Amy Baiboly ao misy taridalan̈a tsara momba fandraisan̈a fanapahankevitry. Izio han̈ampy atsika “hanan̈a fahendrena ndreky ho loso marangitry.” (Ohabolana 4:5) Ndraikindraiky koran̈iny amintsika fanapahankevitry farany tsara. Fa misy koa, torohevitry fo amezany ao fa izin̈y amy zay hindesintsika manapakevitry.

Amy lahatsoratra ty

•  Hevitry han̈ampy anao hangala fanapahankevitry tsara

•  Fanapahankevitry efa nalaiko ma tokony hivoako?

•  Akory izikoa ratsy fanapahankevitry nalaiko kanefa efa tsy mety hivoan̈a eky?

•   Aza mekimeky manapakevitry. Baiboly mivolan̈a: “Olo mitandrin̈y ... mandiniky tsarabe isaka izy han̈ano raha.” (Ohabolana 14:15) Hisy raha maventy tsy ho voadinikinao, izikoa anao mekimeky manapakevitry. Ke mangalà fotoan̈a tsarabe handinihanao ino aby raha mety hifidinao.​—1 Tesalonianina 5:21.

•   Aza indesimpô izikoa fa manapakevitry. Baiboly mampitandrin̈y atsika fa fôntsika io ndraikindraiky tsy mety atokisan̈a. (Ohabolana 28:26; Jeremia 17:9) Ohatra, atsika koa fa meloko, malahelo, malemy troko, avio tsy mahadin̈y raha, na kajo loatra, mety tsy hahavita hangala fanapahankevitry tsara atsika.​—Ohabolana 24:10; 29:22.

•   Mivavaha baka hahazo fahendrena. (Jakoba 1:5) Zan̈ahary tia mamaly vavaka karaha zen̈y. Izy Baba tia zanaka, ke zanany tsy tiany ho voavoa raha karaha io fo. “Jehovah lastio man̈amia fahendrena, avio baka amy vavanany hiboahany fahaizan̈a ndreky fahaizan̈a mandiniky.” a (Ohabolana 2:6) Baka amy Volan̈anany amy Baiboly ao an̈amezany atsika fahendren̈a io.​—2 Timoty 3:16, 17.

•   Man̈anaova fikarohan̈a. Izikoa anao tihahay hanapakevitry, mila fan̈azavan̈a mety atokisan̈a tsarabe anao. Baiboly mivolan̈a: “Olo hendry zen̈y mitandren̈y tsara, ke hahaimaro raha hainy.” (Ohabolana 1:5) Ke aia mety hahitanao fan̈azavan̈a ten̈a ilain̈a ndreky mety atokisan̈a?

   Voanalohany, zahava raha koran̈iny Baiboly momba izio. Amizio ao misy torohevitry ten̈a atokisan̈a, fotony Pamoron̈o atsika io mahay raha ten̈a mahatsara atsika. (Salamo 25:12) Ndraikindraiky Baiboly man̈ambara mazava raha tokony hataontsika, amy raha momba fanapahankevitry sasany. Mety efa misy lalàn̈a na didy momba raha aby io amy zen̈y. (Isaia 48:17, 18) Fa tsy voatery ho hisy raha voafaritry be karaha zen̈y fo amy Baiboly ao, fa toro lalan̈a fo amiany hitaritan̈a atsika. Atsika koa man̈araka toro lalan̈a aby io, hangala fanapahankevitry tsara atsika, sady amy zen̈y koa mba mifan̈araka aminy araiky tiantsika fo. Ke izikoa anao tihizaha andininy han̈ampy anao hanapakevitry, man̈anaova fikarohan̈a amy boky ndreky lahatsoratra momba Baiboly, karaha iro mety zahan̈a amy tranonkala ty ato. b

   Anao mila mizaha loharanonkevitry hafa mety atokisan̈a, ohatra, alohany hivangan̈a raha araiky, sirto izio koa raha lafo mare. Olo hendry anao, izikoa man̈ano fikarohan̈a momba raha tianao hivangain̈a io ndreky pan̈amboatra izio. Ohatra amy zen̈y akory izikoa izio misy robaka na tianao hampody amy pivarotro. Fa izy ndraiky tokony hataonao azo antoko tsarabe fa mifan̈araka aminy araiky ten̈a ilainao in̈y ankitin̈y.

   Baiboly mivolan̈a: “Tsy ho vita raha tian̈a hatao izikoa tsy mangataka hevitry aminolo.” (Ohabolana 15:22) Ke alohany anao hangala fanapahankevitry, mivolàn̈a aminolo araiky mety atokisan̈a. Ohatra, izikoa izio fanapahankevitry momba fitahan̈a, tsara anao mikoran̈a amy dokotera antsendriky. (Matio 9:12) Fa ndraikindraiky koa anao tsara mikoran̈a aminolo efa nanan̈a olan̈a miramira amy ninao io. Fa ndray izy man̈ano zen̈y, tsy maintsy anao fo manapakevitry ndreky mibaby vokatranizio, fa tsy olo ikoran̈anao io.​—Galatianina 6:4, 5.

•   Diniha tsara raha jiaby momba izio. Ataova listy safidy jiaby mety hataonao, izikoa anao fa nahavoavory fan̈azavan̈a. Sorata tombony ndreky fatiantoko isaka safidy mety hataonao. Diniha baka amy zen̈y amy zay ino mety ho vokatrany fanapahankevitrinao io. (Deoteronomia 32:29) Ohatra, ino mety ho vokatranizio aminao, amy fianakavian̈anao ndreky aminolo hafa? (Ohabolana 22:3; Romanina 14:19) Izikoa anao man̈apetraka fan̈ontanian̈a karaha zen̈y ndreky mandiniky toro lalan̈any Baiboly, anao hangala fanapahankevitry tsara ndreky feno fitiavan̈a.

•   Raisa fanapahankevitrinao. Ndraikindraiky atsika misalasala, ke manjary tsy masaky manapakevitry. Fa kanefa atsika tsy manapakevitry, mety ho voa mare na ho tatrany problemo. Safe olo araiky koa tsy mety mangala fanapahankevitry, izy mira olo tsy nanapakevitry fo. Izio ampiran̈iny Baiboly aminolo mitsabo raha. Karaha ty koran̈iny Mpitoriteny 11:4: “Lan̈iany mandiniky tsiko, tsy hamafy edy. Baka io lan̈iany mizaha rondro, tsy hijinja.”

 Aza adin̈a koa fa tsisy fanapahankevitry tsisy tsin̈iny zen̈y foeky. Atsika koa fa man̈ano safidy, io tsy maintsy misy raha afoentsika fo. Avio koa, mety hisy raha tsy hampoizintsika hiboaka. (Mpitoriteny 9:11) Ke ampiasà fan̈azavan̈a farany tsara ampelantan̈ananao, avio fidiana fanapahankevitry ten̈a mety aminao.

 Ndraikindraiky fanapahankevitry sasany mbala mety ivoan̈a. Mety niova raha iain̈anao na koa mety nisy vokany tsy nampoizin̈y fanapahankevitrinao. Ke mety ho tsara izikoa mimpody dinihinao ndraiky ny raha misy, ke zay fanapahankevitry han̈ampy anao hanakatra tanjon̈onao, in̈y ny hataonao.

 Fa ndray izy man̈ano zen̈y, misy fanapahankevitry tsy tokony hivoan̈a foeky. (Salamo 15:4) Ohatra, tiany Zan̈ahary izikoa olo fivadiany tsy mivadiky amy voady nataondro foeky. c (Malakia 2:16; Matio 19:6) Ke izikoa misy raha manahiran̈a an̈atiny tokantran̈onao, aza milefa fa alamìna fo izio.

 Atsika jiaby io samy mety hangala fanapahankevitry ratsy na tsy mety aby. (Jakoba 3:2) Atsika mety hanen̈iny na han̈ameloten̈a foeky. Tsy diso atsika izikoa mahatsapa zen̈y. (Salamo 69:5) Izikoa fihetsehampontsika io misakana atsika tsy han̈ampody raha tsy mety ataontsika in̈y eky, dikanizen̈y misy mahatsara izy fo izio. (Ohabolana 14:9) Ndray izy man̈ano zen̈y, Baiboly man̈ambara fa atsika tsy tokony han̈ameloten̈a loatra, fotony mety halemy troko atsika koa man̈ano zen̈y, ke tsy hisain̈y tsarabe eky. (2 Korintianina 2:7) d Baiboly mivolan̈a fa ‘Jehovah mamindra fô ndreky mahinakinaka.’ (Salamo 103:8-13) Ke izikoa nisy fanapahankevitry ratsy nataonao kanefa efa tsy azonao ivoan̈a, mifen̈a baka hangala fianaran̈a baka amizio, avio ataova zay mety ho vitanao hankatsaran̈a raha misy.