმა დო ღრეობა. იეჰოვაშ მოწმეეფ ხიოლით იშაყარნა მეგობრეფწკუმა ართო, თინეფ ალკოჰოლს ხოლო შუნა, მარა, მუშო ოკო რაგად, ზომიერო. თინეფ ირნერო ოცადნა, მიაჸუნან თე ბიბლიურ რჩევას: „ჭკუმუნთ, შუნთ დოვარ შხვა მუდგარენს ორთუთ, ირფელ ღორონთიშ ოდიდებელო აკეთით“ (1 კორინთელები 10:31).

    ათეშენ იეჰოვაშ მოწმეეფ ვეგლულა კარნავალეფშა დო შხვა თეცალ დღესასწაულეფშა, სოდეთ ხვადუ უზნეობა, ნამდგას ბიბლია ვეწონუანს. თეცალ დღესასწაულეფშა მიშურს „იუდაურ ფურიმიშ ფესტივალ“. თე დღესასწაულს ბრელ ხანიშ ისტორია უღჷ. თიშ აღნიშნება ჯვ. წ. მა-5 საუკუნეს დიჭყეს დო დაკავშირებულ რდჷ ისრაელეფიშ რსხებაწკუმა. მარა «თიქ დითირ დო ამდღა თავისფალო შილებე გივოდვათ „მარდი გრასიშ კარნავალიშ“ იუდაურ ვერსია» — ჭარჷ წიგნის „იუდაიზმიშ არსი“. თე წიგნ აგრძელენს: „თე დღესასწაულს მონაწილეეფს კოსტიუმეფ მიკაქუნა. უმენტაშო ქომოლკათა ოსურკათაშ ბარგის მიკიქუნანს. მონაწილეეფ უზომეთ შუნა დო დუდეშქუმალირო დო ხმაურიანო ატარენა დროს“.

  მუშო ოკო რაგად, ქო. ბიბლია ადამიანეფს ოგურუანს, ნამდა უჸორდან ოჯახიშ წევრეფ დო პატი ცან თინეფს, მუდგა რელიგიურ შეხედულება ვა უღდანინ (1 პეტრე 3:1, 2, 7). მუჟამსით იეჰოვაშ მოწმე ბიბლიაშ საფუძველშა გინოჭყვიდუნს, ნამდა ნამთინე დღესასწაულს მონაწილება ვემიღას, შილებე ნათესეეფს ეწყინან დო მოღალატეთ ხოლო მირჩქინან. ათეშენ იეჰოვაშ მოწმეეფ თინეფიშ ჸოროფას საქმეეფით გიმოხანტუნა, გემუანო ეუნწყუნა მუნეფიშ გადაწყვეტილებაშ მიზეზის დო შხვა დროს მეულა თინეფშა სტუმარო.

 პასუხ რე, ვარ. თინეფს მიორჩქუნა, ნამდა თითოულქ მუშით ოკო მიღას გადაწყვეტილება (იესო ნავეს ძე 24:15). იეჰოვაშ მოწმეეფ ირნერ ადამიანს ცენა პატის, მუდგანერ რელიგიურ შეხედულება ვა უღდასინ (1 პეტრე 2:17).