Koran̈iny Baiboly fa tsy raha jiaby manampahin̈ana ambony tany eto handeha andan̈itry an̈y fa olombelon̈o vitsy fo handeha an̈y. (Ohabolana 17:17) Hanjary panjaka ndreky pisoron̈o miaraka amy Jesosy andan̈itry an̈y iro io. (Lioka 22:28-30; Apokalypsy 5:9, 10) Iro tsy an̈isanizio ndraiky hivilomin̈y ke hiain̈y amy Paradisa ambony tany eto.​—Salamo 37:11, 29.

 Baiboly tsiary ndraiky mivolan̈a fa hisy biby na amboa handeha andan̈itry an̈y. Misy antony tsarabe mahavy zen̈y. Iro biby aby io baka tsy hahavita raha takin̈a amy fandihanan̈a an̈y. Iro ‘voakaiky handeha andan̈itry’ zen̈y tsy maintsy efa nianatra momba Zan̈ahary ndreky mila mino izy ndreky man̈araka raha volan̈iny. (Hebreo 3:1; Matio 19:17; Jaona 3:16; 17:3) Olombelon̈o fo niasainy Zan̈ahary nataony han̈anten̈a hiain̈y tsisy farany, fotony efa karaha zen̈y niasany Zan̈ahary iro.​—Genesisy 2:16, 17; 3:22, 23.

 Olo araiky mandeha andan̈itry zen̈y, tsy maintsy maty antsendriky, zay vo hivilomin̈y mandeha an̈y. (1 Korintianina 15:42) Maro olo koran̈iny Baiboly efa navy naty, avio nivilomin̈y. (1 Mpanjaka 17:17-24; 2 Mpanjaka 4:32-37; 13:20, 21; Lioka 7:11-15; 8:41, 42, 49-56; Jaona 11:38-44; Asan’ny Apostoly 9:36-42; 20:7-12) Tsisy biby nata araiky tamindro io fa olombelon̈o fo jiaby.

•  Man̈aia biby koa fa maty?

•  Biby ma mba manota?

•  Mety ma mampijaly biby?

 Baiboly mivolan̈a fa samy “raha manampahin̈a” aby olombelon̈o ndreky biby. Dikanizen̈y amy Zan̈ahary, mira fo fahin̈ananolombelon̈o ndreky niny biby. Fotaka fo niasan̈a iro io, avio iro samy namian̈a ‘fahin̈ana.’​—Genesisy 1:24; 2:7; Nomery 31:28.

 Baiboly koa mivolan̈a fa samy mety maty na biby na olo. (Eksodosy 19:13) Iro io samy tsisy izikoa fa maty, fotony samy manjary fotaka.​—Mpitoriteny 3:19, 20 a.

 Ehe. Dikany manota zen̈y, tsy man̈araka lalàn̈any Zan̈ahary momba ny tsara ndreky ratsy. Mety an̈aty jerinolo an̈y olo manota, na an̈atiny fônany an̈y, na raha io ten̈a hita amy raha ataony foeky. Ke tsy maintsy raha mandiniky fo mahay manapakevitry hanota izy sa tsy hanota. Biby tsy mahay man̈ano karaha zen̈y. (2 Petera 2:12) Biby aby io tsy mahay mifidy fa fiain̈anandro raha mandeha hoazy fo. Avio izikoa iro lany andra, iro efa maty edy, nata iro tsy manota.

 Tsy mety. Zan̈ahary nan̈ambela olo hanjaka amy biby fo fa tsy hampijaly biby. (Genesisy 1:28; Salamo 8:6-8) Valera amy Zan̈ahary iro io, nata iro voron̈o madiniky aby io. (Jona 4:11; Matio 10:29) Ke olo manompo Zan̈ahary tsy imboany mampijaly biby fa irahiny mikarakara tsara iro.​—Eksodosy 23:12; Deoteronomia 25:4; Ohabolana 12:10.