იეჰოვაშ მოწმეეფ მეჸუნა ბიბლიურ რჩევას, ნამდა ნირზის ვეჭყანა ტყურაშეკმაწამებელ დო გუმაძიცებელეფწკუმა. მაგალთო, წიგნ „იგავეფს“ ჭარჷ: „მით გიმაძიცალს შეცდომაშა მეუთითენს, ონჯღორეს ძირუნს“ (იგავები 9:7, 8; 26:4). თეცალ კათაწკუმა ნირზ ქიდიბჭყათინ თიშ მანგიორო, ირნერო ვოცადუთ, ღორონთიშ მოსაწონო მიფქცუათ (ფსალმუნი 119:69).

 მუჭოთ ბიბლიას ჭარჷ: „[რე] რაგადიშ დრო დო რაგადშე დუდიშ შეკებაშ დრო“ (ეკლესიასტე 3:7). ჩქი ვეჩიებუთ თიცალ კათას, მით მთელ გურით რე დაინტერესებულ ბიბლიურ ჭეშმარიტებათ დო დუდის ვურიდანთ თინეფწკუმა ნირზის, მიდგას ჩქინ წინააღმდეგ უსაფუძვლო არგუმენტეფ უღჷ. თეშნერო მოქციებათ, მეპჸუნთ იესოშ დო პირველ საუკუნეს მახორუ ქრისტიანეფიშ მაგალითის.

•   იესოს პასუხ ვემუჩამ, მუჟამსით პილატეშ წოხოლე ტყურას ეკაწამენდეს (მათე 27:11—14; 1 პეტრე 2:21—23). იესოს თიმწკუმა ხოლო ვა უთქუალ მუთუნ, მუჟამსით თის „ურძღაფ დო შუმას გინოჸუნელ კოჩ“ დუძახეს. თეშ გინაწონს, თიქ მუშ საქმეეფით ოძირუ, ნამდა თე ბიბლიურ პრინციპიშ შესაბამისო იქციებუდ: „სიბრძნეშ სიმართლეს საქმეეფ ოძირანს“ (მათე 11:19). მარა რდუ თიცალ სიტუაციეფ ხოლო, მუჟამსით გაბედულო პასუხენდჷ თინეფს, მით ტყურას ეკაწამენდჷ თის (მათე 15:1—3; მარკოზი 3:22—30).

   იესოქ მუშ მიმაჸუნალეს ოგურუ, ნამდა ტყურას ქეკაწამენდეს-და, გურ ვეგიტახესკო. თიქ თქუ: „ბედნერეფ რეთ, მუჟამსით რლანძღუნა, რთხოზუნა დო ჩქიმ გურშენ არძანერ უბადობას ეკკაწამენა“ (მათე 5:11, 12). იესოქ მუშ მიმაჸუნალეფს პირობა მეჩჷ, ნამდა მეხვარებუდ, მუჟამსით ტყურაშეკმაწამებელეფწკუმა ქადაგებაშ საშვალება ქიმიაჩამდეს. თიქ მუშ მოციქულეფს უწუ: „მა მერჩანთ სიბრძნეს, ნამდგაშა თქვან მოწინააღმდეგეეფს ართო აკოშაყარელო ხოლო ვა მარიებენა დო ვართ შეიალებენა, გენირზან“ (ლუკა 21:12—15).

•   მოციქულ პავლექ ელუჩ თანაქრისტიანეფს, დუდ ეუჩილითესკო მოწინააღმდეგეეფწკუმა უსაფუძვლო ნირზის, მუშენდა თეცალ მოქმედებას მუთუნ ჯგირობუა ვა მოუღ (ტიტე 3:9; რომაელები 16:17, 18).

•   მოციქულ პეტრექ ელუჩ ქრისტიანეფს, ნამდა ირიათო დეცვესკო მუნეფიშ რწმენა (1 პეტრე 3:15). თიქ თქუ, ნამდა ხშირას რწმენას ჩქინ საქმეეფ უმოსო ამტკიცენს, ვინემ ჩქინ სიტყვეფ. თიქ ჭარჷ: „ჯგირიშ კეთებათ ორაგადე ვემეჩათ უგუნურეფს, მით ურჩქინჯობათ რაგადანა“ (1 პეტრე 2:12—15).