Mila ataony zanaka efa be azo antoko fa voakarakara tsara fo olobendro efa matoe. Baiboly mivolan̈a fa iro tokony ‘hianatra han̈aja fianakavian̈andro ke hamaly fitarimian̈a jiaby nataony olobendro tamindro, fotony Zan̈ahary tia raha karaha zen̈y.’ (1 Timoty 5:4, Fandikan-teny Katolika) Baiboly koa man̈iraka tsaiky han̈aja olobendro nata olobendro io efa matoe. Ke man̈araka didy io iro izikoa ataondro azo antoko tsarabe fa voakarakara tsara olobendro efa matoe io.​—Efesianina 6:2, 3.

 Amy Baiboly ao tsisy toromariky mazava momba fomba tokony hikarakaran̈a raimandreny efa matoe. Fa ao ndraiky misy tantarany panompony Zan̈ahary efa navy nan̈ano karaha zen̈y taloha tan̈y. Ao koa mbala misy torohevitry mety han̈ampy olo mikarakara olo efa matoe.

•  Amy Baiboly ao, akory nikarakarandro olo sasany raimandrenindro efa matoe?

•  Ino aby torohevitry amy Baiboly mety han̈ampy olo mikarakara raimandreny efa matoe?

•  Baiboly ma mivolan̈a tsy maintsy mipetraka miaraka amindro fo olobendro efa matoe io?

 Olo samby amy fomba an̈anaovany izio, arakarakany raha misy.

•   Josefa: Izy nipetraka lavitry Jakoba, babany niteraka izy efa natoe. Nirahiny nifindra tamy tany nisy izy Jakoba, izikoa fa nilamin̈y fiain̈ananany. Josefa niantoko tran̈onany ndreky hanin̈inany, avio niaro izy koa.​—Genesisy 45:9-11; 47:11, 12.

•   Rota: Nifindra tantanindrazan̈any rafozambaviny tan̈y izy, sady niasa mare hikarakaran̈a izy.​—Rota 1:16; 2:2, 17, 18, 23.

•   Jesosy: Talohany nifatesany, Jesosy nan̈iraka olo hikarakara Maria reniny. Mety efa naty vady Maria taminio.​—Jaona 19:26, 27. a

 Fikarakaran̈a olo matoe io ndraikindraiky mandreraka sady mampalemy troko. Fa misy toro lalan̈a amy Baiboly ao man̈ampy atsika hiatriky zen̈y.

•   Hajà raimandreninao.

   Baiboly mivolan̈a: “Hajà babanao ndreky mamanao.”​—Eksodosy 20:12.

   Akory mety han̈arehan̈a toro lalan̈a io? Hajà raimandreninao, ke ambilà iro han̈ano fiain̈ana tiandro. Izikoa mbala mety, ambilà iro fo manapakevitry amy fomba hikarakaran̈a iro. Man̈anaova zay erakany vitanao han̈ampianao iro, amy zen̈y hitandro tsarabe fa anao man̈aja iro.

•   Mifen̈a baka hahay raha an̈atiny fôndro ndreky hamela heloko.

   Baiboly mivolan̈a: “Olo lalintsain̈y tsy man̈ampatra helokonany, sady raisiny voninahitrinany man̈ambela hadisovan̈a.”​—Ohabolana 19:11.

   Akory mety han̈arehan̈a toro lalan̈a io? Izikoa olobenao mivolan̈a raha mampalahelo anao, na karaha tsy tiany zay raha ataonao diniha ty: ‘Mba nan̈ano karakory eky zaho koa tamy plasinany? Maro raha tiany hatao ndreky raha mampiasaloha izy, kanefa izy efa tsy mahavita raha maro eky. Akory zaho koa tamy taon̈onany io?’ Tsy hankasarodraha anao koa mifen̈y hahatakatra raha mahazo izy ndreky hamela heloko.

•   Mangataha torohevitry.

   Baiboly mivolan̈a: “Tsy ho vita raha tian̈a hatao izikoa tsy mangataka hevitry aminolo, fa ho vita ndraiky raha zen̈y izikoa maro pan̈amia hevitry.”​—Ohabolana 15:22.

   Akory mety han̈arehan̈a toro lalan̈a io? Man̈anaova fikarohan̈a momba aretin̈iny raimandreninao io, avio zahava akory mety hikarakaran̈a izy. Zahava koa tsao mba misy fikamban̈ana mety han̈ampy anao hikarakara tsarabe iro. Mikoràn̈a aminolo efa navy nikarakara raimandreny efa matoe. Mila miaraka mivory anaro kibo araiky. Diniha amizio ino aby raha ilainy raimandreninaro, akory ikarakaran̈a izy, avio akory hirasanaro andraikitry io.

•   Mifen̈a baka hanetry ten̈a.

   Baiboly mivolan̈a: “Hendry ... lan̈iany olo manetry ten̈a.”​—Ohabolana 11:2.

   Akory mety han̈arehan̈a toro lalan̈a io? Ikia fa anao koa mba mahay kajo. Ohatra, misy erany fotoan̈anao ndreky angovonao, ke mety tsy arakany niritriretanao izy raha vitanao han̈ampian̈a raimandreninao. Anao koa fa mahatsiaro kajo mare, mivolàn̈a aminolo kibo araiky aminao na aminolo efa zatra mikarakara olo matoe, hitatahy anao.

•   Aza adin̈a mikarakara vatan̈anao.

   Baiboly mivolan̈a: “Tsisy olo tsy tia ain̈inany tompiny zen̈y, fa izy tsy maintsy tia ndreky mamelon̈o izio.”​—Efesianina 5:29.

   Akory mety han̈arehan̈a toro lalan̈a io? Anao mila mikarakara ain̈inao koa, nata anao mikarakara olobenao efa matoe. Izikoa anao manambady, mbala mila mamelon̈o fianakavian̈anao fo anao. Avio mila mihina tsarabe anao ndreky mila mangala kajo koa, avio tokony ho ampy toromaso. (Mpitoriteny 4:6) Ndraikindraiky, tsara izikoa anao mba mangala kajo hely, amy zen̈y anao hanan̈a angovo hikarakaran̈a olobenao io.

 Amy Baiboly ao tsisy toromariky voafaritry tsarabe mivolan̈a zen̈y. Izikoa mbala mety, tsara izikoa antran̈ondro an̈y fo iro raimandreny aby io karakarain̈y io. Izikoa fa mandeha tsarabe fotoan̈a, mety ho tsapandro fo fa voakarakara tsara tsarabe iro, izikoa alefa amy tany mitarimy olo matoe an̈y. Tsara izikoa iro jiaby fianakavian̈a mba miaraka mivory mandiniky raha tokony hatao, amy zen̈y fanapahankevitry raisindro mahatsara iro tsiaraikiaraiky.​—Galatianina 6:4, 5.