Fikambanan̈a arapivavahan̈any Vavolombelon̈o Jehovah erantany (“fikambanan̈a arapivavahan̈a”) man̈eky fa zonolo manan̈a fiain̈ananany manokan̈a ndreky tsy tokony haparitaka fan̈azavan̈a amezany momba izy. Fikambanan̈a arapivavahan̈a io koa man̈eky fa ilain̈y mifampikoran̈a tsarabe. Ilainy koa mangala raha mombamomba olo araiky, an̈isanizen̈y sekire sasany. Izio man̈ano raha zen̈y baka han̈amezan̈a raha ilainy Vavolombelon̈o Jehovah ndreky han̈anaovan̈a asa soa ndreky asa arapivavahan̈a. Kanefa ndray zen̈y, izio man̈eky fa ilain̈y fo mitana sekire ndreky miaro fan̈azavan̈a azony. (Ohabolana 15:22; 25:9) Ten̈a raha maventy amy fikambanan̈a arapivavahan̈a io mitana sekire zen̈y.​—Ohabolana 20:19.

Maro firenena nan̈aboaka lalàn̈a momba fiarovan̈a fan̈azavan̈a han̈ajan̈a zonolo hanan̈a fiain̈ananany manokan̈a. Kanefa mbala tsendriky nisy lalàn̈a aby io, fikambanan̈a arapivavahan̈a io, tafiditry amy zen̈y birony sampan̈a, efa nan̈aja zonolo hanan̈a fiain̈ananany manokan̈a ndreky efa nahatana sekire edy. Ke karaha raha efa fataony rango zay fo, izio tsy han̈aparitaka fan̈azavan̈a azony zen̈y foeky.

Fiarovan̈a fan̈azavan̈a. Fikambanan̈a arapivavahan̈a io man̈araka toro lalan̈a aby ty izikoa fa mahazo raha mombamomba olo araiky:

1. Iro io karakarain̈y amy fomba mety ndreky aradalàn̈a.

2. Izikoa fa azony fikambanan̈a arapivavahan̈a io raha mombamomba olo araiky, izio ampiasainy aminy asa soa ndreky aminy asa arapivavahan̈a ataony fo.

3. Lan̈iany fan̈azavan̈a farany ndreky marin̈y tsara momba olo araiky fo hajarisin̈y. Izikoa fa misy fan̈itsian̈a, direkty hamboariny.

4. Mandrapatakatrany tanjony tian̈a takarin̈y, akajiny fikambanan̈a arapivavahan̈a io fo fan̈azavan̈a momba olo io.

5. Hajainy arakany tokony ho izy zonolo man̈amia raha mombamomba izy io.

6. Misy fepetra alain̈a hiarovan̈a raha mombamomba olo, amy zen̈y tsy afaka han̈aboely raha zen̈y olo sasany tsy nahazo lalan̈a na tsy man̈araka lalàn̈a. Ordinatera araiky izikoa fa an̈akajian̈a raha mombamomba olo tsiaraikiaraiky tsy maintsy misy kaody sekire, ke lan̈ianolo nahazo lalan̈a fo tafiditry aminy ordinatera aby io. Mifody lakile koa biro misy ordinatera aby io izikoa fa tsy lera fiasan̈a, ke lan̈ianolo nahazo lalan̈a fo mahazo miditry ao.

7. Raha mombamomba olo araiky tsy hafindra amy sampan̈a hafa, izikoa tsy raha mila man̈ano zen̈y fikambanan̈a arapivavahan̈a io han̈anaovany asa soa ndreky asa arapivavahan̈a. Vavolombelon̈o Jehovah jiaby man̈eky zen̈y izikoa fa nan̈eky hanjary Vavolombelon̈o Jehovah.

Toro lalan̈a momba fiarovan̈a fan̈azavan̈a aby io mifan̈araka tsarabe amy raha koran̈iny amy boky Voalamina mba Hanao ny Sitrapon’i Jehovah. Lan̈iany olo efa pitory amy Vavolombelon̈o Jehovah fo mahazo boky io. Izikoa anao mila fan̈ampiny fan̈azavan̈a, zahava boky Voalamina mba Hanao ny Sitrapon’i Jehovah.

Zonolo tsiaraikiaraiky miaro ndreky man̈itsy avio man̈afoan̈a fan̈azavan̈a momba izy, an̈isanizen̈y sekire sasany. Afaka man̈ano zen̈y izy, karaha volan̈iny amy Fifan̈ikian̈a Momba Fampiasan̈a Raha Mombamomba Anao, ambaniny Zonao. Vavolombelon̈o Jehovah efa man̈araka raha koran̈iny ao fo.

Fan̈ikiany Vavolombelon̈o Jehovah Tsy Han̈aboely Fan̈azavan̈a Amezanao ty arehany Vavolombelon̈o Jehovah man̈erantany izikoa fa mikarakara fan̈azavan̈a azony momba olo araiky.